ستیں ویہہ سو
لکھت: اکرم شیخ
کجھ گلاں تواریخ دا حصہ ہوندیاں نیں بھاویں پاکستان دی سیاست دا پورا سچ تاں ایہو اے کہ بینظیر بھٹو نے دو واری حکومت وچ شراکت داری کیتی پر کدی وی کسے دی تھاں ٹکرا نہیں کیتا۔ سر نیواں ای رکھیا مصلحت توں کم لیا۔ پر فیر وی دوویں واری اوہنوں حکومت چوں کڈھیا گیا فیر دیس نکالا وی ہویا۔ ایس پچھوکڑ پیو دی نجائز شہادت وی سی جنہوں اج وی وپری دنیا عدالتی قتل کہندی اے۔ فیر شاہنواز بھٹو دا بیرون ملک قتل وی سی تے مرتضیٰ بھٹو دا اوہدی اپنی حکومت وچ قتل وی سی۔ ایہو ای احتیاط پسندی سی پر فیر وی اوہ قابل قبول نہیں ہوئی دوجی واری جدوں اوہنوں باہر کڈھیا گیا تے اوتھے نوازشریف نوں اشارا دتا سی کہ ہن اوہدی واری ہووے گی… پر اوس ویلے نوازشریف نوں ایہ گل سمجھ نہیں آئی۔
دوجا سچ تاں ایہہ وی اے کہ نوازشریف جدوں وی اقتدار وچ آئے اوہناں دی جرنیلی سیاست نال نہیں بنی اوہناں دی ویلے دے حکمران جرنیلاں نال نہیں بنی۔ وحید کاکڑ توں جہانگیر کرامت تک اوہناں دا اٹ کھڑکا ای رہیا۔ بینظیر بھٹو نوں لیاقت باغ وچ بھرے مجمع وچ شہید کر دتا گیا ایہہ اوہ ویلا سی جدوں نوازشریف وی راولپنڈی وچ موجود سن۔ اوہ وی ہسپتال پہنچے اوہناں دیاں اکھاں وچ اتھرو سن۔ فیر آصف علی زرداری نے پیپلزپارٹی دی قیادت وی سنبھالی پاکستان کھپے دا نعرہ وی ماریا تے بینظیر بھٹو دے جمہوریت بہترین انتقام دے آکھے دا جھنڈا چکیا۔ ایسے انتقام وچ ای اوہناں نے ساریاں جماعتاں نال مل کے اٹھارویں ترمیم منظور کروائی جہڑی اج وی سب توں وڈی رکاوٹ بنی ہوئی اے نہیں تے خورے ہن تیکر کیہ کجھ ہو چکیا ہوندا۔
گل تاں اوہو ای اے کہ… پاکستان دی ریاست تے حکومت نوں عوامی سیاست وارا نہیں کھاندی۔ نواز شریف بھاگاں والا اے کہ ریاست کسے ہور قتل دا الزام اپنے سر نہیں لینا چاہندی سی ایہدے لئی فیر عدالت نوں ذریعہ بنایا گیا پانامہ توں شروع ہون والی کہانی اقامہ تے ختم ہوئی نوازشریف نوں حکومت چوں وی باہر کڈھیا گیا تے ساری عمر لئی سیاست لئی نااہل وی قرار دتا گیا۔ ایہ وکھری گل اے کہ اوہ ووٹ کو عزت دو دا نعرہ ماردا جی ٹی روڈ توں لہور ول ٹر پیا۔ راہ وچ لوکائی نے اوہنوں سرمتھے تے بٹھایا فیر اوہنوں جیل وچ سٹ دتا گیا آکھیا جاندااے کہ جیل وچ سیاستدان زیادہ خطرناک ہو جاندا اے چنانچہ بیماری دا بہانہ بنا کے علاج کرائون لئی ملکوں باہر گھلیا گیا۔ سیاستدان ملک دے اندر ہووے یاں باہر اپنی قومی سیاست توں دور نہیں رہ سکدا۔ ایس وچالے اک ہور بھیڑا کم تاں ایہ وی ہویا کہ… اوتھے عوامی جلسیاں وچ ٹیکنالوجی توں فائدہ چکدے ہوئے کجھ ناں لے کے اوہناں دے کردار دی نندیا کیتی جنہوں براہ راست حملہ آکھیا گیا ظاہر اے ایہو جہی جرأت پہلے کسے نہیں سی کیتی۔ ایہہ برداشت کرنا وی اوکھا سی۔
ایس وچالے مریم نواز اوہدی سیاسی جانشین بن کے سامنے آئی تے اوہنے ووٹ کو عزت دو دے نعرے نوں اپنے سیاسی مشن دا حصہ بنایا۔ ہر تھاں ہر جگہ ایہدا ہوکا دتا لوکاں وی اوہنوں نوازشریف دی سیاست دا حقدار تسلیم کر لیا شہبازشریف تے حمزہ شہباز دور دراڈے ہو گئے اوہناں دی مصلحت تے مفاہمت دی سیاست نوں لوکاں پسند کرنا چھڈ کے مریم نواز دی جارحانہ سیاست نوں سر متھے تے بٹھایا۔ جس دا نتیجہ ضمنی الیکشن وچ بھرویں کامیابی دی صورت وچ سامنے آیا۔ پنجاب دے حوالے جہڑی نویں سیاسی صف بندی کیتی گئی سی اوہ ساری الٹ پلٹ ہو کے رہ گئی۔ بدقسمتی تاں ایہہ وی اے کہ پنجاب وچ تحریک انصاف ساری ریاستی تے حکومتی سرپرستی دے باوجود اپنے لئی کوئی چنگی تھاں نہیں بنا سکی سگوں جہڑی تھاں اوہنوں ملی سی اوہ وی پیراں ہیٹھوں نکل گئی ایس لئی اک واری فیر نویں سرے توں جوڑ میلے کرنے پئے۔
تحریک انصاف چوں ترین گروپ کڈھیا گیا‘ ق لیگ دے چوہدری پرویزالٰہی دی آصف زرداری نال ملاقات دا بندوببست ہویا۔ ق لیگ دے امیدوار نوں سیالکوٹ دے ضمنی الیکشن وچ کامیاب کروایا گیا۔ ایس طرح جہڑی سیاسی نقشہ بندی ہو رہی اے جنوبی پنجاب وچ پیپلزپارٹی تے ترین گروپ تے ق لیگ دا گروپ اگلیاں چوناں وچ نظر آوے گا۔ وچلے پنجاب وچ ق لیگ تے تحریک انصاف رل کے کھلون گے… تاں جے ن لیگ دے بیانیے دا پنجاب وچ توڑ کیتا جاوے۔
سجنا… کھیڈ تاں کھڈاریاں دی اے باقی سب مہرے نیں۔ جتھے بٹھائو اوتھے بہہ جان گے یاں فیر انگلی دے اشارے اُتے نچن لگ پین گے۔ بینظیر دی سیاست تے شہادت دا اسیں شروع وچ ذکر کیتا۔ جمہوریت بہترین انتقام دی گل وی کیتی اٹھارویں ترمیم دی رکاوٹ دا حوالا وی دتا ووٹ کو عزت دو دے مطالبے نوں وی سامنے رکھیا پر… بھائی ایہہ ساریاں گلاں اوتھے ہوندیاں نیں جتھے آئین دی پاسداری ہووے ہر کوئی آئین دا احترام کرے۔ جتھے تگڑے دا ستیں ویہہ سو ہووے اوتھے سب کجھ ہو سکدا اے جو نہیں وی ہو سکدا اوہ وی ہو سکدا اے۔٭٭
