پنجاب حکومت دے 3 سال پنجاب معاشی لحاظ نال ٹیک آف کر چکیا

اسد شہزاد

بزدار حکومت دے 3 ورہے مکمل ہو گئے۔ کامیابی ترقی تے خوشحالی دے رستیاں اُتے چلدا پنجاب اج پاکستان دی وڈی اواز دے نال رواں دواں اے۔ 3 سال پہلاں جس حالت وچ پنجاب عثمان بزدار دے حوالے کیتا گیا ایس ویلے پنجاب نہ صرف قرضیاں تھلے دبیا ہویا سی ، سارے ادارے اپنے آپ نوں غیر محفوظ تصور کر رہے سن، کوئی ذمہ داری لین نوں تیار نہیں سی۔ عثمان بزدار دے حلف چکدے ای ایہناں دے خلاف بڑے الزامات لائے گئے کرپشن توں لے کے ذاتیات نوں وی نہیں بخشیا گیا۔ ایہہ سارے حالات بھانویں عثمان بزدار لئی خلاف معمول تے ہو سکدے سن پر ایہہ بہادر بندا نہ جھکیا، نہ وِکیا، نہ بولیا، ہولی ہولی کامیابی دا عزم لئے کے ٹُردا رہیا۔ اوہناں نے سب توں پہلے اپنی اک بہترین ٹیم تشکیل دِتی۔ عمران خان وزیراعظم پاکستان دے عزم تے ویژن نوں لئے کے ٹُرے تے فیر پنجاب دی ترقی دے رستیاں اُتے ڈائیونگ سیٹ سنبھالدے ہوئے پوری سپیڈ دے نال صرف’’ کام ، کام اور صرف کام‘‘ نوں اپنا مشن بنا لیا۔ مشن کیہ سی؟ پنجاب نوں خوشحال بنانا، اوہ بھانویں صحت، تعلیم، زراعت ہوئے ایہناں سارے شعبہ جات وچ جدید اصلاحات لیان دے نال نال ایہناں دے منصوبیاں نوں عملی شکل دینا وڈا امتحان سی۔ پاکستان دا سب توں وڈا صوبہ ہون دے ناطے سابقہ حکومت دی ارباں روپئے دی کرپشن توں پاک کرنا وی اک مشن سی۔ پچھلے 3 سالہ کارکردگی دا جائزہ اگلے کالماں وچ لیا جائے گا ایہہ حقیقت اے کہ اوہ ای قوماں زندہ رہندیاں نیں ، اوہ ای قوماں خوشحال ہوندیاں نیں، اوہ ای قوماں ترقی دے زینے طے کردیاں نیں، اوہ ای قوماں صدیاں دا سفر طے کردیاں نیں جنہاں دے حکمراناں دے قوم نوں دِتے ویژن مضبوط ہوندے نیں۔ عمران خان دی قیادت وچ پاکستان دی تاریخ وچ پہلی وار پاکستان اپنی صحیح سمت اُتے چڑھیا اے۔ عمران خان دی وڈی خوبی ایہہ وے کہ اوہ کرپٹ نہیں بلکہ ایس نے سابقہ کرپٹ حکومت اُتے نہ صرف ہتھ پایا بلکہ ایہناں نوں قانون دے شکنجے وچ لیاندے ہوئے جیلاں وچ پایا۔ ایہو نہیں عمران خان نے قوم نوں جتھے اک بہترین لیڈر شپ دِتی، جتھے قوم تے ملک نوں وڈے بحراناں توں کڈیاں اوتھے خاص کر پنجاب نوں اک اِنج دا حکمران دتا جس نے ثابت کر دتا کہ ایمان، جذبہ تے نیت صاف ہوئے تے فیر وڈی توں وڈی مشکل تے وڈے توں وڈے بحراناں دا مقابلہ کماں تے ویژن دے نال کیتا جا سکدا اے۔ بزدار حکومت دے تن کامیاب سال پاکستان دے 74 سالہ تاریخ وچ سنہرے حروف وچ پڑھے جا رہے نیں۔ اج پنجاب دے کسے ادارے نوں لے لوو اوتھے بہتری ای بہتری وکھائی دے رہی اے تے اوہناں نے عوام دی خدمت وچ دن رات اک کردے ہوئے اپنے آپ دی نمائش نہیں کیتی شہباز شریف دی طرح ارباں روپئے اپنی ذات تے مشہوری اُتے نہیں لائے، جتھے بچت کیتی اوتھے خوبصورت مثالاں قائم کیتیاں۔ بیورو کریسی توں تھانہ کلچر تیکر نوں بدل کے رکھ دتا۔ پورے پنجاب دے ہنگامی دورے کر کے سارے منصوبیاں نوں بروقت مکمل کرایا۔ گرین پنجاب دے منصوبے اُتے عمل درآمد کرایا۔ ہیلتھ کارڈ توں لے کے غریب دے بچے نوں مفت تعلیم دین تیکر دا سفر تے خاص کر کرونا دی تناں لہراں دے دوران جدوں ہر پاسے موت دے سائے سن، بزدار حکومت نے دن رات اک کر کے ویکسین لگوان دے عمل نوں تیز کردے ہوئے ہزاراں زندگیاں نوں محفوظ کیتا۔ ویلڈن بزدار حکومت۔
تندی بادِ مخالف سے نہ گھبرا اے عقاب
یہ تو چلتی ہے تجھے اونچا اُڑانے کے لیے
بزدار حکومت دے 3 سال پاکستان دی تاریخ دے اوہ سنہرے سال نیں جس نال نہ صرف پاکستان بلکہ پنجاب محفوظ ہو گیا۔ عثمان بزدار پنجاب دے پہلے حکمران نیں جنہاں نے نہ صرف سیاسی خاندان دے برج الٹے، کرپشن دا خاتمہ کیتا بلکہ موروثی سیاست نوں جڑ توں اکھاڑ دتا تے نوجوان نسل نوں قیادت فراہم کردے ہوئے سیاست دے نویں دروازے کھول دتے تے آن والے انتخابات وچ پنجاب دی سیاست دا انداز وی بدلیا بدلیا نظر آئے گا ۔