حکومت طب یونانی دی سرپرستی کرے، حکیم احمد سلیمی

حکومت پنجاب اطبا ٕ دیاں ملازمتاں اُتے لگی پابندی ختم کرے: پاکستان طبی کانفرنس

پروفیسر حکیم سید عمران فیاض

حکومت پنجاب نے پورے پنجاب وچ اطبا کرام دی خالی آسامیاں نوں پُر کرن دی بجائے ایہناں نوں ختم کرن دا فیصلہ کیتا اے جس دی جنہی وی مذمت کیتی جائے گھٹ اے۔ ایہناں وچاراں دا اظہار پاکستان طبی کانفرنس دے زیر اہتمام چیئرنگ کراس اسمبلی ہال دے ساہمنے اطبا نال خطاب کردے ہوئے پروفیسر حکیم سلیمی،حکیم میاں اکرم ، حکیم سید عمران فیاض ، حکیم جاوید رسول ، حکیم قیصر نوید گھمن ، ڈاکٹر سکندر حیات زاہد، حکیم افتخار نجمی ، ڈاکٹر شوکت علی چوھدری ، حکیم محسن ضیا ٕ، حکیم محمد یوسف ، حکیم عطا ٕ الرحمن صدیقی ، حکیم امجد بھٹی ، حکیم احمد حسن نوری تے حکیم احمد اسحاق نے کیتا۔ بعد وچ ایوان وزیراعلیٰ دے ساہمنے اپنے مطالبات دے حق وچ احتجاجی مظاہرہ وی کیتا گیا تے حکام نوں یادداشت وی پیش کیتی گئی تے ایوان وزیراعلیٰ وچ ناصر سلیمان وائس چیئر مین وزیراعلیٰ شکایت سیل نال وفد نے ایہناں دے دفتر وچ ملاقات وی کیتی۔ ایس موقعے اُتے خطاب کردے ہوئے مقررین نے کہیا کہ اوہناں نے کیہ ایہہ انداز حکمرانی ہر اوہ قدم چکیا جا رہیا اے جس نال عوام پریشان تے لاچار ہون ۔ بے پناہ مہنگائی دے ایس منہ زور دور وچ غریب عوام توں سستا، آسانی نال دستیاب تے بے ضرر طریقہ علاج یعنی طب یونانی دی سہولت دا حق کھویا جا رہیا اے جیہڑا بذات خود اک ظلم اے کیوں جے اک عام تے گھٹ آمدنی والا انسان انگریزی طریقہ علاج دا بوجھ نہیں چک سکدا۔ وطن عزیز سنے ہر ملک دا ہر آئین و قانون بنیادی انسانی حقوق اُتے بنیاد کردا اے پر ساڈے کول تے الٹی گنگا وگدی اے نہ جانے اطبا دے خالی آسامیاں نوں ختم کر کے کنہاں غیر ملکی آقاواں نوں خوش کر کے غیر قانونی تے غیر انسانی عمل کیتا جا رہیا اے۔ اسیں مقتدر طاقتاں اَگے اپیل کرنے آں کہ خالی آسامیاں نوں نہ صرف پُر کیتا جائے بلکہ ایہناں وچ خاطر خواہ وادھا کیتا جائے تاکہ اطبا نوں موقع خدمت و روزگار میسر ہوئے۔ غریب دکھی انسانیت دا بھلا ہوئے تے اوہ دعاواں وچ یاد رکھن نہ کہ بددعاواں دین۔ حکومت پہلے ای عوامی طعن و تشنیع دی زد وچ اے ایس وچ وادھے والے اقدامات توں گریز کرے تے بنیادی انسانی حقوق نوں پامال نہ کرے۔ اوہناں نے کہیا کہ ایتھے ایہہ یاد دلوانا مناسب ہوئے گا کہ طب یونانی نوں سفید گورا اپنی طاقت لان دے باوجود ختم نہ کر سکیا تے فیر ایہہ کالا گورا کیونکر کامیاب ہوئے گا۔
ایس موقعے اُتے اپنے مندرجہ ذیل مطالبات پیش کیتے گئے۔
&٭ 140 خالی آسامیاں اُتے اطبا نوں تعینات کیتا جائے۔
٭ سرکاری ہسپتالاں وچ طب یونانی دی آسامیاں نوں ختم کرن دا فیصلہ واپس لیا جائے۔
٭ ایہناں آسامیاں اُتے مسند حکما 1985 توں خدمات سرانجام دے رہے نیں۔
٭ بجائے ایس دے کہ خالی آسامیاں نوں پُر کرن دے نال نال نویاں آسامیاں پیدا کیتیاں جان، پرانیاں آسامیاں ای ختم کر دتیاں گئیاں۔
٭ ذرائع ابلاغ دے مطابق ایس جابرانہ فیصلے اُتے مشتمل سمری حکومت نوں ارسال کیتی جا چکی اے۔
٭ حقیقت حال ایہہ وے کہ ایلوپیتھک طریقہ علاج دے مہنگا ہون پاروں عوام دی کثیر تعداد ہسپتالاں وچ تعینات حکما نال رجوع کردی اے۔
٭ بوہت افسوس دے نال کہنا پئے رہیا اے کہ وزارت صحت وچ براجمان اک مخصوص طبقہ طب یونانی دے خلاف مسلسل سازشاں تیار کر رہیا اے تے ایہہ کم ورہیاں اُتے محیط اے۔
٭ بجائے ایس دے کہ موجودہ حکومت ایس قومی ورثے دے تحفظ لئی اقدامات کردی ایس تواریخی فن شریف نوں ختم کیتا جا رہیا اے۔
٭ ایس قابل مذمت پالیسی دا ثبوت ایس توں ودھ کے کیہ ہوئے گا کہ اسسٹنٹ ڈائریکٹر طب دی آسامی کئی ورھیاں توں خالی اے۔
٭ کم و بیش سٹھ ہزار حکما دی نمائندہ ملک گیر تنظیم پاکستان طبی کانفرنس ایس یک طرفہ فیصلے دے خلاف سخت احتجاج کردی اے۔
٭ ساڈا مطالبہ اے کہ ایس جانب دار فیصلے نوں فی الفور واپس لیا جائے۔
٭ حکما نے کدی اپنے حقوق دی خاطر قانون نوں ہتھ وچ نہیں لیا پُر امن طریقے نال ای اپنی گل اگے اپڑائی۔
٭ جے ایہہ ظالمانہ فیصلہ واپس نہ لیا گیا تے پورے ملک دے حکما راست اقدام کرن اُتے مجبور ہون گے۔
پاکستان طبی کانفرنس اوہ واحد جماعت اے جیہڑی طب تے طبیب دی صحیح نمائندہ جماعت سی،ہےتے رہوے گی جس نے اج فیر ثابت کر دتا۔
حکیم محمداحمد سلیمی ممبر NCT دی قیادت وچ پورے صوبے توں دیگر حکما نے پنجاب اسمبلی تے وزیراعلیٰ ہائوس دے باہر احتجاج کردے ہوئے اپنی گل بات نال ایوان بالا دے ساہمنے بَبانْگِ دُہل اطباء کرام دیاں سیٹاں اُتے لگی پابندی دے خلاف حکومت وقت نوں کہیا کہ حکما نوں ناجائز تنگ نہ کیتا جائے تے چنگا ای اے کیوں جے ایہہ حکما اٹھ کھڑے ہوئے تے اطبا مخالف لابی دی اِٹ نال اِٹ وجا دین گے۔ ایس موقعے اُتے پروفیسر حکیم اسلم طالب ، حکیم نذیر تابش ، حکیم طاھر نوید جنجوعہ ، حکیم عبدالوحید صدیقی ،حکیم محمد اسماعیل ، حکیم محمد شفیق ، ڈاکٹر سکندر حیات زاھد ، حکیم تصور محمدی ، حکیم محمد نواز چشتی ، حکیم محمد افضل بٹ ، حکیم عارف چوھدری ، حکیم محمد اعظم ، حکیم ابوبکر یحیی ، حکیم فیصل جگرانوی ۔،حکیم اکرم ملک ، حکیم عبدالرشید ، حکیم عبیدالرحمان ، حکیم محمد اقبال شاد ، حکیم محمد عاصم الفاتح، حکیم ریاض شاہد ، حکیم رفعت اشفاق چوہان ، حکیم آقا بیدار بخت ، حکیم سرفراز احمد ، ڈاکٹر راحت علی چوہدری تے پورے ملک توں جم غفیر حکماء نے پر امن طریقے نال پنجاب حکومت نال احتجاج تے مطالبہ کردے ہوئے کہیا کہ حکماء دی 140 سیٹاں اُتے فوری طور حکماء کرام دی تعیناتی کیتی جائے تے ایہناں اُتے لگی بے جا پابندیاں نوں فی الفور ختم کیتا جائے۔ الحمدللہ حکام بالا نے فوری طور اُتے نوٹس لیندے ہوئے محکمہ صحت دے سیکرٹری توں جواب طلب کر لیا اے۔