پیغام تے ذمہ داری
تحریرحمیداللہ بھٹی
بدھ دے دیہاڑ جوہر ٹائون لہور وچ ہون والے بم دھماکے نے ملک نوں ہلا کے رکھ دتا اے ایس دھماکے نال ملک دشمناں نے پیغام دتا اے کہ اوہ کمزور ضرور ہوئے نیں پر ہجے ایہناں دا کُلی طور اُتے خاتمہ نہں ہویا نیز ملک دا کوئی حصہ وی ایہناں دے ناپاک عزائم توں محفوظ نہیں اوہ ملک دے ہر حصے وچ کاروائی اُتے قادر نیں ۔ کے پی کے تے بلوچستان وچ تے عرصہ توں غیر ملکی سرگرم نیں جنہاں نوں ناکام بنان لئی سکیورٹی ادارے کاروائیاں کردے رہندے نیں پر ہن لگدا اے کہ فرائض دے حوالے نال چوکس نہیں قدرے آرام پسند ہو گئے نیں لہور دھماکے نال ثابت ہو گیا اے کہ دہشت گرد ہر ویلے ملک دے سارے علاقیاں وچ جانی و مالی نقصان دی پوزیشن وچ نیں جس لئی لازم اے کہ سکیورٹی ادارے دیگر مصروفیات ترک کرن تے فرائض اُتے توجہ دین ملک دشمن عناصر دی سرکوبی اُتے مامور اداریاں لئی مزید غفلت دی گنجائش نہیں کیوں جے معمولی جہی نرمی، سستی یا غفلت کسے وڈے حادثے دا پیش خیمہ بن سکدی اے۔
حافظ سعید عرصہ ہویا عملی طور اُتے غیر متحرک نیں بلکہ نظر بندی وچ دن لنگھ رہے نیں پر جدوں اوہ متحرک سن تے کشمیریاں لئی کافی کم کیتا ایسے بنا اُتے بھارت دی ناپسندیدہ ترین شخصیات وچ شمار ہوندے نیں لہور دھماکے ایہناں دے گھر دے اینا نیڑے ہویا اے کہ تن شہداء دے نال شدید زخماں وچ سکیورٹی اُتے مامور کانسٹیبل وی شامل اے ایس لئی حافظ سعید نوں نقصان اپڑان دا امکان رد نہیں کیتا جا سکدا ایس لئی دھماکے وچ بین الاقوامی خفیہ ایجنسیاں دا ہتھ ہو سکدا اے ۔ چاہے تاحال کسے تنظیم نے ذمہ داری قبول نہیں کیتی پر سوال ایہہ اے کہ اک نظر بند بندا جیہڑا آزادانہ نقل و حمل توں محروم اے ایس نال کسے نوں کیہ خطرہ ہو سکدا اے۔ ماحالہ قوی خیال اے کہ جس ملک دے اوہ ناپسندیدہ نیں اوہ ایہناں نوں خوفزدہ کرن لئی طاقت دا مظاہرہ کر سکدا اے ایس پہلو نوں دھیان وچ رکھ کے ایجنسیاں نوں تفتیش دا دائرہ کار وسیع کرنا چاہیدا اے ۔
لہور بم دھماکہ انج دے حالات وچ ہویا اے جدوں بھارت نوں کشمیر وچ سخت مزاحمت دا ساہمنا اے تے مودی دی پوری کوشش اے کہ دنیا نوں یقین دلوایا جائے کہ کشمیری تبدیل شدہ حالات نوں قبول کر چکے نیں پر ایس حوالے نال ہون والا ہر ڈرامہ فلاپ ہو رہیا اے۔ کٹھ پتلی قیادت وی کشمیر دی سابقہ حیثیت بحال کرن دا مطالبہ کرن لگی اے۔ جمعرات نوں نئی دہلی وچ ہون والے ساڑھے تن گھنٹے دے اجلاس وچ انج دے سیاسی رہنما وی حکومت اُتے برسدے رہے جنہاں دی سیاست دا دارومدار ای بھارتی قیادت دی چاکری اُتے اے کانگریس تے ممتابیزجی جہے اپوزیشن رہنمائواں ولوں وی شدید تنقید ہو رہی اے عمر عبداللہ جہیا نسلی کشمیری غدار سپریم کورٹ جان دا اعلان کرن لگیا اے حالانکہ مودی نے سارے کشمیری قیادت نوں دعوت دین دی بجائے صرف بھارت نواز رہنمائواں نوں ای بلایا سی فیر وی کسے سیاسی رہنما نے بھارتی حکومت دے یکطرفہ فیصلے دی تائید نہیں کیتی جس دے جواب وچ جنونی مودی کہنا پیا کہ پہلے ریاستی اسمبلی دے انتخاب ہو جان دین بعد وچ مناسب ویلے اُتے ریاستی حیثیت بحال کر دیواں گا پاکستان ولوں وی کشمیر دے حوالے نال اپنائے موقف وچ کوئی لچک نہیں آئی بلکہ سفارتی تعلقات محدود کرن دے بعد مسلسل کشمیریاں نوں حق خودارادیت دین دا مطالبہ کیتا جا رہیا اے ایس دبائو نوں گھٹ کرن لئی بھارت دا دہشت گردانہ کاروائیاں دی سرپرستی بعید از امکان نہیں۔
نیٹو انخلا دے بعد کابل حکومت ختم ہون دے آثار نظر آن لگے نیں طالبان کابل دے نواحی علاقیاں تیکر اپڑ چکے نیں تے معافی دا اعلان ہون دے بعد سرکاری فوج دے ہتھیار پان دا عمل تیز ہو چکیا اے۔ صدر جوبائیڈن نال مشاورت لئی اشرف غنی تے عبداللہ عبداللہ دونویں امریکہ اپڑ چکے نیں ایسے دوران امریکہ نے اعلان کیتا اے کہ طالبان دا بزور طاقت کنٹرول تسلیم نہیں کراں گے پاکستان نے مطالبے دے باوجود امریکہ نوں اڈے نہیں دتے جس دی بنا اُتے دونواں ملکاں وچ سفارتی سطح اُتے قدرے تنائو اے۔ ایس توں علاوہ پیش نظر رکھن والی گل ایہہ وے کہ امریکہ و بھارت اج کل اک دوجے اُتے ریشہ ختمی نیں تے عالمی معاملات اُتے دونواں وچ مکمل یگانگت پائی جاندی اے۔ کشمیریاں دے دبائو نوں گھٹ کرن تے اڈے نہ دین اُتے غصے دے اظہار لئی دونواں ملکاں دی مشترکہ کاروائی دا امکان خارج ازامکان نہیں ۔ علاقائی تنازعات تے چیلنجز نوں ذہن وچ رکھدے ہوئے ادارے تحقیقات دا دائرہ وسیع کرن تے اصل ذمہ داران تیکر اپڑیا جا سکدا اے۔ بلوچستان تے کے پی کے دی مقامی آبادی وچ غیر ملکی حاشیہ برداراں دے خلاف فضا ہموار ہون لگی اے جے ساڈی ایجنسیاں ٹھوس لائحہ عمل بنا کے کم کرن تے انج دے واقعے دا تدارک آسان ہو سکدا اے پر لوڑ ایس امر دی اے کہ فرائض ول دھیان رکھیے تے غیر متعلقہ مصروفیات وچ الجھ دا ویلا ضائع نہ کیتا جائے۔
پاکستان وچ سیاسی استحکام نہیں ہتھ نچاندے تے گلے پھاڑ کے چیخ دے چلاندے حکومتی و اپوزیشن رہنمائواں دا طرز عمل کسے طور ذمہ داری نہیں کہہ سکدے بلکہ سیاسی قوتاں وچ ڈیڈ لاک جہی کیفیت اے انج دے حالات غیر ملکی قوتاں نوں کھل کے کھیڈن دی دعوت دیندے نیں پہلے ای لڑ جھگڑ کے ادھا ملک گنوا چکے مزید انج دے کسے صدمے دے متحمل نہیں ہو سکدے جے حکومت تے اپوزیشن مل بہہ کے ذمہ داریاں دا تعین کر لین تے انتقامی رویے تے تنقید برائے تنقید دا سلسلہ ترک کر دتا جائے تے دشمن قوتاں دی حوصلہ شکنی ہوئے گی تے ملک وچ سیاسی استحکام آ سکدا اے پر ایس لئی سب نوں انا دے خول توں نکلنا ہوئے گا لہور دھماکے دا پیغام بڑا واضح اے کہ دشمن توں کوئی علاقہ محفوظ نہیں بلکہ اوہ اہر تھاں وار کر سکدا اے تے ملک دی سیاسی قیادت متفقہ لائحہ عمل لئی اک کیوں نہیں ہو سکدی؟
لہور بم دھماکے دے ماسٹر مائنڈ پیٹرپال ڈیوڈ سنے سارے سہولت کاراں نوں گرفتار کرن دا دعویٰ کردے ہوئے تفتیشی ٹیماں نے را ولوں فنڈنگ دا انکشاف کیتا اے بابو صابو ناکے اُتے تعینات سکیورٹی اہلکار ولوں بارود نال بھری گڈی نوں لنگھن دی اجازت دین دی پاداش وچ شامل تفتیش کیتا جا چکیا اے پر تحقیقات وچ کوئی وی پہلو تشنہ نہیں رہنا چاہیدا تے ظاہری دے نال پوشیدہ ذمہ داران دے خلاف وی کاروائی ہونی چاہیدی اے بھارت تے امریکہ گٹھ جوڑ وچ کسے نوں ابہام نہیں پر ساڈے سکیورٹی اداریاں نوں وی دفاعی کاروائیاں دے علاوہ وی اپنی استعداد دا مظاہرہ کرنا چاہیدا اے۔ بھارتی جاسوس گلبھوشن سنے کئی غیر ملکی حاشیہ بردار جیہڑے دہشت گردانہ کاروائیاں دی سہولت کاری وچ پیش پیش نیں ایہناں دی سرکوبی وچ کسے قسم دی نرمی یا رحم دلی دا مظاہرہ کرن دی لوڑ نہیں نتیجہ خیز کاروائی حالات دا تقاضہ اے جس نال پہلو تہی عوامی اعتماد وچ کمی دا باعث بن سکدی اے تے سیاسی قیادت تے ادارے عوامی اعتماد نوں برقرار رکھن لئی مصلحت پسندی دا دامن جھٹک دین جے دشمن قوتاں ہر علاقے وچ کاروائی کرن دی طاقت رکھن دا پیغام دے سکدیاں نیں تے سانوں وی سرکوبی کرن دی قوت رکھن دا پیغام اپڑان دی ذمہ داری پوری کرنی چاہیدی اے۔
