حصے دار

لکھت:اشرف شریف

روس گرم پانی تے اسیں وسط ایشیا تک اپڑ گئے۔ سچ ایہہ وے کہ مفادات نوں ٹوٹے ٹوٹے کر کے دنیا بھر وچ کھلار دتا جاوے فیر وی ایہ مقناطیس ول کھچے آن گے قدرت مفادات نوں دور نہیں رہن دیندی۔ حضرت غوث علی شاہؒ پانی پتی دے ملفوظات تے مبنی کتاب تذکرہ غوثیہ وچ اک قصہ شامل اے۔ حضرت غوث علی شاہ پانی پتی دی خدمت وچ اک ہندو بڈھی اپنی جوان بہو دے نال حاضر ہوئی‘ اولاد لئی دعا دی درخواست کیتی۔ حضرت دی نظر جیویں ای کڑی تے پئی دل وچ طلب پیدا ہو گئی۔ شام نوں کڑی اکلی فقیر دی ایس نظر وچ بندھی اپنے آپ آ گئی۔ حضرت نے بٹھایا‘ اینے وچ دل چوں آواز آئی غوث علی شاہ توں خواہش کیتی‘ہن کیہ کرنا اے‘ ایہنوں بھین بنان اے تے اپنی حقیقی بھیناں تے خاندان نوں چھڈ کے کیوں در بدر ہووے‘ جے ایہدے نال نفسانی خواہش پوری کرنی اے تے ایہ درویشی تے فقیری دا بہروپ کیوں بھر رکھیا اے۔ فقیر نے توبہ کیتی تے کڑی دے سر تے ہتھ رکھ کے اوہنوں واپس گھلیا۔
اساں سٹرٹیجک ڈیتھ دی خواہش وچ پہلے پندراں ویہہ ہزار جہادی مروائے فیر دہشت گردی خلاف جنگ وچ ستر ہزار توں ودھ شہید کروائے۔ ہن بائی سو کلومیٹر دی سرحد دے پار ساڈے دوست حکمران بنے نیں جہناں دے دل ساڈے لئی کھلے تے اکھاں وچ مروت دے چراغ بلدے نیں۔ اسیں جہڑی خواہش کیتی اوہ پوری ہو گئی۔ ہن کیہ کرنا اے؟ ہندوستان وچ آزادی دی تحریک جوبن تے آئی تے افغانستان تے سرحدی گاندھی باچا خان خاندان دے اثرات سن لسانی رابطہ سی خیبرپختونخواہ دے لوکاں دی افغانستان آمدورفت تے رشتہ داریاں سن۔ ساڈے کول صرف قائداعظم سن۔ کے پی وچ مسلم لیگ دی کوئی حیثیت نہیں سی۔ کانگرس تے خدائی خدمت گار تحریک نے رَل کے حکومت بنا رکھی سی۔ اجہے وچ جدوں پاکستان بنن دا اعلان ہویا تے شمال مغربی سرحدی صوبہ دے کانگرس نواز خیالات افغان علاقیاں تک اپڑے تے افغانستان وچ پاکستان مخالفت دے بیں بوئے گئے۔ ایہ اوہ بنیاد سی جو بھارت تے افغانستان دے تعلقات وچ ہمیشہ خوشگواری دا کارن بنی رہی۔ پاکستان نے سوویت یونین دے خلاف جہاد وچ حصہ لیا۔ وڈی وجہ تے امریکہ دے مفادات سن پر مشترکہ مفاد افغان علاقے نوں اپنی دوست سرزمین بناندا سی۔ اوتھوں کمیونزم دا خاتمہ امریکہ دا ہدف سی۔ ساڈا ہدف بھارت دا اثرورسوخ ختم کرنا سی۔ سوویت یونین ٹٹی تے امریکہ تے پاکستان نوں اپنے مقصد حاصل ہو گئے۔ پاکستان نوں وسط ایشیا تک رسائی دا اضافی فائدہ ملیا۔ افغانستان دے باشندیاں نوں تجارتی راہداری دی حیثیت ملی جہدے توں اوہ اپنی غربت ختم کر سکدے سن تے پاکستان دی بندرگاہ دے راہیں اپنی پیداوار دنیا دے کسے وی علاقے وچ اپڑا سکدے سن ایس طرح ساریاں دی خواہش پوری ہو ئی۔
طالبان جے اپنی سرزمین القاعدہ تے اسامہ بن لادن نوں نہ ورتن دیندے تے 20 ورھے تک جنگ نہ لڑنی پیندی نہ لکھاں لوک مردے۔ ایس جنگ وچ ویہہ ورھیاں دوران ڈھائی ہزار امریکی مرے جد کہ مرن والے افغاناں دی گنتی ڈھائی لکھ دے نیڑے اے۔ پاکستان وچ ہون والیاں موتاں نوں شامل کر لیے تے گنتی سوا تن لکھ بن دی اے۔ 110 ارب ڈالر دا نقصان پاکستانی انفراسٹرکچر نوں چکنا پیا‘ افغانستان تے 83 کھرب ڈالر لگے پر کابل شہر توں علاوہ کوئی علاقہ امن نہ ویکھ سکیا۔ کابل دا وی اوہ حصہ جہڑا چھائونی بنیا ہویا سی۔ امریکی جنگی آلات و مشینری ای نہیں جنگی علماں دا وی استاد کہلاندا اے۔ دنیا بھر توں فوجی افسر امریکی داراں توں تربیت حاصل کرن آئوندے نیں۔ امریکہ کسے نال رنج ہوندا اے تے اوس ریاست نوں فوجی تربیت دی رعایت دینا بند کر دیندا اے۔ صدر ٹرمپ نے پاکستان تے وی تربیتی پابندیاں لائیاں سن۔ افغانستان دے کول کجھ نہیں سی جنگی مشینری دے سامنے صرف حوصلہ سی جو ڈٹیا رہیا تے استاد دا سارا ہنر مٹی وچ مل گیا۔ استاد سنگلاخ پہاڑاں تے نک رگڑدے ہوئے ایس حال وچ نسیا کہ اوہدا عالمی رعب و دبدبہ طالبان دے ننگے پیراں دے تھلے پیا ہویا اے۔ اوہدے اثاثے مال غنیمت بن چکے نیں۔ طالبان دی جنگی حکمت عملی دنیا توں داد پا رہی اے۔ اوہناں نے کوئی خون بہایا نہ غارت گری کیتی‘ عورتاں‘ بچیاں تے بزرگاں نوں تکلیف پہنچائی نہ فصلاں تے کاروبار تباہ کیتے۔ جس شہر نوں چاہیا اوہدا گھیرا گھت لیا۔ لڑائی یاں اطاعت‘ ایہ دو لفظی پیغام شہر والیاں نوں گھلیا۔ ساریاں نے اطاعت قبول کیتی حالاں کہ کابل شہر جہدی حفاظت تن لکھ نفری والی فوج کر رہی سی بنا خون بہائے فتح ہو گیا۔ اک اک کر کے طالبان رہنما ورھیاں دی روپوشی ختم کر کے سامنے آ رہے نیں۔ ایس جنگ دا نتیجہ اک واری فیر افغانستان چوں بھارتی اثرورسوخ دے خاتمہ‘ وسط ایشیا دیاں منڈیاں تک پاکستان دی رسائی‘ افغانستان دی بطور تجارتی راہداری‘ حیثیت بحالی دی صورت وچ نکلیا۔ اضافی فائدہ ایہ ملیا کہ افغانستان دی وجہ نال پاکستان‘ روس‘ چین تے وسط ایشیا اک تزویراتی بلاک دی شکل وچ ابھرن لگ پئے نیں۔
افغانستان دی تعمیرنو ہونی اے نویں حکمراناں دی تربیت ہونی اے‘ ایہناں نوں استاد دی لوڑ اے۔ ایہناں کول انتخاب اے کہ امریکہ دی ٹکر دے باصلاحیت استاد توں سکھ سکیے۔ آئی ایس آئی چیف لیفٹیننٹ جنرل فیض حمید سکیورٹی معاملیاں تے مشاورت کرن افغانستان اپڑے امریکہ دی جنگی مشینری‘ جہاز تے نکارہ بنائے ہیلی کاپٹر ٹھیک کیتے جا رہے نیں۔ طالبان حکومت دا نک نقشہ بنایا جا رہیا اے صرف نواں افغانستان نہیں نواں جہان تعمیر کیتا جا رہیا اے۔ اک صف ماتم اے‘ گوانڈھ وچ مرگ ہو گئی اے جدوں ساڈے ایتھے سوگ سی تے اوہ ڈھول وجا رہے سن کابل دے فرضی مشن تے بالی وڈ فلماں بنا رہیا سی ہن سرحد پار وین چل رہے نیں۔ ایہ رولا دسن نوں کافی اے کہ نویں صورتحال وچ افغان طالبان دے نال جت وچ ہور کون حصہ دار اے۔٭