ایہ دُکھ کنہوں سنائیے؟
مظہر برلاس
صرف ایہ لکھیا سی کہ سسٹم جواب دے چکیا اے۔ ایہدے تے دنیا بھر توں تبصرے‘ تجزیے سامنے آئے‘ سب توں دکھی آواز شہاب زبیری دی سی شہاب زبیری اک سمجھدار کاروباری آدمی اے۔ کراچی وچ رہندے نیں‘ اوہناں نے لہور دی اک شاعرہ دے نال ویاہ کیتا۔ ایہ اوس زمانے دی گل اے جدوں محبت نوں ایناں زوال نہیں سی صوبائی تے لسانی تعصب عروج تے نہیں سی پر ہن تے فرقیاں دی اگ وی برابر لگی ہوئی اے۔
دوستو! شہاب زبیری دی فون کال تے تبصرہ بعد وچ‘ پہلے معاشرے دی اوس تصویر دا ذکر ہو جاوے جہدے وچ نفرت بولدی اے۔ اک صوبے دے آئی جی کہن لگے یار اسیں کنے عجیب لوک ہو گئے آں میں اپنے پُتر دا رشتہ کرنا سی رشتے دی گل چلی تے کڑی دے والدین پچھن لگے کہ تسیں کہڑے مسلمان او؟ میں اوہناں اگے عرض کیتا مسلمان تے مسلمان ای ہوندے نیں‘ تہاڈی گل مینوں سمجھ نہیں آئی کیوں جے جو وی اللہ‘ رسولؐ تے قرآن نوں من دا اے اوہ مسلمان اے۔ پتہ نہیں کہڑا فرق لبھ رہے او فیر اوہناں نے فرقیاں دے ناں گنوانے شروع کیتے تے میں گزارش کیتی کہ تسیں فکر مند نہ ہوو اسیں سچے مسلمان آں پر مینوں ایہ گل بھُل نہیں سکدی کہ اسیں اپنے مذہب نوں کیہ بنا کے رکھ دتا اے۔ ساڈا مذہب تے رواداری تے محبت سکھاندا اے ایہ تے اللہ دا آخری تے حتمی دین اے سانوں حکم اے کہ تفرقیاں وچ نہ پوو تے فیر ایہ سب اسیں کیوں کر رہے آں۔ معاشرے نوں ونڈن والے ایہناں مذہبی رہنماواں بارے کہیا جاوے کہ ہن تے اوہناں ہور کارنامے وی سامنے آنا شروع ہو گئے نیں۔ ایہ اوہو نہیں جہناں نے معاشرے نوں فرقیاں وچ ونڈیا‘ نفرتاں پیدا کیتیاں‘ لوکاں نوں لوکاں نال لڑوایا۔ کجھ ڈھڈ دے پجاریاں نے اللہ‘ اللہ دے رسولؐ تے رسولؐ دے پیاریاں دے تذکرے دے وی ریٹ مقرر کر رکھے نیں۔ مسلمان ملکاں دی تباہی دے زیادہ ذمہ دار ایہو لوک نیں۔
ہن آئونے آں شہاب زبیری دی ٹیلی فون کال ول۔ شہاب زبیری دکھی سن‘ کہن لگے تہاڈا کالم میرے سامنے اے‘ تسیں اسمبلیاں وچ بیٹھن والے کیہ کیہ لوک یاد کروا دتے‘ پر ہن کس کس چیز دا رونا رویا جاوے۔ باقی شعبیاں دا دا وی ایہو حال اے اسیں اپنی زندگیاں وچ معاشرے نوں تیزی نال بدلدے ویکھیا اے ہن ساڈا معاشرہ اوہ نہیں رہیا جو چالھی ورھے پہلاں سی لوکاں دے کردار وی بدل گئے۔ چالھی ورھے پہلاں بستیاں وچ محبتا ںدا بسیرا سی پر اج اوتھے نفرت دی اگ اے۔ ہن اسیں کوئی وڈا سیاستدان‘ شاعر‘ گلوکار‘ کھڈاری‘ خطیب‘ صحافی‘ موسیقار غرض کسے وی شعبے وچ وڈا آدمی پیدا کرن توں قاصر آں۔
معاشرے نوں دولت دی ہوس کھا گئی‘ محبت نوں مفاد دیاں اکھاں نے چٹ لیا۔ دوستیاں فائدیاں لئی ہون لگیاں تے فائدے دوستاں نوں کھا گئے۔ ایہ معاشرے دا بھیانک چہرہ اے کہ صرف فائدے لئی دوست‘ دوست نوں قتل کر رہیا اے بھائی‘ بھائی نوں مار رہیا اے کدی ساڈے معاشرے وچ بزرگاں دا احترا م مثالی سی پر ہن اجہے اجہے واقعات پیش آ رہے نیں کہ توبہ کردے کردے ہتھ تھک جاندے نیں لوک والدین دا احترام بھُل گئے اسیں سیاستداناں نوں رونے آں‘ سیاستدان تے معاشرے دا عکس نیں‘ پورا معاشرہ ای دولت دا پجاری بن چکیا اے۔ تہاڈے معاشرے وچ پھل فروش وی دھوکھے باز اے‘ اوہ چنگا پھل سجا کے ضرور رکھدا اے پر خریدار دے نال دھوکھا کردا اے۔ تہانوں ددھ سنے کھان پین دیاں ساریاں شیواں وچ ملاوٹ ملے گی لوکاں نے حرام حلال وچ تمیز کرنا چھڈ دتا۔ کرپشن‘ بدعنوانی تے بددیانتی دی ہوا سارے محکمیاں وچ پھر چکی اے۔ اک دن سرکاری افسر تے اک کنٹریکٹر دی گل بات ہو رہی سی بڑی دلچسپ گل بات‘ جہدے وچ ٹھیکیدار کہہ رہیا سی کہ جی مینوں پتہ اے کہ پنج پرسنٹ تے محکمے دا اے‘ تہاڈا وچ ہور کیہ ہووے گا؟ جہدے تے اوہ سرکاری افسر کہہ رہیا سی دیکھو تہانوں ایہ تے پتہ اے کہ محکمے دا پنج پرسنٹ ہوندا اے ہن میرا کم اے کہ میں ایمانداری نال تہانوں کم دواواں‘ باقی اک پرسنٹ تے میرا وی بن ای اے ناں؟ ایہ گل بات سنن دے بعد میں اپنے اک دوست نوں کہیا کہ فلاں محکمے دے لوک سرکار توں تنخواہ نہیں لیندے؟ اوہنے کہیا لیندے نیں‘ میں عرض کیتا تے ایہ فیر ٹھیکے وچ پنج پرسنٹ کیوں لیندے نیں‘ حکومت دے تنخواہ دار؟ میرا دوست مینوں کہن لگا کہ جناب بس ایہناں سرکاری افسراں نے ایہو میرٹ بنا رکھیا اے ایہدے بناں ٹھیکہ دیندے ای نہیں۔ دوست دیاں گلاں سن کے مینوں خیال آیا کہ پاکستان دے اک سابق وزیراعظم نے ایہو کہیا سی کہ دو پرسنٹ کمیشن تے انٹرنیشنل سطح تے تسلیم شدہ اے جے میں لے لیا تے کیہ ہویا؟ جس ملک دا اک سابق وزیراعظم اجہے خیالات دا مالک ہووے تے فیر باقی لوکاں دے بارے کیہ کہیا جا سکدا اے؟ ایہ تے انج ای اے کہ دنیا بھر وچ حرام جانور دا گوشت کھایا جاندا اے جے میں کھا لیا تے کیہ ہویا؟ واہ‘ کیہ دلائل نیں لوکاں کول‘ لوک معاشرے وچ کھلریاں برائیاں نوں نہیں ویکھ رہے‘ بس دولت دے پچھے لگے ہوئے نیں اوہ وی حرام حلال دی تمیز کیتے بناں۔ بقول ناصرہ زبیری:
دلوں میں خوف بڑھتے جا رہے ہیں
نہ جانے کیا سے کیا ہونے چلا ہے
