انصاف امداد پروگرام دے تحت 10 ارب تقسیم کیتے گئے عوام دوست وزیر اعلیٰ

تمام اضلاع واسطے 360 ارب روپے دے ڈسٹرکٹ ڈویلپمنٹ پیکج دا اعلان

جاوید یونس

وزیراعلیٰ عثمان بزدار دا کہنا اے کہ وزیراعظم دی قیادت وچ معاشی ٹیم دی محنت دی بدولت پاکستان معاشی لحاظ نال ٹیک آف کر چکیا اے۔ اپنے اک بیان وچ وزیراعلیٰ پنجاب عثمان بزدار دا مزید کہنا اے کہ وقت دے نال نال معیشت مضبوط ہو رہی اے تے کاروباری سرگرمیاں وچ تیزی آئی اے۔ سابق حکمراناں دی غلط پالیسیاں دی وجہ نال معیشت تباہ ہو گئی سی۔ وزیراعظم عمران خان تے ایہناں دی ٹیم نے معیشت نوں درست کرن لئی ٹھوس اقدامات کیتے۔ وزیر اعلیٰ پنجاب سردار عثمان بزدار نے پچھلے تن ورھیاں وچ ہر طرح دے دبائو دا ساہمنا کر کے تے بوہت زیادہ مشکلاں دے باوجود پنجاب دے وسائل نوں سارے ضلعیاں لئی مساوی انداز وچ تقسیم کر کے صوبے دے عوام نوں اپنائیت دا احساس دلوا کے اپنے لیڈر تے وزیراعظم دے انتخاب نوں درست ثابت کر دتا۔ عثمان بزدار نے اپنی ٹیم تے اتحادی جماعتاں نال رَل کے صوبے وچ حکمرانی دا صحیح معنیاں وچ عوام دوست انداز متعارف کرایا اے۔ وزیراعلیٰ عثمان بزدار دی تن سالہ کارکردگی ویکھ کے ناقدین وی اپنی رائے بدلن اُتے مجبور ہو گئے نیں۔ اوہناں نے ذاتی تشہیر توں بالا تر ہو کے عوام دی خدمت دی پالیسیاں دتیاں نیں جنہاں دے ثمرات ساہمنے آ رہے نیں۔ اوہ بیان بازی دی بجائے عمل اُتے یقین رکھدے نیں جمہوری طرز حکومت وچ ریاست دی ذمہ داری نسبتاً زیادہ اہمیت دی حامل ہوندی اے۔ جمہوریت دا حسن اے کہ سارے شہری برابری دی حیثیت رکھدے نیں تے عوامی خدمت حکومت دا سب توں وڈا مقصدہوندا اے تے وزیراعلیٰ عثمان بزدار ایس اُتے پورے اتردے نیں۔ بزدار حکومت صوبے دے سارے عوام خواہ ایہناں دا تعلق کسے وی علاقے نال ہوئے دی فلاح و بہبود، ترقی و خوشحالی لئی بلاامتیاز اقدامات کر رہی اے۔ وزیراعلیٰ نے کہیا کہ اج جس مقام اُتے اپڑ چکے آںتے جیہڑے اہداف حاصل کر چکے آں ایس دا کریڈٹ میرے قائد وزیراعظم عمران خان دی غیر متزلزل قیادت نوں جاندا اے۔ وزیراعلیٰ نے کہیا کہ تن سال پہلاں پاکستان تحریک انصاف نوں صوبہ پنجاب دے عوام دی خدمت دا موقع ملیا۔ سانوں نامکمل وزیرآباد انسٹیٹیوٹ آف کارڈیالوجی، نامکمل اورنج لائن میٹرو ٹرین، نامکمل تریموں تھرمل، پاک پتن ہائیڈرو تے مرالہ پاکستان کڈنی اینڈ لیور انسٹیٹیوٹ دے علاوہ کئی نامکمل منصوبے ورثے وچ ملے۔ کرونا دی وبا دے دوران حکومت پنجاب دے جامع اقدامات دی بدولت کرونا دی وبا اُتے موثر انداز وچ قابو پایا گیا۔ بزدار حکومت نے غریب تے مستحق بندیاں لئی احساس پروگرام دا آغاز کیتا جس دی ماضی وچ کوئی مثال نہیں ملدی۔ ماضی دے حکمراناں نے غریب بندے نوں صرف طفل تسلیاں دتیاں عملی اقدامات نہیں کیتے جد کہ پی ٹی آئی دی حکومت نے جیہڑے وعدے کیتے سن ایہناں نوں پورا کر رہی اے۔
بزدار حکومت نے 53 ارب روپئے نال پنجاب احساس پروگرام دا آغاز کیتا اے جس دے تحت پورے صوبے وچ 94 پناہ گاہواں قائم کیتیاں گئیاں نیں ایس دے علاوہ لنگر خانیاں دے قیام دے منفرد تے تاریخی پراجیکٹس شروع کیتے نیں۔ انصاف امداد پروگرام دے تحت اڑھائی لکھ خانداناں نوں 10 ارب روپئے دتے گئے نیں۔ زکوۃ دی مد وچ 4 ارب 7 کروڑ روپئے دی وڈی رقم نال 3 لکھ خانداناں دی مدد کیتی گئی۔ کرونا دے دوران ڈیوٹی کرن والے فرنٹ لائن ورکراں نوں سپیشل الائونس دتا گیا۔ حکومت پنجاب کنسٹریشن انڈسٹری دی ہر ممکن مدد کر رہی اے۔ پنجاب وچ پہلے توں 12 سیمنٹ پلانٹس سن تے سابقہ حکومت نے اک وی نواں سیمنٹ پلانٹ نہیں لایا جد کہ موجودہ حکومت نے تن سال وچ 10 سیمنٹ پلانٹس دی تنصیب لئی این او سی جاری کیتے نیں تے مزید 10 پلانٹس دی منظوری دا عمل تیزی نال مکمل کیتا جا رہیا اے۔ حکومت نے گھٹ آمدنی والے طبقے نوں اپنی چھت فراہم کرن لئی کئی منصوبیاں دا آغاز کیتا اے۔ لہور وچ 25 ہزار اپارٹمنٹس تعمیر کیتے جان گے تے پہلے مرحلے وچ 4 ہزار فلیٹس بنائے جا رہے نیں جد کہ پنجاب دی 146 تحصیلاں وچ پیری اربن افورڈ ایبل سکیم دے تحت گھر دتے جان گے تے فیز ون وچ 37 تحصیلاں وچ 10 ہزار بنائے جا رہے نیں جیہڑے ایسے سال مکمل کر لئے جان گے۔ پی ٹی آئی حکومت سارے علاقیاں دی یکساں ترقی اُتے یقین رکھدی اے ایہو وجہ اے کہ سارے ضلعیاں لئی 360 ارب روپئے دا ڈسٹرکٹ ڈویلپمنٹ پیکج رکھیا گیا اے جس نال ماضی وچ نظر انداز کیتے گئے پسماندہ علاقیاں وچ وی ترقی و خوشحالی دے نویں باب کھلن گے تے لوکاں دا معیار زندگی وی بلند ہوئے گا۔
پنجاب واحد صوبہ اے جتھے سارے بھٹیاں نوں زگ زیگ ٹیکنالوجی اُتے منتقل کر دتا گیا اے لہور وچ 200 ماحول دوست الیکٹرک بساں چلائیاں جان گیاں۔ ایئر کوالٹی مانیٹرنگ سسٹم تے انوائر منٹ مانیٹرنگ سینٹرز دا عمل لیایا گیا اے۔ 3 سال وچ مزدور دی ماہانہ اجرت 20 ہزار تیکر اپڑ گئی اے موجودہ حکومت نے مزدور دی اجرت وچ 33.3 فیصد وادھا کیتا نویں لیبر ہائوسنگ الاٹمنٹ پالیسی 2021 دا نفاذ کیتا گیا تے مزدوراں نوں پہلی وار مالکانہ حقوق اُتے گھر دتے جا رہے نیں۔ سابق حکمراناں نے 10 سال حکومت کیتی پر مزدور دی گھٹ توں گھٹ اجرت 15 ہزار توں نہ ودھ سکی۔ بے روز گار نوجواناں نوں باعزت روزگار دے موقعے فراہم کرن لئی بنک آف پنجاب دے مالی اشتراک نال 30 ارب روپئے نال پنجاب روزگار پروگرام دا آغاز کر دتا گیا اے۔ حکومت پنجاب نے تعلیمی اداریاں نوں سولر اُتے منتقل کرن لئی اک جامع پلان مرتب کیتا اے تے 10750 پرائمری سکولاں نوں سولر اانرجی اُتے منتقل کیتا جا رہیا اے۔ لیہ چوبارہ وچ 100 میگاواٹ دا سولر پراجیکٹ لایا گیا اے جس وچ 3.2 Unitpercent دے نرخ اُتے معاہدہ کیتا گیا اے جد کہ پچھلے دور حکومت وچ unitpercent 14 دے نرخ اُتے سولر انرجی دے معاہدے کیتے گئے۔ پنجاب نے ہمیشہ وڈے بھرا دا کردار ادا کردے ہوئے دوجے صوبیاں دی ہر ممکن مدد کیتی اے۔ بزدار حکومت بین الصوبائی ہم آہنگی دے فروغ لئی کوشاں اے حال ای وچ پنجاب وچ دوجے صوبیاں دے کلچر ڈے منائے گئے نیں۔
حکومت پنجاب بلوچستان وچ ہسپتال، ٹیکنیکل کالج تے ریسکیو سروسز دی فراہمی، ریسکیو ٹریننگ تے وال سٹی دی خدمات کر رہی اے ایسے طرح بلوچستان، کے پی کے تے گلگت بلتستان نوں ایمبولینس تے طبی آلات فراہم کر رہی اے۔ ریسکیو 1122 دے زیر اہتمام کے پی کے، بلوچستان، آزاد جموں کشمیر تے گلگت بلتستان دے 1456، ریسکیو اہلکاراں نوں پیشہ وارانہ ٹریننگ فراہم کیتی گئی ۔ حکومت پنجاب نے صحت دے ترقیاتی بجٹ وچ 185 فیصد مجموعی وادھا کیتا اے۔ ہائر ایجوکیشن وچ 286 فیصد وادھا، زراعت وچ 306 فیصد وادھا، صنعت دے بجٹ وچ 307 فیصد، مینار نیز دے بجٹ وچ 400 فیصد و انرجی ڈیپارٹمنٹ دے ترقیاتی بجٹ وچ 56 فیصد، آبپاشی دے ترقیاتی بجٹ وچ 76 فیصد، سی اینڈ ڈبلیو وچ 120 فیصد لائیو سٹاک وچ 194 فیصد تے لوکل گورنمنٹ دے بجٹ وچ 102 فیصد وادھا کیتا گیا اے جیہڑا کہ اک بوہت وڈا جمپ اے۔حکومت نے پورے صوبے دے سارے خانداناں نوں طبی سہولتاں دی فراہمی لئی یورنیورسل ہیلتھ انشورنس پروگرام دا آغاز کیتا اے جس دے تحت ہر خاندان نوں 7 لکھ 20 ہزار روپئے سالانہ تیکر دے علاج معالجہ دی معیاری سہولتاں مفت میسر ہون گیاں۔ 31 دسمبر تیکر ساڑھے 11 کروڑ عوام نوں ایہہ سہولت میسر ہو جائے گی۔ پی ٹی آئی دی حکومت دے پہلے تن سال وچ 32 ہزار ڈاکٹرز تے پیرا میڈیکل سٹاف بھرتی کیتے نیں جد کہ پچھلی حکومت دے پہلے تن سال وچ 18 ہزار بھرتیاں کیتیاں گئیاں۔ پنجاب واحد صوبہ اے جس دا ٹیکس ریونیو ٹارگٹ کرونا کرائسز دے باوجود سرپلس وچ چلا گیا اے۔ وزیراعلیٰ پنجاب نے دسیا کہ ساڈی حکومت دے تیجے سال وچ لہور نوں 86 ارب روپئے دے رہے آں۔ لہور دی تیزی نال ودھدی ہوئی آبادی دے پیش نظر لہور نوں انتظامی لحاظ نال تقسیم کیتا جائے گا۔ لہور وچ سرفیس ویسٹ واٹر ٹریٹمنٹ پلانٹ تے بارش دے پانی نوں محفوظ کرن لئی انڈر گرائونڈ ٹینکس بنائے جا رہے نیں دیگر منصوبیاں وچ دلکش لہور، اک ہزار بیڈ دا نواں جنرل ہسپتال، گنگارام ہسپتال وچ مدر اینڈ چائلڈ بلاک، چلڈرن یونیورسٹی، 25 ہزار اپارٹمنٹس، شاہکام تے شیرانوالہ ہیڈ برج شامل نیں ایسے طرح گلاب دیوی چوک وچ انڈرپاس بن رہیا اے۔ وکلا لئی ٹاور، ٹھوکر نیاز بیگ اُتے عالمی معیار دا بس ٹرمینل، فوڈ اینڈ ڈرگ لیبارٹری تے لوکل گورنمنٹ اکیڈمی وی لہور وچ ای بن رہی اے۔ سروس ڈلیوری نوں بہتر بنان لئی ایل ڈی اے دے دائرہ کار نوں اک وار فیر لہور تیکر محدود کیتا جا چکیا اے۔
پنجاب لوکل گورنمنٹ ایکٹ 2019 دے تحت لوکل گورنمنٹس بنائی گئی اے تاکہ لوکاں نوں مقامی سطح اُتے رسائی ہو سکے، بلدیات دے سارے Tiers ڈائریکٹ الیکشن دی بنیاد اُتے منتخب ہون گے۔ سارے 9 ڈویژنل ہیڈ کوارٹرز دے علاوہ گجرات تے سیالکوٹ نوں وی میٹرو پولٹین کارپوریشن دا درجہ دتا جائے گا۔ موجودہ حکومت نے قبضہ گروپاں دے خلاف بلاامتیاز کاروائی کردے ہوئے 458 ارب روپئے دی اک لکھ 50 ہزار توں ودھ ایکڑ اراضی بااثر بندیاں توں واگزار کرائی جس دی اک مثال جوہر ٹائون وچ سینکڑاں ایکڑ اراضی دا قبضہ چھڑوایاگیا۔ اینٹی کرپشن اسٹیبلمشمنٹ نے تن سال دے دوران 2 ارب 35 کروڑ دی ڈائریکٹ تے 26 ارب روپئے دی اِن ڈائریکٹر ریکوری کیتی گئی جد کہ پچھلی حکومت دے 10 سال وچ 43 کروڑ روپئے دی ریکوری کیتی گئی۔ وزیر اعلیٰ آفس سے اخراجات وچ 45 فیصد کمی کیتی گئی تے صرف اک وزیر اعلیٰ آفس رکھیا گیا جد کہ ماضی وچ 6 وزیر اعلیٰ آفس سن ۔ اِنج ای 3 سال وچ صوبائی کابینہ دے 46 اجلاس منعقد ہوئے جد کہ سابقہ حکومت دے پہلے تِن سالاں وچ صرف 19 اجلاس ہوئے۔ ایجوکیشن واسطے 442.1 ارب روپے مختص کیتے گئے نیں۔ اساتذہ واسطے پہلی ای ٹرانسفر، ای لیو، تے ای لیو ریٹائرمنٹ پالیسی نافذ کیتی گئی اے۔ ہُن اساتزہ گھر بیٹھ کے تبدیلی دی درخواست جمع کروا سکدے نیں تے ہُن تیکر 70 ہزار اساتذہ ایس پالیسی توں مستفید ہو چکے نیں۔ ایسے طرح 6 یونیورسٹیاں قائم کیتاں جا چکیاں نیں۔ ہور 9 یونیورسٹیاں دے قیام دی منظوری دِتی جا چکی اے تے ایس توں اَد وی 6 ہور یونیورسٹیاں بنائیاں جان گئیاں۔