آزادکشمیر انتخابات دے بعد

لكهت:مطلوب وڑائچ

آزادکشمیر اسمبلی دے پچھلے دیہاڑے الیکشن مکمل ہوئے۔ آزادکشمیر تے پاکستان دیاں تنے وڈیاں سیاسی پارٹیاں یعنی مسلم لیگ (ن)‘ پیپلزپارٹی تے پی ٹی آئی جان تلی تے رکھ کے انتخابی مہم جاری رکھے ہوئے سن۔ خاص طور تے مسلم لیگ (ن) دی نایب صدر مریم نواز شریف تے پیپلزپارٹی دے چیئرمین بلاول بھٹو زرداری نے اپنی الیکشن کمیپن دوران پی ٹی آئی تے اوہدے چیئرمین عمران خان نوں ہدف بنایا ہویا سی۔ میرا اپنا خیال ایہہ وے کہ سیاست وچ پیر رکھن توں پہلاں مریم تے بلاول بھٹو زرداری نوں اپنے آل دوالے تھوڑا جیہا ماضی دی سیاست دا وی پتہ ہونا چاہیدا سی۔ دوہاں رہنماواں نے سیاست نوں بالکل فری سٹائل دی شکل دتی ہوئی سی۔ اپنے مدمقابل پی ٹی آئی دے چیئرمین نوں ہدف تنقید بنانا آپ تہاڈا حق سی پر کشمیر ویچن تے عمران خان نوں نریندر مودی نال ملا دینا ایہ اوہ بیانیہ سی جہنوں کشمیر دے لوکاں نے رد کر دتا اے۔ پیپلزپارٹی آزادکشمیر نے اک سیٹ‘ مسلم کانفرنس آزادکشمیر دے سردار عتیق اک سیٹ حاصل کر سکے جد کہ مسلم لیگ نوں اپنی ساری محنت تے رولے رپے دے باوجود اقتدار والی پارٹی ہون دے باوجود صرف چھ سیٹاں ملیاں جد کہ پیپلزپارٹی جہدے کول پہلے اٹھ سیٹاں سن اوہ اوہناں نوں یاراں تک لے جان وچ کامیاب ہوئی جد کہ پی ٹی آئی نوں چھبی سیٹاں مل گئیاں نیں۔ ایس طرح پی ٹی آئی حاصل کردہ سیٹاں دے نال سادہ اکثریت نال حکومت بنان وچ کامیاب ہو چکی اے۔ الیکشن توں پہلاں تے ایس الیکشن دے دن کئی ناخوشگوار واقعات وی ریکارڈ دا حصہ بن چکے نیں۔ خاص طور تے مسلم لیگ (ن) دی گوجرانوالہ سیٹ توں امیدوار اسماعیل گجر نے اپنا انتخابی کیمپ پٹے جان تے تلملا کے ایہ بیان داغ دتا کہ جے مینوں الیکشن وچ ہران دی کوشش کیتی گئی تے میں مدد لئی بھارت نوں سد لواں گا۔ ایسے طرح وزیراعظم آزادکشمیر راجہ فاروق حیدر نے شام نوں رزلٹ آن دے بعد ایہ بیان جڑ دتا کہ آزادکشمیر دے عوام تن سو سالہ غلامانہ ذہنیت چوں باہر نہیں نکل سکے جد کہ مسلم لیگ (ن) دے قائد نوازشریف دی الیکشن توں دو دن پہلاں لندن وچ افغانستان دے نیشنل سکیورٹی چیف حمداللہ محب دیاں فوٹواں وی چھپ گئیاں یاد رہوے کہ محب نے پاکستان دے خلاف ہرزہ سرائی کیتی سی جہدے پاروں حکومتی پالیسی دے تحت اوہدا بائیکاٹ کرن دا اعلان کیتا گیا سی۔ پاکستان دے دشمناں نال قائد (ن) لیگ میاں نوازشریف دی ایس ملاقات نوں قومی سطح تے سراہیا نہیں گیا تے اک عام آدمی تے ووٹر تے ایہدے منفی اثرات پئے نیں۔ سیاست بڑا حساس سبجیکٹ اے تے بندے دی اک چھوٹی جہی غلطی لڈو دے سپ وانگوں اوہہنوں کدھرے دا کدھرے اپڑا دیندی اے۔ ایہدے وچ کوئی شک نہیں کہ ڈسکہ دا الیکشن مریم نوازشریف دی جارحانہ سیاست دی وجہ نال جتیا گیا پر ایہدے بعد مریم نوازشریف نے غیرضروری جارحانہ انداز اپنا کے اپنے آپ نوں ہردلعزیز سیاستداناں دی صف چوں کڈھ لیا اے۔
دوستو! ساڈے خطے دے لوک اپنے ہیرو نوں باوصف‘ باکردار تے محبت بھرا دل رکھن والے ہیرو دے روپ وچ ویکھنا پسند کردے نیں تے آزادکشمیر دے حالیہ الیکشن وچ ملک دیاں دوہاں وڈیاں سیاسی پارٹیاں دی مرکزی لیڈرشپ ایہ تاثر دین وچ نکام رہی جہدا لامحالہ فائدہ سیاسی طور تے بھنور وچ پھسی ہوئی تحریک انصاف نوں ہویا۔ پر ایس اک چانس نوں عمران خان نے مس ہون نہیں دتا تے میدان مار لیا۔ میری بیرسٹر سلطان محمود چوہدری‘ وزیراعظم عمران خان تے پی ٹی آئی قیادت نوں الیکشن جتن تے دلی مبارکباد جد کہ پیپلزپارٹی وچ میرے سابق ساتھی تے دوست چوہدری یاسین‘ لطیف اکبر تے دوجے رہنماواں نوں الیکشن جتن تے دلی مبارکباد دینا واں۔ الیکشن دیاں گلاں تے الیکشن تنازعے کنڈ پچھے سٹ کے ہن سانوں اگے ول ویکھنا ہووے گا نہیں تے سرحد پار ساڈا مکار دشمن ساڈی کسے چھوٹی جہی کوتاہی نوں کیش کروا کے کھیڈ دا پاسہ پرت سکدا اے۔ افغانستان وچ پاکستان دے خلاف زہرافشانی کرن والیاں دی گل کیتی جاوے تے صدر اشرف غنی‘ نایب صدر امرصالح تے افغان مشیر حمداللہ محب سب توں اگے نظر آئوندے نیں۔ پچھلے دیہاڑیاں ازبکستان وچ وزیراعظم عمران خان دے ہتھوں شنگھائی تعاون تنظیم دے اجلاس وچ جھوٹے بیان دین تے افغان صدر تے نایب صدر دی دھلائی ہوئی سی۔ اشرف غنی نے الزام لایا سی کہ پاکستان توں طالبان دی مدد لئی دس ہزار جنگجو افغانستان وچ داخل ہوئے نیں۔ امرصالح نے بے وزن‘ بے تکی‘ مضحکہ خیز گل کیتی سی کہ پاک فضائیہ نے افغان حکومت نوں دھمکی دتی اے کہ طالبان نے سپن بولدک تے قبضہ کیتا اے۔ اوہنوں چھڑان لئی طالبان تے افغان فضائیہ نے حملے کیتے تے پاک فضائیہ ایہدا جواب دیوے گی۔ کسے وی ملک ولوں اجہے بیان اداریاں ولوں نہیں آئوندے۔ ریاست ولوں آئوندے نیں۔ امراللہ صالح اپنے بیان دے حق وچ کوئی ثبوت پیش نہ کر سکے۔٭٭