چوہدری پرویز الٰہی تے پنجاب
اوہناں دیاں پنجاب واسطے خدمات ہمیشہ یاد رکھیاں جان گِیاں
عتیق انور راجہ
چوہدری پرویز الٰہی تے وزیراعلیٰ پنجاب سردار عثمان بزدار دی ملاقات دے دوران چوہدری پرویز الٰہی ولوں ایہہ بیان ساہمنے آیا کہ موجودہ حالات وچ انتشار دی سیاست دی کوئی گنجائش نہیں۔ چوہدری صاحب دے ایس بیان وچ جتھے پنجاب سرکار لئی راحت دا پیغام سی تے اوتھے ایہناں لوکاں دے چہریاں اُتے مایوسی چھا گئی ہوئے گی جیہڑے اک عرصے توں مسلم لیگ ق نوں ہمنوا بنا کے پنجاب دی بساط الٹ دین دے خواہاں نیں پر وضع دار تے جی دار چوہدری برادران اپنے الفاظ دی پاسداری کردے ہوئے حکومتی کشتی نوں پار لگان دا کم کیتے جا رہے نیں۔ جے کارکردگی دی ای گل کیتی جائے تے پنجاب حکومت دی کارکردگی باقی صوبیاں توں کسے طرح وی گھٹ نظر نہیں آندی 4۔ وزیراعلیٰ عثمان بزدار اپنے دھیمے لہجے تے صلح جو رویے نال سوالات تے تندوتیز بیانات نوں مخالفین ول ای موڑدے چلے جا رہے نیں۔ ایہہ خوشی دی گل اے کہ ایس وار پنجاب سرکار نے 560 ارب روپئے دے ریکارڈ ترقیاتی پروگرامز دا اعلان کیتا اے۔ ہن جنہی جلدی ممکن ہوئے پنجاب سرکار نوں چاہیدا اے کہ ایس اعلان کردہ بجٹ نوں عوامی فلاح اُتے لانا وی شروع کر دین۔ اسیں دو سال پہلے وی لکھیا سی کہ جناب عثمان بزدار نوں وزارت اعلیٰ توں ہٹان دی خواہش رکھن والے مایوس رہن گے۔ لکھن والے بولن والے تے کہن والے جو مرضی کہن پر حقیقت ایہو اے کہ سردار عثمان بزدار بخوبی اپنا کردار نبھاندے چلے جا رہے نیں۔ ہن تے اک روٹین جہی بن گئی اے کہ اپوزیشن ہر بجٹ دے بعد تماشا لاندی نظر آندی اے۔ بجٹ دی کاپیاں پھاڑ دتیاں جاندیاں نیں تے کدی نازیبا الفاظ دا کھلے عام استعمال کر کے اپنے خراب رویاں دی عکاس کیتی جاندی اے۔ انج جدوں اک وار فیر اپوزیشن بجٹ اُتے گل کردے ہوئے سیخ پا ہو رہی اے۔ چوہدری پرویز الٰہی دا حکومت دی دو ٹوک حمایت دا اعلان تے وزیراعلیٰ پنجاب عثمان بزدار دا بیان کہ اسیں اتحادی جماعت نوں ہر موقعے اُتے نال لے کے چل رہے آں۔ اسیں اک پیج اُتے آں تے اک رہاں گے تے اک ہو کے اسیں سیاسی تماشا لان دی ہر سازش نوں ناکام بنایا اے۔ بوہت اہمیت دا حامل لگدا اے۔ اپوزیشن جماعتاں نے صرف سازشاں کیتیاں ایس لئی ایہناں نوں مسلسل ناکامی دا ساہمنا کرنا پیا اے۔ چودھری پرویز الٰہی نے کہیا کہ تحریک انصاف دے اتحادی آں۔ سازشاں کرن والے پچھے رہ گئے تے ساڈا اتحاد اگے ودھ رہیا اے۔
پاکستانی سیاست وچ چوہدری برادران آف گجرات نے بوہت سارے ادوار ویکھے نیں۔ بوہت ساریاں حکومتاں دے نال رہندے ہوئے نہ صرف اپنی شناخت برقرار رکھی اے بلکہ چوہدری پرویز الٰہی نے سیاست وچ پنجاب دی اعلیٰ روایات، وضع داری تے سیاسی سوجھ بوجھ نال اپنا قد بلند توں بلند تر کیتا اے۔ آپ نے ہمیشہ پاک وطن دا جھنڈا بلند رکھن دی گل کیتی اے جدوں جدوں ایہناں نوں پنجاب یا مرکز وچ موقع ملیا تے اوہناں نے اپنی بہترین صلاحیتاں نوں بروئے کار لیاندے ہوئے ملکی سیاست وچ اہم کردار ادا کیتا اے۔
چوہدری پرویز الٰہی نے ہمیشہ ملکی سیاست وچ اک اہم کردار ادا کیتا اے پر پنجاب لئی ایہناں دے کیتے گئے کم ہمیشہ یاد رکھے جان گے۔ جدوں اوہ وزیراعلیٰ پنجاب سن تے اوہناں نے پنجابی زبان و ادب نوں فروغ دین لئی لہور وچ پنجاب انسٹیٹیوٹ آف آرٹ اینڈ لینگوئج ادارہ بنایا۔
چوہدری پرویز الٰہی نے ای صوبے وچ پرائمری تعلیم وچ انقلابی اصلاحات متعارف کروائیاں۔ ایہناں دا شروع کروایا گیا منصوبہ 1122 پنجاب دے عوام لئی اک نعمت توں گھٹ نہیں۔ پہلے جدوں کدی سڑک اُتے کوئی حادثہ ہوندا تے زخمی مریض اوتھے تڑفدا رہندا پر قانون دے ڈر توں کوئی راہگیر زخمی نوں ہسپتال اپڑان دی کوشش نہ کردا۔ پر ہن سڑک اُتے رونما ہون والے کسے وی حادثے دے بعد مریض نوں بنا ایس دی شناخت ، قوم، مذہب پچھے فوری علاج دی سہولت مل رہی اے۔وارڈن ٹریفک پولیس نال چوہدری پرویز الٰہی نے نہ صرف آن والے ویلے وچ درپیش ٹریفک مسائل اُتے قابو پان دا پلان تیار کیتا بلکہ بوہت سارے پڑھے لکھے نوجواناں نوں باعزت روزگار وی فراہم کیتا تے ایہناں دی محبتاں نال قائم ہون والی خوبصورت محل و قوع وچ آباد یونیورسٹی آف گجرات نہ صرف گجرات بلکہ ملحقہ ضلعیاں دے نوجواناں دی علمی پیاس بجھان دا کم بخوبی کر رہی اے۔ چوہدری پرویز الٰہی دی دور اندیشی، معاملہ فہمی تے سیاسی پختگی اے کہ ایہناں دا شروع کیتا گیا ہر عوامی منصوبہ ہر طرح دی مخالفت دے باوجود پنجاب وچ اپنا کم بخوبی کر رہیا اے۔
