پِلاک ولوں ثمرہ عرفان دے اسلامی کیلی گرافی اُتے مشتمل فن پاریاں دی نمائش
نمائش دا افتتاح نامور مصور، خطاط، ادیب، ڈیزائنر تے مصور اقبال اسلم کمال نے کیتا
رپورٹ: آفاق بٹ
پنجاب انسٹیٹیوٹ آف لینگویج آرٹ اینڈ کلچر، محکمہ اطلاعات وثقافت پنجاب دے زیر اہتمام پنجاب آرٹ گیلری وچ ثمرہ عرفان دے اسلامی کیلی گرافی اُتے مشتمل فن پاریاں دی نمائش منعقد ہوئی۔
ایہناں فن پاریاں وچ قرآنی آیتاں بشمول سورۃ فاتحہ ، آیت الکرسی، آیت کریمہ، حروف مقطعات، اسماء الحسنیٰ، اسماء النبیﷺ تے اہل بیت اطہارؓ دے ناواں اُتے مشتمل فن پارے نمائش لئی پیش کیتے گئے۔ ایہہ نمائش یکم جولائی 2021 تیکر جاری رہوے گی۔نمائش دا افتتاح نامور مصور، خطاط، ادیب، ڈیزائنر تے مصور اقبال اسلم کمال نے کیتا تے ثمرہ عرفان دے قرآنی آیتاں اُتے مشتمل فن پاریاں دی بھرپور تعریف کیتی۔
ایس موقعے اُتے ڈاکٹر صغرا صدف ڈائریکٹر جنرل پلاک نے کہیا کہ پنجاب آرٹ گیلری وچ نوجوان آرٹسٹاں دی حوصلہ افزائی تے ایہناں دے فن نوں اجاگر کرن لئی بغیر کسے معاوضے دے نمائشاں منعقد کیتیاں جاندیاں نیں تاکہ نوجواناں نوں اپنے فن پاریاں دی نمائش لئی بہترین پلیٹ فارم دستیاب ہوئے تے اوہ ترقی دی منزلاں آسانی نال طے کر کے ملک و قوم دا ناں پوری دنیا وچ روشن کرن۔ معزز مہماناں نوں پھُلاں دے تحفے وی پیش کیتے گئے۔
