دیمک تے ساڈا نظام
لکھت:سعد اللہ شاہ
میرے پیارے قارئین! اج بڑا ای وکھرا جہے موضوع تے لکھن جا رہیا واں جہدا ایس دیمک زدہ نظام نال شاید دور نیڑے دا کوئی واسطہ ہووے۔ بڑا دلچسپ تے حیران کن واقعے توں شروع کرنے آں۔ اوہناں دیہاڑیاں وچ علامہ اقبال ٹائون دے ستلج بلاک وچ رہندا سی۔ انورسدید تے فرخندہ لودھی دے محلے وچ‘ ستلج بلاک تے جہانزیب بلاک ہر دو ادیباں تے شاعراں نال بھرے ہوئے سن۔ پڑھنا لکھنا تے سونا ایہو مشغلے سن۔ الماریاں وچ کتاباں بھریاں رہندیاں سن۔ کتاباں دا کھلار تے پسار پورے گھر وچ سی۔ آمدم برسر مطلب اک دن جدوں میں بالائی منزل دی الماری کھولی تے بس ویکھدا ای رہ گیا۔ الماری دا پٹ میرے ہتھ وچ سی مختصر ایہ کہ دیمک نے کتاباں نوں بھیڑی طرح کھا لیا سی کیہ غالب تے کیہ علامہ اقبال دیاں کتاباں‘ کسے نوں وی نہیں سی چھڈیا۔ چھوٹے موٹے ادیباں دیاں کتاباں تے کسے کھاتے وچ ای نہیں سن۔ تسیں یقین کرو کہ ہزار صفحیاں دی کتاباں وچ دیمک آرپار ہو گئی۔
کیہ کردا قیمتی تے نایاب کتاباں وی ردی ہو گئیاں تے ردی والا بوریاں بھر کے لے گیا۔ فیر ایہ احتیاط کہ کوئی دیمک زدہ کتاب گھر وچ نہ رہ جاوے کہ ایہ نسل در نسل چلدی اے ایس واقعہ دا خیال مینوں ایس لئی آیا کہ نویں گھر وچ وی دیمک نے آن ڈیرا پایا تے کمبخت اوس ویلے آ شکار ہوندی اے جدوں الماریاں دیاں لکڑیاں کھا چکی ہوندی اے۔ ایہ اوہو گھن اے جو کہیا جاندا اے کہ عاشق نوں کھا گیا۔ گھر والیاں دے اصرار تے ایہدے خاتمے دا سوچیا تے پُتر نے نیٹ تے سرچ کیتی۔ میں تے ویکھ کے حیران ہو گیا کہ دیمک نوں ختم کرن دیاں کمپنیاں بنیاں ہوئیاں نیں ایہ کاروبار بڑا وسیع اے تے پتہ کرن تے پتہ لگا کہ پنجی ہزار روپیے توں لے کے سٹھ ہزار تک خرچ اے اہ زمین وچ ٹیکے دے راہیں دوائی پاندے نیں تے سپرے کردے نیں کیہ اللہ دا نظام اے ہاں اوہدیاں آیتاں نیں جو سوچن تے مجبور کردیاں نیں کہ اک بڑا چھوٹا جیہا کہڑا بڑا مشکل نال وکھائی دیندااے اوہ وی اپنے آثار چھڈ ای جاندا اے ایس کیڑے نے کنے وڈے کاروبار نوں جنم دے رکھیا اے۔ اک ہور اتفاق ویکھو کہ ذہنی طور تے میں ایس مسئلے وچ سی کہ دیمک نوں ختم کروا کے الماریاں نوں ٹھیک کراواں‘ سویرے میں فجر دی نماز پڑھ رہیا سی تے اوہدے وچ قاری صدام صاحب نے اوہ آیات تلاوت کیتیاں جہناں وچ حضرت سلمان علیہ السلام دا تذکرہ اے۔ اوہناں دی موت دا پتہ ساریاں نوں اوس ویلے لگا جدوں دیمک نے اوہناں دی لاٹھی مکمل طور تے کھا لئی تے لاٹھی جس ویلے ڈگ گئی تے جن کہن لگے کہ کاش اوہناں نوں غیب دا علم ہوندا تے اوہ مشقت توں بچ جاندے۔ جن ایہو سمجھ رہے سن کہ حضرت سلمان اوہناں دی نگرانی کر رہے نیں جد کہ اوہ تے کدوں دے وصال کر چکے سن۔ واقعی اسیں تھوڑا جیہا وی غور کریئے تے ساڈے تے واضح ہوندا اے کہ انسان کناں لاعلم تے بے بس اے اوہنوں کجھ وی پتہ نہیں کہ اوہدے جسم اندر کیہ چل رہیا اے اک ہور گل میرے ذہن وچ آئی کہ اللہ نے تے اک مکھی دی مثال دتی سی تے کہیا سی کہ اللہ نہیں شرماندا چھوٹیاں چھوٹیاں چیزاں دی مثال دین توں سگوں اوہدے توں وی چھوٹھی۔ ایہ اللہ دی تخلیق جو دیمک توں لے کے پتھر وچ پلن والے کیڑے تک حیرتاں دا اک جہان اے بندے دی عقل بڑی محدود اے۔
ڈھونڈنے والا ستاروں کی گزرگاہوں کا
اپنے افلاک کی دنیا میں سفر کر نہ سکا
میں سورۃ الملک پڑھنا واں تے حیرت وچ کھو جانا واں اللہ فرماندا اے دیکھ میں ست اسمان اُتے تھلے کیویں بنائے نیں دیکھ اوہناں ول‘ ہے کوئی ایہناں وچ نقص‘ فیر اللہ فرماندا اے اپن آل دوالے ویکھ اے ویکھن والے تیری نظر مایوس تے تھک کے واپس آ جاوے گی تے فیر اللہ نے پہلے اسمان نوں کیویں تاریاں دے چراغاں نال سجایا اے تے ایہ گولے شیطاناں نوں مارن لئی وی نیں۔ فیر میرے دل وچ شہاب ثاقب دے ٹٹن دا منظر وی آیا۔ انسان سوچن لگ پئے تے سوچدا ای چلا جاندا اے کہ اللہ نے کیویں اپنی قصد نال حقیر چیز دی قدر تے اہمیت مخلوق تے ظاہر کیتی۔ فرعون ہووے یاں نمرود ساریاں نوں اوہنے رسوا کیتا۔ نمرود دی نک وچ وی تے مچھر ای وڑیا سی تے اوہ دماغ تک اپڑ گیا۔ فیر جدوں کوئی نمرود دے سر وچ جتیاں ماردا تے اوہنوں سکون ملدا میں اپنے نظام دے حوالے نال سوچن لگا کہ جو سچ مچ دیمک زدہ اے تسیں کسے وی محکمے نوں ہتھ پائو‘ بس ایسے دیمک زدہ الماری دے پٹ وانگوں اے جو تہاڈے ہتھ وچ آ جاوے گا کہ اوہ قبضے گھڑی چھڈ دتے نیں اکثر اوقات تے پوری الماری ای ڈگ جاندی اے پر ایس مثال وچ شرمناک گل ایہہ وے کہ دیمک دا کم اسیں آپ کر رہے آں۔ ہن دی واری تے میں سوچدا ای رہ گیا کہ ایس دیمک دا علاج صرف اکلے عمران خان کیویں کر سکدے نیں۔ سارے کرپٹ دیمک دی صورت کجھ نہیں چھڈدے۔ صرف سیاستدان تے بیوروکریسی ای نہیں اسیں وی انجے ای آں کہ اپنے مفادات توں اگے نہیں ویکھدے۔ ایس دیمک زدہ سسٹم نوں ٹھیک کرن وچ کجھ دیر تے لگے گی اوہ وی اوس صورت وچ کہ سانوں پتہ لگ جاوے کہ گھر کھایا جا رہیا اے۔ ایہ مافیا کیہ نیں‘ دیمک نہیںتے کیہ نیں‘ ایہناں نے ساڈے پیارے وطن دیاں بنیاداں ہلا کے رکھ دتیاں نیں عرب پتی نیں پر ٹیکس دیندے ہوئے موت آئوندی اے اپنے ملک دا پیسہ تے اہ وی لٹ کے سوئس بینک بھرے جاندے نیں۔ شاید اوہ سمجھدے نیں کہ ایس دیمک زدہ نظام نوں بدلن دے ناں تے یاں ایہنوں دیمک توں پاک کرن دے ناں تے اوہنوں ہور لٹیا جا سکدا اے۔ اوہ ایس دیمک نوں ختم کرن دے ٹھیکے وی اپنے پیاریاں نوں دیندے نیں جو وی احتساب دے ناں تے آئوندا اے اوہ ایہو کجھ کردا اے نیب نوں استعمال کردا اے تے ایہدے بعد آن والا وی ایہو کجھ کردا اے تے کمال ایہہ وے کہ عبرت کدی نہیں پھڑدا۔ عوام وچارے تے امیداں بنھ بنھ کے تھک گئے نیں ایسے لئی ڈر لگدا اے۔ اجے میںزرداری صاحب دا تردیدی بیان پڑھ رہیا سی کہ امریکہ دا فلیٹ اوہناں دا نہیں۔ اوہ ٹھیک کہندے ہون گے پر مینوں سرے محل یاد آیا تے کہڑے کہڑے فلیٹ یاد آئے کہ جہناں دا ملک وچ پہلے پہل کوئی نہیں سی بن دا مریم نواز نے تے سرے توں ای انکاری سی کہ اوہناں دی پاکستاان وچ وی کوئی جائیداد نہیں۔ مینوں تے ترکی دی خاتون اول دا ہار وی یاد آیا کہ جو گیلانی دی بیوی دے گلے تک آن اپڑیا۔ کجھ نہ پچھو کھا گئے یہ لوگ میرے وطن نوں دیمک وانگوں۔٭٭
