رُوح دا چین ،مَن دی راحت ۔۔۔ سیر و سیاحت

رات مری مال جاگ کے گذاری تے شیرو دے دند وجّن لگ پئے،شیرو دا کانبا ویکھ کے
میں شیرو نوں مری مال بزاروں گرم چادر لے دِتی تے فیر کدرے جا کے منڈا سکون وچ آیا

وقار احمد وقار

زندگی دے نشیب و فراز کجھ انج دے ہندے نیں کہ انسان بوجھل ، افسردہ ، بے چین ، غمزدہ تے پریشان پریشان رہن لگ پیندا اے۔ بچّے ، جوان تے بڈھے سارے ای حالات دی چکی وچ پس جان دے بعد رُوحانی تے جسمانی طور اثرات قبول کردے نیں۔ کرونے دی خُود ساختہ تے غیر فطری جھوٹھی وبا عالمی طور متعارف ہو جان بعد فردِ واحد توں لے کے اجتماعی طور پنڈاں ، شہراں تے ملکاں دی حالت بھیانک انداز وچ تبدیل کر دتی گئی اے تے ہر پاسے طبیعتاں وچ چڑ چڑا پن تے بیزارگی ہُن عام اے تے ہر بندہ جیوندے جی مویا ای جاپدا اے۔ویکسینیشن لئی مجبور کرن دے عمل پاروں ذہناں وچ شکوک و شبہات ودھ گئے نیں تے ساڈا دین وی شک والی راہئے پین توں منع کردا اے پَر حکومت ڈانگ پھڑی پھردی اے ۔۔۔۔ کِیہ کریئے ؟؟؟
ساڈے ملک وچ سسٹم نام دی کوئی وی شے کدی وی قنونی طور نافذ نئیں رہئی کہ اساں بچپن توں لے کے ہُن تیک سبھ قصّے کہانیاں کتاباں وچ ای پڑھے نیں عملی طور اکھاں ساہمنے کوئی قابلِ فخر منظر سیاسی قیادتاں تے حکومتاں ولوں نئیں دِسیا ۔ اساں غلامی ویکھی اے ، غلامی پڑھی پڑھائی تے سکھی اے تے بڑے مان نال غلامی وچ ای چل سو چل کیتی پھردے آں کہ اج نام ریاستِ مدینہ دا چل رہئیا اے تے ہر کوئی اسٹیبلشمنٹ دے کوفے دا سسٹم ای قبول کر کے قومی زندگی گذار رہئیا اے۔ چھڈّو گل دُوجے پاسے ٹر پئی اے تے انج کم لمّا ہو جانا اے۔میں کہہ رہئیا ساں کہ زندگی دی مصروفیات پاروں ہر کوئی بیزار تے اکدوجے توں اکیا اکیا لگدا اے بلکہ چوکھے تے ہُن اپنے آپ توں وی تنگ محسوس ہندے نیں ۔میں آپ لہوروں اسلام آباد تبادلہ ہو جان بعد ہر ہفتے دے جبری پھیریاں توں تنگ اپنی طبیعت منفی طور بدلی بدلی محسوس کیتی اے شاید ایہ ای اوہ اصل تبدیلی اے جہڑی عمران خان ہُن تک لیان وچ کامیاب اے باقی سارے دعوے ای دعوے نیں جہڑے بغیر کسے دلیل دے اجے تک جاری و ساری نیں تے سانوں بیوقوف بنان دا عمل 2023 دے الیکشن تک انج ای رہنا اے۔ تبدیلی تے کرونے دے ایس دور وچ بیزارگی ایس حد تک ودھ گئی اے کہ بندے پہلاں بیزار ہون پاروں اکدوجے دے گل پئے جاندے ساہن تے ہُن تے بالکل ای تبدیل ہو کے اِک نکرے لگ کے چُپ بہہ گئے نیں۔ سکولاں دے غیر اعلانیہ طور با ر بار کھلن تے بند ہون پاروں بچّے وی اوازار ہو گئے نیں ۔ پچھلے ہفتے لہور گھر رہ کے وی بیزار تے اپ سیٹ وقت گذاریا تے اسلام آباد واپس آن لگیاں پہلی دفعہ دل کلیاں آن تے نئیں کیتا تے جدوں کسے ہور نوں نال لیان تے مجبور نہ کر سکیا تے مجبوراً اپنے بھتیجے شیروز حیدر المعروف فہد ( شیرُو Sheru ) نوں ای اپنے نال اسلام آباد لے آیا ۔شیرو دے نال ہون پاروں پہلی وار مینوں پردیس پردیس نئیں لگا تے ہن سمجھ آئی اے کہ سارا رولا اپنیاں دے نال نہ ہون دا اے بس نئیں تے جیسا دیس ویسا بھیس!!!
شیرو تے میں 26 جولائی 2021 بروز سوموار اسلام آباد پہنچے تے ناشتہ کرن بعد سدھا دفتر آ گئے۔شیرو دا انج میرے نال گھروں باہر کلیاں رہن دا ایہ پہلا کامیاب تجربہ سی۔ کجھ دیر دفتر دا کم کار کرن بعد شارٹ لیو لے کے سدھا مری مال تے دوپہر دا کھانا اوتھے ای کھاہدا تے فیر آوارہ گردی۔
پنڈی پوائنٹ تک پیدل گئے تے چیئرلفٹ دیاں ٹکٹاں لین بعد قطار وچ کھلو گئے۔قطار وچ پچھے کوئی ہور وی کھلوتا سی۔ شیرو نے اِک دو وار میتھوں پُچھیا وی کہ بڑے پاپا پچھے مُڑ مُڑ کیہ ویکھدے او ۔؟ کجھ دیر لین وچ لگن بعد چیئر لفٹ تے بیٹھن دی واری آ گئی تے میں تے شیرو جدوں چیئرلفٹ تے بیٹھن لگے تے کسے آواز لائی ۔۔۔احتیاط سے مطلب دھیان نال !!!
شیرو پُچھیا ایہ کس آکھیا اے کہ احتیاط سے۔؟؟؟ میں سُنی ان ُنی کر چھڈی ۔
چیئر لفٹ تے بیٹھے بیٹھے میں کئی کئی وار جدوں پچھلی چیئر لفٹ ول مُڑ مُڑ تکیا تے شیرو فیر پُچھیا کہ بڑے پاپا پچھے کیہ اے۔؟؟؟
میں بولیا یار شیرو انج تے کدی تیری تائی وی نگرانی نئیں کیتی جنج تُوں شروع کر دِتی اے۔؟؟؟
کہن لگا نئیں سچی دسّو کہ پچھے کیہ اے۔؟
میں دسیا یار پچھے تیری ماں دی سہیلی باجی شبانہ دا دِتا اوہ ای میہنہ اے کہ کرن مینوں تیرا جیٹھ ٹھیک نئیں لگدا۔!!!
کہندا کیہ مطلب ۔؟ میں بولیا یار تُوں سیر کر مطلب گھر جاکے ماں کولوں پچھدا رہویں کہ پتا نئیں لوکی ہر ہر تعلّق نوں اِکّو ای کھاتے وچ کیوں پَا دیندے نیں کہ مینوں تیرا جیٹھ ٹھیک نئیں لگدا ۔ ؟؟؟
شیرو بڑا زیادہ پُرجوش تے خُوش باش نظر آ رہئیا سی۔مری آن توں پہلے شیرو اسلام آباد تے راولپنڈی دیاں مشہور و معروف تھاواں ویکھ آیا سی تے کہہ رہئیا سی کہ سبھ نالوں چوکھا سواد مری آیا اے۔
٭
جو پچھلے جنم میں رہی ساتھ میرے
تمہیں کیا خبر حُور تھی یا پَری تھی
مَری نام اِس کا پڑا کب ہے یُونہی
خُدا کی قسم وہ یہیں پر مری تھی
٭
رات مری مال جاگ کے گذاری تے شیرو دے دند وجّن لگ پئے۔شیرو دا کانبا ویکھ کے میں شیرو نوں مری مال بزاروں گرم چادر لے دِتی تے فیر کدرے جا کے منڈا سکون وچ آیا۔
سیر سپاٹا بندے دے جسم دی گڈی دی ٹیوننگ تے سروس اے جہڑی بونہہ ضروری اے۔ کمپیوٹر ورگی جدید مشین نوں وی بار بار Re-Fresh دی کمانڈ دے دے کے تازہ دم رکھنا پیندا اے تے انسان نوں تے ایس سہولت دی زیادہ ضرورت اے۔
رات مری رہن بعد واپس اسلام آباد آنا پئیا کہ دفتر حاضری سی۔
د فتروں چھٹی کرن بعد کجھ دیر لئی ریسٹ کیتا تے فیر فیصل مسجد ، شکرپڑیاں ، امام بری سرکار حاضری تے دامنِ کوہ پھردے پھراندے مونال ویکھ آئے۔
شیرو رات رج کے نیند پوری کیتی تے اگلے دن کہن لگا اک واری فیر مری جانا اے مینوں وی شیرو دا انج فرمائش کرنا چنگا لگا تے اسیں اخ واری فیر مری پَر ہُن سدھا پتڑیاٹہ کیبل کار انجوائے کرن لئی جان دا سوچیا۔
سارا دن پتریاٹہ موج میلہ ویکھن بعد دوبارہ اسلام آباد آ گئے تے اگلے دن دفتر حاضری بعد واپس لاہور آن لئی فیصل موورز دے اڈّے تے ۔ شیرو جدوں واپس لہور اپڑیا تے مینارِ پاکستان ویکھ کے جذباتی انداز وچ بولیا کہ تایا پاپا بڑا مزا آیا اے پَر لہور ، لہور اے !!!
شیرو دی سیر دے بہانے میں آپ تازہ دم ہو گیا تے ایہ احساس جاگیا کہ سال وچ کم از کم دو دفعہ سیاحتی مقامات دا وزٹ ضروری اے کہ ایہ جھوٹھ نئیں جے کہ سیرو سیاحت رُوح دا چین تے من دی راحت اے۔