ساڈا ملک‘ ساڈے حکمران

لکھت: مظہر برلاس

سکردو وچ اٹھاراں گھنٹے گزار کے واپسی لئی ایئرپورٹ آیا تے سوچ وچ پے گیا دنیا وچ کنے ہوائی اڈے انج دے ہون گے جہناں نوں چوہاں پاسیوں پہاڑاں نے گھیر رکھیا ہووے گا؟ خدائے لم یزل دا شکر ادا کیتا کہ اوہنے ایس دھرتی نوں انج تے اینے حسن نال نوازیا اے۔ جہاز نے اڑان بھری‘ کھڑکی چوں ویکھیا تے نظر آیا خوبصورتی ہر پاسے کھلری پئی اے۔ دنیا دے اچے پہاڑاں تے برف دی چادر وچھی ہوئی اے۔ بدلاں نے ماحول تے سحر طاری کر رکھیا اے۔ کدی انج لگا جیویں پوری فضا وچ ددھ وچ نہائی ہووے۔ کدی ٹکڑیاں وچ جمی برف انج لگی جیویں ساحل تے سفید کشتیاں نے چاندنی اوڑھ رکھی ہووے‘ انج وی لگا‘ پہاڑاں تے جیویں بکھری ہوں سیپیاں۔ بدل کدی دھوں دی صورت‘ کدی روں دے گالاں ورگے‘ کدھرے دھپ نے برف نوں ہور چمکا دتا سی۔ میرے توں رہیا نہ گیا‘ جہاز دی کھڑکی چوں کجھ فوٹواں لئیاں تے فیر ایہناں فوٹواں نوں سوشل میڈیا دی نذر کر دتا۔ نال ای لکھ دتا قدرت نے ساڈے پیارے پاکستان نوں خوبصورتی نال نوازیا اے کیوں جے ایہناں نظاریاں وچ کدھرے فطرت دی ہیبت گونج رہی سی کدھرے خوبصورتی بول رہی سی تے کدھرے حسن برس رہیا سی۔ جیویں ای فوٹواں لوکاں دیاں نظراں چوں گزریاں تے بڑے باکمال تبصرے ہون لگ پئے۔ کسے اک نے دسیا کہ حکیم سعید کہندے سن پاکستان سورئہ رحمن دی تفسیر اے۔ جو تبصرہ سب توں ودھ آیا اوہ ایہ سی ساڈا ملک بڑا چنگا اے پر ساڈے حکمران چنگے نہیں۔ پاکستان تے بڑا پیارا اے پر ایتھے لیڈر چنگے نہیں۔ پچھلے ستر ورھیاں توں ساڈے تے اجہے حکمران مسلط نیں جہناں نوں ملک توں ودھ اپنی فکر رہندی اے۔ سب توں ودھ آن والے تبصرے وچ ملک دے اہل سیاست لئی وڈا سوال اے کہ آخر لوک ایہناں دے بارے انج کیوں سوچ رہے نیں؟ ساڈے سیاستداناں نوں اپنیاں غلطیاں دا جائزہ لینا چاہیدا اے اوہناں نوں جھوٹ تے جھوٹے وعدیاں توں گریز کرنا چاہیدا اے۔ سیاستداناں نوں سوچنا چاہیدا اے کہ اوہ کہڑی وجوہات نیں جہناں دی بنیاد تے لوک ایہناں بارے ایس طرح دی مجموعی رائے رکھدے نیں۔ ملک تے واقعی بڑا پیارا اے ایہدے وچ کوئی شک نہیں کہ قدرت نے ایہنوں بہت نوازیا اے پر اک سوال ایتھوں دے لوکاں لئی وی بڑا اہم اے کہ اللہ نے اپنی آخری الہامی کتاب وچ فرمایا تہاڈے تے تہاڈے ورگے حکمران مسلط کر دتے جان گے۔ ہن لوکاں نوں ایس گل دا جائزہ لینا چاہیدا اے کہ جے ایہناں دے حکمران چنگے نہیں تے کیہ اوہ آپ چنگے نیں؟ ساڈے لوک کیوں اوہناں لیڈراں دے پچھے نسدے نیں؟ ایتھے وراثتاں وچ سیاست کیوں پلدی اے‘ ایتھوں دا عام بندہ ایواناں تک کیوں نہیں اپڑ سکدا؟ جے لیڈراں دے سامنے سوالات نیں تے لوکاں لئی کدھرے زیادہ سوالات نیں۔
سکردو جان دا اک ای مقصد سی کہ اوتھے بزم علم و فن دی چھترچھاویں اک کانفرنس ’’حسینؑ سب کا‘‘ منعقد ہو رہی سی بزم علم و فن سکردو اٹھائی ورھیاں تو ں ایہ کانفرنس کروا رہی اے۔ ایس کانفرنس دی خوبصورتی ایہہ وے کہ ایہدے وچ سارے مذہب دے لوک شرکت کردے نیں۔ ایس واری وی سینیٹر گردیپ سنگھ توں علاوہ ہندو تے مسیحی نمائندے موجود سن۔ کانفرنس دی صدارت مذہبی امور دے وفاقی وزیر پیر نورالحق قادری دی پرواز منسوخ ہون پاروں متحدہ جمعیت اہل حدیث دے امیر سید ضیاء اللہ شاہ بخاری نے کیتی نہیں تے اوہ تے مہمان خصوصی سن۔ ایتھے ننھے پر شہرت یافتہ ثناخوان حسین معظم علی مرزا نال وی ملاقات ہوئی۔ بزم علم و فن سکردو دا فلسفہ ایہہ وے کہ ادب وسیلہ اتحاد‘ محبت وسیلہ امن‘ تمغہ امتیاز دے حامل میراسلم حسین سحر ایس بزم علم و فن دے سربراہ نیں تے اوہناں نوں جاویداقبال جیدی ورگے ساتھی وی ملے نیں۔
اس موقعے تے اہالیان سکردو دی خدمت وچ عرض کیتا کہ لوک عظمت نوں دولت تے حکومت وچ تلاش کردے نیں حالاں کہ عظمت کردار توں ملدی اے۔ ایہ راہ چوداں سو ورھے پہلاں حضرت امام حسین علیہ السلام نے لوکاں نوں وکھا دتا سی۔ کاش لوک سمجھ جاندے تے اپنے کرداراں نوں بہتر بناندے پر لوکاں نوں دولت دی ہوس کھا گئی۔ اقتدار دی خواہش اوہناں نوں لے ڈبی اے‘ لوک ہر قیمت تے اقتدار حاصل کرنا چاہندے نیں بھاویں اوہدی یقمت کردار دی پستی ای کیوں نہ ہووے۔
سکردو توں واپسی ہوئی تے کنٹونمنٹس دے الیکشن دے نتیجیاں دا سامنا سی۔ پتہ لگا کہ لہور‘ پنڈی تے ملتان توں الیکشن ہارن تے وزیراعظم اپنی پارٹی دے رہنماواں تے غصہ کڈھ رہے نیں۔ اوہناں دے محبوب وزیراعلیٰ دی کارکردگی سوالیہ نشان بنی ہوئی اے۔ پچھلے تن ورھیاں وچ کئی معتبر تے طاقتور بندیاں نے وزیراعظم نوں کئی واری آکھیا کہ ایہنوں ہٹا دیو پر وزیراعظم نے عمل نہ کیتا۔ عمل نہ کرن دی وڈی وجہ وزیراعظم دے دوالے ست بندیاں دا دائرہ اے ایس دارے وچ دو عورتاں وی شامل نیں جے وزیراعظم نے ست دا ایہ دائرہ نہ توڑیا تے ساڑھ ستی لگ سکدی اے۔ ہن تے (ن) لیگ دے رہنما رانا ثناء اللہ اعلانیہ کہہ رہے نیں کہ ایوان وزیراعلیٰ وچ بولیاں لگدیاں نیں۔
وزیراعظم غصے وچ نیں تے اوہناں نوں کنٹونمنٹس الیکشن دا مکمل جائزہ لینا چاہیدا اے۔ وزیراعلیٰ دی کارکردگی توں علاوہ ٹکٹاں دی تقسیم دا وی جائزہ لینا چاہیدا اے۔ سنن وچ آ رہیا اے کہ ایس سلسلے وچ دولت دی جادوگری نے ہتھ وکھایا اے۔ دولت توں کجھ چیزاں تے حاصل ہو سکدیاں نیں پر عزت تے عظمت نہیں‘ سیاست وچ خدمت نوں عبادت سمجھیا جانا ای بہترین فلسفہ اے۔ ن لیگ دی قیادت تے خواجہ سعدرفیق تے ملک ابرار نوں مبارکباد دے چکی‘ کیہ وزیراعظم نے پنجاب وچ گوجرانوالہ‘ کھاریاں تے جہلم دی پی ٹی آئی قیادت نوں مبارکباد دتی اے۔ جہلم وچ تحریک انصاف دے نوجوان چوہدری فراز حسین نے بڑی محنت کرکے پارٹی امیدواراں نوں جتوایا۔ وزیراعظم ہارن ہروان تے جتن جتوان والیاں وچ فرق محسوس کرن۔ بقول حسن عباس رضا:
شہر دلِ تباہ میں پہنچوں تو کچھ کھلے
کیا بچ گیا ہے راکھ میں اور کیا تمام شد
(بشکریہ جنگ)