پردے پچھے کیہ ہو رہیا ے؟

ارشد وڑائچ

اک وزیراعظم ہون دے ناطے حزب اختلاف دی الزام تراشیاں دا جواب دینا تہاڈا کم نہیں۔ تسیں بھل جاندے او کہ تسیں کنٹینر تے نہیں کھڑے۔ تسیں وزیراعظم او۔ مخالفاں نوں منہ بھن جواب دین لئی تسیں منہ منگیاں تنخواہواں تے معاوضیاں دے بدلے مشیراں‘ خصوصی معاونین تے ایڈوائزراں دی ظفرموج رکھی ہوئی اے۔ حزب اختلاف دے ارکان نوں اٹ دا جواب پتھر نال دین تے اوہناں دے دند کھٹے کرنا ظفرموج دا کم اے تہاڈا نہیں۔ وزیراعظم غصے وچ آ کے منہ تے ہتھ نہیں پھیدے منہ تے ہتھ پھیر کے کسے نوں نہیں دھمکاندے۔ ایس لئی تساں نٹ کھٹ ورگے تیز طرار مشیر‘ معاونین تے ایڈوائزر رکھے ہوئے نیں۔ تسیں اوہناں نوں اوہناں دا کم کرن دیو۔ اوہ اپنا کم بڑی ایمانداری تے لگن نال کر رہے نیں۔ اوہناں نے حزب اختلاف دے اراکین نوں چھٹی دا ددھ یاد دوا دتا اے۔ اوہناں نوں منہ تے ہتھ پھیرن دیو۔ تسیں اپنا اصلاحی کم جاری رکھو۔ تہاڈے کول باقی دے ڈھائی ورھے رہ گئے نیں۔ ایس قوم نوں تبدیلی لیا کے وکھائو۔ کدھرے انج نہ ہووے کہ باقی رہندے ڈھائی ورھے وی تسیں پہلے ڈھائی ورھیاں وانگوں چور ڈاکو دا کھیڈ کھیڈن وچ ضائع کر دیو۔ 72 ورھیاں توں اساں ہر نویں آن والے حاکم نوں پچھلے حاکم نوں چور ڈاکو تے کرپٹ کہندے سنیا اے۔ تسیں تے تہاڈے نٹ کھٹ ایڈوائزراں نے 72 سالہ روایت نوں تقویت بخشی اے۔ یقین کرو تہاڈے جان دے بعد آن والا حاکم وقت تہانوں وی چور ڈاکو کہندا رہوے گا۔ فقیر کدی کدی سوچدے نیں کہ ایہ قوم کیہ اینی گئی گزری اے کہ 72 ورھیاں توں چور ڈاکوئواں نوں ووٹ دے کے اپنا حاکم بناندی رہی اے؟ ایہ سوچن دی گل اے۔ کوئی بندہ اپنی مرضی نال ساڈا حاکم نہیں بن دا۔ اسیں پاکستانی اوہدے حق وچ ووٹ دے کے اوہنوں اپنا حاکم بنانے آں۔ ایس منطق دا مطلب اے کہ پوری پاکستانی قوم چور تے ڈاکوئواں تے مشتمل اے۔ اجہی کریمنل قوم چوراں تے ڈاکوئواں نوں اپنا حکمران بناندی اے۔ پاکستانی حکمراناں نوں اک دوجے تے گھٹیا الزام تراشی کردے ہوئے سوچنا چاہیدا اے کہ اوہ بلاواسطہ پاکستانی قوم دی بے عزتی کر رہے نیں۔ 72 ورھیاں توں اک دوجے نوں چور ڈاکو کہن والے حکمران لائے ہوئے الزام ثابت کرن وچ نکام رہے نیں۔ میاں نوازشریف نوں وزیراعظم دے منصب توں ایس لئی ہٹایا گیا سی کہ اوہنے اپنے پُتر توں تنخواہ نہیں سی لئی۔
تہانوں اقتدار وچ آئے ڈھائی ورھے ہو گئے نیں۔ تہانوں ہن تک یقین کیوں نہیں آئوندا کہ تسیں ملک دے وزیراعظم بن چکے او۔ سرکار تسیں پچھلے ڈھائی ورھیاں توں ایس ملک دے وزیراعظم او۔ ایس منصب تک اپڑن لئی تساں بڑی جانفشانی کیتی اے۔ ویہہ پنجی ورھے سرکار تساں سیاست دے صحرا وچ صحرانوردی کیتی اے۔ اپنے مقصد تے منصب دے حصول لئی تساں کنٹینر نوں اپنا مسکن بنا دتا۔ ایہ کوئی معمولی گل نہیں۔ ایہ اک تریخی کارنامہ اے۔ دنیا صدیاں تک تہاڈی تے تہاڈی قربانی دی مثال دیوے گی۔ اپنے منصب لئی اپنا گھر بار‘ اپنے بال بچے چھڈ دین توں وڈی ہور کیہ قربانی ہو سکدی اے؟ بے سمجھ لوک تہانوں نہیں سمجھ سکدے۔ تساں ٹھیک ای کہیا اے کہ تسیں لوک مینوں نہیں جان دے۔ تہاڈا جملہ ملک بھر دے میرے ورگے فقیراں نوں چنگا لگا سی۔ اسیں فقیر باخبر آں کہ تسیں کون او۔ تسیں ساڈے وزیراعظم او۔ پاکستان دی مکمل تریخ وچ کسے نے وزیراعظم بنن لئی اینی محنت تے جدوجہد نہیں سی کیتی جنی جدوجہد تساں کیتی اے پر سرکار تسیں آپ بھُل جاندے او کہ تسیں وزیراعظم بن چکے او۔ تسیں اجے تک اپنے آپ نوں کنٹینر تے کھلوتا محسوس کردے او۔
تسیں ایس قوم نوں بھتہ خوراں دے عذاب توں نجات دوائو۔ 72 ورھے توں بھتہ خور غریب‘ مسکین تے بے یارومددگاراں دا لہو چوسدے رہے نیں۔ بھتہ خور حکومتاں توں ودھ طاقتور نیں۔ کسے حاکم وچ ایناں دم خم نہیں ویکھیا کہ جو بھتہ خوراں دے چھتے وچ ہتھ پا سکے۔ تسیں کوئی کرشمہ کرکے وکھائو۔ بھتہ خوراں دے نیٹ ورک تے ہتھ پائو۔ ایہ چھ ست کروڑ مسکیناں دی روزی روٹی تے عزت نفس دا سوال اے۔ اپنے اقتدار دے آخری ڈھائی ورھے سپھل کرو۔ تسیں ڈھائی ورھیاں وچ غریباں لئی پنجاہ لکھ مکان نہیں بنا سکدے۔ ملک دے اقتصادی حالات نوں سامنے رکھدے ہوئے چھیتی طور تے پنجاہ لکھ تے کیہ تسیں پنجاہ مکان نہیں بنا سکدے۔ اک کروڑ بیروزگاراں نوں روزگار نال جوڑنا امکان توں باہر اے پر ایہناں ڈھائی ورھیاں وچ تسیں بھتہ مافیا دا خاتمہ کر سکدے او۔ بھتہ خوری نوں تسیں جڑوں پٹ کے چھ ست کروڑ روزی روٹی کمان لئی گلی کوچیاں وچ دھکے کھان والے مسکیناں نوں عزت نال روزی کمان تے جیوندا رہن دا حق دوا سکدے او۔ ایہ تہاڈے لئی بالکل ممکن اے۔ تہاڈے کول وسیلے نیں‘ ادارے نیں۔ چھ ست کروڑ لوکاں نوں بھتہ خوراں توں آزادی دوائو۔ اگلے کالم وچ تہانوں اک ہور بڑے طاقتور مافیا دے بارے دساں گا۔ ہر حکومت اوہناں تے ہتھ پان توں کتراندی اے۔٭٭