سالارِ طب۔۔۔۔پروفیسر حکیم محمد احمد سلیمی

پروفیسر حکیم محمد احمد سلیمی اک باخبر انسان نیںتے ہر موضوع اُتے گل بات دے نال نال تقریر و تحریر وچ اپنا ثانی نہیں رکھدے

تحریر۔ پروفیسر حکیم سید عمران فیاض

بولن دا انداز انسانی شخصیت دا آئینہ اے، جنہی گل بات چنگی ہوئے، اہناں ای انسان چنگا تصور کیتا جاندا اے ۔پروفیسر حکیم محمد احمد سلیمی انتہائی شریف النفس دیانت دار علمی و ادبی گھرانے دے چشم و چراغ نیں تے بہاولنگر دی مشہور ہر دلعزیز مذہبی و سماجی شخصیت تے معالج حکیم حافظ مشتاق احمد مرحوم دے آنگن وچ اوہناں نے اکھ کھولی۔ اوہ تن بھائی تے ایہناں دی دو بھیناں نیں۔
پروفیسر حکیم محمد احمد سلیمی دی شخصیت ایہناں دے خاندان دی آئینہ دار اے۔ ایہناں دے اندر محبت اخلاق پیار تے ملنساری کُٹ کُٹ کے بھری ہوئی اے۔ اوہ اپنے والد محترم حکیم حافظ مشتاق احمد مرحوم دی اعلیٰ صفات تے خوبصورت صلاحیتاں نال بھرپور جانشین ثابت ہوئے نیں۔ پروفیسر حکیم محمد احمد سلیمی نے علمی، ادبی، ثقافتی، صحافتی، طبی ہر طبقہ ہائے زندگی وچ اپنے خاندان دا ناں روشن کیتا۔ اوہ شفاء الملک حکیم محمد حسن قرشیؒ دے فرمودات و افکار اُتے عمل پیرا ہو کے طب و طبیب دی خدمت کر رہے نیں۔ اوہناں نے صحیح معنیاں وچ خود نوںحکیم اقبال احمد قرشی دا جانشین ثابت کر دتا اے۔
پروفیسر حکیم محمد احمد سلیمی نے اپنی انتھک محنت، لگن نال اپنیاں نوں ای نہیں بلکہ غیراں نوں وی اپنا گرویدہ بنا لیا۔ اوہ ایس ویلے صدر نیشنل کونسل فار طب اسلام آباد منتخب ہو چکے نیں۔ اوہناں نے موجودہ الیکشن وچ سب توں زیادہ ووٹ حاصل کیتے۔ ایس توں پہلاں اوہ چیئر مین امتحانی کمیٹی وی رہ چکے نیں۔ ایس دے علاوہ اوہ چیئر مین بزم قرشی پاکستان ، چیئر مین قومی امن کمیٹی برائے بین المذاہب ہم آہنگی پاکستان حکما ونگ، چیئر مین پاکستان طبی کانفرنس شعبہ جراحت، جنرل سیکرٹری پاکستان طبی کانفرنس صوبہ پنجاب مینجر پبلیکیشنز قرشی انڈسٹریز پاکستان۔ ایڈیٹر ماہنامہ قومی صحت تے ڈرگ ریگولیٹری اتھارٹی اسلام آباد دی طب کمیٹی دے ممبر دے عہدے اُتے فائز ہون دے نال نال سماجی، صحافتی سنے کئی عہدیاں اُتے فائز نیں۔

پروفیسر حکیم محمد احمد سلیمی اک باخبر انسان نیںتے ہر موضوع اُتے گل بات دے نال نال تقریر و تحریر وچ اپنا ثانی نہیں رکھدے۔ ایہناں دا اپنا جداگانہ انداز فکر و اظہار اے۔ کجھ ایہناں نوں اک باغی تے سرکش انسان قرار دیندے نیں۔ غلط روایت نال سمجھوتے کرنا ایہناں دے وَس وچ نہیں۔ اوہ ہر اختلاف خوبصورتی تے تحمل نال برداشت کردے نیں۔ ایہناں دے لہجے دی تندی و تیزی ایہناں دے حسن اظہار دے پردے وچ لُک جاندی اے۔

وضعدار تے اخلاقی ضابطہ کاری ایہہ ایہناں دی شخصیت دا جزو لاینفک اے تے ایہو شائستگی فکر و شائستگی اظہار تشنگی قلب و نظر ایہناں دا سرمایہ زندگی اے۔
پروفیسر حکیم محمد احمد سلیمی دے نال راقم دی رفاقت 1997 توں اے گو کہ ایہہ رفاقت 24 ورھیاں دی اے۔ پر اِنج محسوس ہوندا اے کہ جویں ساڈے تعلق نوں عمر لنگھ گئی ہوئے ایہناں دے بارے وچ صرف اینا کہواں گا کہ متذکرہ خوبیاں نال آراستہ و پیراستہ انسان جدوں بے باکی دا متحمل ہوندا اے تے اوہ منافقت نوں کفر گرداندا اے۔ مصلحت اندیشی نوں گناہ کبیرہ تصور کردا اے تے صبر و استقامت دے معنی ایس دی نظر وچ ظلم و جبر نوں برداشت کرن دی بجائے ایس نال ٹکر لینا ای زندگی دی باعث فخر و انسباط علامت اے۔ اسیں ایہناں نوں نیشنل کونسل فار طب دا صدر منتخب ہون اُتے دل دی گہرائیاں نال مبارکباد پیش کرنے آں تے ایس دی امید رکھنے آں کہ اوہ اپنے دل وچ پلن والی ساری رنجشاں نوں بھلا دین گے تے محبتاں تے چاہتاں دی ایس نویں منزل نوں انج دی خوبصورتی دے نال لنگھان گے کہ دوستاں دی دتی ہوئی محبتاں دا جواب محبت نال دین گے۔چاپلوسی کرن والیاں تے اپنیاں نوں پہچانن وچ کوئی دقیقہ فزوگزاشت نہیں کرن گے۔