پِلاک دے پربندھ ہیٹھ استاد اختر علی خان دی خدمات دے اعتراف وچ بیٹھک

رپورٹ: سید علی قیصر

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے زیر اہتمام پلاک سٹوڈیو وچ شام چوراسی گھرانے دے نامور سپوت استاد اختر علی خان دی شخصیت تے فن موسیقی دے بارے وچ ایہناں دی خدمات دے اعتراف وچ اک مکالماتی پروگرام دا انعقاد کیتا گیا جس وچ استاد ریاض علی خان ، پرویز پارس، اعجاز علی خان، ہمایوں شوکت بٹ، سجاد بری، ناصر بیراج تے ایہناں دے پتر شان اختر علی ہوراں اظہار خیال کیتا۔ اوہناں نے کہیا کہ شام چوراسی گھرانے دی تاریخ 500 سو سال پرانی اے جس دا آغاز اکبر بادشاہ دے دور وچ ہویا۔

چاند خان تے سورج خان توں موسیقی دا آغاز ہویا سورج خان دی اولاد پاکستان وچ رہائش پذیر ہوئی جنہاں وچ استاد سلامت علی خان، ذاکر علی خان تے اختر علی خان دے ناں قابل ذکر نیں۔
استاد اختر علی خان پڑھے لکھے گریجوایٹ موسیقار سن اوہناں نے موسیقی اُتے تن کتاباں لکھیاں جنہاں وچوں ’’نورنگِ موسیقی‘‘ کافی مقبول ہوئی تے ایس دے کئی ایڈیشن چھپ چکے نیں۔ اختر علی خان بوہت چنگے لے کار تے غزل گائیکی وچ مہارت رکھدے سن ، کلاسیکل موسیقی وچ بوہت مشہور ہوئے۔ سارے گائیکاں نے کجھ کلام ترنم دے نال پیش کیتا۔ موسیقی دی ترویج و ترقی دے حوالے نال کہیا کہ حکومت دی سرپرستی وچ موسیقی دی تعلیم لئی ثقافتی ادارے اپنا بھرپور کردار ادا کرن تاکہ کلاسیکل موسیقی دے فن نوں زندہ رکھیا جا سکے۔ ایس نوں سکھنا اک محنت طلب کم اے جس توں اج دی نوجوان نسل نسدی اے۔

اپنا تبصرہ گھلو