چوہدری ظہور الٰہی شہید۔۔۔ اک عہد ساز شخصیت
چوہدری ظہور الٰہی ڈرائنگ روم دی سیاست دے سخت مخالف سن اوہ حقیقی تے سچی سیاست دے قائل سن
تحریر : پروفیسر حکیم سید عمران فیاض
شہید جمہوریت چوہدری ظہور الٰہی 7 مارچ 1920 وچ گجرات دے پنڈ نت وچ پیدا ہوئے ایہناں دے والد چوہدری سردار خان اک ہمہ جہت شخصیت دے مالک انسان سن۔ چوہدری ظہور الٰہی شہید ڈرائنگ روم دی سیاست دے سخت مخالف سن اوہ حقیقی تے سچی سیاست دے قائل سن جس وچ عوامی مفاد سر فہرست سی اوہ استحصالی طبقہ دے خلاف کمربستہ ہوئے اوہناں نے قائداعظم محمد علی جناح دے نال مل کے پاکستان دا مطالبہ کیتا لاالہٰ الا للہ دا نعرہ بلند کیتا۔ 1944 دے بعد اوہ عملی طور اُتے مسلم لیگ گجرات دی سیاست وچ شامل ہوئے تے مسلماناں وچ خدمت دا بیڑا چکیا تے 1945-1946 آل انڈیا مسلم لیگ وچ تحریک پاکستان دے سرگرم کارکن دی حیثیت نال کم کیتا۔ 1947 وچ قیام پاکستان دے ویلے بوہت وڈی تعداد وچ مغویہ مسلمان عورتاں نوں ہندوئواں تے سکھاں دے قبضے توں آزاد کروایا بعدازاں ایہناں نوں مسلم لیگ دی پارلیمانی پارٹی دا سیکرٹری جنرل بنا دتا گیا۔ ایوب خان تے محترمہ فاطمہ جناح دی صدارتی سیاسی محاذ آرائی وچ اوہ کھل کے ساہمنے آئے تے محترمہ فاطمہ جناح دا ساتھ دتا۔
نہیں ہے نہ امید اقبال اپنی کشت ویراں سے
ذرا نم ہوتو یہ مٹی بہت زرخیز ہے ساقی
چوہدری ظہور الٰہی شہید ضلع گجرات دے اوہ جوان مرد تے بہادر سپوت نیں جنہاں نے اپنی ساری زندگی عوام دی خدمت وچ صرف کر دتی اوہ اپنی انمٹ صلاحیتاں دی بدولت عوام دے اندر مقبول ہوئے ایہناں دی زندگی دا اول تے آخر مقصد عوام دی خدمت تے ایہناں نال بے لوث محبت سی تے زندگی دے آخر دناں تیکر ایہہ اوہناں دا طرئہ امتیاز رہیا۔ تے اوہ قائداعظم محمد علی جناح دے فرمودات کام، کام اور بس کام اُتے عمل پیرا رہے جس اُتے گجرات دی دھرتی نوں ہمیشہ ناز رہیا۔
نگہ بلند سخن دلنواز پر سوز
یہی ہے رخت سفر میر کارواں کے لیے
چوہدری ظہور الٰہی شہید نے اپنی عملی زندگی دا آغاز پولیس فورس وچ خدمات سرانجام دے کے کیتا۔ بعدازاں اپنے وڈے بھرا چوہدری منظور الٰہی دے نال ٹیکسٹائل دا بزنس شروع کیتا۔
چوہدری ظہور الٰہی شہید نے اپنی سیاست دا آغاز 1955 دی دہائی وچ کیتا۔ ایہناں دے والد محترم چوہدری سردار خان اپنے ویلے دے اک عظیم انسان سن۔ جنہاں نے اپنی اولاد دے دل وچ عوامی فلاح دا جذبہ کُٹ کُٹ کے بھریا۔
چوہدری ظہور الٰہی شہید 1958 وچ ضلع گجرات بورڈ دے چیئر مین منتخب ہوئے ایس دے علاوہ نیشنل بنک آف پاکستان دے بورڈ آف ڈائریکٹرز دے ڈائریکٹر وی رہے۔ 1962 تے 1970 وچ قومی اسمبلی دے رُکن منتخب ہوئے اوہناں نے اپنے سیاسی کیریئر دے دوران کئی وار قید و بند دیاں مصیبتاں برداشت کیتیاں۔ 1977 دے انتخابات وچ اللہ دے سپاہی دا لقب ملیا تے 1978 وچ قومی اتحاد دی حکومت وچ وفاقی وزیر محنت و افرادی قوت دا قلم دان سنبھالیا۔
ہو حلقہ یاراں تو بر یشم کی طرح نرم
رزم حق و باطل ہوتو فولاد ہے مومن
چوہدری ظہور الٰہی شہید دے وڈے پتر چوہدری شجاعت حسین سابق وزیراعظم پاکستان، وفاقی وزیر داخلہ سنے کئی عہدیاں اُتے فائز رہے ۔ دوجے پتر چوہدری وجاہت حسین وفاقی وزیر رہے جد کہ تیجے پتر چوہدری شفاعت حسین چیئر مین ضلعی کونسل و ضلعی ناظم گجرات دے عہدے اُتے فائز رہے۔ چوہدری ظہور الٰہی شہید دے وڈے بھرا چوہدری منظور الٰہی (مرحوم) دے پتر چوہدری پرویز الٰہی سابق ڈپٹی وزیراعظم پاکستان ، وزیراعلیٰ پنجاب، اسپیکر پنجاب اسمبلی دے عہدیاں اُتے فائز رہے تے ایس ویلے اوہ اسپیکر پنجاب اسمبلی دے عہدہ اُتے فائز نیں تے عوامی خدمات فراہم کر رہے نیں۔
انداز بیاں گر چہ بہت شوخ نہیں ہے
شاید کہ اتر جائے دل میں مری بات
چوہدری ظہور الٰہی شہید نے حق و باطل دی جنگ وچ ہمیشہ حق دا پرچم سر بلند رکھیا۔اوہ اک زندہ دل، ملنسار تے عوام نال محبت کرن والے انسان سن۔ایہناں دی ذاتی دشمنی کسے نال نہیں سی۔ ایہناں دے سیاسی مخالفین تے موجود سن پر دشمنی ایہناں دی کسے وی بندے دے نال نہیں سی۔ اوہناں نے تخت بھٹو دے نال ٹکر لے لئی عوام دے حق دی خاطر جمہوریت دی لڑائی لڑی، حق دی جنگ دے دوران اوہناں نے کئی سال قید و بند دیاں صعوبتاں برداشت کیتیاں پر اپنے موقف توں پچھے ہٹنا گوارا نہ کیتا اوہ اک صاف دل صاف گو انسان سن۔ اوہناں نے عوام دی خاطر جمہوریت و آزادی دی لڑائی لڑی تے عوام دے حقوق دی خاطر اپنی جان دا نذرانہ دین توں پچھے نہ ہٹے اوہ جو اندروں سن اوہ ای باہر سن اوہ اپنی خداداد صلاحیتاں دی بدولت عوام دیاں دلاں وچ گھر کر گئے۔
شاہین کبھی پرواز سے تھک کر نہیں گرتا
پر دم ہے اگر تو، تو نہیں خطرہ افتاد
چوہدری ظہور الٰہی شہید نے تارکین وطن دے بہبود لئی اوورسیز پاکستانیز فائونڈیشن قائم کیتی چوہدری ظہور الٰہی شہید 25 ستمبر 1981 نوں اک قاتلانہ حملے وچ شہید ہوئے پر اوہ اج وی ساڈے ساریاں وچ زندہ نیں ایہناں دا خاندان اج وی عوام وچ پیار و محبت ونڈ رہیا اے۔ ایہناں دی شہادت 25 ستمبر 1981 توں لے کے اج تیکر عوام ایہناں دے خاندان دے بندیاں توں محبتاں لے رہی اے چوہدری برادران دے نال رشتہ ضلع گجرات دے عوام دا رشتہ دو جان اک جسم دا اے۔ چوہدری ظہور الٰہی شہید دی شہادت توں لے کے اج تیکر عوام ایہناں نوں بھلا نہیں سکی۔ چوہدری برادران دے دروازے اُتے خاص و عام لئی دن رات کھلے رہندے نیں۔ اوہناں نے ہزاراں دی تعداد وچ غریباں، مسکیناں یتیماں دے سر اُتے شفقت دا ہتھ رکھیا تے ایہناں نوں ماہانہ امداد فراہم کیتی ایس دے علاوہ بوہت وڈی تعداد وچ اپنے حلقے دے عوام نوں روزگار فراہم کیتا۔ ایہہ گل اظہر من الشمس اے کہ جس قدر ترقیاتی، فلاحی، سماجی کم چوہدری برادران دے دور حکومت وچ ہوئے اوہ تاریخ گواہ اے کہ اج تیکر سارے کسے ہور دور وچ ممکن نہ ہو سکے اج چوہدری شافع حسین، چوہدری سالک حسین، چوہدری مونس الٰہی، چوہدری راسخ الٰہی، چوہدری حسین الٰہی ، اسمبلی وچ اپڑ کے عوام دی خدمات دا بیڑا چکے ہوئے نیں۔
مینوں اج اوہ دن یاد اے جدوں چوہدری سردار خان ٹرسٹ ہسپتال فوارہ چوک گجرات وچ چوہدری برادران دی ہدایات اُتے چیئر مین بلدیہ گجرات چوہدری محمد طفیل (مرحوم) روزانہ عوام دے مسئلے سنیا کردے سن۔ راقم الحروف وی ایہناں دے نال اکثر موجود ہوندا سی۔ ساڈے خاندان تے برادری دا ووٹ صرف چوہدری برادران دی امانت سی۔ تے میری پھوپھو نوں چوہدر ی ظہور الٰہی شہید نے اپنی دھی بنا رکھیا سی۔ گجرات مسلم لیگ ق دا قلعہ اے تے ایتھے دی عوام نوں چوہدری برادران دی ہدایت اُتے خصوصی ریلیف فراہم کیتا جاندا اے پاکستان مسلم لیگ ق دے ہر اول دستے MSF نے ہمیشہ چوہدری ظہور الٰہی شہید دے فرمودات دی روشنی وچ ملکی تعمیر و ترقی تے طلبا دے حقوق دی خاطر کم کیتے چوہدری برادران دی سرپرستی وچ مزید بہتر تے موثر طور اُتے اپنی خدمات نوں اگے ودھایا۔ MSF دے مرکزی صدر سہیل چیمہ دی ہدایت اُتے درمے، قدمے، سخنے طلبا نوں ایہناں دے حقوق دلوائے تے طلبا دے دلاں وچ اک وکھرا مقام حاصل کیتا۔
چوہدری ظہور الٰہی شہید دے فرزندان تے خاندان دے سارے بندیاں نے ہمیشہ عوام دے دلاں وچ اپنا اک انمٹ مقام دسیا ۔ اوہناں نے اپنے خاندان دی روایات نوں ہمیشہ قائم رکھیا تے عوام خدمت نوں اپنا مشن دسیا۔
تندی با د مخالف سے نہ گھبرا اے عقاب
یہ تو چلتی ہے تجھے اُونچا اڑانے کے لیے
