کھیڈ‘ سیاست تے سازشاں

مطلوب وڑائچ

نیوزی لینڈ کوئی بہت وڈا ملک نہیں ایناں مضبوط وی نہیں کہ ویسٹرن مائنڈ سیٹ دا حصہ بن کے پاکستان دے نال کرکٹ سیریز دا خاتمہ کر دیوے پر نیوزی لینڈ ویسٹرن مائنڈ سیٹ لئی استعمال ضرور ہویا اے۔ ویسٹرن مائنڈ سیٹ اک عرصے توں پاکستا ندے خلاف کارفرما اے اک دور وچ پاکستان نے امریکہ نال ایف16 جہازاں دی خریداری دا معاہدہ کیتا معاہدے موجب جہازاں دی پوری ادائیگی کر دتی گئی ایہدے بعد امریکہ نے پاکستان نوں جہاز دین توں انکار کر دتا۔ پاکستان نے دبائو پایا تے کہیا گیا کہ ایہناں پیسیاں دے بدلے پاکستان امریکہ توں کنک لے لوے۔ پاکستان لئی ایہ کیویں ممکن سی کہ ایہناں پیسیاں دی پاکستان کنک خرید لیندا جو فائٹر جہازاں دی فراہمی لئی ادا کیتے گئے سن۔ ایہدے بعد امریکہ دے نال تعلقات کجھ تھوڑے جہے بہتر ہوئے تے پاکستان نوں امریکہ نے جہاز تے دے دتے پر مینگناں پا کے۔ ایہ سارا کجھ ویسٹرن مائنڈ سیٹ نوں ظاہر کردا اے پاکستان نوں جہڑے جہاز دتے گئے اوہناں وچ کئی سسٹم لگے ای نہیں سن۔ اک دور وچ پاکستان پیپلزپارٹی دی حکومت دوران فرانس نال پاکستان نے ایٹمی پلانٹ دا معاہدہ کیتا۔ فرانس نے پاکستان نوں ایٹمی پلانٹ دینا سی پر فرانس وی اک موقعے تے اپنے معاہدے توں مُکر گیا تے پاکستان نوں ایٹمی پلانٹ دین توں انکار کر دتا۔
ہن آ جائو ذرا موجودہ دور ول ایس دور وچ وی سانوں ویسٹرن مائنڈ سیٹ نظر آئوندا اے اوہ برطانیہ دی صورت وچ۔ کجھ چر پہلاں برطانیہ نے کئی ملکاں نوں ریڈلسٹ وچ شامل کیتا ایہدے وچ پاکستان وی سی۔ ریڈلسٹ وچ شامل کردے ہوئے ایہ کہیا گیا کہ ایہناں ملکاں وچ انڈیا ورژن دا کرونا اے۔ پاکستان وچ اج وی اک وی مریض ایس ورژن دے کرونا وچ مبتلا ثابت نہیں ہویا بھاویں برطانیہ ولوں کجھ دیہاڑ پہلاں پاکستان نوں ریڈلسٹ چوں کڈھ دتا گیا اے پر برطانیہ دا پاکستان بارے اوہ مائنڈسیٹ سامنے آ گیا اے جہنوں اسیں ویسٹرن مائنڈ سیٹ کہنے آں یاں ایہنوں مغربی ذہنیت کیہا جاندا اے۔ بھارت وی ایسے ذہنیت یاں مائنڈسیٹ وچ شامل اے۔ اسرائیل وی پچھے نہیں۔
ہن ذرا افغانستان دی صورتحال تے غور کرو اوتھوں امریکہ نوں ویہہ سالہ جنگ دے بعد رسوا ہو کے نکلنا پیا امریکہ دے نال دو درجن نیٹو ملک وی سن بھارت افغانستان دی سرزمین پاکستان خلاف استعمال کر رہیا سی اوہدے افغانستان وچ درجناں کونسل خانے سن اوہنوں وی افغانستان چوں راہ فرار اختیار کرنی پئی۔ بھارت‘ برطانیہ‘ امریکہ تے اوہدے دوجے اتحادی افغانستان وچ اپنی شکست تے شرمندگی دی وجہ پاکستان نوں قرار دیندے نیں اوہناں ولوں پاکستان توں بدلہ لین لئی نیوزی لینڈ نوں استعمال کیتا گیا اے ایہناں ساریاں ولوں پاکستان دے خلاف جال بنُیا گیا یاں جدوں اسیں ویسٹرن مائنڈ سیٹ دی گل کرنے آں تے دنیا دے کسے وی کونے وچ دہشت گردی ہووے اوہدے وچ کوئی مسلمان ملوث تے اوہنوں جہادی کہیا جاندا اے۔ اوہنوں جنون پسند مسلم ذہنیت دا پیروکار قرار دے دتا جاندا اے تے مسلم ملکاں توں توقع کیتی جاندی اے کہ مسلم ریاستاں وچ لبرل اسلام دا پرچار کرے تے ایسے مقصد لئی پاکستان تے دوجے اسلامی ملکاں دے کئی سکولاں تے کالجاں وچ لبرل نظام تعلیم متعارف کروایا گیا اے۔ نیوزی لینڈ کس دبائو وچ آیا کہڑی سازش دا شکار ہویا جو وی ہویا اوہدے کمزور ملک ہون دی وجہ نال ہویا۔ ایہ اوہو نیوزی لینڈ اے جدوں اک دہشت گرد جنونی نے مسجد تے حملہ کرکے سٹھ مسلماناں نوں شہید کر دتا سی اوہ ایس موقعے تے بنگلہ دیش دی کرکٹ ٹیم نیوزی لینڈ وچ موجود سی جنہے ایہ دورہ منسوخ کیتا نہ کوئی میچ۔ نیوزی لینڈ ولوں صرف سکیورٹی تھریٹ دا بہانہ بنا کے سیریز منسوخ کر دتی گئی نیوزی لینڈ نے ایہ سارا کجھ مجبور ہو کے کیتا یاں کوئی وی وجہ رہی ہووے اوہدے ولوں ایہ بدترین پاکستان دشمنی تے مبنی اقدام اے۔ نیوزی لینڈ نے جو بہانہ بنایا اے برطانیہ اوہنوں استعمال کردے ہوئے پاکستان آن توں انکار کر سکدا اے۔ جہڑی صورتحال نیوزی لینڈ ولوں سیریز منسوخ ہون دے بعد سامنے آئی اے اوہ ساڈی مایہ ناز انٹیلی جنس ایجنسی آئی ایس آئی لئی چیلنج رکھدی اے۔ دوستو میں اک پاکستانی ہون دے ناطے ایس موقعے تے اپنے جذبات نوں قابو وچ رکھ کے ایہ سوچنا واں کہ نیوزی لینڈ نوں ایہ کوئی حق نہیں اپڑدا کہ اوہ ریاست دی عزت و وقار دیاں دھجیاں بکھیرے۔
ساڈی قابل فخر خفیہ ایجنسیاں نوں ایس چیز نوں چیلنج سمجھ کے قبول کرنا ہووے گا تے ایس گل نوں ممکن بنانا ہووے گا کہ جے ساڈے کھیڈ دے میدان انڈیا نے ویران کیتے نیں تے فیر بھارت دے کھیڈاں دے میدان آباد نہیں رہنے چاہیدے۔ اسیں بچپن توں سن دے آ رہے آں کہ محبت تے جنگ وچ سب جائز ہوندا اے جے ساڈا واہ اک مکار دشمن نال پے گیا اے تے سانوں اپنے حواس قابو وچ رکھ کے اسرائیل‘ بھارت تے اوہناں دے اتحادیاں دی رات دی نیندر حرام کرنی ہووے گی نہیں تے امن دی آشا دا ڈھنڈورا پٹدے پٹدے کدھرے اسیں اپنی پچھان ای نہ گوا دیئے۔٭٭