انھا ونڈے ریوڑیاں

حناپرویزبٹ

تن ورھے کارکردگی دی گردان صرف لفاظی نکلی‘ عوام سمجھ گئے نیں کہ 2017ء وچ بھاری چمک پاروں صبح‘ دوپہر‘ شام‘ گلی گلی‘ نگر نگر‘ کنٹینراں تے‘ اخباراں وچ ‘ریڈیو ٹی وی تے‘ بینراں‘ ہورڈنگ بورڈز توں‘ آڈیو‘ ویڈیو پیغامات‘ سوشل میڈیا توں نویں نسل تے تبدیلی دے حوالے نال جنے وی پراپیگنڈا بمب پھوڑے گئے اوہ سب دے سب پھوکے نکلے۔ جنے سبزباغ وکھائے گئے اوہ سارے بھنگ دے نکلے‘ خوشخبریاں دے سارے خواب سراب نکلے‘ متوقع کامیابیاں دے حوالے نال تیاریاں تے مبنی وعدیاں دے ڈھول پھیتی پھیتی ہو گئے نیں۔ تن ورھیاں وچ پنجاب دے پنج چیف سیکرٹری تے ست آئی جی ایس طرح بدلے گئے جیویں لڈو دا کھیڈ‘ تبدیلی اصل وچ تبادلیاں تے کارکردگی کرپشن سکینڈلاں دی صورت وچ مرحلہ وار ظاہر ہو رہی اے جہدے بارے کجھ حلقے ایہ کہہ رہے سن کہ مافیا موجودہ حکومت نوں پھڑ کے حکومت وچ لیایا۔
ماضی وچ بین الاقوامی حکومتی کارکردگی پاروں پنجاب سپیڈ دی اصطلاح دا متعارف ہونا پاکستان لئی بڑے اعزاز دا کارن بنیا سی جہدی گونج اج وی چین سنے ست سمندر پار توں آ رہی اے۔ ایسے شہرت پاروں کجھ حلقے میاں شہبازشریف نوں اسٹیبلشمنٹ توں دور رکھن لئی ہر حربہ استعمال کر رہے نیں تے اوہناں دی راہ وچ تھاں تھاں کنڈے وچھائی جا رہے نیں۔ شریف خاندان وچ اختلافات بارے کوڑیاں خبراں اڑائیاں جا رہیاں نیں پر فیر وی تن ورھیاں وچ اوہناں نوں رتی بھر کامیابی وی نہیں ملی۔ مورخ دا قلم دو دھاری تلوار ہوندا اے اک وقت وچ اوہ طاقت دے دیوتاواں تے مدح سرائی دے پھُل برساندا رہندا اے پر دوجے پاسے اوہ خفیہ ڈائری وی مرتب کر رہیا ہوندا اے جہدا حرف حرف سچائی تے مبنی ہوندا اے۔ مورخ قلم زد کر رہیا اے کہ تن ورھے دی کارکردگی دا ڈھول تے ایس طرح پٹیا گیا جیویں واقعی کوئی کارنامہ سرانجام دتا گیا ہووے۔ اک توں ودھ اک قریبی نوں وزیر‘ مشیر دے قلمدان دتے گئے جیویں انھا ونڈے ریوڑیاں۔ پی آئی اے کریش ہو گئی پر حاکم اوسے طرح واہ واہ دا ورد کر رہے نیں۔ چنگی بھلی چلدی ریلوے نوں پٹڑی توں لاہن والے نوں سنجیدہ وزارت دے کے کہیا گیا جا سمرن جا جی لے اپنی زندگی۔
وزارت خزانہ آئی ایم ایف دے حوالے کرکے حاقتاں بھری لڈو کھیڈی گئی دن رات دعوے کیتے گئے کہ کرنٹ اکائونٹ خسارہ گھٹ سطح اُتے اے۔ سارے اشاریے مثبت نیں پر کوئی ایہ نہ دس سکیا کہ ڈالر 168 روپیے دا کیوں تے کیویں ہویا؟ کوئی ایہ وضاحت نہیں کر رہیا کہ ملکی قرض ودھ کے 39ہزار 827 ارب روپیے کیویں ہویا؟ جے ایناں بھاری قرض لیا گیا تے کتھے کتھے خرچ ہویا؟ ماہرین دا کہنا اے کہ پنج ورھے دے آخر تک ایہ قرض 63 ہزار ارب دی خوفناک سطح تے جا سکدا اے نواز شریف دے اختتام تے ایہ قرض 25ہزار 732ارب روپیے سی جس تبدیلی دا وعدہ کیتا گیا اوہ تبدیلی تے نہ آ سکی پر میڈیا تے پراپیگنڈا مہم جاری اے شاہ توں ودھ شاہ دے وفادار اینیاں وڈیاں وڈیاں بونگیاں مار رہے نیں کہ وڈے توں وڈے بچے وی منہ وچ انگلیاں دبا کے رہ گئے نیں۔ اک مدح سراء نے تے اینی وڈی چھڈی کہ مارچ 1940ء نوں منٹوپارک وچ جدوں قرارداد پاکستان منظور کیتی گئی تے اوہناں دے دادا اوتھے کھلوتے سن اوہ ایہدے تے وی نہیں رکیا تے ایس توں وی وڈی چھڈ دتی کہ تحریک پاکستان وچ قائداعظم دے نال اوہدے دادا نے وی جیل کٹی سی۔ ایتھے دو سوال پیدا ہوندے نیں پہلا سوال ایہ کہ کیہ واقعی 81 ورھے پہلاں قرارداد پاکستان دی منظوری دے وقت اوہناں دے دادا اوتھے موجود سن؟ جے ایہ ٹھیک اے تے فیر اوہناں دی عمر کیہ سی؟ پوتے صاحب دی موجودہ عمر 43 ورھے اے تے اوہ قرارداد پاکستان دی منظوری دے 38 ورھے بعد پیدا ہویا۔ ایتھے دوجا وڈا سوال ایہہ وے کہ پوتے دے والد دی موجودہ عمر کنی اے؟ جے سارا حساب ایتھے لکھ دتا تے شکایت ہووے گی‘ بس ایناں ای کافی اے۔ اندازے لان والے آپ ای اندازہ لا لین کہ پوتے نے سچ بولیا یاں جھوٹ؟۔
ایمانداراں دی حکومت نے تیل وچ 80ارب روپیے دی دیہای لان والے نوں بحرین دی ٹکٹ تھما دتی۔ 110 ارب دی دیہاڑی لان والے نوں وی باہر گھلن دیاں تیاریاں جاری نیں۔ شوگر دے مریضاں توں سستی انسولین‘ دل تے کینسر دے مریضاں توں مفت دوائیاں‘ گردیاں دے مریضاں توں مفت ڈائیلسز دیاں سہولتاں کھوہن والیاں نے اجہے ہیلتھ کارڈ تھما دتے جو کسے تھاں وی قابل قبول نہیں۔ دوائیاں تے علاج توں محروم ہون والے عوام دن رات گھراں وچ تے ہسپتالاں وچ موت دے بسر تے خدا اگے دعا گو نیں کہ یاں سانوں چک لے یاں حشر برپا کر دے۔٭٭