الوداع مجاہدلاثانی!
مرحوم سید علی گیلانی نےساری عمر آزادی جموں و کشمیر دا جھنڈا پھڑی رکھیا تے ایس مرد درویش نے حریت دی اک تابناک تاریخ رقم کیتی
رابعہ رحمٰن
بابائے حریت، جدوجہد آزادی کشمیر دے سرخیل مجاہد لاثانی سید علی گیلانی اپنے رب دے حضور پیش ہو گئے، اوہ کشمیر اُتے غاصبانہ بھارتی قبضے دے خلاف برس ہا برس اُتے جاری تحریک آزادی دی سب توں وڈی علامت تے توانا آواز سن۔ سید علی گیلانی 29 ستمبر 1929ء نوں مقبوضہ کشمیر دے ضلع بانڈہ پورہ وچ واقع وولر جھیل دے کنارے آباد پنڈ رفتہ وچ پیدا ہوئے، ابتدائی تعلیم بانڈی پورہ توں ای حاصل کیتی تے بعد وچ اورینٹل کالج لہور توں گریجویشن مکمل کیتی۔ تعلیم توں فارغ ہون دے بعد سکول ٹیچر دے طور اُتے ملازمت اختیار کر لئی۔ اپنی سیاسی زندگی دا آغاز 1960 دی دہائی وچ نیشنل کانفرنس دے پلیٹ فارم توں کیتا پر بوہت جلدی ایس دے نظریے توں اختلاف کردے نیشنل کانفرنس توں فارغ ہو گئے تے جماعت اسلامی وچ شمولیت اختیار کیتی تے باقی ساری حیاتی دا بیشتر حصہ ایسے جماعت نال جڑے رہے۔ 1972 توں لے کے 1990 دے دوران تن وار سو پور توں مقبوضہ کشمیر دی اسمبلی دے رکن منتخب ہوئے تے کدی وی ہندوستان دے مقبوضہ کشمیر دے ناجائز قبضے نوں تسلیم نہیں کیتا۔ 1990 دے بعد جدوں مقبوضہ کشمیر وچ آزادی دی جدوجہد نے زور پھڑیا تے ہندوستان دی انتقامی کاروائیاں وچ وی وادھا ہویا تے جناب سید علی گیلانی نے اپنی جدوجہد نال لوکاں دی اواز نوں بھرپور طریقے نال ہر فورم اُتے بلند کیتا تے ہندوستان دے نظام دے اندر ہر قسم دی پارلیمانی سیاست نوں خیر باد کہہ دتا۔ مرحوم سید علی گیلانی آخری دم تیکر اک سچے پاکستانی سن تے ایہناں دا ایہہ مشہور نعرہ ، ہم پاکستانی ہیں اور پاکستان ہمارا ہے، ہر کشمیری دے دل دی اواز بن گیا، اوہ ہمیشہ اک مضبوط تے مستحکم پاکستان دے وکیل رہے کیوں جے ایہناں دا کہنا سی کہ اک مضبوط تے خوشحال پاکستان جدوجہد آزادی کشمیر لئی بوہت ضروری اے۔
مرحوم سید علی گیلانی نےساری عمر آزادی جموں و کشمیر دا جھنڈا پھڑی رکھیا تے ایس مرد درویش نے حریت دی اک تابناک تاریخ رقم کیتی، اوہ اک عظیم مجاہد، پختہ نظریاتی وابستگی دا چراغ تے باعمل و باکردار صاحب بصیرت قائد سن، زندان ، جھوٹھے مقدمات، جبر و استبداد دا کوئی ہتھکنڈا ایہناں دے عزم صمیم نوں متزلزل نہ کر سکیا۔ اوہناں نے امیر واعظ عمر فاروق، عبدالغنی بھٹ، اشرف صحرائی تے دوجے سینئر کشمیری راہنماواں دے نال رَل کے 1993 وچ کل جماعتی حریت کانفرنس دی بنیاد رکھی تاکہ جدوجہد آزادی کشمیر نوں باقاعدہ راہنمائی فراہم کیتی جا سکے۔ پچھلی تن دہائیاں توں اوہ ایس فورم توں مقبوضہ کشمیر دے عوام نوں بھرپور راہنمائی فراہم کردے رہے تے چار وار کل جماعتی حریت کانفرنس دے سربراہ وی رہے۔ اپنی عملی جدوجہد دے دوران سید علی گیلانی نے 10 سال توں ودھ دا عرصہ قید و بند وچ لنگھایا جد کہ پچھلے 11 سال توں اوہ اپنے گھر وچ نظر بند سن۔ اوہناں نے 11 توں ودھ کتاباں لکھیاں جنہاں وچوں اک مشہور کتاب ’رودادِ قفس‘1993ء وچ شائع ہوئی فیر ایہناں دے گھر نوں وی قفس بنا دتا گیا ایہناں دی وفات وی قفس وچ ہوئی تے جنازہ وی قفس وچ کیوں جے ہندوستان دی قابض حکومت ایہناں دے جنازے توں وی خوفزدہ سی اک موقعے اُتے سید علی گیلانی نے ایہہ کہہ کے ہندوستانی پاسپورٹ لین توں انکار کر دتا کہ اوہ اپنے آپ نوں ہندوستان دا شہری نہیں من دے تاں اوہ ہندوستان دے پاسپورٹ پُر وی نہیں کر سکدے۔ سید علی گیلانی دا ہمیشہ توں ایہہ ٹھوس تے اٹل موقف سی کہ کشمیر دے مستقبل دا فیصلہ کشمیریاں دی مرضی دے مطابق ہونا چاہیدا اے تے کشمیریاں دی اکثریت پاکستان دے نال الحاق چاہندی اے۔
سید علی گیلانی بلاشبہ تحریک آزادی کشمیر دے سب توں وڈے راہنما تے پوری ملت اسلامیہ دے اک عظیم لیڈر سن اوہناں نے وادی کشمیر دے مقتل وچ قابض بھارتی فوج دی سنگینیاں دے سائے وچ چھ دہائیاں تیکر جرات بہادری تے عزم و استقلال دے نال تحریک آزادی کشمیر دا جھنڈا تے پاکستان دا سبز ہلالی پرچم سر بلند رکھیا ایس دی کوئی نظیر نہیں ملدی۔
ڈھونڈواگر ملکوں ملکوںملنے کے نہیں نایاب ہیں ہم
اوہ عزم و ہمت دا کوہ ہمالیہ سن اج ہندوستان دی قابض حکومت تے فوج ایہناں دی لاش توں وی ایس قدر خوفزدہ اے کہ ایہناں دے نماز جنازہ نوں وی صرف گھر دے کجھ بندیاں تیکر محدود کر دتا گیا پر اوہ مرد قلندر اپنی قوم وچ اک اِنج دا ولولہ پیدا کر گیا جنھوںختم کرنا ہن کسے لئی ممکن نہیں، اوہ اپنی زندگی وچ تے اپنی قوم نوں ہندوستان دے چنگل توں آزاد کروان پاکستان دا حصہ نہ بنا سکے پر ایہناں دا روشن کیتا ہویا چراغ کدی بجھ نہیں سکے گا۔ ایہناں دی رحلت نے ہر پاکستانی نوں غمزدہ کر دتا اے اوہ کشمیریاں دے عزم حریت دا استعارہ سن۔
