کیہ گالھاں پنجاب دا کلچر اے؟

تنویر ظہور

مسلم لیگ ن دے رہنما‘ ممبر قومی اسمبلی شیخ روحیل اصغر نے آکھیا اے کہ گالھاں پنجاب دا کلچر اے۔ غصے وچ انسان کجھ وی کہہ دیندا اے ایہ لغو گل مسلم لیگ ن دے رہنما نے کیتی پر مسلم لیگ ن دی ترجمان مریم اورنگزیب نے ایہ گل حکمران ارکان نال منسوب کر دتی۔ اوہناں دا کہنا سی کہ عمران خان نے کرائے دے ترجمان دا اجلاس سد کے شہبازشریف تے اپوزیشن نوں گالھاں کڈھن دا حکم دتا۔ حکومتی ارکان نے بے بس ہو کے گالھاں کڈھیاں۔ شیخ روحیل اصغر نے جوش خطابت وچ گالھاں نوں پنجاب دا کلچر کہہ دتا۔ ایس گل دا اعتراف وی کیتا کہ انسان غصے وچ کجھ وی کہہ دیندا اے۔ایسے لئی کہیا جاندا اے کہ اپنے غصے تے قابو رکھو۔ صبرو تحمل توں کم لوو‘ انتقام توں پرہیز کرو تے معاف کر دین دا رویہ اپنائو۔ دوجیاں دا برا نہ چاہو‘ اپنے اندر ایثار و قربانی دا جذبہ پیدا کرو تے گمراہی توں بچو۔ سرزنش کرن توں گریز کرو‘ کہیا جاندا اے کہ جاہل نوں غصہ آوے تے اوہ چیکدا اے۔ عقلمند نوں غصہ آ جاوے تے اوہ اوہناں شیواں بارے اپنا منصوبہ بناندا اے جو اوہدے کم لئی ضروری ہوندیاں نیں۔ ساڈے وچ کوئی بندا برا نہیں صرف جذباتی نیں۔ جوش وچ آئوندے نیں تے ہوش توں بیگانہ ہو جاندے نیں جدوں ہوش آئوندا اے تے اپنے بیگانے ہو جاندے نیں۔
گالھاں نوں پنجاب دی ثقافت قرار دینا حماقت اے۔ پنجاب دی ثقافت پیار‘ محبت تے رواداری اے۔ ایہو پیغام سانوں صوفیاء کرام نے دتا۔ حضرت بابا فرید رواداری تے انسان دوستی دے پرچارک سن۔ ایہ اوہناں دی رواداری‘ انسان دوستی تے ہمدردی دا ای نتیجہ سی کہ جوق در جوق لوک اوہناں دے کول آئوندے‘ اوہناں دے کردار و گفتار توں متاثر ہو کے اسلام قبول کردے تے بھائی چارے دا درس حاصل کردے۔ رواداری دا مقصد ایس دنیا وچ جتھے متضاد تصورات رائج نیں اوتھے آپسی اخوت و برداشت دے جذبے نوں اجاگر کرنا اے تاں جے امن دے ماحول وچ انسانی تکریم دا تصور عملی جامہ پہنا سکے تے مخلوق خدا ہر قسم دے خوف تے پریشانیاں توں آزاد ہو کے اپنے خالق دے احسانات و انعامات توں بہرہ ور ہو سکے۔ پنجاب دی ثقافت وچ جتھے پیار‘ محبت تے رواداری اے اوسے طرح پنجاب دی زبان پنجابی وچ وی مٹھاس تے پیار محبت پایا جاندا اے۔
ڈاکٹر عارفہ صبح خان نے اپنے اک کالم وچ لکھیا پنجاب توں علاوہ سارے صوبیاں وچ اوس صوبے دی علاقائی زباناں سکول وچ لازمی مضمون ہوندیاں نیں۔ پشتو‘ سندھی‘ بلوچی‘ کشمیری‘ سرائیکی‘ بروہی وغیرہ۔ صرف پنجاب واحد صوبہ اے جو ہر طرح دے تعصبات‘ لسانی حسد توں پاک اے۔
جتھوں تک پنجاب دا تعلق اے پنجاب وچ وی پنجابی اختیاری مضمون دے طور تے لاگو اے۔ پنجابی وچ ایم اے تے پی ایچ ڈی دی تعلیم دتی جاندی اے۔ رائے منصب علی خان (مرحوم) قومی اسمبلی دے ممبر تے وزیرمملکت رہے۔ اوہناں دا تعلق ننکانہ صاحب نال سی۔ اوہ اخبار وچ کالم وی لکھدے رہے۔ اک کالم وچ اوہناں نے لکھیا جتھوں تک پنجابی زبان دا تعلق اے ایہ اہل پنجاب دی مادری زبان اے۔ ایہدی اپنی اک اہمیت و حیثیت‘ ایس زبان دی ترقی و ترویج لئی کم ہونا چاہیدا اے رائے منصب علی خان‘ ایوب خان دور وچ پہلی واری مغربی پاکستان اسمبلی دے رکن منتخب ہوئے تے اوہناں نے پنجابی زبان وچ حلف چکیا۔ اخبارات نے ایہدی بڑی کوریج کیتی۔ ترک ڈرامہ سیریل راہ عشق دا اک ڈائیلاگ اے۔ دوجے لوکاں وانگوں اسیں اپنی زبان توں شرمندہ نہیں۔ اسیں اپنی ترک زبان ای بولنے آں۔ اپنی زبان اپنی ہوندی اے۔ معروف ادیب نجیب محفوظ نے اک تھاں لکھیا اپنے ہم زبان دے نال کسے دوجی زبان وچ گل بات کرنا پڑھا لکھا ہون دی نشانی نہیں سگوں ایہ اپنی ای زبان دے ثقافتی تے جمالیاتی پہلو توں محرومی دی دلیل اے۔ آخر وچ استاد دامن دے دو شعر:
مینوں کئیاں نے آکھیا، کئی واری
توں لینا پنجابی دا ناں چھڈ دے
مینوں انج لگدا، لوکی آکھدے نیں
او پترا! اپنی توں ماں چھڈ دے