شیطان نال ملاقات

لکھت:ابرار ندیم

شیطان دے چیلیاں نال تے آئے دن میرا کدھرے نہ کدھرے سامنا ہو ای جاندا اے پر میرے دل وچ اک عرصے توں ایہ ڈاڈھی خواہش اے کہ میری کسے شیطان نال ون ٹو ون ملاقات ہووے جہدے وچ اوہدے توں میں ایہ سوال پچھ سکاں کہ اوہ کیوں ہر ویلے ساڈے ورگے سدھے سادے انساناں دی عاقبت خراب کرن تے تلیا رہندا اے۔ کجھ دیہاڑ پہلاں میں گلاں گلاں وچ ایویں ای اپنی ایس خواہش دا اظہار اپنے دوست شاطر نال کیتا تے اوہنے چٹکی وجاندے ہوئے کہیا جان من! ایہ وی کوئی مسئلہ اے حکم کرو شیطان نال کدوں تے کتھے ملنا پسند کرو گے؟ ایہدے تے میں کسے خودساختہ دانشور دے انداز وچ اپنی ناگواری دا اظہار کردے ہوئے اوہنوں کہیا یار شاطر! ایس ویلے میرا مذاق دا موڈ نہیں شاید تینوں اندازہ نہیں کہ میں ایہ گل کس پیرائے وچ کیتی اے تے میری ایس خواہش دے پچھے کیہ نیک مقصد چھپیا اے؟ میری ایس ناگواری نوں محسوس کرن دے باوجود شاطر نے ایہنوں ہس کے نظرانداز کردے ہوئے کہیا شیطان نال ون ٹو ون تہاڈی ملاقات دی خواہش دے پچھے چھپے اپنے نیک مقصد بارے تسیں مینوں نہ وی دسو تے میں تھوڑا بہت تے سمجھ ای سکنا واں۔ انج وی تہاڈا پرانا دوست ہون توں علاوہ تہاڈے کالماں دا مستقل تے شاید واحد قاری وی آں۔ تیار رہنا میں کل کسے وقت شیطان نال تہاڈی ملاقات کرا دیواں گا۔
ایہدے بعد بوہا کھولیا تے میرے ول مڑ کے ویکھے بناں کمرے چوں باہر نکل گیا۔ اگلے دن غالباً رات دے ساڑھے دس گیاراں وجے دا وقت ہووے گا جدوں میں ناشتے لئی بیکری توں انڈے‘ ڈبل روٹی خرید کے گھر واپسی لئی اپنی گڈی سٹارٹ کر رہیا سی کہ ہتھ وچ تسبیح لمکائے تے سر تے نماز والی ٹوپی پائے اک نورانی شکل و صورت دے ستر پچھتر سالہ بابا جی نے میری مخالف سمت والے کار دے شیشے تے دستک دتی۔ میں بابا جی دی سائیڈ والا گڈی دا شیشہ تھلے کیتا تے پچھیا جی حاجی صاحب فرمائیے‘ میں تہاڈی کیہ خدمت کر سکنا واں؟ بابا جی نے اک لمحے دی تاخیر کیتے بناں گڈی دا بوہا کھولیا تے نوجوان ورگی پھرتی نال اگلی سیٹ تے بیٹھدے ہوئے کہیا پُتر! میں خدمت لین نہیں خدمت کرن آیا واں۔ رات دے ایس وقت مینوں بابا جی دے ایس پراسرار انداز تے حیرانی دے نال پریشانی وی ہوئی پر میں اوہنوں ظاہر کیتے بناں اوہناں نوں کہیا حاجی صاحب! میں کجھ سمجھیا نہیں تسیں کس خدمت دی گل کر رہے او؟ بابا جی کہن لگے پُتر! ایتھوں نکلو میں تینوں راہ وچ دسنا واں بس اجے توں ایناں سمجھ لے کہ میں تیرے من دی مراد آں۔ مینوں بابا جی دی ایس پہیلی دی بالکل وی سمجھ نہیں ئی پر ایہدے باوجود پتہ نہیں بابا جی دے لہجے وچ ایسی کہڑی گل سی کہ میں گڈی ریورس کرکے مین سڑک تے پا دتی تے پچھیا حاجی صاحب کتھے جانا اے؟ بابا جی کہن لگے پُتر توں مینوں کدھرے وی لے چل پر ایہ جو مینوں بار بار حاجی صاحب کہہ رہیا ایں ایہ نہ کہے‘ ایہدے توں مینوں بڑی تکلیف ہوندی اے۔ مینوں لگا شاید‘ بزرگ انکساری دی وجہ نال انج کہہ رہے نیں ایس لئی میں بڑے ادب نال کہیا بزرگو جیویں تہاڈا حکم‘ پر میری گزارش اے کہ تسیں میرے صبر دا ہور امتحان نہ لوو تے براہ مہربانی اپنا تعارف کرا دیو۔
بابا جی نے شرارتی نظراں نال مینوں ویکھدے ہوئے کہیا میں دسیا اے ناں میں تیرے من دی مراد یعنی اوہ شیطان آں جہدے نال ون ٹو ون ملن دی تیری بڑی خواہش سی۔ میں بابا جی دی تسبیح تے نماز والی ٹوپی سنے اوہناں دے سراپے تے اک گہری تنقیدی نظر پائی تے فیر اوہناں دے چہرے ول ویکھدے ہوئے کہیا بابا جی! نامعلوم رات دے ایس پہر وچ تسیں میرے نال اجیہا مذاق کیوں کر رہے او ایہ سن کے بابا جی اچانک غصے وچ آ گئے تے کہن لگے برخوردار! جدوں میں تینوں صاف لفظاں وچ کہہ رہیا واں کہ میں شیطان آں تے فیر کیہ مسئلہ اے کہ تینوں میری گل تے ایمان لیان توں روک رہیا اے؟ میں اک واری فیر بے یقینی نال بابا جی ول ویکھدے ہوئے کہیا یقینا تہانوں میرے نال اجیہا مذاق کرن لئی شاطر نے اکسایا ہووے گا جہدے سامنے کل میں غلطی نال شیطان نوں ملن دی خواہش دا اظہار کیتا سی۔ ایہدے تے بابا جی کہن لگے میں کسے انسان دے حکم تے نہیں چلدا سگوں تہانوں انساناں نوں اپنے حکم تے چلانا واں۔ بے شک شاطر میرا بڑا چنگا چیلا اے پر میں اوہدے کہن تے نہیں اپنی مرضی نال تینوں ملن آیا واں۔ میں اک واری فیر بابا جی دے چہرے تے نظر ماری تے کہیا بابا جی تسیں اپنے بارے جو وی کہوو میرا دل نہیں من دا کہ تہاڈی ورگے نورانی شکل و صورت تے شریفانہ حلیے دا کوئی بندہ شیطان وی ہو سکدا اے۔ میں اج تک شیطان نوں ویکھیا تے نہیں پر میرا اندازہ اے کہ اوہ اپنے کالے کرتوتاں تے چہرے تے پیندی نحوست تے پھٹکار دی وجہ نال دور توں ای پچھانیا جاندا ہووے گا۔ ایہدے تے بابا جی نے مسکرا کے میرے ول ویکھدے ہوئے کہیا برخوردار! سب توں پہلاں توں ایہ سن لے کہ میں تینوں جھوٹ نہیں بول رہیا تے میں تینوں دس دیواں کہ ایس دنیا وچ انساناں دے جنے وی کاروبار تے کردار نیں میرے اونے ای روپ نیں۔ میں انساناں دے وچکار انساناں ورگی ای شکل تے حلیے وچ رہنا واں۔ بس ایناں فرق اے کہ کسے تھاں میں آپ ہونا واں تے کسے تھاں میرے چیلے ہوندے نیں۔٭٭