ضمنی الیکشن دا غیر متوقع نتیجہ
ایہہ حلقہ بریار خاندان دا نہیں بلکہ دوجے حلقے توں آ کے احسن سلیم بریار نے ایس اجنبی حلقے توں کامیابی حاصل کیتی اے جیہڑا خاصی انہونی گل اے
تحریر حمیداللہ بھٹی
پی پی 38سیالکوٹ دی نشست پی ٹی آئی دے امیدوار احسن سلیم بریار نے 7ہزار ووٹاں دی برتری توں جت لئی اے عام انتخابات 2018 وچ مسلم لیگ ن دے خوش اختر سبحانی ایسے حلقے توں موجودہ حکمران جماعت دے امیدوار سعید بھلی توں 17ہزار توں ودھ ووٹ لے کے کامیاب ہوئے سن پر تن ورہے دے دوران کنج برتری ختم ہوئی تے پنجاب دے ضمنی انتخابات وچ ہردی پی ٹی آئی دی پہلی فتح کیونکر ممکن ہوئی؟ واقفانِ رازہنوز سوچ وبچار وچ نیں ضمنی انتخاب وچ فتح حاصل کرن والے امیدوار دے والد سلیم بریار مسلم لیگ ق پنجاب دے سینئر نائب صدر نیں ایہناں دا شمار سیالکوٹ دے امیر ترین صنعتکاراں وچ ہوندا اے اوہ کجھ عرصے توں ٹیلن نیوز دے ناں توں اپنا ذاتی ٹی وی چینل شروع کر رکھیا اے جتن والے امیدوار احسن سلیم بریار دا اک ہور تعارف وزیراعلیٰ پنجاب دے پرنسپل سیکرٹری دا داماد ہونا اے ہمہ پہلو وضاحت دا مقصد ایہہ وے کہ قارئین نوں تحریر پڑھدے ہوئے کسے حوالے نال تشنگی دا احساس نہیں ہوئے۔
ایہہ حلقہ بریار خاندان دا نہیں بلکہ دوجے حلقے توں آ کے احسن سلیم بریار نے ایس اجنبی حلقے توں کامیابی حاصل کیتی اے جیہڑا خاصی انہونی گل اے ایتھے جاٹ تے گجر ووٹراں دی اکثریت اے دیگر برادریاں وی نیں پر نتیجے وچ اثر انداز ہون لئی ناکافی نیں پر امیدوار دا حلقے دا رہائشی نہ ہوئے کہ فتح حاصل کرن اُتے کسے نوں یقین نہیں آ رہیا بلکہ پولنگ دے نیڑے سروے رپورٹس دی بنا اُتے اکثر مبصرین متفق سن کہ 17 ہزار دی لیڈ تے شاید گھٹ ہو جائے پر طارق سبحانی بحرحل جت ضرور جان گے پر سارے اندازے وقیافے دھرے دے دھرے رہ گئے اونج وی جدوں امیدوار دے سسر وزیراعلیٰ دے پرنسپل سیکرٹری ہون پٹواری، ایس ایچ او تے ڈی پی او تے ڈی سی دست بستہ حاضر ہون تے جت زیادہ حیران کُن نہیں رہندی پر ہن ایہہ سمجھ لینا کہ ایہہ نشست آئندہ ہمیشہ لئی پی ٹی آئی دی ہو گئی اے درست نہ ہوئے گا چوہدری اختر وریو دی وفات نال ایس خاندان دے عوامی رابطے گھٹ تے سیاسی معاملات اُتے گرفت کمزور ضرور ہوئی اے پر حالیہ شکست وچ دیگر اسباب دا وی خاصا عمل دخل اے۔
حکمران جماعت دا موقف اے مودی دے معاون بیانیے نوں شکست ہوئی اے جد کہ مسلم لیگ ن ہار دا جواز آزاد کشمیر والی دھاندلی دی روایت قرار دیندی اے ایس وچ شائبہ نہیں کہ ضمنی الیکشن دی انتخابی مہم دے دوران سوشل میڈیا دا بے دریغ استعمال کیتا گیا مودی دی لہور آمد تے شریف خاندان ولوں پذیرائی اُتے مشتمل کلپ بھجوائے جاندے رہے آزاد کشمیر دے حلقہ ایل اے 35 جموں 2 توں امیدوار چوہدری اسماعیل گجر ولوں انتظامیہ نے گل نہیں سنی تے بھارت توں مدد منگن دی ویڈیو منظم انداز وچ پھیلائی گئی ایسے طرح ن لیگ دے امیدوار طارق سبحانی دے کزن ایم این اے ارمغان سبحانی ولوں اک ٹی وی پروگرام وچ عمران خان دی بجائے مودی دی تصویر ویکھن دے غیر ذمہ دارانہ بیان اُتے مشتمل ویڈیو دی وی خوب تشہیر کیتی گئی تے انتخابی مہم دے دوران وریو خاندان و ضاحتاں ای کردا رہیا کیوں جے سیالکوٹ اونج ای اک سرحدی ضلع اے جتھے بھارت دے خلاف نفرت عروج اُتے اے مزکورہ طرز عمل اپنانا شکست نوں دعوت دین دے مترادف اے ایہناں عوامل دا نتیجے اُتے اثر انداز ہونا اک حقیقت اے جنہوں تسلیم نہ کرنا اصل وچ حقائق توں چشم پوشی دے مترادف اے پر ایہہ کہنا کہ شکست دا باعث صرف ایہو عوامل نیں مکمل طور اُتے درست نہیں۔
حکومتی امیدوار نوں کمزور سمجھنا وی اک فاش غلطی سی پر وریوں خانداناں توں ایہہ غلطی ہوئی ایہناں نوں کامل یقین سی کہ حریف امیدوار جس دی رہائش وی پی پی 38 وچ نہیں ایہنوں لوک کیونکر امیدوار نوں ووٹ دے سکدے نیں پر ایہہ خیال کردے ہوئے بھُل گئے کہ ہن دی وار مقابلے اُتے صوبائی وزیراعلیٰ دے پرنسپل سیکرٹری وی نیں جنہاں نے جت دی یقین دہانی کراندے ہوئے اپنے دماغ نوں ٹکٹ دلوایا اے اینے وڈے بیورو کریٹ نے اعتماد نال جت دا دعویٰ سوچ سمجھ کے ای کیتا گیا ہوئے گا جدوں ساری صوبائی مشنری دا تعاون حاصل ہوئے اوہ کنج شکست دی پاتال وچ ڈگ سکدا اے؟ بلکہ ہن تے شنید اے کہ داماد لئی وزارت دا وی تقاضا کیتا جا رہیا اے جس دے بظاہر آثار نہیں کیوں جے عثمان ڈار مرکز وچ معاون خصوصی نیں فردوش عاشق اعوان پنجاب وچ معاون خصوصی دے منصب اُتے فائز نیں چوہدری اخلاق تے بائو رضوان دونواں پنجاب کابینہ دا حصہ نیں ایس وجہ نال کابینہ دا حصہ بننا تے مشکل اے پر ایہہ نہیں بھُلنا چاہیدا اے کہ پی ٹی آئی توں کجھ وی ناممکن نہیں کیوں ج کارکردگی توں زیادہ ایتھے دوستیاں و تعلق ای اہم نیں۔
بریار خاندان سیالکوٹ دا اک امیر کبیر خاندان اے جس نے الیکشن جتن لئی دولت دا بے دریغ استعمال کیتا اے، سسر دے عہدے دا اثر و رسوخ، دولت دی چمک، روزگار دلوان تے ترقیاتی کماں دے وعدیاں دا وی نتیجے دا رُخ بدلن وچ کردار اے ایس حلقے وچ ووٹاں دی خریدو فروخت منہ منگے داماں ہوئی محتاط اندازے دے مطابق ایہہ انتخابی معرکہ لاگت دے اعتبار نال پورے ملک توں زیادہ مہنگا ثابت ہویا اے اک ارب توں ودھ دے اخراجات دا اندازہ اے جدوں پیسہ پانی وانگوں بہایا جائے تے مد مقابل وی پر اعتمادی دا شکار ہوئے تے حالات بدلنا ناممکن نہیں رہندا غداری دے الزامات تے غیر ذمہ دارانہ بیان بازی نے وکھرے شکوک و شبہات وچ وادھا کیتا انج مسلم لیگ ن نے جتی ہوئی نشست حریف دی جھولی وچ پا دتی۔
چوہدری برادران تے بریار خاندان وچ چنگے خاصے مراسم نیں دونواں پاسے اک دوجے لئی عزت و احترام اے پر ہن احسن سلیم بریار دی کامیابی نال حالات بدل چکے نیں ایس لئی ممکن اے عزت و احترام تے شاید موجود اے پر سیاسی راہواں جدا ہو جان گیاں جس دا آغاز وی ہو گیا اے تے مسلم لیگ پنجاب دے سینئر نائب صدر سلیم بریار نے ق لیگ دی حمایت کرن دے دعوے نوں جھٹلاندے ہوئے بائو رضوان ول مخالفت تے ایہہ کہنا اے کہ نشست اسیں پی ٹی آئی دے ٹکٹ اُتے جتی اے اوہناں نے طارق بشیر چیمہ ولوں فارمولے دے ذکر وی نفی کردے ہوئے وفاقی وزیر نوں آئندہ انج کہن تے بہاولپور دی سیاست اُتے دھیان دین دا مشورہ دتا اے پر سچ ایہہ وے کہ ٹکٹ دلوان توں لے کے کامیابی نال ہمکنار کرن تیکر ق لیگ دا اہم کردار اے ممکن اے سلیم بریار ایہہ سب کجھ پتر دی وزارت لئی کر رہے ہون کیوں جے ق لیگ نے معاہدے دے مطابق پنجاب توں دونواں وزارتاں حاصل کر لئیاں نیں ایس بنا اُتے تیجی وزارت دا امکان نہ ہون دے برابر اے۔ قبل ازیں ساجد بھٹی ایم پی اے نے پارلیمانی سیکرٹری دے عہدے توں پبلک اکائونٹس کمیٹی دی چیئر مینی حاصل کرن لئی استعفیٰ دے دتا سی پر باوجود کوشش دے دل دی مراد پوری نہیں ہوئی مطلب ایہہ کہ حکمران جماعت ہن کوئی مزید اہم عہدہ اپنی اتحادی جماعت نوں دین اُتے آمادہ نہیں پر ایہہ وی پورے یقین نال کہیا جا سکدا اے کہ احسن سلیم بریار وزارت تے نہیں البتہ سسر دی بنا اُتے کوئی اہم عہدہ حاصل کر سکدے نیں پر پچھنا ایہہ وے کہ غیر اہم عہدے دی خاطر ورھیاں دے رابطے قربان کرنا کتھوں دی دانشمندی اے؟
