آزاد جموں کشمیر دے عام انتخابات مکمل، تحریک انصاف 25 نشستاں جت گئی

عمران خان دی نویں وزیراعظم لئی تیاریاں

ظہیر اعظم جرال

آزاد کشمیر دے 11 ویں پارلیمانی انتخابات وچ پاکستان تحریک انصاف کشمیر نے حکومت سازی لئی واضح اکثریت حاصل کر لئی، 45نشستاں وچوں 25 پی ٹی آئی کشمیر، 11 پیپلز پارٹی آزاد کشمیر، کشمیر دی حکمران جماعت مسلم لیگ ن 6، آل جموں و کشمیر مسلم کانفرنس تے جموں و کشمیر پیپلز پارٹی اک اک نشست جت سکی۔ پیپلز پارٹی دے چوہدری محمد یاسین دو نشستاں اُتے کامیاب ہوئے۔ پی ٹی آئی دے چوہدری انوار الحق نے آزاد کشمیر بھر وچ سب توں زیادہ 38308 ووٹ لئے جد کہ وزیراعظم آزاد کشمیر فاروق حیدر اک حلقہ وچ 12090 ووٹ دے بھاری مارجن توں شکست تے دوجے وچ صرف 394 ووٹاں دی سبقت نال جت پائے۔ اگلے مرحلے وچ اکثریتی جماعت ولوں وزارت عظمیٰ لئی امیدوار نوں نامزد کر کے ایس دی کامیابی لئی بھرپور تیاریاں جاری نیں۔ چیئر مین پاکستان تحریک انصاف وزیراعظم پاکستان عمران خان نے آزاد کشمیر دے انتخابات وچ جتن والے ممبراں نوں مبارکباد دیندے ہوئے کہیا کہ بین الاقوامی برادری اقوام متحدہ دی نگرانی وچ استصواب رائے دے ذریعے اہل کشمیر توں حق خودارادیت دا وعدہ پورا کرے، میں بطور سفیر کشمیر اقوام متحدہ سنے سارے عالمی فورمز اُتے اواز بلند کردا رہواں گا۔ وزیراعظم آزاد کشمیر لئی سیاسی بصیرت تے انتظامی تجربہ دے لحاظ نال بیرسٹر سلطان محمود دے ناں نوں موزوں قرار دتا جا رہیا اے جد کہ الیکٹرانک و سوشل میڈیا اُتے وزیراعظم آزاد کشمیر لئی بیرسٹر سلطان محمود دے علاوہ سردار تنویر الیاس، چوہدری انوالحق ، خواجہ فاروق احمد دے ناں وی گردش کردے رہے نیں۔ واضح رہے کہ کسے وی جماعت نوں حکومت سازی لئی 53 رکنی ایوان وچ 27 نشستاں دی لوڑ اے۔ پیپلز پارٹی تے مسلم لیگ وی ایوان وچ اپنی اپنی حکمت عملی دے تحت اگے ودھ رہے نیں بلکہ مسلم لیگ نے تے انتخابی دھاندلی دے خلاف ایوان توں باہر احتجاج دی کال وی دے دتی اے۔
پیپلز پارٹی دے چیئر مین بلاول بھٹو زرداری تے مسلم لیگ ن دی نائب صدر محترمہ مریم نواز نے وی شدید دھاندلی دا الزام عائد کردے ہوئے نتائج نوں تسلیم کرن توں انکار کیتا۔ جس اُتے وفاقی وزیر اطلاعات چوہدری فواد حسین نے کہیا اے کہ کشمیر دے عوام نے عمران خان دی قیادت اُتے مکمل اعتماد دا اظہار کردے ہوئے پی ٹی آئی نوں واضح اکثریت نال کامیاب دلوائی اے۔ حکمران جماعت دے وزیر اطلاعات ولوں ملک دی وڈی جماعتاں دی قیادت مریم نواز تے بلاول بھٹو نال ایس ناکامی اُتے اپنے عہدیاں توں از خود مستعفی ہون دا مطالبہ کیتا جا رہیا اے۔ جد کہ چیف الیکشن کمشنر جسٹس (ر) عبدالرشید سلہریا نے کہیا کہ الیکشن مکمل صاف شفاف تے غیر جانبدارانہ ہوئے نیں مقابلے وچ اک دی جت اک دی ہار ہوندی اے تے ہرن والے کھلے دل نال نتائج و شکست تسلیم کرن دی بجائے ہمیشہ دھاندلی دا الزام لاندے نیں تاں سیاسی نقاداں دا کہنا اے کہ مسلم لیگ ن دی شکست دی وجہ قیادت دا کارکناں نوں نظر انداز کرنا تے ترقیاتی منصوبیاں لئی مشاورت توں ایہناں نوں محروم رکھنا اے۔
پی ٹی آئی آزاد کشمیر دے صدر بیرسٹر سلطان محمود چوہدری نے 9 ویں وار ممبر اسمبلی بنن دا منفرد ریکارڈ قائم کر لیا اے۔ پی ٹی آئی دی کامیابی اُتے اللہ تعالیٰ تے عوام دا شکریہ ادا کردے ہوئے اوہناں نے آزاد کشمیر وچ ایس کامیابی نوں وزیراعظم عمران خان دے ویژن تے مسلم لیگ ن دی سبکدوش حکومت دی بدترین کارکردگی نال منسوب کیتا۔ اوہناں نے کہیا کہ اسیں برسر اقتدار آ کے آزاد کشمیر وچ بہتری لیاواں گے ریاست نوں حقیقی معنیاں وچ آزادی دا بیس کیمپ بنا کے مقبوضہ کشمیر دے مظلوم عوام دی اواز بناں گے تے پوری دنیا وچ کشمیر ایشو نوں اجاگر کرن لئی ہنگامی اقدامات چکاں گے۔ آزاد کشمیر توں کرپشن دا خاتمہ تے نوجواناں نوں روزگار فراہم کرنا میری اولین ترجیح ہوئے گا عدل و انصاف دے قیام لئی جدوجہد کراں گے پیپلز پارٹی آزاد کشمیر دے جنرل سیکرٹری فیصل ممتاز راٹھور نے کہیا کہ وفاقی تے آزاد کشمیر حکومت دے دبائو تے الیکشن کمیشن دے ناقص انتظامات دے باوجود آزاد کشمیر دے عوام نے پیپلز پارٹی اُتے بھرپور اعتماد دا اظہار کیتا، اوہناں نے اپنی کامیابی نوں اہلیان حویلی دے ناں کردے ہوئے پارٹی چیئر مین بلاول بھٹو زرداری دا وی شکریہ ادا کیتا کہ ایہناں دے اعتماد تے بھرپور انتخابی مہم نال جیالیاں دے جوش و جذبہ وچ وادھا ہویا۔ انشاء اللہ اسیں پارٹی قیادت تے کارکنان دے اعتماد اُتے پورا اتراں گے تے شہید قائد عوام دے نظریئے اُتے چلدے ہوئے خدمت دا سفر جاری رکھاں گے۔
پی ٹی آئی نوں پاکستان وچ مہاجرین مقیم پاکستان دی نشستاں اُتے انج دے ویلے وچ وڈی کامیابی ملی جدوں اوہ پاکستان دے ضمنی انتخابات وچ اپوزیشن توں یکے بعد دیگرے شکست نال دو چار ہو رہی سی پر پاکستان وچ مہاجرین دی 12 وچوں 9 نشستاں اُتے پی ٹی آئی کشمیر دے جنرل سیکرٹری عبدالماجد خان، چوہدری محمد اکمل سرگالہ، چوہدری مقبول احمد، چوہدری اکبر ابراہیم، حافظ حامد رضا، جاوید بٹ، عاصم شریف بٹ، دیوان غلام محی الدین ، چوہدری ریاض گجر کامیاب ہوئے۔ مسلم لیگ ن مہاجرین دی 2 راجہ محمد صدیق، احمد رضا قادری تے پیپلز پارٹی نوں صرف 1 نشست عامر عبدالغفار لون دی حاصل ہوئی۔ میرپور ڈویژن دی 13 نشستاں وچوں پی ٹی آئی نے 8 نشستاں اُتے بھرپور کامیابی حاصل کیتی جتھے سابق وزیراعظم تے پی ٹی آئی دے صدر بیرسٹر سلطان محمود چوہدری، چوہدری ارشد حسین، چوہدری انورالحق، علی شان سونی، چوہدری اظہر صادق، نثار انصر ابدالی، ظفر اقبال ملک، چوہدری اخلاق احمد کامیاب ہوئے۔ پیپلز پارٹی ایس ڈویژن توں چوہدری محمد یاسین دی دو نشستاں سنے جاوید اقبال بڈھانوی، چوہدری قاسم مجید دی صورت وچ کل چار نشستاں حاصل کر سکی۔ جد کہ مسلم لیگ ن کرنل (ر) وقار احمد نور دی شکل وچ صرف اک نشست جت پائی۔ ایسے طرح پونچھ ڈویژن دی 11 وچوں 6 نشستاں وائس چیئر مین الیکشن مہم سردار تنویر الیاس، شاہدہ صغیر، عبدالقیوم نیازی، سردار محمد حسین، سردار فہیم اختر ربانی کامیاب ہوئے۔ پیپلز پارٹی سردار محمد یعقوب خان تے فیصل ممتاز راٹھور دی شکل وچ دو نشستاں جد کہ مسلم لیگ ن دے سردار عامر الطاف، مسلم کانفرنس دے سردار عتیق احمد تے جموں و کشمیر پیپلز پارٹی دے سردار حسن ابراہیم خان اک اک نشست سکے۔ پونچھ ڈویژن دے ضلع باغ حلقہ ایل اے 16 دے ریٹرنگ افسر حافظ عمران وزیر ولوں الیکشن کمیشن نوں ارسال کردہ رپورٹ دے مطابق کل 167 وچوں 163 پولنگ اسٹیشن وچ پی ٹی آئی دے سردار میر اکبر خان نے 22506 ووٹ تے پیپلز پارٹی دے سردار قمر الزمان نے 22307 ووٹ لئے نیں تے ایہناں دونواں امیدواراں دے وچکار 199 ووٹاں دا فرق اے جد کہ ایس حلقہ دے چار پولنگ اسٹیشن اُتے دو وچ ووٹ بیگ کھون تے دو وچ ساڑن دی رپورٹ پاروں غیر حتمی نتائج دا اعلان ممکن نہیں لہٰذا چار پولنگ اسٹیشن اُتے دوبارہ پولنگ کروائی جائے۔ مظفر آباد ڈویژن دی کل 9 نشستاں وچ پیپلز پارٹی دا پلڑا بھاری رہیا جتھے چوہدری لطیف اکبر، سردار جاوید ایوب، سید بازل نقوی، میاں عبدالوحید دی شکل وچ چار نشستاں اُتے کامیابی سمیٹی۔ پی ٹی آئی دے خواجہ فاروق احمد، دیوان علی خان چغتائی، چوہدری محمد رشید تن ممبران اسمبلی تے مسلم لیگ ن دے صرف دو ممبران راجہ فاروق حیدر تے شاہ غلام قادر منتخب ہو سکے۔
انتخابات وچ حصہ لین والی 11 خواتین امیدواراں وچوں صرف اک امیدوارہ شاہدہ صغیر جنہاں دا تعلق پی ٹی آئی نال اے تے ایہناں نوں ایہناں دے شوہر صغیر چغتائی دی الیکشن مہم دے دوران حادثاتی موت دے بعد امیدوار نامزد کیتا گیا سی کامیابی حاصل کیتی بقیہ 10 خواتین نوں شکست دا ساہمنا کرنا پیا۔
واضح رہوے کہ تحریک انصاف جیہڑے الیکٹیبلز دے بجائے نوجوان قیادت ساہمنے لیان دے دعوے کردی رہی اے پاکستان دے عام انتخابات تے گلگت بلتستان دے انتخابات دے بعد ہن آزاد کشمیر وچ وی اپنے ایس دعوے وچ ناکام نظر آئی۔ الیکشن شیڈول توں پہلاں پی ٹی آئی دے کول کجھ انتخابی حلقیاں وچ انج دے امیدواراں دی کمی سی جیہڑے برادری قبیلہ دا وڈا ووٹ بنک رکھدے ہون تاں وزیراعلیٰ پنجاب دے معاون خصوصی سردار تنویر الیاس نوں الیکشن مہم وچ ذمہ داریاں دتیاں گئیاں تے ایس دے بعد مختلف جماعتاں نال وڈی تعداد وچ رہنماواں و کارکنان نے پی ٹی آئی وچ شمولیت اختیار کیتی جس دے بعد ایہہ تاثر سی کہ ہن آزاد کشمیر وچ پی ٹی آئی حکومت بنان لئی اکثریت حاصل کر لوے گی۔ تحریک انصاف دے کامیاب ہون والے ممبران دے سیاسی کیریئر دا جائزہ لیا جائے تے پارٹی صدر بیرسٹر سلطان محمود، سردار محمد حسین، سردار گل خنداں، دیوان علی چغتائی، سردار فہیم اختر ربانی، سردار عبدالقیوم نیازی، چوہدری علی شان سونی، چوہدری انوارالحق، میجر (ر) لطیف خلیق، خواجہ فاروق احمد، چوہدری ارشد حسین، سردار میر اکبر سنے دیگر کجھ الیکٹیبلز دے پی ٹی آئی وچ شامل ہون دے بعد ای پی ٹی آئی نوں کامیابی ملی اے۔
آزاد کشمیر دے انتخابات وچ مسلم کانفرنس دے ملک محمد نواز، سابق وزیراعظم سردار سکندر حیات دے بھرا سردار نعیم خان تے پتر سردار فاروق سکندر، مسلم لیگ ن دے چوہدری طارق فاروق، ڈاکٹر محمد نجیب نقی، چوہدری محمد عزیز، محترمہ نورین عارف، راجہ نصیر احمد خان جہے سینئر رہنما سیاستدان انتخابات وچ شکست نال دو چار ہوئے جد کہ دو حلقیاں توں انتخاب لڑن والیاں وچ مسلم لیگ ن دے صدر وزیراعظم آزاد کشمیر راجہ محمد فاروق حیدر اک حلقہ وچ پی ٹی آئی دے دیوان علی خان چغتائی توں شکست کھا گئے، پیپلز پارٹی دے سینئر رہنما و سابق وزیراعظم و صدر سردار محمد یعقوب خان، جموں و کشمیر پیپلز پارٹی دے صدر تے آزاد کشمیر دے بانی صدر سردار محمد ابراہیم خان دے پوتے سردار حسن ابراہیم خان توں اک حلقہ وچ شکست کھا گئے، پیپلز پارٹی دے میاں عبدالوحید وی اک حلقے وچ مسلم لیگ ن دے جنرل سیکرٹری و سپیکر اسمبلی شاہ غلام قادر توں شکست کھا گئے۔ حلقہ ایل اے 32 جتھوں غیر حتمی نتیجہ دے مطابق وزیراعظم راجہ فاروق حیدر خانہ پیپلز پارٹی دے صاحبزادہ محمد اشفاق ظفر توں 394 ووٹاں دی برتری توں کامیاب قرار دتے گئے نیں، اوتھے اشفاق ظفر نے ریٹرنگ افسر اُتے مبینہ بددیانتی و جانبداری دا الزام عائد کردے ہوئے کہیا کہ اسیں 672 ووٹاں دی لیڈ نال جت گئے سی، اسیں ریٹرنگ افسر تے ڈسٹرکٹ ریٹرنگ افسر دے کول دوبارہ گنتی لئی گئے تے اوہناں نے جواب دتا کہ دوبارہ گنتی الیکشن کمیشن دا اختیار اے اسیں الیکشن کمیشن دے کول گئے تے ایس نے جواب دتا کہ ایہہ ریٹرنگ افسر و ڈسٹرکٹ ریٹرنگ افسر دا اختیار اے جس اُتے اسیں دوبارہ گنتی تیکر دھرنا دے دتا اے۔
آزاد کشمیر الیکشن کمیشن ذرائع دے مطابق انتخابات وچ ٹرن آئوٹ 58 فیصد رہیا، پی ٹی آئی نے سب توں زیادہ 6 لکھ 13 ہزار 509 ووٹ حاصل کیتے جیہڑے کل ووٹاں دا 32.5 فیصد اے۔ پاکستان مسلم لیگ ن نے 4 لکھ 91 ہزار 91 ووٹ حاصل کیتے جیہڑے کل وٹاں دا 25 فیصد تے پاکستان پیپلز پارٹی نے 3 لکھ 49 ہزارا 895 ووٹ حاصل کیتے جیہڑے مجموعی ووٹاں دا 17 فیصد اے۔ مسلم کانفرنس نے 1 لکھ 53 ہزار 861 ووٹ حاصل کیتے جیہڑے مجموعی ووٹاں دا 8.4 فیصد اے۔ تحریک لبیک پاکستان نے 96 ہزار 697 ووٹ حاصل کیتے جیہڑے کل ووٹ دا 5 فیصد تے آزاد امیدواراں نے 152973 ووٹ جہڑے مجموعی ووٹ دا 8 فیصد اے۔ موصولہ نتائج دے مطابق پی ٹی آئی خواتین دی پنج وچوں تن نشستاں حاصل کرن دی پوزیشن وچ اے جد کہ ٹیکنو کریٹ، علما و مشائخ تے سمندر پار کشمیریاں لئی مختص کل 3 نشستاں اُتے وی پی ٹی آئی دی کامیابی واضح وکھائی دے رہی اے۔ ایسے طرح پی ٹی آئی قانون سازی اسمبلی وچ 31 نشستاں دے نال سادہ اکثریت حاصل کر چکی اے۔