کشمیریاں تے اقلیتاں لئی بھارت دا مکروہ چہرہ

مقبوضہ کشمیر دے بارے وچ بھارت دے ارادے نیک نہیں ، اوہ لاک ڈائون تے کرفیو دیاں پابندیاں ختم کرن اُتے مائل نظر نہیں آندا

اسد اللہ غالب

بھارت نے اپنے آئین توں آرٹیکل 370 ختم کر کے اک طرح نال اپنے لئی قبر کھود لئی اے تے اپنی چتا لئی الائو بھڑکا لیا اے۔ آرٹیکل 370 دے تحت ریاست جموں و کشمیر نوں خصوصی حیثیت دا درجہ حاصل سی۔ دلی سرکار ایس دے امور وچ زیادہ مداخلت دی مجاز نہیں سی۔ کشمیر دی ایہہ حیثیت ایس ویلے توں چلی آ رہی اے جدوں توں انگریزاں نے ہندو مہاراجہ دے ہتھوں کشمیر ویچیا سی۔ انگریز سرکار نے وی ہمیشہ کشمیر دی خود مختاری دا احترام کیتا، پر نریندر مودی دی فاشٹ حکومت نے اپنے ای آئین نوں ذبح کر دتا۔ ایس نال کشمیر دی حیثیت تے متاثر ہوئی تے ایہنوں تن حصیاں وچ ونڈ دتا گیا پر کشمیر اُتے بھارت نے جیہڑا کلہاڑا چلا دتا اےایس دی وجہ نال بھارت دی 11 مزید ریاستاں نوں ایہہ خطرہ لاحق ہو گیا اے کہ بھارتی آئین دا آرٹیکل 370 تے ایس دی 11 ذیلی شقاں جیہڑی ایہناں نوں خصوصی حیثیت دیندیاں نیں، ایہناں نوں وی کشمیر والا ڈرامہ رچا کے کدھرے ختم نہ کر دتا جائے۔ بھارتی آئین دے آرٹیکل 370 دے تحت درج ذیل 11 ریاستاں نوں خصوصی درجہ حاصل اے:
1۔گجرات‘ 2۔آندھراپردیش‘ 3۔کرناٹکا‘ 4۔میزورام‘ 5۔سکم‘ 6۔ناگالینڈ‘ 7۔تامل ناڈو‘ 8۔گوا‘ 9۔مہاراشٹرا‘10۔آسام‘ 11۔گورکھالینڈ
ایہناں ریاستاں وچ تشویش دی اک انتہائی شدید لہر دوڑ چکی اے کہ نریندر مودی دا سامراج نہ جانے کدوں ایہناں دے حقوق وی سلب کرن لئی آ جائے۔ ایہناں وچوں کئی ریاستاں انج دیاں نیں جتھے آزادی تے علیحدگی دی تحریکاں چل رہیاں نیں تے ایہہ تحریکاں بھارت لئی درد سر بن گئی اے۔
ایہناں 11 ریاستاں دی تشویش توں توجہ ہٹان لئی امریکی وزیر خارجہ تیکر متحرک ہو چکے نیں تے اوہناں نے تبت دے نمائندیاں نال ملاقات کر کے اک نویں شرارت کھڑی کر دتی اے۔ دنیا مئی وچ ایہہ تماشا ویکھ چکی اے کہ لداخ دے محاذ اُتے کنگفوچاقوئواں نال کس طرح بھارتی فوجیاں دیاں لاشاں دا ڈھیر لایا جا چکیا اے۔ بھارت ہجے تیکر ایس ہار دا داغ نہیں مٹا سکیا۔ ایس نے امریکہ دی مدد نال چین دے اقلیتی مسلماناں نوں ابھارنا شروع کر دتا اے پر ایس محاذ اُتے امریکہ تے بھارت نوں ناکامی دا ساہمنا کرنا پیا۔ حال ای وچ طالبان دے اک وفد نے چینی حکومت نال مذاکرات کیتے نیں۔ طالبان نے اپنے میزباناں نوں یقین دلوایا کہ ایہناں دا انج دا کوئی ارادہ نہیں کہ اوہ چین دی مسلمان اقلیت دے حقوق لئی اواز بلند کرن۔ طالبان نے چینی حکومت نوں باور کروایا کہ اقلیتاں نال نبڑنا چین دا داخلی مسئلہ اے تے ایس وچ اوہ کوئی مداخلت نہیں کرن گے۔ دوجے پاسے تامل ناڈو، منی پور،میزورام،سکم،آسام تے گورکھا لینڈ وچ ورھیاں توں اآزادی تے علیحدگی دی اوازاں اٹھ رہیاں نیں۔ بجائے ایس دے کہ بھارتی حکومت اپنے ایہناں داخلی مسئلیاں نوں حل کردی تے علیحدگی پسنداں دے نال مذاکرات کر کے کوئی حل کڈدی، ایس نے الٹا شہریت دا اک قانون نافذ کر دتا اے جس دی رو نال اوہ کسے وی بھارتی باشندے دی شہریت کھوہ سکدی اے۔ بھارت نے جنہاں لوکاں دی شہریت کھوئی، ایہناں نوں یا تے کیمپاں وچ بند کر دتا گیا اے یا سرحد پار دھکیل دتا گیا اے۔ بھارت سمجھدا اے کہ اوہ اپنی جنگی مشینری دی طاقت نال ایہناں تحریکاں نوں دبا سکدا اے، پر ایہہ ایس دی وڈی بھُل اے۔
آزادی دی تحریکاں نہ اک رات وچ جنم لیندیاں نیں، نہ راتوں رات ختم کیتیاں جا سکدیاں نیں۔ کشمیر وچ شہادتاں دی تاریخ اک صدی اُتے پھیلی ہوئی اے۔ ہندو مہاراجہ نے کشمیریاں دے جذبہ آزادی نوں دبان لئی جبر و استبداد دا ہر رستہ اختیار کیتا، تقسیم ہند دے بعد بھارت نے جموں و کشمیر نوں ہتھیا لیا تے آزادی دی تحریک وچ وی تیزی آ گئی۔ بھارت نے مقبول بٹ نوں پھانسی دے کے شہید کیتا، سید علی گیلانی، شبیر شاہ، یاسین ملک نوں ورھیاں توں قید و بند دیاں مصیبتاں دا شکار کر رکھیا اے ایس نے نوجوان کشمیری حریت پسند برہان وانی نوں بے دردی نال شہید کیتا، ایس دی لاش نوں سری نگر دے گلی کوچیاں وچ گھمایا گیا، پر جدوں ایس دا جنازہ اٹھیا تے اک لکھ توں ودھ کشمیری مسلمان ایس دے جذبہ حریت نوں سلامی دین اپڑ گئے۔
الغرض بھارت اپنی بے پناہ فوجی قوت دے باوجود کشمیریاں دے جذبہ حریت نوں دبان وچ بُری طرح ناکام رہیا اے۔ کیونکہ کشمیری مردوزن اپنے آزادی دے ہیروز دے پیدا کردہ جذبیاں نال سرشار نیں۔ بڈھا علی گیلانی ایہناں دے دلاں وچ آزادی دی تڑپ نوں زندہ رکھدا اے تے نوجوان برہان وانی قربانی دی اک لازوال مثالتے زندہ و جاوید علامت بن چکیا اے۔ 5 اگست دے لاک ڈائون دے بعد بھارت دے پٹھو تے پالتو کشمیری عوام نال رابطے دا حق نہیں دتا جاندا۔ محبوبہ مفتی تے کھل کے کہندی اے کہ کشمیر وچ امن لیانا اے تے پاکستان نال گل بات دا عمل شروع کیتا جائے۔ بھارت نے کشمیریاں دے حقوق نوں جس بُری طرح پامال کیتا اے ایس اُتے کشمیر دی اجتماعی قیادت بھارت دے خلاف چیخ و پکار کر رہی اے۔
مقبوضہ کشمیر دے بارے وچ بھارت دے ارادے نیک نہیں ، اوہ لاک ڈائون تے کرفیو دیاں پابندیاں ختم کرن اُتے مائل نظر نہیں آندا۔ کجھ ہفتے پہلاں ایس نے کشمیر اُتے جہڑی آل پارٹیز کانفرنس منعقد کیتی، ایس دے اصل مقصد تے ہجے ساہمنے نہیں آئے پر تجزیہ نگار ایس گل اُتے متفق نیں کہ بھارت نے کشمیری قیادت وچ دراڑ پان دی کوشش کیتی کیوں جے ایس نے ایس کانفرنس وچ حریت کانفرنس دے لیڈراں نوں مدعو نہیں کیتا۔ بھارت نے اک لحاظ نال اپنے پٹھو کشمیری لیڈراں نوں لالچ دتا اے کہ اوہ وادی وچ الیکشن لڑن دی تیار کرن۔ ایہہ الیکشن ہجے ہوئے گا یا نہیں، ایس دے بارے وچ وی ہجے کجھ نہیں کہیا جا سکدا پر الیکشن دے نتیجے وچ ممکنہ طور اُتے جس بندے نوں وزیراعلیٰ بنایا جانا مقصود اے تے بھارتی میڈیا ایس دا ناں کثرت نال اچھال رہیا اے تے ایس دی خوب پبلسٹی کیتی جا رہی اے ایس دے گن گائے جا رہے نیں۔ بھارت نے کشمیر کانفرنس وچ نویں حلقہ بندیاں دا وی اشارہ دتا اے جنہوں کشمیری قیادت نے متفقہ طور اُتے مسترد کر دتا اے کشمیری قائدین دا کہنا اے کہ جدوں پورے ملک وچ حلقہ بندیاں دا عمل 2026 وچ ہونا اے تے فیر کشمیر وچ ای ایس قدر عجلت دا مظاہرہ کیوں کیتا جا رہیا اے۔ کشمیر دے علاوہ آسام وچ وی نویں حلقہ بندیاں دا فیصلہ کیتا گیا سی پر اوتھے عوامی احتجاج دے پیش نظر ایہہ فیصلہ واپس لے لیا گیا۔ ایس سارے مکروہ کھیڈ دے پیش نظر بھارت دا اک ای مقصد اے کہ اوہ کٹھ پتلی کشمیری قیادت دے ذریعے وادی وچ الیکشن کروا کے کشمیر دی تن حصیاں وچ ونڈ دے فیصلے اُتے مہر ثبت کروالوے، بھارت دی خوش بیانیاں تے خوش گمانیاں اپنی تھاں پر زمینی حقائق بھارت لئی ساز گار نہیں کیونکہ کشمیری عوام صرف حریت کانفرنس دی اواز اُتے ای لبیک کہندے نیں۔ اوہ شہادتاں قبول کردے نیں، سینیاں اُتے گولیاں کھاندے نیں۔ بھارتی فوج دے ٹارچر سیلاں وچ ٹارچر برداشت کردے نیں پر ایہناں دے پائے استقلال وچ ذرہ بھر لغزش نہیں آندی۔ کشمیری خواتین دیاں عزتاں برباد کیتیاں جاندیاں نیں۔ پیلٹ گناں توں معصوم کشمیری بالاں دی بینائی کھوہ لئی جاندی اے پر بھارت دی فاشٹ فوج کشمیریاں دیاں اکھاں وچ بلن والے آزادی و حریت دے دیپ گل کرن وچ مکمل طور اُتے ناکام ہو چکی اے۔ کشمیری عوام بھارتی شکنجے توں آزاد ہون دی آرزواں نال سرشار نیں تے اوہ ’’ کشمیر بنے گا پاکستان ‘‘نوں ہر صورت عملی جامہ پہنان دی خاطر اپنا لہو بہان لئی وی ہر ویلے تیار رہندے نیں۔