بھارتی فوجی درندیاں دے ہتھوں معصوم بالاں تے خواتین اُتے کیہ گزری؟
9 لکھ بھارتی فوجاں نے پوری ریاست نوں یرغمال بنا رکھیا اے
جی این بھٹ
کشمیریاں نوں مکمل طور اُتے بھارت دی غلامی دا طوق پائے دو ورہے مکمل ہو گئے نیں۔ پہلے 72 ورہے جیہڑی غلامی سی اوہ ادھوری سی پر ہن 5 اگست 2019 دے بعد جیہڑی غلامی نال اوہ کامل اے بھارت دے آئین وچ کشمیر نوں ناکام نہاد تے جبری الحاق دے باوجود آئینی دفعہ 370دے تحت اندرونی خود مختاری حاصل سی۔ ایس دے علاوہ آرٹیکل 335 دے تحت کشمیر وچ کوئی غیر کشمیر ڈومی سائل حاصل نہیں کر سکدا سی نہ جائیداد خرید سکدا سی۔ ہن نہ اوہ خصوصی حیثیت رہی نہ قانون ساز اسمبلی نہ جھنڈا رہیا نہ وحدت۔ لداخ نوں یک جنبش قلم بھارت نے براہ راست کشمیر توں علیحدہ کر کے دہلی دے کنٹرول وچ دے دتا تے جموں کشمیر نوں اپنی ریاست ڈکلیئر کر کے اقوام متحدہ تے سلامتی کونسل دے منہ اُتے اک زور دار تھپڑ مار دتا اے۔ عالمی ادارے عالمی طاقتاں، انسانی حقوق دی تنظیماں اک متنازعہ علاقہ دی جغرافیائی حیثیت بزور طاقت یکدم تبدیل کرن اُتے چپ نیں۔
ہن تے:
اے سلگتی ہوئی جنت میرے محبوب وطن
تیری شبنم پہ بھی اشکوں کا گماں ہوتا ہے
5 اگست 2019 دے بعد مقبوضہ کشمیر وچ مکمل لاک ڈائون تے کرفیو دی کیفیت اے۔ 9 لکھ فوج نے پوری ریاست نوں یرغمال بنا کے محصور کر رکھیا اے مواصلاتی نظام منقطع اے۔ انٹرنیٹ بند اے، ہسپتالاں وچ دوائیاں دی قلت تے کرونا نال ہزاراں مریض مر رہے نیں۔ خوراک دی قلت نال لوک پریشان نیں، مذہبی آزادی سلب کیتی جا چکی اے۔ جامع مسجد بند پئی اے۔ تراویح دی اجازت نہیں دتی گئی عید دے اجتماعات ممنوع رہے۔
ایس دے نال بھارتی فوج نے اپنے خصوصی ٹارگٹ دے تحت حکومت بھارت دی مرضی توں منظور شدہ پلان اُتے عمل درآمد شروع کر رکھیا اے روزانہ تن توں چار نوجواناں نوں مجاہد قرار دے کے شہید کیتا جا رہیا اے درجناں مکانات نوں بارود چھڑک کے دھماکے نال اڑایا جا رہیا اے۔ ایہہ سلسلہ پوری ریاست وچ جاری اے کدی کشتواڑ، کدی بھدروا، کدی شوپیاں، کدی انت ناگ، کدی کپواڑہ، کدی بارہ مولا، کدی ترال، کدی چرار شریف تے آئے دن سری نگر وچ جیہڑی قیادت ڈھائی جاندی اے اوہ سب ویکھ رہے نیں۔ ایس دے باوجود کشمیریاں دے حوصلے پست نہیں ہوئے۔اوہ ہر دن اک نویں سچ دھج دے نال مقتل نوں اپنے لہو نال رنگین کردے نیں تے بھارتی فوج دے ساہمنے ڈٹ جاندے نیں کیوں جے اوہ جان دے نیں بقول جوش ملیح آبادی۔
اے جنت کشمیر کے بیدار جوانوں
اے ہمت مردانہ کے ذی شان نشانوں
سو بات کی یہ بات ہے اس بات کو مانو
جینے کا جو ارمان ہے تو موت کی ٹھانو
بے غرق ہوئے کوئی ابھرتا ہی نہیں ہے
جو قوم پہ مرتا ہے وہ مرتا ہی نہیں ہے
صرف ایہو نہیں آفرین اے کشمیری مائواں، بھیناں تے دھیاں دے عزم و حوصلے اُتے جیہڑی اپنے باپ، پتراں، بھراواں دیاں شہادتاں اُتے گرفتاریاں اُتے خوفزدہ نہیں اوہ عزم و حوصلے دے نال ہر پریشانی تے دکھ درد دا مقابلہ کر رہیاں نیں۔ انسانی حقوق دی تنظیماں دے مطابق مقبوضہ کشمیر وچ بھارتی فوجی خواتین نوں ہراساں کرن تے ایہناں دے نال زیادتیاں تے ایہناں دے قتل دی ہزاراں وارداتاں وچ ملوث نیں سینکڑے خواتین جیلاں وچ بند یا گھراں وچ نظر بند نیں پر ایس دے باوجود کشمیر دی ایہہ دلیر، نڈر بیتیاں اج وی ہر تھاں شہیداں دے جنازیاں ہون یا بھارتی مظالم دے خلاف احتجاج پیش پیش نظر آندیاں نیں کیوں جے ایہہ نڈر دلبر بچیاں سری نگر دی بیٹیاں نیں جیہڑی چوڑیاں والے ہتھاں وچ پتھر لئے بھارتی فوج نوں ناکوں چنے چبوا رہیاں نیں۔ شاید ایسے طرح دے کسے منظر دے تصور وچ اقبال نے کہیا سی:
توڑ اس دست جفاکیش کو یا رب
جس نےروح آزاد، کشمیر کو پامال کیا
