پنجاب وچ سکیورٹی ڈیوٹی اُتے 161107 پولیس اہلکار تعینات 10 ضلعے حساس، فوج تے رینجرز سٹینڈ بائی

صوبے وچ 9366 محرم الحرام دے جلوس، 35983 مجالس عزا، 876 مقامات حساس، سرکاری تے نجی گڈیاں دی چیکنگ دا فیصلہ مجلساں وچ شناخت دے بغیر داخلہ ممنوع، جلوساں توں ملحقہ رستے خاردار تار تے بیریئر نال محفوظ بنائے جان گے

احسان شوکت

افغانستان توں امریکی فوج دے انخلاء تے طالبان دے مختلف حصیاں اُتے قبضے و خانہ جنگی دی موجودہ صورتحال جد کہ ملک دشمن بھارتی ایجنسی را، دے پاکستان وچ تخریب کاری دے واقعیاں دی موجودگی وچ ایس وار محرم الحرام دے مقدس مہینے وچ امن و امان دی ذمہ داری ودھ گئی اے۔دہشت گرداں ولوں کاروائی دے خدشات ودھ گئے نیں جد کہ خفیہ اداریاں ولوں ملن والی رپورٹاں وچ وی خبردار کیتا گیا اے کہ دہشت گرداں نے محرم الحرام دے دوران پورے ملک وچ خاص طور تے صوبہ پنجاب وچ تباہی دا منصوبہ بنایا اے۔جس اُتے عوام وچ تشویش دا پایا جانا فطری عمل اے۔ محرم الحرام وچ دہشت گرداں دی کاروائیاں اُتے قابو پانا تے امن و امان دی فضا قائم رکھنا حکومت تے قانون نافذ کرن والے ادارے لئی ازمائش تے کڑا امتحان اے۔ جس اُتے پولیس، قانون نافذ کرن والے دیگر ادارے، انٹیلی جنس ایجنسیاں محرم الحرام وچ امن و امان قائم رکھن لئی سرجوڑ کے بہہ گئے نیں تے محرم الحرام دے دوران دہشت گردی دے ممکنہ خدشات دے پیش نظر سکیورٹی دے غیر معمولی اقدامات کیتے گئے نیں۔
محرم الحرام وچ صوبے دے سارے ضلعیاں وچ 9366 جلوس تے 35983 مجلساں منعقد ہو رہیاں نیں۔ جلوساں دی سکیورٹی ڈیوٹی اُتے 161107 افسران و اہلکار پنجاب وچ محرم الحرام دے دوران 35 ہزار 9 سو 83 مجلساں تے 93 سو 66 تعزیتی جلوس کڈے جان گے۔ 10 ضلعے لہور، راولپنڈی، ملتان، جھنگ، سرگودھا، گجرات، فیصل آباد، وہاڑی، بہائولپور تے لیہ نوں انتہائی حساس قرار دتا گیا اے جد کہ پورے صوبے وچ 876 حساس مقامات دی نشاندہی کر کے ایہناں نوں کیٹیگری اے ، بی تے سی وچ ونڈ کے سکیورٹی انتظامات کیتے گئے نیں۔ محرم الحرام وچ پورے صوبے وچ سکیورٹی لئی 161107 پلس اہلکاراں دی ڈیوٹیاں لائیاں گئیاں نیں ۔
پولیس و دیگر سرکاری اداریاں دیاں گڈیاں دی وی چیکنگ کیتی جائے گی تے کسے نوں وی جلوس دے رستے یا مجلس وچ شناخت دے بغیر داخلے دی اجازت نہیں ہوئے گی۔ جلوس دے سارے رستیاں تے ایس توں ملحقہ سڑکاں نوں خاردار تاراں تے لوہے دے بیریئر لا کے بند کر دتا جائے گا تے جلوس وچ داخل ہون لئی اک داخلی تے اک خارجی رستہ رکھیا جائے گا۔ خواتین سنے ہر کسے نوں تن مقامات اُتے چیکنگ دے بعد جلوس دے روٹ یا اہم مجالس وچ داخل ہون دتا جائے گا۔ خواتین دی چیکنگ لئی لیڈریز پولیس اہلکار تعینات کرن دے علاوہ خواتین ٹریفک وارڈنز دی وی ڈیوٹیاں لائیاں جان گیاں۔ مجالس تے محرم دے جلوساں دے داخلی و خارجی رستیاں اُتے سی سی ٹی وی کیمرے تے واک تھرو گیٹس لائے جان گے۔ مجالس توں ملحقہ اُچی عمارتاں تے جلوس دے روٹ اُتے دور بیناں نال لیس سنائپر تعینات کیتے جان گے۔ ایس دے علاوہ سراغ رساں کتیاں توں مدد لئی جائے گی جد کہ اجازت نامے دے بغیر کسے نوں مجلس منعقد کرن دی قطعاً اجازت نہیں دتی جائے گی۔ جلوس دے روٹ تے ویلے دی ہر ممکن پابندی کروائی جائے گی۔ جلوس دے رستیاں ول آن والی ہر قسم دی ٹریفک نوں متبادل رستیاں توں لنگھایا جائے گا۔ نویں تے دسویں محروم الحرام دے موقعے اُتے موٹر سیکل اُتے ڈبل سواری اُتے پابندی موبائل فون نیٹ ورک سروس جام کرن دے علاوہ یوم عاشور دے مرکزی جلوساں دی ہیلی کاپٹرز توں فضائی نگرانی وی کیتی جائے گی۔
حکومت پنجاب محرم الحرام دے انتظامات لئی پولیس نوں خصوصی فنڈ وی مہیا کر رہی اے۔ محرم الحرام وچ عاشورہ دے جلوساں تے مجلساں دے پر امن انعقاد، علما اکرام دی سکیورٹی تے دہشت گردی توں بچن لئی پلس حکام ولوں لہور وچ تینجرز تعینات کرن تے فوج دی خدمات طلب کرن دی تجویز پ یش کیتی سی جیہڑی ہوم سیکرٹری پنجاب نے مسترد کر دتی اے۔ البتہ لوڑ پین اُتے فوج بلائی جا سکے گی۔ محکمہ داخلہ پنجاب نے محرم الحرام دے دوران شیہہ ذوالجناح تے تعزیہ بردار جلوساں دی حفاظت لئی روزانہ دی بنیاد اُتے سکیورٹی پلان ترتیب دین تے محرم الحرام لئی جاری کیتے گئے ضابطہ اخلاق اُتے سو فیصد عملدرآمد کران دے احکامات جاری کر دتے نیں۔ ضابطہ اخلاق اُتے عمل درآمد وچ ناکام رہن والے پولیس افسر تے ضلع حکام جوابدہ ہون گے۔ ایڈیشنل سیکرٹری انٹرنل سکیورٹی ولوں ڈویژنل کمشنرز تے ڈی سی اوز دے ناں مراسلہ جاری کردے ہوئے واضح کیتا گیا اے کہ محرم الحرام دے دوران اسلحہ دی نمائش اُتے پابندی عائد اے جد کہ مجلساں لئی ذاکرین دے کول حکومت ولوں جاری کردہ لائسنس ہونا لازمی اے جد کہ نفرت انگیز تے اشتعال انگیز مواد دے پوسٹرز تے وال چاکنگ اُتے پابندی اے۔ ایس دوران حساس اداریاں تے پولیس افسراں دے دفتراں، اہم عمارتاں تے مزاراں دے باہر سخت سکیورٹی انتظامات رہن گے۔
ایہناں انتخابات دے باوجود عام شہری خاص طور تے اہل تشیع حضرات تے مجالس و جلوساں دے منتظمین امن و امان نوں درپیش خطرات پاروں شدید کرب وچ مبتلا نیں۔ جس اُتے مجالس تے جلوساں دے منتظمین اپنے طور اُتے وی سکیورٹی لئی اقدامات کر رہے نیں۔ واک تھرو گیٹس تے میٹل ڈیٹیکٹرز دا بندوبست کرن دے علاوہ شرکاء دی فزیکل چیکنگ لئی رضا کار فراہم کیتے جا رہے نیں۔ مجالس دے مقامات توں فاصلے اُتے رستیاں اُتے رکاوٹاں لائیاں جان گیاں۔ مجلساں تے امام بارگاہواں دے نیڑے گڈیاں تے موٹر سائیکلاں دی پارکنگ دی اجازت نہیں دتی جائے گی۔ قانون انفذ کرن والے اداریاں دا دعویٰ اے کہ محرم الحرام وچ محرم دے جلوساں تے مجالس نو ں نہ صرف دہشت گردی دا نشانہ بنن توں روکن بلکہ صوبے نوں خدانخواستہ کسے وی ازمائش توں بچان لئی اوہ اپنے سارے وسائل نوں بروئے کار لیاندے ہوئے سکیورٹی دے حوالے نال ہر ممکن اقدامات کر رہے نیں۔ ایس صورت حال وچ پولیس حکام دا کہنا اے کہ عوام نوں وی ذمہ دار شہری ہون دے ناطے اتحاد و باہمی یگانگت دا مظاہرہ کرنا ہوئے گا تے اپنے قومی اداریاں دی اخلاقی مدد کر کے ایہناں دے ہتھ مضبوط کرنے ہون گے۔ باہمی اتحاد تے اعتماد نال ای اسیں اپنے دشمن دے خطرناک ارادیاں نوں مٹی وچ ملان وچ کامیاب ہوواں گے۔ ساڈی دعا اے کہ اللہ رب العزت وطن عزیز نوں دشمناں دے شر توں محفوظ رکھے۔ آمین