”پٹاکہ تیرے پیو نے کڈنا اے“

ایثار رانا

میاں جی ایہہ تسیں کیہ کیتا میری عقیدت دا کھوتا ای کھُوہ وچ سٹ دِتا، سر جی سانوں آرڈر کرنا سی لندن وچ تہاڈا اَکلاپا دور کرن لئی میرے جہے سینکڑے میراثی تیار نیں۔ سانوں بُلا لیندے تہانوں کجھ ”اِنج اُنج“دے لطیفے سناندے، مہدی حسن، محمد رفیق دے گانے سناندے تہاڈی تنہائی رفع ہو جاندی۔وڈـے میاں جی ایس بندے دا بس ناں حمداللہ محب اے ایہہ ساڈا محب شہب کجھ نہیں ایہہ بندہ دشمناں دی جھولی وچ بہہ کے پاکستانی قوم نوں ”گندیاں گندیاں گالھاں کڈدا“ اے تے جو پاکستان نوں گالھ کڈے چاہے سونے دا ای بن کے آ جائے اسیں ایہنوں انتہائی عقیدت و احترام نال ”دُر فٹے منہ“ای آکھاں گے۔ بھاء جی پاکستان ہے تے ساڈےلندن، دبئی دے فلیٹاں نیں۔ چلو وطنیت نوں تسیں پاسے رکھو پاکستان تے ساڈا نوٹ چھاپن دا کارخانہ اے ایس کارخانے دی ای لاج رکھ لیندے۔ بنتا سنگھ توں کسے نے پچھیا ایہہ پنگے دا کیہ مطلب ہوندا اے؟ بنتا سنگھ سو چ کے بولیا یار مینوں مطلب دا تے پتہ نہیں پر بندہ ایہہ لیندا ضرور اے۔ ایس ویلے جدوں پاکستان سٹریٹجیکلی اک سنگین دوراہے اُتے کھڑا اے۔ افغانستان وچ امریکہ نوں پھینٹی پئی پر بھارت دے تے ارباں، کھرباں ڈُب گئے۔ ہن ایہہ دونویں ملک ”ڈِگے کھوتی“ توں نیں تے غصہ کمہیار اُتے کڈ لین۔ خیر کمہیار وی ایس وار ذرا تگڑا کھلوتا اے غصہ کڈ ن گے تے اپنی مزید بستی خراب کرن گے۔ ایہہ بندہ حمداللہ محب رائ دا پکاسنگی بیلی اے آپ نوں وی ایہنوں قریب بلکہ عنقریب نہیں کرنا چاہیدا سی 25 جولائی نوں کشمیر وچ الیکشن سن تے آپ نے کشمیریاں دے قاتلاں دے دوست نال ”پپّی شپّی کر لئی تُسی اے کیہ کیتا میاں جی کیہ کیتا“
آزاد کشمیر الیکشن وچ الیکشن ہویا تے دُدھ دا دُدھ تے پانی دا پانی ہو گیا۔ آزاد کشمیر وچ پی ٹی آئی دا مقابلہ وی پی ٹی آئی نال ای ہویا۔ ہن بھانویں ”لارا لپّا گرل“ہوئے یا ”بابو چھبیلا“یا ”شہد والے موتی چور“ایہناں دا کم ختم تقریراں وچ بھڑکاں لانا کجھ ہور ہوندا اے صندوکڑیاں وچ ووٹ پانا یا ڈلوانا کجھ ہور ہوندا اے۔ایس وچ کوئی شک نہیں مریم بی بی نا ہوندیاں تے الیکشن دا ماحول اینا گرم ہوندا نہ گنڈاپور موتی چور دے لڈو ونڈدے۔ ہن جے تسیں کہو گے کہ ”اوئے میں ٹبر کھا جاواں تے ڈکار نہ مارا ں“تے تسیں وی ”نواں آیاں ایں سوہنیا یا سوہنیئے“سنو گے۔بہر حال ڈائیلاگ مارن دا ویلا ختم ہویا ہن بی بی تے بابو دھاندلی دے بیان دے رہے نیں کیوں جے صرف اوس ووٹ نوں عزت اے جیہڑا سانوں ملے نہیں تے دھاندلی دھاندلی۔ بلاول ٹھیک کہندے نیں کپتان نے پیپلز پارٹی دی کشمیر پالیسی چوری کر لئی اے۔ میں آپ ایس چوری دا گواہ واں۔ میں آپ کپتان نوں اوہ تجوری کھولدے ویکھیا اے جس وچ اک پاسے بی بی شہید دی وصیت رکھی سی تے ایہہ پالیسی کشمیر ہائوس دے بورڈ دے پچھے رکھی ہوئی سی۔ چلو ہن چنگے بچیاں وانگوں کشمیر ہائوس دا بورڈ واپس کر دیو کئی ورہے ہو گئے ایہنوں چوری ہوئے۔ پتہ نہیں سیاست دے بالاں نوں کیہ ہو گیا اے۔ فواد چودھری کہندے نیں اوہناں نے اک کتاب نہیں پڑھی۔ ہن کیہ کریئے۔ فواد چودھری ایہناں بالاں لئی کسے مدرسے دا بندوبست وی نہیں کر سکدے۔ پر جے اوہ کوشش جاری رکھن تے کجھ نہ کجھ افاقہ ضرور ہو سکدا اے۔ اُنج سابق خادم اعلیٰ وی ایہناں  بالاں دی تربیت کر سکدے نیں۔ سنتا سنگھ بنتا نوں بولیا اج دے بالاں نوں پتہ نہیں کیہ ہو گیا اے ، کل اک بچے نے جوس پی کے ڈبہ سڑک اُتے سٹ دتا میں بلایا تے پیار نال سمجھایا کہ ”پُتر ڈبّے تے پیر مار کے پٹاکہ تیرے پیو نے کڈنا سی“ ۔سیاست وچ جے پٹاکہ نہ بولے تے مزا نہیں آندا۔ اُنج ایہہ میرا یقین اے کہ جے پیپلز پارٹی کسے الیکشن وچ اکلـی کھلوئے تے پی ٹی آئی، ن لیگ وی نہ ہون اودوں وی پیپلز پارٹی دوجے نمبر اُتے آئے گی۔ ایس عظمت دا کریڈٹ آصف علی زرداری نوں جاندا اے جیہڑا کم جنرل ضیا، جنرل مشرف نہ کر سکے ایس مرد آہن نے کر وکھایا۔ چنگا اے سیاست وچ پیپلز پارٹی اے نہیں تے پی ٹی آئی تے ن لیگ ہر وار ”ٹکر و ٹکری“ہوندے۔پیپلز پارٹی ودھائیاں دین تے الیکشن دے بعد دہائیاں دین لئی بہترین جماعت اے۔
ٹوکیو اولمپکس دا آغاز ہو چکیا، 22 کروڑ دے عظیم ملک توں صرف 20 رکنی وفد اولمپکس وچ شریک ہو رہیا اے۔ قسمیںافسوس ہویا سنیا اے جس اتھلیٹ نے پاکستانی جھنڈا پھڑیا سی ایہنوں جھنڈا چُکن اُتے ای چُک پئے گئی۔ اتھلیٹ نہ ہویا ساڈا وزیر دفاع ہو گیا کپتان جی تہاڈے ہوندے ہوئے ملک وچ کھیڈاں دا ایہہ حال اے۔ سارا زور کرکٹ اُتے ای نہیں لانا چاہیدا ہاکی نوں اسیں ایدھی دے جھولے توں نہیں چُکیا۔ میں تے ایس عظیم چور نوں سلام پیش کرنا واں جیہڑا ساڈے عظیم ”فلائنگ ہارس“سمیع اللہ دے مجسمے توں ہاکی تے گیند چُرا کے لے گیا تے فیر واپس لا وی گیا۔ چلو ایس بہانے ساڈی نسل نوں ایہہ تے پتہ چلیا کہ کوئی سمیع اللہ وی ہوندے سن تے ہاکی وی اک کھیڈ اے۔ایہو صورتحال رہی تے پاکستان گھر وچ بہہ کے یسو پنجو دا عالمی چمپئن بن سکدا اے وزیراعظم کھیڈا ں اُتے ضرور توجہ دین ہجے ہاکی، سکوائش، روئنگ، سنوکر، بالنگ،ٹینس،دے بالاں وچ ”پوٹینشل“ موجود اے،سارے پیسے بیورو کریسی اُتے خرچ کرن دی بجائے تھوڑے بوہت ایہناں اُتے لا دیو ایہہ قوم دا ناں اُچا کرن گے۔