بھارت وچ ظلم و جبر دے سائے وچ اگلے انتخابات دیاںتیاریاں

بی جے پی حکومت دے غیر قانونی اقدامات تے دہشت گردی نال عالمی امن خطریاںنال دوچار

محبوب احمد

پوری دنیا دے ملکاں نوں مقبوضہ کشمیر وچ ودھدی ہوئی محرومیاں تے مودی دی جارحیت تے درندگی اُتے تشویش تے ہے پر ایس دے حل لئی اج تیکر کوئی موثر کردار ادا نہیں کیتا جا سکیا بس محض نہتے کشمیریاں اُتے ڈھائے جان والے مظالم دے خلاف اظہار مذمت اُتے ای اکتفا کیتا جا رہیا اے۔ اک پاسے عالمی حمایت دی عدم موجودگی نال اج تیکر ہون والے ’’امن مذاکرات ‘‘ نتیجہ خیز ثابت نہیں ہو سکے تے دوجے پاسے کشمیری نوجوان تے سیاستدان کشمیر اُتے ’’سٹیٹس کو‘‘ تسلیم کرن توں انکاری نیں کیوں جے اقوام عالم نے مسئلہ کشمیر دے سلسلے وچ ہمیشہ ای سرد مہری دا مظاہرہ کیتا اے۔ بھارت نے مقبوضہ کشمیر اُتے اپنی گرفت برقرار رکھن لئی ہمیشہ ای کٹھ پتلی حکومتاں نوں سپورٹ کیتا اے تے ہن وزیراعظم نریندر مودی نے مقبوضہ کشمیر وچ انتخابات لئی حلقیاں دی از سر نو تشکیل دے منصوبے اُتے اعتماد وچ لین لئی بھارت نواز کشمیری رہنمائواں اُتے مشتمل جیہڑے ’’اے پی سی ‘‘ بلائی اے ایس دا بنیادی مقصد اسمبلی وچ مسلمان ارکان دی بالادستی نوں ختم کرنا اے۔ کشمیر دی خصوصی حیثیت دے خاتمے نال ایہنوں 2 مرکزی علاقیاں وچ تقسیم کرن دے بعد ہن ایہہ قیاس آرائی وی کیتی جا رہی اے کہ مرکز وچ بھارتیہ جنتا پارٹی دی مودی حکومت جموں و کشمیر وچ اسمبلی انتخابات دیاں تیاریاں وچ مصروف اے جس دی تصدیق جموں و کشمیر دی اپنی پارٹی دی ترجمان تے پی ڈی پی دی سربراہ محبوبہ مفتی نے وی کیتی اے۔ ضلعی ترقیاتی کونسل (ڈی ڈی سی ) دے انتخابات دے بعد توقع کیتی جا رہی سی کہ اسمبلی انتخابات دی تیاری جلدی ای شروع ہو جائے گی پر ایس وچ کنہا ویلا لگے گا ایس متعلق کجھ واضح نہیں سی پر ہن ایہہ خیال ظاہر کیتا جا رہیا اے کہ مرکزی حکومت حلقہ بندیاں طے کرن توں پہلے فریقین دے نال گل بات کرن نوں ترجیح دے رہی اے بظاہر ویکھیا جائے تے ایہہ سیاسی تعطل نوں توڑن دی اک سازش اے کیوں جے ایس نال بین الاقوامی سطح اُتے ایہہ پیغام دین دی کوشش کیتی جا رہی اے کہ کشمیر وچ حالات معمول اُتے نیں۔ ایس وچ وی کوئی دورائے نہیں نیں کہ مودی حکومت اک وار فیر اپنی جارحیت، درندگی دی اک نویں تاریخ رقم کرن لئی مذموم ہتھکنڈے استعمال کر رہی اے لہٰذا ہن اک وار فیر غیر قانونی تے یکطرفہ اقدامات دے ذریعے کشمیردی آبادی نوں تقسیم تے تبدیل کرن دی تیاریاں عروج اُتے نیں۔ یاد رہوے کہ 1953 وچ شیخ عبداللہ دی گرفتاری دے بعد بخشی غلام محمد دی حکومت قائم کیتی گئی ایس طرح 1990 وچ گورنر راج لا کے جگ موہن ملہوترا نوں اقتدار دتا گیا جس نال ریاستی جبر دے اک کالے دور دا آغاز ہویا ایس دور وچ وی بالکل اج دی طرح جنسی تشدد، تضحیک، گالم گلوچ، مشتبہ نوجواناں دی پکڑ دھکڑ تے پرہجوم مقامات اُتے اندھا دھند گولیاں برسانا معمول سی۔ بی جے پی حکومت ایس موقف اُتے ہٹ دھرمی دا مظاہرہ وکھاندے ہوئے کہ کشمیر ایس دا داخلی معاملہ اے تے پاکستان نوں ایس اُتے بولن دا کوئی حق نہیں پچھلے 22 مہینے توں کھلے عام انسانی حقوق دی پامالی کر رہیاے حق خودارادیت نوں پامال کردے ہوئے کشمیر توں باہر دے لوکاں نوں جعلی رہائشی سرٹیفکیٹس دتے جا رہے نیں۔ یاد رہوے کہ 5 اگست 2019 نوں ریاست دی خصوصی حیثیت والے آرٹیکل 370 دے خاتمے دے بعد 3 سابق ورائے اعلیٰ سنے متعدد رہنما جنہاں نوں نظر بند کر دتا گیا سی ایہناں نوں ہولی ہولی رہا کرنا وی ایسے سلسلے دی اک کڑی اے۔
مسئلہ کشمیر اُتے بھارت دی ہٹ دھرمی اک پاسے پاکستان دا ہمیشہ توں موقف رہیا اے کہ ایہنوں اقوام متحدہ دی قرارداداں دے تحت استصواب رائے توں طے کیتا جانیا اے۔5 اگست 2019 دے یکطرفہ بھارتی اقدام نے بی جے پی دی فرقہ پرست پالیسیاں دا پول کھول کے رکھ دتا اے۔ پاکستان تے ایس دے عوام دا دو ٹوک موقف اے کہ بھارت دے غیر قانونی قبضے والے کشمیر دی خصوصی حیثیت وچ تبدیلی فوری واپس لئی جائے جنہاں دناں کشمیری قیادت دے نال مودی سرکار مذاکرات دا ڈھونگ رچ رہی سی پاکستان دی ایوان بالا وچ کشمیریاں نوں حق خودارادیت دین دے حق وچ متفقہ قرار دادا منظور کیتی گئی جس وچ بھارت توں کشمیر اُتے ناجائز تسلط دے خاتمے دا مطالبہ کیتا گیا۔متفقہ قرار داد وچ مطالبہ کیتا گیا کہ بھارت کشمیریاں نوں سلامتی کونسل دی قرار داداں دی روشنی وچ حق خودارادیت دیوے تے کشمیر دی آئینی حیثیت نوں 5 اگست 2019ء توں پہلے دی حالت اُتے بحال کرے۔ قرار داد دے مطابق بھارت زیر حراست سارے سیاسی قیدی فوری رہا کرے۔ ہندوستان مقبوضہ کشمیر وچ اقلیت نوں اکثریت وچ بدلن دیاں کوششاں فوری چھڈے۔ ظلم و جبر دے خلاف کشمیریاں دی باہمت جدوجہد تے قربانیاں نوں سلام پیش کرنے آں۔ سینٹ وچ اپوزیشن نال تعلق رکھن والے ارکان دا اپنی حکومت نال ایہہ مطالبہ رہیا اے کہ امریکہ دے افغانستان توں انخلا دے بعد خطے وچ پیدا ہون والی صورت حال اُتے ایوان بالا نوں اعتماد وچ لیا جائے ۔ قرار داد وچ واضح کیتا گیا اے پاکستان دا نیو کلیئر پروگرام ختم نہیں کیتا جا سکدا جد کہ قائد ایوان سینیٹر شہزاد وسیم نے کہیا اے کہ پاکستان کشمیر دے مسئلے اُتے ایس ویلے تیکر بھارت نال گل نہیں کرے گا جدوں تیکر اوہ 5 اگست دی حیثیت اُتے واپس ایس نوں بحال نہیں کردا۔ ایس موقعے اُتے اپوزیشن لیڈر یوسف رضا گیلانی نے کہیا کہ امریکہ دے افغانستان توں انخلا دے بعد جیہڑی صورتحال پیدا ہوئے گی ایس اُتے سانوں ایہناں گیمراسیشن وچ دسیا جائے رضا ربانی نے کہیا کہ جدوں بھارتی تسلط ایس علاقے وچ رہوے گا جدوں تیکر امریکہ بھارت نوں خطے دا پولیس مین بنان دی کوشش کرے گا ایس ویلے تیکر ایس خطے دے اندر نیو کلیئر ڈیٹرنٹ دی لوڑ رہوے گی۔ رضا ربانی نے کہیا کہ پاکستان دا نیو کلیئر پروگرام ختم نہیں کیتا جا سکدا۔ ایس قرار داد نال ایہہ گل بالکل عیاں اے بھارت امریکی سرپرستی وچ خطے وچ طاقت دے توازن نوں وگاڑن دی سازش کر رہیا اے۔
ایسے تناظر وچ پورے بھارت وچ جدوں اقلیتاں نوں کچلن دی کوشش جاری اے۔ کشمیر اُتے تاریخ دا بدترین ظلم و جبر جاری اے۔ خطہ کشمیر جنہوں جنت نظیر وی کہیا جاندا اے بدقسمتی نال ایس دے سارے تر حسن تے خوبصورتی نوں بی جے پی حکومت دے غیر اعلانیہ کرفیو تے فوج کشی نے گہنا دتا اے۔ بھارتی فوجی ہر قانون توں ماوراء دن دیہاڑے۔ ’’سرچ آپریشن‘‘ دا لیبل لا کے چادر چار دیواری دا تقدس پامال کردے ہوئے مال و اسباب لُٹن وچ مصروف نیں، ہزاراں کشمیری نوجوان بچے خواین تے بڈھے ٹارچر سیلاں وچ حق خودارادیت منگن دی سزا بھگت رہے نیں۔ ریاستی آئین و قانون معطل تے انسانی حقوق دی پامالی عروج اُتے ہون نال مقبوضہ وادی میدان جنگ دا نقشہ پیش کر رہی اے۔ بھارتی فوج نے کشمیر نوں اک وڈے جیل خانے وچ تبدیل کر رکھیا اے جتھے بنیادی سہولتاں دی فراہمی بند کر کے ظلم و ستم دے پہاڑ توڑے جا رہے نیں۔ عید ہوئے یا کوئی اسلامی یا ریاستی تہوارایہناں موقعیاں اُتے بھارتی ظلم و ستم دا ودھ جانا معمول دی گل اے۔ پیلٹ گناں دے استعمال نال سینکڑے بندیاں دی بینائی ختم کر دتی گئی، گولہ باری نال سکولاں دیاں عمارتاں تباہ ہو گئیاں ، مودی سرکار دی درندہ صفت فوج کشمیر وچ خواتین دی آبرو ریزی وچ مصروف اے۔ نریندر مودی دے انتہاء پسندانہ تے دہشت گردانہ عزائم نے خطے دے امن نوں داء اُتے لا رکھیا اے۔ کشمیر وچ امن نہیں ، ریاست وچ تباہی بربادی تے قتل و غارت گری دا ذمہ دار بھارت اے جیہڑا کہ کشمیریاں دے مطالبات نوں تسلیم کرن دے بجائے ظلم و جبر دا سلسلہ جاری رکھے ہوئے اے۔ مقبوضہ کشمیر وچ آزادی اظہار رائے اُتے قدغن لانا بھارت دا مشغلہ بن چکیا اے۔ نہتے کشمیریاں تے ایل او سی اُتے ’’بنئیے‘‘ ولوں ہٹ دھرمی دا جیہڑا مظاہرہ کیتا جا رہیا اے اوہ ہن کسے توں لُکیا چھپیا نہیں رہیا پر ایتھے ایہہ خوش آئند امر اے کہ جویں جویں ویلا تیزی نال لنگھ رہیا اے اونج ای مودی دا مکروہ چہرہ دنیا دے ساہمنے بے نقاب ہو رہیا اے ایہو وجہ اے کہ اج عالمی برادری مسئلہ کشمیر دے حل لئی پاکستان ولوں پیش کیتے گئے موقف دی تائید کر رہی اے۔ مقبوضہ کشمیر دے باشندے ہن ایہہ گل بخوبی سمجھدے نیں کہ ایہناں دی سرزمین اُتے غیر ملکی افواج قابض نیں ، سرچ آپریشنز ، کرفیو، انٹرنیٹ دی مسلسل بندش، تفتیش تے مقامی بندیاں دی ان گنت موتاں تے گمشدگیاں پہلے توں کدھرے ودھ چکی اے۔ ایمنسٹی انٹرنیشنل دی 1992 دی ای رپورٹ دا جے جائزہ لیا جائے تے ایہہ گل واضح ہو جاندی اے کہ بھارتی افواج جنوری 1990 توں وسیع پیمانے اُتے انسانی حقوق دی خلاف ورزیاں جاری رکھے ہوئے اے۔ پیرا ملٹری فورسز بارڈر سکیورٹی فورسز تے سینٹرل ، ریزرو پولیس، گھیرائو تے تلاشی دے آپریشنز مسلسل جاری رکھے ہوئے اے جنہاں وچ انسانی حقوق دا کوئی پاس نہیں رکھیا جاندا۔ کومبنگ آپریشنز وچ تے آرمی کیمپاں ، تفتیشی مراکز، پولیس سٹیشنز، تے جیلاں وچ تشدد معمول دی کاروائی اے ، جنسی زیادتیاں وی عام نیں۔ مقبوضہ کشمیر دی آبادی نوں حراساں کرن لئی اجتماعی جنسی زیادتیاں دے واقعے وی مسلسل ہو رہے نیں۔
کشمیر دی خون آلود جھیلاں،بلدے چنار، بلکدے بچے، چیخدی عورتاں، گمنام قبراں، سنسان بازار، لاشاں نال بھریاں گلیاں تے ویران بازار انسانی حقوق دے علمبرداراں دا منہ چڑا رہے نیں۔ بھارت مقبوضہ وادی وچ اپنے جنگی جنون تے جارحیت لئی ریکارڈ قائم کر رہیا اے۔ ایل او سی اُتے ہون والی اشتعال انگیری تے مقبوضہ کشمیر وچ آئے دن نوجواناں نوں جعلی مقابلیاں وچ شہید کرن دے ودھدے واقعے لمحہ فکریہ توں گھٹ نہیں پر ایتھے ایہہ قابل غور امر اے کہ نریندر مودی دی تنگ نظری تے کوتاہی اندیشی پاروں بھارت اج تیکر کشمیریاں دی ہمدردیاں حاصل کرن وچ کامیاب نہیں ہو سکیا بلکہ نہتے شہریاں اُتے روا رکھے جان والے مظالم دی وجہ نال ایس دا تشخص پوری دنیا وچ بُری طرح مجروح ہویا اے۔ پاکستان نے اقوام متحدہ سنے ہر عالمی فورم اُتے لائن آف کنٹرول تے مقبوضہ کشمیر وچ بھارتی فوجاں دی ننگی جارحیت تے وبربریت نوں بھرپور طریقے نال اجاگر کردے ہوئے امن مذاکرات دی دوعت دتی پر بی جے پی حکومت نے نہ صرف اپنی ہٹ دھرمی دا مظاہرہ کیتا بلکہ ایس توں ہمیشہ راہ فرار اختیار کردے ہوئے اپنے ناجائز قبضے نوں طوالت بخشی، ایتھے ایہہ وی خوش آئند امر اے کہ سالہا سال دی جدوجہد تے عظیم قربانیاں دے بعد اج کشمیری بھارت تے دنیا نوں ایہہ باور کران وچ کامیاب ہو گئے نیں کہ اوہ ایس مسئلے دے بنیادی فریق نیں تے ایہناں دی مرضی دے بغیر مسئلے دا کوئی وی پائیدار حل ممکن نہیں۔ مقبوضہ کشمیر جنہوں بھارتی آئین دے آرٹیکل 370 دے تحت خصوصی درجہ حاصل اے۔ 3 حصیاں وچ بٹیا ہویا اے جنہاں دی علاقائی، مذہبی، معاشی تے سیاسی تفریق حالیہ ورھیاں وچ ابھر کے ساہمنے آئی اے۔ کشمیر دا متنازعہ علاقہ برصغیر دے شمال مغرب وچ چین تے افغانستان دے نال واقع اے۔ایہہ علاقہ 5 حصیاں وچ منقسم اے 2 علاقے پاکستان دے انتظامی کنٹرول وچ نیں جنہاں وچ گلگت بلتستان تے آزاد جموں و کشمیر دا علاقہ شامل نیں جد کہ باقی 3 حصیاں اُتے بھارت دی اجارہ داری اے دونواں حصیاں نوں کنٹرول لائن جدا کردی اے جنہوں فائر بندی دی لائن وی کہیا جاندا اے۔ پاکستان تے بھارت دونواں دا دعویٰ اے کہ ایس لائن دے دونویں پاسے دے علاقے ایہناں دی ملکیت نیں۔ جموں دے 6 ضلعیاں وچوں 3 وچ مسلماناں دی اکثریت اے۔ لداخ دا پہاڑی علاقہ تیجے نمبر اُتے وے جس وچ زیادہ تر آبادی بدھ مت دے پیروکاراں تے مسلماناں دی اے۔جد کہ کارگل وچ مسلمان اکثریت وچ نیں۔ لداخ وچ شیعہ مکتبہ فکر وی کافی تعداد وچ آباد اے۔ ایتھے ایہہ قابل غور امر اے کہ مقبوضہ کشمیر دے تنے خطیاں وچوں آزادی دی تحریک دا زور وادی وچ اے جنہاں نے ہمیشہ ای نئی دہلی دے کنٹرول نوں چیلنج کیتا اے۔ایس وچ کوئی شک و شبے دی گنجائش نہیں کہ مسئلہ کشمیر دا حل صرف تے صرف اقوام متحدہ دی سلامتی کونسل دی قرار داداں اُتے عمل کرن توں نکلے گا لہٰذا ایتھے ایہہ گل ذہن نشین رہوے کہ جے بھارت مستقبل وچ کشمیر وچ مزید یکطرفہ تبدیلیاں لیاندا اے تے ایہہ سلامتی کونسل تے چوتھے جنیوا کنونشن سنے بین الاقوامی قوانین دی خلاف ورزی ہوئے گی تاں عالمی برادری نوں ہن چاہیدا اے کہ اوہ بھارتی ظلم و ستم نوں فوری بند کروا کے مقبوضہ کشمیر دے دیرینہ مسئلے دے حل لئی اقوام متحدہ دی قرار داداں اُتے عملدرآمد یقینی بنان اُتے زور دیوے تاکہ قیام امن لئی دتی جان والی قربانیاں نوں ضائع ہون توں بچایا جا سکے۔