استعمال کرنا حکمران طبقیاں دا فن اے

آصف عنایت

ساڈے کول جلعساز بھرپور اداکاری دے نال ہر شے دی فروخت وچ مصروف نیں

پچھلے دناں میرے اک عزیز خواجہ طاہر نے اک مسیج گھلیا کہ 21 مئی نوں یوم یکجہتی فلسطین مظاہرے ہوئے پر جماعت اسلامی نے وکھرے، جماعت اہل حدیث ساجد میر گروپ وکھرے، اہل حدیث مشتاق چیمہ گروپ وکھرے، تحریک خاکسار وکھرے، اہل سنت مجددی گروپ وکھرے اہل سنت مولوی صادق گروپ نے وکھرے وکھرے مظاہرے کیوں کیتے۔جد کہ مظاہریاں دی تاریخ وی اک ویلے تے عنوان وی اک سی یکجہتی نو ں یکجا کر لیندے تے کیا ای چنگا ہوندا۔ ایہہ کنج یکجہتی اے کہ آپس وچ یکجہتی نہیں تے فلسطین اُتے احسان ہو رہیا اے۔
میرے خیال نال معمولی معمولی جلسیاں تے ریلیاں اصل وچ ذاتی تشہیر سی ایہناں دا فلسطین نال کیہ لینا دینا سی ایہہ غریب فروشی، نظریات فروشی، مسائل فروشی، درد فروشی حتیٰ کہ کشف و تصوف فروشی ساڈے کول نفح بخش کاروبار نیں۔
ساڈے کول جلعساز بھرپور اداکاری دے نال ہر شے دی فروخت وچ مصروف نیں۔ ہن ساڈے وزیراعظم نوں ای ویکھ لوئو ایہناں دی سیاست ویکھ لوئو جیہڑے کہن نوں سیاست دان تے نہیں، ایہناں نوں سیاست نہیں آندی پر ایہہ پہلے سیاست دان نیں جنہاں دے ہر فعل دا دفاع، مبہم بیان دا دفاع ایہناں دے فالوورز نے کیتا۔ میڈیا توں لے کے افراد تیکر جو جس دی حیثیت اے عمران خان صاحب نے بھرپور استعمال کیتا ہر اک نوں پوڑھی دے زینہ دے طور استعمال کر کے اُتے چلدے گئے۔
قائداعظم نے اک قراقلی ٹوپی تحفہ وچ نہ لئی پر ساڈے کول تے شہ خانیاں اُتے مقدمے بنے بوہت چنگی گل پر ساڈے وزیراعظم نوں شاید والاں دی پیوندکاری تے پیراں تیکر سارے بنیادی تے ضروریات زندگی لوک تحفہ کر جاندے نیں۔
عمران خان سیاست دان نہیں تے ایہہ حال اے کہ حمید گل دے نال سیاست وچ انٹری ماردے نیں تے عبدالستار ایدھی نوں مجبور کردے نیں کہ وزیراعظم محترمہ بے نظیر شہید دے خلاف ایہناں دا ساتھ دیو نہیں تے ہور اوہ کجھ عرصہ لئی ملک چھڈ جاندے نیں۔ میڈیا دی طاقت ، نوجواناں دے اضطراب نوں استعمال کیتا۔ خواتین نوں سحر وچ لیا گیا اے۔
جلسے کنسرٹ دا روپ اختیار کر گئے ملکی وسائل دے غلط ترین اعداد و شمار دتے تے ملک وچ سارے سابقہ حکمراناں دی سوائے (مارشل لاء) ساریاں نوں چور ڈاکو قرار دتا۔
وزیراعظم نوں پارلیمنٹ دے ساہمنے دھرنے وچ جیہڑے القابات، لغویات بالن اوہ ہن تاریخ دا حصہ نیں جس نے قومی سیاست اخلاقیات اُتے اوہ اثرات چھڈے کہ اخلاقی جرم جرم نہ رہیا۔ میں تے کہنا واں جویں دی بیورو کریسی تے حکمران ٹولہ مسلط اے اخلاقی جرائم، انسانی سمگلنگ، ناجائز قبضہ ، مفت بھری، بھتہ خوری، ذخیرہ اندوزی دے مجرم تے جرائم پروری دے الزام وچ جیلاں وچ بند حوالاتیاں تے قیدیاں نوں رہا کر دینا چاہیدا اے۔
ایہناں دا قصور صرف ایہہ وے کہ اوہ حکومت وچ نہیں اونج حکومت دا پارلیمنٹ اُتے وی ناجائز قبضہ ای اے جیہڑا 19 بلز رولز بلڈوز کر کے پاس کیتے گئے۔ بہرحال عمران دی سیاست استعمال کرنا اے۔ 10 ڈائوننگ سٹریٹ، انڈونیشیا، سنگا پور، امریکہ ، چائنہ، ترکی کوئی ملک ہوئے گا جس دے نظام حکومت نوں اپنے ملک اپنان دی گل نہ کیتی ہوئے تے فیر ویکھیا کہ لوک آقا کریم ﷺ دے ناں اُتے سب کجھ قربان کر دیندے نیں تے ریاست مدینہ دے لفظ نوں وی استعمال کرن توں دریغ نہ کیتا۔ ہن کارکردگی صفر ہوئی تے بیرون ملک پاکستانیاں دے ووٹاں ول چل پئے ۔ عمران خان دے بیرون ملک اوہ لوک حامی نیں جنہاں نے کدی پاکستان آنا اے نہ ایتھے دفن ہونا اے البتہ جنہاں دے رشتے داراں دے گھلے ہوئے پیسے اُتے تکیہ کردے نیں اوہ خوب جان دے نیں کہ وطن عزیز دے ہر بندے دی واحد تمنا زندہ رہنا بن گئی اے۔
عمران خان جان دے نیں کہ ایتھے بنیاد پرست عناصر جے سیاست وچ نیں یا نہیں ایہناں دا بوہت شدید گہرا اثر اے۔ ہر مکتبہ فکر دی گل کر لئے ایس دی ڈنڈا فورس دہشت دی علامت اے۔ عمران خان اپنا حلقہ انتخاب ایس رائٹ ونگ نوں بنانا چاہندے نیں ایہہ اپنی حکومت وچ آئندہ انتخابات دی تیاری لئی صرف نعرے محفوظ کر رہے نیں کہ میں NRO نہ دتا میں اڈے نہ دتے۔ عمران خان نے اقتدار دی خاطر افراد توں لے کے نظریات میڈیا توں اداریاں، ہر اک نوں استعمال کیتا تے فیر پلٹ کے نہ ویکھیا۔ ہن ایف آئی اے اُتے تکیہ اے ایف آئی اے انج دا ادارہ اے کہ ملزم تے ملزم مدعی وی خوار ہو جائے۔ میاں نواز شریف اپنے دوجے دور وچ ایس محکمہ نوں ای ختم کر کے ایس دے ملازمین نوں سرپلس پول تے دوجے اداریاں وچ گھلن لگے سن پر چودھری محمد شریف دی درخواست اُتے محکمہ نوں توڑن توں باز رہے۔ ساڈے کول محکمہ جات دی کارکردگی پبلک سرونٹس ہون دی بجائے عوام نوں ایذا رسانی دے حوالے نال جانی جاندی اے۔
بقول گوجرانوالہ دے ممتاز، دانشور شاعر تے معروف قانون دان حافظ انجم سعید دے جے کابینہ دا اجلاس ہوئے تے انج ای لگدا اے جویں ن لیگ پیپلز پارٹی یا ق لیگ دی حکومت دا دور تے کابینہ دا اجلاس اے۔ گویا تبدیلی بس اینی اے شوکت عزیز دی تھاں عمران خان آ گئے۔ ایہناں ای دے ارسطوئواں توں فائدہ چک رہے نیں۔ اپنا ارسطو تے پہلے 100 دن وچ چت ہو گیاسی۔ اصل وچ انسان کسے نوں دھوکہ دے کے کجھ ویلا لنگھا لیند ااے پر جدوں اوہ دھوکے وچ ایس حد تیکر اگے چلا جائے کہ خود فریبی وچ مبتلا ہو جائے تے فیر قدرت دا قانون ایس دا انکشاف ضرور کردا اے پر اک منطقی انجام دے نال۔ سو جس شے دا کوئی ماہر ہوندا اے، شوقین ہوندا اے اوہ ای ایس دے انجام دا باعث بن دی اے۔ شہنشاہ ہمایوں ستاریاں دی چال تے فلکیات دا ماہر سی ستارہ ویکھدا ہویا چھت توں ڈگیا، شیر دی قوت گینڈے تے ہاتھی توں زیادہ نہیں پر ایس دا دھاڑنا ایس دی طاقت اے ایہو دھاڑنا ایس نوں شکاری دی گولی دے ساہمنے لے آندا اے ۔ سپیرے زیادہ تر سپاں دے کٹن نال ای مردے نیں۔ عمران خان استعمال کرن دے ماہر نیں ہن ایہہ استعمال ہون گے۔ امریکہ نوں اڈے نہ دینا خوش آئند اے کہ ایہہ ساڈے لوکاں دی سرشت وچ شامل اے کہ امریکا نوں چنگا نہیں سمجھدے ایس وچ شدت بھٹو صاحب دی پھانسی دے بعد آئی پر نال ای عذر پیش کر دتا کہ اڈے جے دتے تے دہشت گرد سانوں نشانہ بنان گے گویا دوجے طریقے نال مدد منگ لئی کہ افغانستان توں انخلا دے بعد سانوں تحفظ چاہیدا اے۔ افغانیاں نے تے ناں لیے بغیر انتباہ کر دتا سی۔ گوانڈھی ملکاں نے جے امریکا نوں اڈے دتے تے سخت ترین مشکل صورت حال نال دوچار ہون گے گویا اڈے مسئلہ نہیں دہشت گردی توں تحفظ مسئلہ اے۔ بھٹو ہر کوئی بن دا اے پر 5 جولائی 1977 توں 4 اپریل تیکر عرصہ تے گڑھی خدا بخش دا قبرستان واپسی دی راہ وکھاندا اے جیہڑے لوک سمجھدے نیں عمران خان بنیادی طور اُتے سیاست دان نہیں اوہ احمق نیں خان صاحب بنیادی طور اُتے سیاستدان ای نیں ایہہ رستے وچ کرکٹ تے اک زینہ سی جس اُتے پیر رکھ کے ہسپتال تے فیر نواز شریف توں زمین تے 50 کروڑ روپئے لئے بدلے وچ گالیاں تے انتقام، ڈاکوئواں چوراں دی حکومتاں دے نیب زداں نوں کابینہ دا حصہ بنایا۔ جنہاں نوں نازی کہندے سن ایہناں نوں منایا۔
ایہناں دی سیاست تاریخ وچ اک خوفناک باپ دے طور اُتے یاد رکھی جائے گی۔ کابینہ وچ شامل رہن دا معیار مخالفین نوں گالی گلوچ کرنا ای ایس لئی اے کہ اوہ واپس اپنی سیاسی جماعت وچ نہ جا سکن مبادہ پی ٹی آئی واپس تانگے دی سواریاں والی پارٹی نہ بن جائے۔ استعمال کرنا حکمران طبقیاں دی سیاست اینہیں طرز زندگی وی اے۔ ہن سیاست دی شطرنج اُتے ویکھنے آں خان صاحب مزید استعمال کردے نیں یا استعمال ہوندے نیں۔ تسیں اندازہ کرو کہ جیہڑے سیاست دان نہیں اوہ استعمال کرن دا فن کس قدر جان دا اے فیر مذہبی، سماجی، سیاست کرن والے نجات دہندے ڈکٹیٹر تے میاں صاحب، زرداری صاحب دا اندازہ لانا مشکل نہیں ایتھے ہر کوئی انج ای دوجے نوں استعمال کردا اے ایہو ایتھے دا آئین تے قانون اے۔ ایہو دنیا دا وی دستور اے۔ بین الاقوامی قوتاں اپنے بغل بچہ ملکاں تے بغل بچہ ملک ایہناں نوں استعمال کردے نیں۔