ایہنوں کہندے نیں ’’سینے تے مونگ دلنا‘‘

لکھت:مطلوب ورائچ

ہر گزردے دن نال طالبان افغانستان تے اپنا تسلط مضبوط کر رہے نیں۔ امریکہ نے 9/11 دے بعد افغانسستان تے یلغار کرکے طالبان حکومت دا خاتمہ کیتا۔ امریکہ نوں اوس ویلے شمالی اتحاد نے مکمل طور تے سپورٹ کیتا جہدے انعام وچ شمالی اتحاد والیاں نوں اقتدار وچ وڈا حصہ دتا گیا۔ افغانستان دے نایب صدر امرصالح تے رشید دوستم ورگے لوگ نوازے جان والیاں وچ شامل سن۔ ہن افغانستان وچ جو وڈی تبدیلی آئی اے اوہ شمالی اتحاد دے سرے توں وجود دا خاتمہ اے۔ طالبان اپنے دور حکومت وچ شمالی اتحاد دے خلاف مسلسل لڑے پر اوہدے اقتدار دا خاتمہ نہ کر سکے۔ اج بناں لڑائی دے شمالی اتحاد دے اوس دور وچ زیرقبضہ علاقیاں تے وی طالبان دا قبضہ ہو چکیا اے۔ اک ہلکی جہی مزاحمت وادی پنج شیر توں ہوئی احمد شاہ مسعود دے پُتر احمد شاہ نے زندگی وچ کدی ہتھیار نہیں چکے۔ امریکہ تے بھارت نے غلط گھوڑے نوں اگے ودھا دتا تے شاہ نوں جنگجو بنان دی کوشش کیتی جو مٹی وچ مل گئی۔ امرصالح تے احمد شاہ نے نسن وچ ای بہتری س مجھی۔ امریکہ تے بھارت دی طالبان دے سامنے اک قوت کھڑی کرن دی سازش دم توڑ گئی۔
طالبان نے 22اگست 2021ء نوں افغانستان تے قبضہ کرنا شروع کیتا تے کجھ دیہاڑیاں وچ ای دنیا دی واحد سپرپاور نوں نکرے لا دتا۔ ملک وچ خونیں تے خانہ جنگی دے خدشات ظاہر کیتے جا رہے سن۔ اشرف غنی دی بزدلی نال ایہ خدشات دور ہو گئے۔ اشرف غنی نوں پچھلے صدر نجیب اللہ دا بھیانک انجام نظر آ رہیا سی جدوں طالبان نے افغانستان تے قبضہ کرن دے بعد اوہنوں اقوام متحدہ دے دفتر چوں کڈھ کے پھاہے لایا تے اوہدی لاش سرعام اک پول توں کئی دن لمکائی رکھی۔ ہن طالبان کافی بدل چکے نیں۔ اوہناں دے کئی ملکاں نال رابطے رہے۔ ایہو وجہ اے کہ طالبان حکومت نوں چین‘ سعودی عرب تے روس نے من لیا اے۔ جرمن وی من رہے نیں۔ جرمنی دا ایہ اقدام یورپی یونین لئی پیروی دا کارن بن سکدا اے۔ پاکستان نے وی چھیتی یاں بدیر انج کرنا اے۔
طالبان دے رویاں وچ نرمی عالمی برادری وچ اوہدے امیج نوں بہتر بنا رہی اے۔ پچھلے دیہاڑے حیران کن طور تے کابل تے قندھار وچ طالبات نے طالبان دے حق وچ ریلیاں کڈھیاں۔ کڑیاں نے بینر چکے ہوئے سن کہ اسیں اپنے آپ نوں محفوظ سمجھنے آں تے طالبان حکومت دا سواگت کرنے آں۔ ایہناں طالبات نے سکارف پائے ہوئے سن۔ طالبان کوئی سختی نہیں کر رہے۔ انتقامی کاروائیاں دے تحفظ وی کوڑے ثابت ہوئے۔ طالبان دے سب توں وڈے دشمن تے قاتل حامدکرزئی تے عبداللہ عبداللہ ورگے لوک کابل وچ موجود تے محفوظ نیں۔ طالبان کابینہ دا اعلان پچھلے دیہاڑے کیتا گیا جد کہ حلف برداری یاراں ستمبر نوں اوس دیہاڑے منعقد کیتی گئی جدوں امریکہ وچ نائن الیون دی 20 ویں برسی منائی جا رہی سی۔ اوس دن امریکہ وچ صف ماتم بچھی ہوندی اے۔ ایس ورھے طالبان ولوں ا پنی حکومت دی شروعات تے جشن امریکیاں لئی تازیانہ سی۔ ایہ حلف برداری امریکہ تے اوہدے حمایتیاں دے سینے تے مونگ دلنے والی گل سی۔ امریکہ نوں افغانستان چوں ذلیل و خوار ہو کے نکلنا پیا۔ بھارت وی دم دبا کے نس گیا۔ امریکہ نے اپنی ہار منی تے اوہناں لوکاں دے حوالے اقتدار کیتا جہناں توں کھوہیا سی تے جہناں نوں دہشت گرد قرار دیندا سی۔ امریکہ نوں ہر پاسیوں نکامیاں دا سامنا اے۔ عراق وچ اوہ اپنی جت دے شادیانے وجا رہیا اے۔ ایہ تے مٹی گھٹا بیٹھن تے پتہ لگے گا کہ اوتھے اوہ کناں کامیاب ہویا۔ گھٹے مٹی دے بیٹھن وچ دیر نہیں لگے گی۔ اودھر لیبیا وچ وی حالات امریکہ دے ہتھوں نکل رہے نیں۔ کرنل قذافی نوں بے دردی نال قتل کیتا گیا ہن اوہدا پُتر سامنے آ گیا اے بعید نہیں اگلے کجھ مہینے وچ اقتدار وچ آ جاوے۔
دوستو! سینے تے مونگ دلنے توں مینوں یاد آیا کہ پچھلے دیہاڑے پورے پاکستان دی 42 کنٹونمنٹ ایریا وچ تقریباً 286 وارڈز وچ کنٹونمنٹ الیکشن کروائے گئے۔ ایہو دیہی بلدیاتی الیکشن نال ملدا جلدا نظام اے یاں دوجے لفظاں وچ ایہ کہہ لوو کہ یار لوکاں نے عملی طور تے بلدیاتی الیکشن وچ جان توں پہلاں کنٹونمنٹ الیکشن کروا کے ایہ پتہ کر لیا اے کہ کون کنے پانی وچ اے۔ کنٹونمنٹ دے الیکشن نتیجیاں موجب پی ٹی آئی 63 سیٹاں لے کے پہلے نمبر تے جد کہ مسلم لیگ (ن) 59 سیٹاں لے کے دوجے نمبر تے جد کہ اینی ای گنتی وچ آزاد امیدوار منتخب ہوئے۔ پیپلزپارٹی 30 سیٹاں لین وچ کامیاب ہوئی جد کہ کراچی کنٹونمنٹ وچ ایم کیو ایم تے پی ایس پی وی کجھ سیٹاں لین وچ کامیاب ہو چکے نیں۔ جد کہ جماعت اسلامی وی دو سیٹاں لے کے شہیداں وچ ناں لکھوان وچ کامیاب ہو گئی اے۔ میرے اپنے تجزیے موجب اگلے ورھے فروری مارچ وچ ہون والے متوقع بلدیاتی الیکشن وچ نتیجے وی ایہناں نتیجیاں نال کجھ ملدے جلدے ہون گے۔ بہرحال اجے تے کرونا دے مضمرات تے افغانستان دے حالات نے اپوزیشن دے خواباں تے پانی پھیر دتا اے تے ایہنوں ای کہندے نیں سینے تے مونگ دلنا۔٭٭