جھوٹھے لارے

فیاض نذیر

تبدیلی آئوندی رہندی اے۔ کسے دے بلان نال نہیں آئوندی۔ کسے دے روکن نال نہیں رکدی‘ تبدیلی قدرتی عمل اے۔ گزرے ہوئے ہر لمحے دے نال اسیں بدلدے رہنے آں۔ کراچی دے روڈ رستے بدلن لگ پئے نیں روڈ راہواں دے ناں بدلے‘ کراچی سٹی سٹیشن دی اہمیت گھٹن لگ پئی‘ کراچی کینٹ ریلوے سٹیشن دی اہمیت ودھن لگ پئی۔ کراچی کینٹ سٹیشن تے اکا دکا ریل گڈیاں رکدیاں سن اوہ وی دو تن منٹ لئی‘ نہیں تے ایکسپریس گڈیاں کراچی سٹی ریلوے سٹیشن توں ٹرن مگروں کراچی کینٹ‘ ڈرگ روڈ سٹیشن‘ ملیر‘ لانڈھی‘ پیری‘ دھابیجی ریلوے سٹیشن تے جا کے رکدیاں سن۔ پلیٹ فارم صاف ستھرے ہوندے سن۔ ریل گڈیاں دے آن تے جان وچ کجھ منٹ دی تاخیر نوں بہت وڈی کوتاہی سمجھیا جاندا سی تے فیر ویکھدیاں ای ویکھدیاں بہت کجھ بدل گیا۔ تبدیلی تبدیلی ہوندی اے‘ تبدیلی چنگی ہوندی اے تبدیلی بھیڑی وی ہوندی اے پر ایہ طے اے کہ منفی یاں مثبت تبدیلی کسے دے سدن‘ پکارن‘ نعرے بازی نال نہیں آئوندی۔ تبدیلی On going Processاے۔ ہمیشہ جاری رہن والا قدرتی عمل اے۔ ایسے قدرتی عمل پاروں باکڑا ہن ڈھابا بن گئے نیں۔ گزرے ہوئے کل دیاں یاداں وچ کھوئے اسیں لوک باکڑا نوں ڈھابا نہیں کہندے۔ اسیں باکڑا نوں ہن وی باکڑا ہوٹل کہنے آں۔ میرا دوست‘ میرا ہم دم کراچی کینٹ ریلوے سٹیشن دے نیڑے پرانے دور دے باکڑا ہوٹل وچ بیٹھا ہویا سی تے دوستاں دی گل بات سن رہیا سی سگوں اوہناں دے وچکار ہون والی دھواں دھار بحث سن رہیا سی۔ سارے دوست ٹیلی ویژن چینلاں تے سیاستداناں دے پروگرام وانگوں اکٹھے بول رہے سن۔ میز تے مُکے مار مار کے اک دوجے تے چلا رہے سن۔ مدر ٹریسا جنت وچ نہیں جاوے گی۔ مدرٹریسا جنت وچ جاوے گی ۔ نہیں جاوے گی‘ ضرور جاوے گی۔ بکواس بند کرو۔ توں بکواس بند کر
گمنام صوفی نوں میں اک لمے عرصے توں جاننا واں۔ کدوں تو؟ ایہ تے مینوں وی یاد نہیں پر میں محسوس کر سکنا واں کہ میں گمنام صوفی نوں اودوں توں جاننا واں جدوں توں میں ایس دنیا وچ آیا واں۔ میں نہیں جان دا کہ اوہ میرے نال ایس دنیا وچ آیا سی‘ یاں فیر میں اوہدے نال ایس دنیا وچ آیا سی۔ ایہ غیب دیاں گلاں نیں جہناں دا مینوں نہیں پتہ۔ میں کدی اوہدے توں ناں نہیں پچھیا تے اوہنے کدی میرے توں میرا ناں نہیں پچھیا اوہ میرے لئی گمنام اے میں اوہدے لئی گمنام آں۔
اوہ بڑی دیر توں کراچی کینٹ سٹیشن دے نیڑے باکڑا ہوٹل دے کونے وچ بیٹھا ہویا سی تے نیڑے دے ٹیبل تے بیٹھے ہوئے نوجوان دوستاں دی گرما گرم بحث سن رہیا سی۔ دوستاں وچکار بحث چل رہی سی کہ مدر ٹریسا جنت وچ جاوے گی یاں نہیں جاوے گی۔ کجھ دوستاں دا موقف سی کہ مدر ٹریسا نے کیوں جے زندگی بھر انسانیت تے ماڑے انساناں دی خدمت کیتی سی ایس لئی اوہ یقینا جنت وچ جاوے گی۔ دوستاں دے دوجے گروپ دا کہنا سی کہ صرف دکھی انسانیت دی خدمت کرن نال تسیں جنت دے حقدار نہیں بن دے۔ جنت وچ جان لئی خدمت خلق توں علاوہ تہانوں کجھ ہور فرائض وی پورے کرنے پیندے نیں۔ بحث وچ گرما گرمی ودھن لگ پئی۔ میز تے مُکن لگن لگ پئے۔ درمیانی فاصلے گھٹن لگ پئے‘ باکڑے وچ بیٹھے ہوئے لوکاں نے پرت کے دوستاں ول ویکھیا۔
تسیں باکڑا ہوٹل دا مطلب سمجھدے او نا؟ مطلب دسن توں بہتر اے کہ کوئی مناسب مثال دے دیواں۔ جس طرح اج کل ڈھابا ناں دے چھوٹے چھوٹے ریسٹورنٹ دیسی کھانیاں لئی ہردلعزیز ہو گئے نیں بالکل اوسے طرح ساڈے پرانے شہر کراچی وچ باکڑا ہوٹل ہوندے سن۔ گزرے ورھیاں وچ کراچی کینٹ ریلوے سٹیشن عام بندیاں لئی گھٹ تے انگریز فوجیاں دی آمدورفت لئی زیادہ استعمال ہوندا سی۔ نیڑے ای انگریز فوجیاں دیاں چھائونیاں ہوندیاں سن۔ کراچی آن تے کراچی توں جان لئی سٹی سٹیشن کم وچ آئوندا سی۔ پرانے شہر کراچی دیاں پرانیاں آبادیاں کھارادر‘ میٹھادر‘ بولٹن مارکیٹ‘ بمبے بازار‘ نیوچالی‘ منسپالٹی (ہن میونسپل کارپوریشن) فریئر روڈ‘ بزنس روڈ‘ میکلوڈ روڈ (ہن آئی آئی چندریگر روڈ) تے گڈی کھاتہ (ہن پاکستان چوک) سٹی سٹیشن توں نیڑے سن۔
دوستاں نے بانہواں ٹُنگ لئیاں۔ مٹھیاں وٹ لئیاں‘ ایس توں پہلاں کہ دوست آپس وچ لڑدے گمنام صوفی اپنی تھاں توں اٹھ کے اوہناں دے کول آیا۔ جھگ کے اوہنے دوویں ہتھ ٹیبل تے رکھ دتے۔ لڑدے جھگڑدے دوست چپ ہو گئے۔ تعجب نال گمنام صوفی ول ویکھن لگ پئے۔ کون جنت وچ جاوے گا‘ کون دوزخ وچ جاوے گا ایہدا فیصلہ اُپر والے نے کرنا اے۔ گمنام صوفی نے آکھیا‘ انج وی‘ مدرٹریسا عیسائی سی۔ عیسائیاں دی اپنی جنت اے۔ اوہ اپنی جنت نوں ہیون کہندے نیں۔ مدر ٹریسا اپنی جنت‘ ہیون وچ جاوے گی لڑدے جھگڑدے دوستاں نوں ہکا بکا چھڈ کے گمنام صوفی باکڑے چوں باہر نکل گیا۔٭