‘‘ہمت مرداں مددِ خدا’’

شکیل امجد صادق

شیر تے شارک دوویں پیشہ ور شکاری نیں پر شیرسمندر وچ شکار نہیں کر سکدا تے شارک خشکی تے شکار نہیں کر سکدی۔ شیر نوں سمندر وچ شکار نہ کرن دی وجہ نال نکارہ نہیں کیتا جا سکدا تے شارک نوں جنگل وچ شکار نہ کرن دی وجہ نال نکارہ نہیں کہیا جا سکدا۔ دوہاں دی اپنی اپنی حد اے جتھے اوہ بہترین نیں۔ جے گلاب دی خشبو ٹماٹر توں چنگی اے تے ایہدا ایہ مطلب نہیں کہ اوہنوں کھانا تیار کرن وچ وی استعمال کیتا جا سکدا اے اک دا موازنہ دوجے نال نہ کرو۔
تہاڈی اپنی اک طاقت اے اوہنوں لبھو تے اوہدے مطابق اپنے آپ نوں تیار کرو۔ ڈاکٹر حافظ فداحسین دا شمار وی اجہے لوکاں وچ ہوندا اے جہناں نے دیارپرخار وچ وی اپنا مقام بنان وچ پوری لگن‘ تندہی تے بھج نس نوں معرض التوا وچ رکھے بناں اپنی منزل نوں استقامت بخشی۔ تسیں بھاویں بلوچ والا موضع جلال پور کھاکھی تحصیل شجاع آباد ضلع ملتان وچ پیدا ہوئے۔ آپ نے گورنمنٹ کمپری ہنسو ہائی سکول ملتان توں میٹرک تے گورنمنٹ ایمرسن کالج ملتان توں انٹر تے بی اے دا امتحان پاس کیتا۔ آپ نے بہائوالدین ذکریا یونیورسٹی ملتان توں ماسٹر دی ڈگری حاصل کیتی۔ آپ نے علامہ اقبال اوپن یونیورسٹی اسلام آباد توں ایم فل تے پی ایچ ڈی دیاں ڈگریاں حاصل کیتیاں۔ آپ 1993ء وچ ایجوکیشن بورڈ ملتان وچ بطور اسسٹنٹ بھرتی ہوئے تے 1997ء وچ ڈائریکٹ سلیکشن دے راہیں اسسٹنٹ کنٹرولر تقرر ہوئے۔ آپ 2004ء وچ ڈپٹی کنٹرولر بنے تے 2017ء وچ آپ دی پروموشن 19ویں گریڈ وچ ہو گئی۔ 13جون 2018ء آپ نوں کنٹرولر امتحانات بورڈ آف انٹرمیڈیٹ اینڈ سکینڈری ایجوکیشن ساہیوال تعینات کر دتا گیا۔ آپ بورڈ ہذا دے پہلے کنٹرولر سن جو باقاعدہ ایجوکیشن بورڈ سروس دا وسیع تجربہ رکھدے سن تے زرخیز دے مالک سن۔ جدوں آپ نے چارج سانبھیا تے اوس ویلے میٹرک تے انٹر سالانہ امتحان 2013ء دیاں سندیاں دا اجراء ہو رہیا سی دوجے امیدوار نوں او بی ٹی سی سند لئی اپلائی کرنا پے رہیا سی۔ مجوزہ ارجنٹ فیس جمع کران دے باوجود طالب علم نوں بورڈ ہذا دے کافی چکر لانے پے رہے سن۔ ایس حوالے نال ہر طالب علم‘ والدین پریشانی دے گھیرے وچ سن۔ آپ نے سنداں دی پرنٹنگ دا کم سویرے اٹھ توں رات اٹھ تک کرا کے کائونٹر فائلز دی پڑتال‘ سنداں دی چیکنگ تے پڑتال تے سنداں دے اجرا تک دے سارے مرحلے نوں اپ ڈیٹ کرکے دن رات دی محنت نال طالب علماں نوں اوہناں دے بوہے تے سنداں دی ترسیل ممکن بنا کے اک خوش اسلوب‘ ایماندار‘ فرض شناس تے محب وطن شہری ہون دا فریضہ چنگے ڈھنگ نال نبھایا۔ 2019ء تک میٹرک تے ضمنی امتحان دے 278195 تے انٹرمیڈیٹ دے سالانہ 149044 طالب علماں نوں اوہناں دیاں سنداں اوہناں دے گھریلو پتے تے گھل چکے نیں۔ آپ نے امتحان دوران ملیاں شکایتاں نوں یومیہ بنیاداں تے نبیڑیا تے ساہیوال بورڈ امیگریشن دا اجرا کیتا۔ آپ دی زیرنگرانی سہولت مرکز دا قیام عمل وچ لیاندا گیا۔ آپ نے انسپکشن سیل دے قیام دے نال امتحانی سنٹراں وچ سی سی ٹی وی کیمریاں دی تنصیب نوں وی ممکن بنایا۔ آپ نے حد درجہ بوٹی مافیا دا خاتمہ کیتا تے امتحانی نظام نوں شفاف بنان وچ اپنی پیشہ ورانہ صلاحیتاں دا بھرواں استعمال کیتا۔ آپ نے بورڈ ہذا دی منظورشدہ جملہ اسامیاں دی تکمیل وچ بھرواں کردار ادا کرن دے نال دوجیاں برانچاں دے ایس او پیز دی تیاری تے مکمل عملدرآمد کروا کے بہتری دی صورت پیدا کیتی تے باقی نظام نوں ٹھیک سمت عطا کیتی۔ آپ دے نیڑے چنگے تے کامیاب منتظم دے کول خوداعتمادی تے باصلاحیت بندیاں دی ٹیم ہونا ضروری اے تے مسئلیاں دے حل لئی بہتر قوت فیصلہ‘ ویلے دی پابندی‘ ضبط نفس انصاف پسندی‘ لگن‘ ہمدردی‘ کم نال محبت‘ مثبت رویہ‘ دوجیاں تے اعتماد‘ صبروتحمل‘ قوت فیصلہ‘ مستقل مزاجی‘ مشاورت‘ مثبت رویہ‘ عفوودرگزر‘ کارکناں نال محبت‘ عزت نفس دا خیال‘ حکمت عملی‘ دوجیاں نوں نال لے کے چلن دی عادت‘ متعلقہ ادارے دے قنوناں دی جانکاری‘ چیلنج نوں قبول کرنا‘ خدمت خلق دا جذبہ تے غیرمتزلزل جرأت ورگی اعلیٰ صفات دا ہونا ضروری اے۔ آپ دے نیڑے پہلا قدم چکنا ضروری اے تے کامیابی دی کنجی حرکت دے بناں ممکن نہیں تے منزل نوں حاصل کرن لئی تیز تر حرکت دی لوڑ اے تے ایہ فطرت دا قنون وی اے۔
کامیابی دی منزل تک اپڑن لئی ضروری اے کہ انسان خیالی دنیا چوں نکل کے حقیقت ول ٹرن تے ارادیاں نوں عملی جامہ پہنان ول ٹردا رہوے۔ آپ دی حیاتی وچ حقیقت نوں ترجمانی حاصل اے تے آپ حقیقت دی راہ تے چلن نوں ترجیح دیندے نیں۔ آپ نوں بورڈ دے جملہ افسر میاں مختاراحمد آڈٹ آفیسر، جناب علی بہادر سابق کمشنر وچیئرمین بورڈ ہذا،ڈاکٹر فرخ مسعود سابق کمشنر و چیئرمین بورڈ ہذا،جناب عارف انور بلوچ سابق کمشنر و چیئرمین بورڈ ہذا،جناب پروفیسر رانا عبدالشکور ڈائریکٹر کالجز و چیئرمین بورڈ ہذا،پروفیسر ڈاکٹر رابعہ اختر سیکرٹری بورڈ ہذا اور موجودہ چیئرمین بورڈ آف انٹرمیڈیٹ اینڈ سیکنڈری ایجوکیشن ساہیوال اسم بامسمی حافظ محمد شفیق ورگے فرض شناس لوکاں نال کم کرن دا موقع ملیا جو بلاشبہ آپ دی آن والی پیشہ ورانہ زندگی وچ اک خوبصورت تجربہ ثابت ہووے گا۔ آپ 13جون 2021ء نوں اپنا سالہ دورانیہ بڑی دیانتداری نال مکمل کر چکے نیں تے کسے دوجی تھاں تقرر دے اڈیک وچ نیں۔ بورڈ ہمیشہ اوہناں دی چنگی خدمات نوں یاد رکھے گا۔ آپ نے ثابت کر دتا اے کہ ہمت مرداں مدد خدا‘ اللہ تہانوں اپنی حفظ و امان وچ رکھے۔٭٭