ٹچکر

ڈاکٹر کرامت مغل

الف: ’’ایس سال تُسیںقُربانی کرو گے؟‘‘
بے: ’’نہیں یار ‘کوئی فایدا نہیں ‘‘
الف:کوئی فایدانہیں ‘مطلب؟‘‘
بے:’’مطلب ایہ کہ ساڈے کول فر یج تاں ہے نہیں۔
فریج توں بغیر قربانی کر ن دا کیہ فایدا؟ایویںاینا زیادا گوشت خاہ مخاہ ای ضائع ہو جاندا اے۔‘‘
الف:’’ضائع ؟اوہ کویں ؟‘‘
بے:’’بندا گوشت خراب ہوون توں پہلے پہلے کِنا کُو گوشت کھا سکدا اے؟۔حدوں بالھا کھاون دے چکر وچ پے جائیے تاں پیٹ خراب ہوجاندا اے ۔ پُورے سال دا کھادا پیتا نکل جاندا اے۔
کمزوری تاں ہوندی ای اے ۔ دوائیاں تے وی پیسے خرچ ہوندے نیں ۔گل کیہ صرف خرچا ای خرچا ۔فایدا بھُوراوی نہیں ۔‘‘
الف:ایہ تاں واقعی نقصان ای نقصان اے۔‘‘
بے:توں ٹچکر تاں نہیں کردا پیا ایں ؟‘‘
الف:’’نہیں نہیں ‘میں کیوں ٹچکر کراں گا بھلا ہر کسے نوں اپنے فایدے بارے سوچن دا پُورا پُورا حق حاصل اے ۔فریج نہیں اے تاں ظاہر اے قُربانی کرن داکیہ فایدا ؟‘‘
بے:’’تُوںپہلا بندا اے جہنے میر ی گل سمجھی اے ۔ پڑھیا لکھیا جو ایں ۔ایتھے تاں ایہ حال اے دکھاوے دی قربانی کرن والے جاہل تے گھٹ پڑھے لکھے وی عالم بن جاندے نیں۔
تہانوں تاں پتا ای ہووے گی ‘دِکھاوے دی کوئی نیکی ‘کوئی عمل کدے قبول نہیں ۔
ایتھے جہناں نوں ککھ پتا نہیں اوہ مذہبی حوالے دیون لگ پیندے نیں ۔ قربانی کرن دے مسئلے مسائل دسن لگ پیندے نیں ۔
جویں سانوں ایہناں مسئلیاں داپتا نہیں ۔‘‘
الف:’’لوکاں داکیہ اے لوکاں نوں تاں ہر معاملے وچ لت پھسا ون دی عادت ہوندی اے ۔تُسیں اپنا فایداسوچو ‘‘
بے:’’ہور کیہ ۔بندا پُچھے جدوں ساڈے گھر کوئی شئے نہیں ہوندی ۔ مول نہیں ایہناں لوکاں وچوں کوئی سانوں کُجھ دیون آندا ۔ گلاں کرن واری بڑے پاڈے بن جاندے نیں۔‘‘
الف:تسیں چھڈو لوکاں دیاں گلاں ۔جدوں فریج خرید لوو اودوں قربانی کر لینا۔قُربانی کہڑا کدھرے بھجی جاندی اے۔اگلے سال فیر آ جاوے گی‘‘
بے:’’شاباشے‘ تُوں کیتی اے سولھاںآنے سچّی گل۔پر تُوں کدھرے ٹچکر تاں نہیں پیا کرنا ایں؟‘‘
الف:’’سوچیںوی نہ ‘‘
بے:’’فیر ٹھیک اے‘‘
الف:’’ایس سال تاںتُسیں قُربانی ضرور کروگے؟‘‘
بے:’’اوہ کیوںایس سال کیہ ساڈا پرائزبانڈ نکلیا اے؟‘‘
الف :’’تُساں فریج جولے لئی اے ۔پچھلے سال فریج نہ ہوون پاروں تُسیں۔۔۔۔۔۔۔۔۔
بے:’’اچھا اچھا ۔پر ایس سال وی اسیں قربانی نہیں پئے کردے ۔ سارے پیسے فریج دی خریداری وچ خرچ ہوگئے نیں ۔
اُتوں قربانی دے جانوراں دیاں قیمتاں نوں اگ لگی ہوئی اے۔وڈے تاں وڈے ‘نکے جانوراں دیاں قیمتاں وی اسمان تے اپڑیاں کھلوتیاں نیں ۔ست اٹھ سیر دے بکرے نو ں ہتھ نہیں لایا جاندا۔‘‘
الف:’’ہاں مہنگائی دا جن واقعی بوتل وچوں باہر آگیا اے۔فریجاں وی بڑیاں مہنگیاں ہو گئیاں نیں ۔ بندا اک ای کم کر سکدا اے ‘یاں قربانی کر لو ے یاں فریج لے لو ے ۔ ہر پاسے پورا لہنا ڈاڈھا اوکھا اے۔ بہر حال فریج ‘قُربانی کرن نالوں زیادا ضروری اے‘‘
بے:’’توں گلاں تاں صحیح کرنا ایں پر مینوں ایہ کیوں لگدااے تُوں ٹچکر پیا کرنا ایں ؟‘‘
الف:’’پتا نہیں تینوں میریاں گلاں تے ٹچکر کرن دا بھُلیکھا کیوں پیندا اے۔ میں تاں صرف ایہ آکھیا اے ۔

بے:’’اچھا اچھا ۔پر ایس سال وی اسیں قربانی نہیں پئے کردے ۔ سارے پیسے فریج دی خریداری وچ خرچ ہوگئے نیں ۔
اُتوں قربانی دے جانوراں دیاں قیمتاں نوں اگ لگی ہوئی اے۔وڈے تاں وڈے ‘نکے جانوراں دیاں قیمتاں وی اسمان تے اپڑیاں کھلوتیاں نیں ۔ست اٹھ سیر دے بکرے نو ں ہتھ نہیں لایا جاندا۔‘‘
الف:’’ہاں مہنگائی دا جن واقعی بوتل وچوں باہر آگیا اے۔فریجاں وی بڑیاں مہنگیاں ہو گئیاں نیں ۔ بندا اک ای کم کر سکدا اے ‘یاں قربانی کر لو ے یاں فریج لے لو ے ۔ ہر پاسے پورا لہنا ڈاڈھا اوکھا اے۔ بہر حال فریج ‘قُربانی کرن نالوں زیادا ضروری اے‘‘
بے:’’توں گلاں تاں صحیح کرنا ایں پر مینوں ایہ کیوں لگدااے تُوں ٹچکر پیا کرنا ایں ؟‘‘
الف:’’پتا نہیں تینوں میریاں گلاں تے ٹچکر کرن دا بھُلیکھا کیوں پیندا اے۔ میں تاں صرف ایہ آکھیا اے ۔
جہڑی چیز ضروری اے پہلوں اوہ خریدنی چاہیدی اے۔تُساں فریج خریدلئی اے۔ ہُن تہاڈے کول پیسے کوئی نہیں ظاہر اے تُسیں قربانی نہیں کر سکدے۔‘‘
بے:’’بلکل ٹھیک آکھیا ای ۔بندے نوں اپنی چادر ویکھ کے پیر پھیلانے چاہیدے نیں ۔ قرض چُک کے قربانی کرنا کتھوں دی عقل مندی اے۔ مقروض دی تاں حضور پاکؐ نے نماز جنازہ وی نہیں سی پڑھائی ۔
ساڈے ایتھے تینوں پتا ای ہووے گا ‘کئی لوک اُدھار قُربانی کر لیندے نیں صرف نک نموج لئی ۔ بعدوچ چھے چھے مہینے پیسے دتے نہیں جاندے اوہناں کولوں ۔قرض خاہ اوہناں دے پچھے دھکے کھاندے پھردے نیں ۔بڑی بے چسّی ہوندی اے ۔ اوہ تاں فِر قربانی نہ ہوئی ۔ اوہنا ں دا ثواب پک نال وچے ای رُکیا رہندا ہووے گا ‘‘
الف :’’تیریاں مذہبی معلومات تاں چنگیاں بھلیاں قابلء رشک نیں ۔ تُوں مسیت کیوں نہیں سنبھال لیندا ۔ اپنے پنڈ مولوی وی کوئی نہیں ٹِکدا‘‘
بے:’’ایس وارتُوں پک نال ٹچکر کیتی اے۔‘‘
الفـ:’’نہیںہسداپیاآں ۔‘‘
بے:’’فیر ٹھیک اے۔‘‘
الف:’’ایس سال تاں تُسیں قربانی کروای کرو ۔‘‘
بے:’’ایہ تُوں ساڈی قربانی دے پچھے کیوں پے گیا ایں ۔ تینوں کیہ اسیں قربانی کرئیے یاں نہ ، توں ڈھیکا لگنا ایں ‘‘
الف:’’میں تاں اُنج ای ۔۔۔۔۔۔۔۔جے تُہانوںغصا لگا اے تاں معافی۔۔۔۔‘‘
بے:’’نہیںتوں ساڈے گھر گوشت منگن آنا ایں ؟ــــ‘‘
الف:’’میں دُبارا اپنے بھرا کولوں ہتھ جوڑ کے معافی منگنا آں ۔میں تاںصرف ایس پاروں پُچھیا سی کہ ہُن تاں تُہاڈے حالات ۔۔۔۔۔۔۔۔۔تُہانوں رب دیاں ستّے خیراںنیںاج کل۔ــ‘‘
بے:ہُن سانوں قربانی کرن دی لوڑ وی نہیں ۔‘‘
الف:’’لوڑ۔۔۔۔۔۔ای نہیں ؟‘‘
بے:’’پنڈ وچ تن چار گھراں کول تاں فریجاں نیں۔ جہڑے گھر قربانی کردے نیں اوہ ایہناں فریجاں وچ ای گوشت ذخیرا کردے نیں ۔پچھلے سال ساڈی فریج وچ وی ۔۔۔۔۔۔۔تے تُوں سوچ جہڑا گھر ساڈی فریج وچ گوشت رکھے گا ‘اوہ بھلا سانوں گوشت نہ دے گاـ۔‘‘
الف: ’’تُسیں ایس سال ڈیپ فریزر خرید لوو‘‘
بے :’’ڈِیپ فِریزر ،تیرا مشورا تاں ٹھیک اے۔ اوہدے وچ گوشت زیادا۔۔۔۔۔۔کھلوجا،توں کدھرے ٹِچکر تاں نہیں کیتی‘‘
الف: ’’میں بلکل ٹِچکر کیتی اے جناب ‘‘
بے:’’کوئی گل نہیں توں آپ منوں بھاویں ٹِچکر کیتی اے پر سُجھا ودھیا دِتاای۔
اسیں ایس سال وڈا سارا ڈِیپ فریزر ای خریداں گے۔‘‘٭٭