پِلاک لوک سٹوڈیو وچ موسیقی دے عالمی دن دے حوالے نال بیٹھکاں

رپورٹ: حافظ ممتاز ملک

پنجاب انسٹیٹیوٹ آف لینگوئج، آرٹ اینڈ کلچر (پِلاک) دے زیر اہتمام پلاک لوک سٹوڈیو وچ موسیقی دے عالمی دن دے حوالے نال دوتقریبات دا انعقاد ہویا۔ پہلی مکالماتی نشست وچ پرویز پارس تے پروفیسر محمد جواد نے موسیقی دے عالمی دن اُتے گل بات کردے ہوئے کہیا کہ موسیقی دا علم اک انج دا علم اے جس نوں گائے بغیر سکھیا نہیں جا سکدا۔ اوہناں نے موسیقی دی پرانی روایت اُتے بھرپور گفتگو کیتی۔ اوہناں نے موجودہ موسیقی دے رحجانات اُتے گل کردے ہوئے کہیا کہ اج دے نوجوان گلوکاراں نوں کلاسیکل موسیقی نوں ضرور سکھنا چاہیدا اے تے موسیقی دی اوہ صنفاں جیہڑیاں نظر انداز کر دتیاں گئیاں نیں۔ ایہناں اصناف اُتے وی توجہ دینی چاہیدی اے جنہاں وچ غز ل تے کافی خصوصی طور اُتے شامل نیں۔
دوجی نشست وچ معروف گلوکارہ فرح لال دے نال اک مکالماتی پروگرام دا انعقاد کیتا گیا۔ ایس پروگرام وچ گلوکارہ فرح لال، گلوکار حبیب علی تے گلوکار توقیر حیدر نے میڈم نور جہاں، ریشماں، نصرت فتح علی خاں تے نزاکت علی دے گانے سنا کے محفل وچ رنگ بھر دتے۔ پلاک دی ڈائریکٹر جنرل ڈاکٹر صغرا صدف نے سارے گلوکاراں نال موسیقی دے عالمی دن دے حوالے نال بھرپور گل بات کیتی تے فرح لال نال اوہناںدی ذاتی زندگی تے ایہناں دے موسیقی دے شوق دے حوالے نال دلچسپ سوال کیتے۔