تہانوں ریلیف محسوس کرنا پوے گا

لکھت:سعد اللہ شاہ

تم نے کیسا یہ رابطہ رکھا
نہ ملے ہو نہ فاصلہ رکھا
نہیں چاہا کسی کو تیرے سوا
تو نے ہم کو بھی پارسا رکھا
تسیں یقینا سوال کرو گے کہ پہلے شعر وچ تم تے دوجے وچ تم توں تو کیوں؟ ایہ ساری بے تکلفی اے کہ آپ توں تم تے فیر تم توں تو ہوئے۔ اجے اسیں آئونے آں بجٹ دے سلسلے وچ اپوزیشن لیڈر شہبازشریف دی تقریر ول‘ جو رولے روپے دی نذر ہو گئی۔ حکومتی ارکان لگاتار آوازاں کسدے رہے۔ خیر ایہ تے ہوندا اے کہ جیویں مشاعریاں وچ ہوسنگ مشاعرہ سنن والیاں دا حق اے اوسے طرح اپوزیشن لیڈر دی تقریر تے حکومتی بنچاں دا بنچ وجانا پر دلچسپ پہلو جنہے سانوں حیران کیتا اوہ جناب سپیکر دا انداز یاں اسلوب سی کہ اوہ وی مسلسل ہلڑبازی کرن والیاں نوں منع کری جا رہے سن بہرحال تہاڈے ایہو جمہوری چلن نیں۔ مزے دی گل تے ایہہ وے کہ بزدار صاحب فرما رہے نیں کہ اپوزیشن دا کم تے رولا پانا رہ گیا اے۔ کوئی کڑھدا اے تے کڑھدا رہوے اک دوست نے چنگی نکتہ آفرینی کیتی کہ بجٹ وچ کھنڈ مہنگی کیتی گئی اے۔ اندازا ایہو اے کہ ایہ صرف رعایت لفظی سی۔ کھنڈ دے مہنگا کرن تے حکومت نوں داد تے دینی پوے گی کہ ایہ کھنڈا چٹا زہر اے۔ ایسے طرح سگرٹ دا مہنگا ہونا وی ٹھیک اے تے میک اپ دا مہنگا ہونا وی بہتر اقدام اے کہ صحیح صورتاں سامنے آن گئیاں۔ اک گل تے اسیں اپنے دوست نوں داد ضرور دیاں گے۔
میرے پیارے قارئین! میں اپنی جانکاری وغیرہ تہاڈے نال شیئر کر لینا واں۔ ساڈے مرزا محمدعباس فرماندے نیں کہ افسوس اوہناں لوکاں تے جو پڑھے بناں لکھدے نیں۔ میں پہلے وی لکھ چکیا واں کہ جہڑے لوک بناں پڑھے کالم لکھدے نیں اوہناں دا کالم وی کوئی نہیں پڑھدا۔ انج ای اک پرانا شعر ایسے مناسبت نال یاد آ گیا:
پڑھتے ہیں سبھی مجھ کو سنتے ہی سبھی تجھ کو
میں نے تجھے لکھا ہے تو نے مجھے گایا ہے
بجٹ تے کڑھن نال کجھ نہیں ہووے گا کیوں جے ایہو ممکن سی اینی کاہل وچ یاں فیر اینے پیسیاں وچ۔ ہن ساڈے استاد اپنی تھاں ٹھیک نیں کہ احتجاج کرن نکلے نیں کہ دس فیصد دا وادھا اوہناں دے نال مخول اے۔ ایہ وادھا پنجاہ فیصد ہونا چاہیدا اے۔ انج 55فیصد دا اندازا سی پر ہن تے اوہ توپ دے لائسنس لئی اپلائی کر رہے نیں۔ گل کجھ ایس طرح اے کہ کجھ تھاں حکومت نے پنجی فیصد وادھا تے کیتا سی انج ہن تک سرکاری ملازم زرداری نوں نہیں بھُلے تے سوشل میڈیا تے یاددہانی لئی اوس دور دا تراشا لا رہے نیں کہ سرکاری ملازماں دیاں تنخواہواں وچ پنجاہ فیصد وادھا‘ مینوں بس یاد اے کہ ایہدے تے ن لیگ رنج ہوئی سی کہ زرداری صاحب سرکاری ملازماں دیاں عادتاں وگاڑ رہے نیں۔ سچی گل ایہہ وے کہ خاص طور تے استاد تے ہن تک بھٹو نوں یاد کردے نیں کہ اوہناں نے ایس طبقے نوں اپ لفٹ کیتا سی تے اوہناں نوں بہت زیادہ بوسٹ اپ کیتا سی۔ ایس حوالے نال بلاول وی اوسے طرح سوچدے نیں تے مینوں ڈر اے کہ سندھ والے پنجاہ فیصد وادھا کر دین گے بھٹو لئی تے اک شعر اسیں کہہ سکنے آں:
کیا بتائوں تمہیں کیسا ہے بچھڑنے والا
ایک جھونکا ہے جو خوشبو سی اڑا جاتا ہے
اسیں بھاویں موجودہ بجٹ تے کسے حد تک خوش ای آں کہ تسیں ایہو پڑھ چکے ہوو گے چیل دے گھونسلے وچ ماس کتھے۔ بھائی ایہدے تے شکرگزار کر لوو پر اک گل تسلسل نال ڈرا رہی اے تے ایہدا تذکرہ محترم سراج الحق نے کیتا اے کہ بجلی گیس تے پٹرول بمب تیار نیں۔ اللہ نہ کرے کہ اوہناں دی گل سچی ہووے۔ پٹرول تے تھوڑی جہی جھلک وکھائی وی دے گئی اے انج ساڈا تے دل وی دھڑکدا اے کہ ساڈی خوشی نوں یوٹرن کر دینا حکومت دے کھبے ہتھ دا کھیڈ اے۔ جاندے جاندے میں دس دیواں کہ تنوری روٹی اٹھ توں دس روپیے بڑی خاموشی نال کر دتی گئی۔ یعنی دس روٹیاں تے 20 روپیے وادھا۔ ہن واری اے خمیری روٹی تے نان دی۔ آٹے دے بارے تے تہانوں پتہ لگ گیا ہووے گا کہ وارننگ دے نال نال ایہ مہنگا ہو چکیا اے۔ حکومت بس ایناں ای کہہ سکے گی کہ جناب ایہ مافیا نیں اسیں کیہ کریئے۔ ہن حکومت نوں کوئی کہہ سکدا اے کہ تسیں ایہ کرو کہ مستعفی ہو جائو؟ ہن کتھوں امیرمحمدخان آوے جو ایہناں منہ زور تاجراں نوں کن پھڑاوے۔ میں صرف منافع خور تے ذخیرہ اندوز تاجراں دی گل کر رہیا واں۔ انج ایہ بڑی سلاہن جوگ گل اے کہ بجٹ دے پاس کروان لئی عثمان بزدار نے ق لیگ والیاں نوں راضی کر لیا۔ ایہ وکھری گل اے کہ اوہناں دے کول راضی ہون توں علاوہ کوئی دوجا راہ وی نہیں سی۔ اوہ آئے دن انج ای رنج ہو کے بہہ جاندے نیں حالاں کہ اوہناں تے خان صاحب دے بڑے احسانات نیں۔ اوہناں تے نیب دے مقدمے اچانک ختم کر دتے گئے سن۔ انج تے نیب دا بن دا ای نہیں سی کہ اینے پرانے مقدمے فیر کھولدے پر کجھ نہ کجھ دسنا تے ہوندا اے جتانا تے ہوندا اے۔ جہانگیرترین تے اوہدے حواریاں دا ڈرامہ وی ختم ہو گیا۔ اوہناں دے مطالبے وی من لئے گئے۔ میرے ورگے بندے نوں محظوظ ہون لئی یاں لطف اٹھان لئی ایہدے وچ بہت سامان سی۔ اداریاں ولوں ایہ کہہ دینا کہ اوہناں نوں جہانگیرترین ہن مطلوب ای نہیں کمال دی پیش رفت سی۔ ایہ وی دلچسپ کہ حکومت نے اوہناں نوں کلین چٹ بالکل وی نہیں دتی۔ ہو سکدا اے کہ ایس چٹ تے کجھ نہ کجھ لکھیا ہویا ہووے۔ ایہ وڈے لوکاں دے کیس تے وڈے لوکاں دیاں گلاں نیں۔ کجھ میرے ورگے ناسمجھ شہبازشریف تے حمزہ شہباز دی رہائی دے خلاف رٹ کر دیندے نیں پر کسے نوں کیہ پتہ ایہ گنجائش اوہناں دا حق اے۔ شہزاداحمد دا شعر:
اپنا حق شہزاد چھینیں گے مانگیں گے نہیں
رحم کی طالب نہیں بے چارگی جیسی بھی ہے