اک شام ایم آر شاہد دے نام

اکادمی ادبیات لاہور وچ ہون والی ایس تقریب دا پربندھ ادارہ خیال و فن ولوں کیتا گیا

رپورٹ:آفاق بٹ

اکادمی ادبیات لہور وچ ممتاز ادیب، محقق، شاعر، مصنف، مدیر اعلیٰ سہ ماہی خیال و فن جناب ممتاز راشد لاہور ولوں صدارتی تمغہ امتیاز دے حامل مشہور ادیب، محقق، شاعر، مصنف جناب ایم آر شاہد دے اعزاز وچ اک نشست منعقد کیتی ۔ ایس تقریب دی صدارت پلاک دی ڈائریکٹر محترمہ ڈاکٹر صغرٰی صدف نے کیتی۔ مہمان خصوصی سابقہ وفاقی وزیر تے پاکستان جاگو تحریک دے سربراہ جناب قیوم نظامی سن۔

دیگر مہمانان گرامی وچ جناب میم سین بٹ، مدثر بشیر، شہزاد فراموش، عتیق الرحمٰن، مرزا عثمان بیگ، سیّد فیضان نقوی، سیّد تنویر گیلانی، خالد اعجاز مفتی، فراست بخاری، ملک محمد شعیب، بابا محمد ثناء اللہ، اکادمی آفیسر محمد جمیل، اسرٰی اسلم، بیگم صفیہ اسحاق، طاہر ابدال طاہر ابن فدا، طفیل اعظمی، ڈیوڈپرسی، عقیل شافی تے ایہناں توں علاوہ بوہت سارے معزز مہمانان گرامی نے شرکت کیتی جنہاں وچ نمایاں میاں صلاح الدین ایڈووکیٹ، آزاد سیّد، وحید احمد ناز، محمد احمد(عربی مترجم)، کیپٹن ریٹائرڈ عمران سعید شامل سن۔
ممتاز راشد لاہوری نے نقابت دے فرائض سر انجام دتے۔ مختلف مقررین نے جنہاں وچ مدثر بشیر، میم سین بٹ، شہزاد فراموش، تنویر گیلانی، فیضان نقوی، اسرٰی اسلم، مرزا عثمان بیگ، ذیشان ہاشمی، خالد اعجاز مفتی تے دیگر مقررین نے ایم آر شاہد نوںخراج تحسین پیش کیتا۔ جناب قیوم نظامی نے ایم آر شاہد نوں خراج تحسین پیش کردے ہوئے فرمایا کہ ایم آر شاید دا کم اینا وڈا اے کہ شاید صدارتی تمغہ امتیاز وی ایس دے اگے بوہت گھٹ اے۔ جے ایہہ کہیا جائے کہ ایم آر شاہد نے قبرستاناں تے قبراں اُتے تحقیق کر کے مردیاں نوں زندہ کر دتا تے گم شدہ قبراں نوں ایہناں دے وارثاں تیکر اپڑا دتا تے بے جا نہیں ہوئے گا۔ محمد جمیل نے ڈاکٹر صغریٰ صدف توں جو کہ پنجاب یونیورسٹی دے سینٹ دی سینئر رکن نیں نال مطالبہ کیتا کہ جس طرح پوری دنیا وچ اعلیٰ تے انوکھا کارنامہ انجام دین والے بندیاں نوں ڈاکٹریٹ دی اعزازی ڈگری نال نوازیا جا ندا اے ایسے طرح جناب ایم آر شاہد نوں ایہہ ڈگری دتی جائے تے ایہناں نوں ڈاکٹر ایم آر شاہد لکھیا تے سدیا جائے۔ ایہناں دے ایس مطالبے دی سارے حاضرین نے پرزور حمایت کیتی۔ محترمہ ڈاکٹر صغری صدف نے اپنے صدارتی خطبے وچ ایم آر شاہد نوں خراج تحسین پیش کردے ہوئے ایہناں نال اپنے ذاتی تعلق دے واقعات سنائے تے ایس مطالبے دے جواب وچ فرمایا کہ میں وعدہ کرنی آں کہ سینٹ دے اجلاس وچ ایہہ تجویز ضرور پیش کراں گی۔
جناب ایم آر شاہد نے جناب ممتاز راشد لاہوری، جناب قیوم نظامی، محترمہ ڈاکٹر صغریٰ صدف تے حاضرین و مقررین دا شکریہ ادا کیتا تے ایس اعزاز اُتے ، کہ ایہناں دے اعزاز وچ ایس نشست دا انعقاد کیتا گیااُتے ممتاز راشد لاہور دا شکریہ ادا کیتا تے ایس عزم دا اظہار کیتا کہ نہ صرف ایہہ کہ اوہ خرابی صحت دے باوجود اپنے کم نوں مزید اگے ودھان گے بلکہ نوجوان جیہڑے ایس کم نوں لے کے اگے ودھ رہے نیں ایہناں دی زبردست حوصلہ افزائی کرن گے تے مدد کرن گے۔
ممتاز راشد لاہوری نے سارے حاضرین دا دلی شکریہ ادا کیتا تے کہیا کہ ایم آر شاہد دے ایس کارنامہ اُتے ایہناں نوں مزید اعزازات نال نوازیا جانا چاہیدا اے تے ایہناں دے اعزاز وچ ایس طرح دی مزید تقریبات دا اہتمام ہونا چاہیدا اے تاکہ پورے پاکستان سنے پوری دنیا نوں پتہ چل سکے کہ جناب ایم آر شاہد نے کنہا عظیم کارنامہ سرانجام دتا اے۔ تقریب دے اختتام اُتے تصویر کشی کیتی گئی۔ ایم آر شاہد نوں مختلف بندیاں ولوں جنہاں وچ ممتاز راشد لاہوری نمایاں سن تحفے دتے گئے، ممتاز راشد لاہوری نے ایم آر شاہد نوں لاہوری صافہ پایا، فراست بخاری تے اقبال راہی نے ایہناں نوں منظوم خراج تحسین پیش کیتا تے اعزازی مالاپائیاں۔ شرکاء دی تواضع کیتی گئی تے ایس طرح ایہہ خوبصورت تقریب ختم ہوئی۔