کنول دا پھُل
پروفیسر محمد عبداللہ بھٹی
میں حیران پریشان شل دماغ کھلرے اعصاب دے نال اپنے ساتھی تے ساہمنے بیٹھی بڈھی طوائف نوں ویکھ رہیا سی میں اپنے ساتھی تے بڈھی طوائف دی جرات اُتے حیران سی کہ اوہ عورت کنہے آرام نال گل کر رہی سی کہ ساڈے گھر ہن جسم نوچن والے درندے گاہک نہیں آ رہے کوئی دم چلہ وظیفہ کرو کہ گاہک آنا شروع ہو جان جسم فروشی دا دھندہ جو بند ہو چکیا اے۔ اوہ فیر توں چلنا شروع ہو جائے۔ میری رگاں وچ خون دی تھاں بچھو دوڑ رہے سن۔ غصے نال میری کنپٹیاں وچ اگ دہک رہی سی کہ مینوں کیہ سمجھ کے ایہہ ایتھے لے کے آیا اے تے ایہہ بڈھی عورت جس دیاں لتاں قبر وچ نیں ایس نوں جوانی دے بعد بڑھاپے وچ وی آخرت دی فکر نہیں تے ایہہ جسم فروشی دی پرموشن لئی دعا دا کہہ رہی سی۔ پہلے تے میرا دل کیتا کہ خوب غصہ کڈ لواں کہ تسیں لوکاں نے مینوں سمجھیا کیہ اے تہاڈی جرات کنج ہوئی انج دے مطالبے دی پر فیر بزم تصوف دا طالب علم ہون دے ناطے اولیاء کرام دی رحم دلی مخلوق پروری یاد آئی کہ میں مولوی بن کے تقریر جھاڑ کے ایہناں نوں ٹھیک نہیں کر سکدا میں مولوی بن کے خطاب کراں گا اچھائی برائی روز محشر دیاں سختیاں دساں گا تے ایہہ کسے ہور عامل بابے نوں بلا لین گے۔ ایتھے مینوں عقل مندی صبر شفقت نال کم لینا ہوئے گا ایس دے نال کجھ ویلا لنگھا کے ایہناں نوں راہ راست اُتے لیان دی کوشش کرنی چاہیدی اے۔ ایہہ سوچ کے میں اپنے آپ نوں نارمل کرنا شروع کر دتا میرے کھلرے اعصاب نارمل ہون لگے ہن میں آن والے ویلے دے بارے وچ سوچ کے دل ای دل وچ فیصلہ کر چکیا سی کہ ایہناں نوں راہ راست اُتے کس طرح لیانا اے۔ ہن میں خود نوں نارمل کر کے آنٹی نوں ویکھیا تے کہیا تہانوں لوکاں نوں رزق دی تنگی اے تے اللہ تعالیٰ تہاڈے رزق دے دروازے ضرور کھولے گا نال ایس نیک دھی ول اشارہ کیتا تے بولیا ایہہ تہاڈے گھر وچ مولوی کس طرح پیدا ہو گئی تے ماں بولی ایس نوں ساڈے جدی پشتی کم توں سخت نفرت اے پتہ نہیں ایس دے کن کس نے بھرے نیں ایہہ دن رات سانوں توبہ دے لیکچر دیندی اے ہن ایس دے وی دھندے دی عمر اے پر ایہہ دھمکی دیندی اے کہ انج دی کوئی کوشش ایس دے نال کیتی گئی تے ایہہ خود کشی کر لوے گی یا گھر توں نس جائے گی۔پنجاں نمازاں ویلے اُتے ادا کردی اے روزے رکھدی اے راتاں نوں اٹھ کے لمبی لمبی نمازاں تے دعاواں کردی اے۔ ایس نے تے ساڈا جینا حرام کر دتا اے ایس دے دماغ توں نیکی دا بھوت کڈ و نہیں تے اسیں بھُکے مر جاواں گے ہن میں غور نال ایس دھی ول ویکھیا تے اکھاں دے حلقے دس رہے سن کہ اوہ راتاں نوں جاگ جاگ کے اپنی باطنی اذیت نوں گھٹ کرن دی کوشش کردی اے ہن میں ایس ول ویکھ کے بولیا دھیے تینوں لگدا اے اللہ تعالیٰ نال بوہت پیار اے تے گلوگیر لہجے وچ بولی جی سر اللہ میرا دوست میرا ساتھی اے۔ ایہہ میری ای دعاواں نیں تے ساڈے گھر وچ گاہک آنا بند ہو ئے نیں، میں ساری ساری رات رو رو کے اللہ دے حضور دعا کرنی واں کہ میرا خاندان ایس جسم فروشی دے جہنم توں جلدی نکل جائے تے پیارے اللہ جی نے میری دعاواں قبول کر لئیاں نیں۔ دھی دیاں گلاں سن کے ماں نوں تے جویں اگ ای لگ گئی ایس نے دھی نوں گالھاں تے بددعاواں دینیاں شروع کر دتیاں کہ توں مر جا ساڈی زندگیاں تے رزق دے پچھے پئے گئی ایں جدوں ماں نے بوہت ڈانٹیا تے دھی نے رونا شروع کر دتا میں قدرت دی کرشمہ سازی اُتے حیران سی تے دل وچ سوچ رہیا سی کہ اللہ تعالیٰ دی ذات مینوں ایس نیک کُڑی دی مدد لئی لیائی سی نال ای میں نیک کُڑی نوں ویکھ رہیا سی کہ خدا نے گندگی دے ڈھیر گندے پانی دے تالاب وچ کنول دا پھُل کھلا رکھیا سی کنول دا پھُل پوری پاکیزگی طہارت تے مہک نال اپنی موجودگی دا احساس دلا رہیا سی ہن میں ماں دے نال ڈرامہ شروع کر دتا کہ تہاڈے اُتے واقعی ای جادو ہو گیا اے۔ حاسدین مخالفین دی وجہ نال تہاڈا دھندہ بند ہو کے رہ گیا اے۔
مینوں پتہ سی جے میں ماں دی ہاں وچ ہاں نہ ملائی تے ایہہ دوبارہ میرے کول نہیں آئے گی نہ ای میری گل سنے تے منے گی ہن میں ماں دے نفسیاتی علاج دی خاطر ایس دا تے ایس دے گھر دا علاج شروع کر دتا ایس نوں مختلف وظائف تے پانی دے چھڑکائو وچ مصروف کر دتا۔ ایہہ مختلف کم تے چلدے رہے پر ساڈی ایہناں کوششاں دے چنگے اثرات برآمد نہ ہوئے جیہڑے نہ ہونے سن ہن جدوں دو مہینے بعد وی گاہکاں دی آمد نہ شروع ہوئی تے میں ایہنوں ماں نوں کہیا ویکھو زمانہ بدل گیا اے لوکاں دا ذوق بدل گیا اے اسیں اپنی کوششاں جاری رکھاں گے پر سانوں نال کوئی ہور کم وی کرنا چاہیدا اے کیوں جے میں پچھلے دو مہینے وچ کئی وار ایہناں دے گھر آ کے مختلف مصنوعی عمل کر چکیا کوئی معاوضہ وی نہیں لیا سی ایس لئی ماں ہن میری عزت وی کردی سی باقی نیک وظائف نے وی کم شروع کر دتا سی ہن بولی پتر ہن تو ای مشورہ دے کہ میں گھر دے معاملات کنج چلاواں ۔ ہجے تے ڈاکٹر صاحب دا سہارا اے جے ایس دا وی دل بھر گیا تے اسیں تے بھکے مر جاواں گے ہن میں اپنے منصوبے دے مطابق مشورہ دتا کہ تہاڈیاں دھیاں نوں میک اپ دا فن آندا اے میں ڈاکٹر صاحب نوں کہنا واں کسے چنگی تھاں اُتے کرائے دی تھاں اُتے چنگا جہیا بیوٹی پارلر کھول دین تہاڈیاں بچیاں کم کرن گیاں تے اللہ رزق وی کھول دیوے گا۔ بڈھی نوں میرا مشورہ بوہت پسند آیا ہن ڈاکٹر صاحب نال گل کیتی شروع وچ تے ڈاکٹر صاحب نے ٹال مٹول نال کم لیا پر پچھلے دو مہینے توں میرے نال رہ رہ کے تھوڑی بوہت عزت کرنا شروع ہو گئے سن میں کہیا تسیں جس کُڑی نوں پسند کردے او ایس نال نکاح کر لوو تے ایس نوں پارلر کھول دیو ایس طرح اوہ صرف اور صرف تہاڈی ہو کے رہوے گی ایس گل اُتے ڈاکٹر صاحب من گئے ہن ڈاکٹر صاحب نے چنگے علاقے وچ ایہناں نوں پارلر کھول دتا جتھے پنجاں بھیناں نے کم شروع کر دتا شروع وچ مشکلات آئیاں پر آخر کار اللہ تعالیٰ نے رزق دے دروازے جائز طریقے نال کھول دِتے۔
میں اک سال تیکر ایہناں لوکاں نال رابطے وچ رہیا ایس دوران ماں نوں عمرہ کرایا گیا جس دی وجہ نال اوہ توبہ کر کے حقیقی نیکی دے رستے اُتے آ گئیاں جدوں میں ویکھیا ایہہ گھرانہ ہن برائی توں نیکی دی ڈگر اُتے آ گیا تے میں اپنی زندگی وچ مصروف ہوندا گیا اج کئی ورھیاں بعد ایسے مولوی دھی دا فون آیا تے مینوں ورھیاں پہلے ڈاکٹر تے آنٹی دا جسم فروشی دا اڈا یاد آ گیا جیہڑا دھڑلے نال کہہ رہی سی دعا کرو جسماں دے سوداگر ساڈے گھر زیادہ توں زیادہ آن تے نال خدا دی قدرت کہ طوائف دے کوٹھے اُتے اللہ تعالیٰ نے کنول دے پھُل نوں کھلا دتا جیہڑی نیکی دی چنگاری سی پر سڑ کے ایس نے ساری گندگی نوں راکھ وچ بدل دتا گناہ برائی دے اڈے نوں برائیاں توں پاک کر دتا میرا رب جدوں کسے اُتے مہربان ہوندا اے تے انج ای کردا اے۔
