غیر معیاری پرفارمنس حکومت نوں لے ڈُبے گی !
مہنگائی نے سب دی مت مار رکھی اے ایس اُتے کرونا ، ڈینگی تے دیگر امراض دے
نال نال جان لیوا بیماریاں دیاں دوائیاں دی قیمتاں وی مسلسل ودھ رہیاں نیں
رقیہ غزل
خواہ اظہار دا کوئی وی پیرایہ اختیار کر لیا جائے پر گل تے اصل حقائق دی ہوندیاے جنہاں توں نظر چرانا ناممکن ہوندا اے۔ ایہہ تے سچ اے کہ بار بار تلخ حقائق توں پردہ چکنا چنگا نہیں لگدا پر کیہ کیتا جائے کہ کہن والیاں نے کہیا اے ’’کچھ نہ کہنے سے بھی چھن جاتا ہے اعجاز سخن ۔۔ظلم سہنے سے بھی ظالم کی مدد ہوتی ہے ‘‘ساڈے کول بہتری دا سورج طلوع ای نہیں ہو رہیا جے کدھرے ہوندا وی اے تے بس تشہیری تے کاغذی کاروائیاں تیکر محدود رہندا اے جس دا بعد وچ حکومت نواز صحافی تے ترجمان عجیب بھونڈے طریقے نال دفاع کردے نظر آندے نیں۔ دور نہ جائو دو دن پہلے ای حکومت نے پٹرولیم مصنوعات دیاں قیمتاں وچ تاریخی وادھا کیتا اے جس اُتے ہر بندا پریشان اے کہ پہلے توں نوکریاں تے کاروبار دے لالے پئے نیں، دوکاناں ویران تے بازار سنسان نیں، مہنگائی نے سب دی مت مار رکھی اے ایس اُتے کرونا ، ڈینگی تے دیگر امراض دے نال نال جان لیوا بیماریاں دیاں دوائیاں دی قیمتاں وی مسلسل ودھ رہیاں نیں جنہاں دے دن دا آغاز و انجام دوائی نال ہوندا اے اوہ پیٹ کٹ کٹ کے اپنی تے اپنے پیاریاں دی دوائیاں پوری کر رہے نیں تے انج مسلسل ٹرانسپورٹ دے ودھدے کرائے کنج ادا کرن گے؟ کیہ اک ویلے دی روٹی وی کسے نوں ملے گی؟ پر حکومت نواز صحافیاں تے ترجماناں ے کمال ہنر مندی نال ایس ظالمانہ تجویز دی منظوری دے جیہڑے جواز دتے نیں اوہناں نے سب نوں ششدر کر دتا اے۔ ایہناں دا کہنا اے کہ پٹرولیم مصنوعات دیاں قیمتاں ہجے وی خطے وچ پائی جان والی قیمتاں وچ سب توں گھٹ نیں تے عالمی منڈی وچ پانی سستا اے تے تیل مہنگا ہو چکیا اے تے شکر کرو کہ اللہ نے پانی سستا رکھیا ہویا اے۔ افسوس! فکر آخرت نہیں۔ قیامت تے ایہہ وے کہ پیر توں روٹی وی 12 تے نان 18 دا ملے گا کیوں جے 45 روپئے وچ خریدی جان والی گندم دی قیمت 80 روپئے وصول کیتی جا رہی اے۔ ریاست مدینہ دے نام لیوائوں دی مسیحائی تے تبدیلی دی حقیقت کھل کے ساہمنے آ چکی اے تاں ای پاکستان تحریک انصاف نوں صوبائی دارالحکومت جہے اہم ترین کنٹونمنٹ بورڈ دے انتخابات وچ ناقابل یقین شکست دا ساہمنا ہویا اے ایس وچ کوئی دورائے نہیں کہ کنٹونمنٹ بورڈ دے الیکشن حکومت جماعت لئی لمحہ فکریہ نیں تے مستقبل دا واضح تعین کردے نیں کیوں جے پنجاب دے وڈے شہراں وچ جس طرح وائٹ واش دا ساہمنا کرنا پیا اے اوہ ایدھے اودھے دے دلائل نال کور نہیں کیتا جا سکدا۔ پنجاب دے وڈے شہر وچ صرف تن سیٹاں لیناں، فیر راولپنڈی وچ تے ملتان توں تے مکمل ای صفایا ہو گیا اے۔ غیر تسلی بخش پرفارمنس دی وجہ نال عوامی بداعتمادی دی ہور کیہ نشانی ہو سکدی اے؟ کسے وی قسم دی تاویلیں تے جواز پیش کیتے جان پر سچ ایہو اے کہ تبدیلی سرکار جت دا سہرا سجان وچ اینی مگن رہی کہ ایہنوں پتہ ای نہیں چلیا کہ عوام نے نویں مسیحا دی تلاش وچ بھٹک چکے نیں کیوں جے ایہناں نوں یقین ہو چکیا اے کہ جمہوریت دے ناں اُتے وطن عزیز انج دے سیاستداناں دے نرغے وچ اے جنہاں دی حماقتاں، سیاسی اکھاڑ پچھاڑ، ایدھے اودھے دی سکیماں، حریفاں نال ہتھ ملان، نام نہاد جاہلانہ نعریاں تے خودی تے خوداری نوں بھلا کے اغراض لئی تماشا بنن تے تماشا بنان تے اک دوجے دیاں لتاں توڑن تے لتاں کھچن دے سوا ایہناں نوں کجھ نہیں آندا۔ ایہناں دی ایہناں ای مکاریاں تے شعبدہ بازیاں دی وجہ نال ایس ملک دی نائو کدی آمریت تے کدی نام نہاد جمہوریت دے طوفاناں نال نبرد آزما رہی تے ہن فیر حالات ایہہ بنے ہوئے نیں کہ ’’تیور ترے اے رشکِ قمر دیکھ رہے ہیں ۔۔ہم شام سے اندازِ سحر دیکھ رہے ہیں ‘‘۔
چلو من وی لیئے کہ مافیاز زیادہ طاقتور نیں ایہناں نوں ختم کرن لئی تبدیلی سرکار ہتھ پیر مار رہی اے پر ہتھ پیر مارنا وکھری گل اے تے کارگر حکمت عملی اپنانا وکھری گل اے۔ تن ورھیاں توں حتی الامکان کوشش ہو رہی اے پر گل نہیں بن رہی ’’ اندھیر نگری چوپٹ راج‘‘ تے’’ جس کی لاٹھی اس کی بھینس‘‘ والا معاملہ بنیا ہویا اے۔ سوال ایہہ اٹھدا اے کہ مافیاز نوں قابو کرنا کس دا کم اے تے جے قابو کرن والے مگر مچھاں دی گردن دبوچن وچ ناکام نیں تے ایہناں نوں ساڈے اُتے مسلط کیوں کر رکھیا اے؟ عوام نوں ’’تقریری ٹانک‘‘ نہیں ریلیف چاہیدا اے، سارے جان دے نیں کہ میاں شہباز شریف نے ڈینگی دے خلاف انج دی مہم چلائی تے رنگ وچ بھنگ پان والیاں نوں انج قابو کیتا کہ ڈینگی دا صفایا ہو گیا۔ ایتھوں تیکر کہ خان صاحب آپ وی ڈینگی برادران کہن اُتے مجبور ہو گئے سن تے اج تسیں کیہ کر رہے او؟ ہر پاسے کوڑا کرکٹ دے ڈھیر لگے نیں پورا پنجاب کچرا کنڈی بنیا ہویا اے۔موسم سرما آ رہیا اے تے مچھراں نے راگ سنانا شروع کر دتا اے وبائی امراض دے خلاف حکومتی پالیسیاں سوایہ نشان کیوں نیں جد کہ کرونا دے نال ہیپاٹائٹس ، ڈینگی تے مختلف انواع دے وبائی امراض تے وبائی بخار وی سر چک چکے نیں۔ انج چاہیدا سی کہ حفاظتی تدبیراں اُتے غور و فکر تے توانائی صرف کیتی جاندی پر الٹا عوام الناس اُتے زندگیاں تنگ کرن دی تجویزاں منظور کیتیاں جا رہیاں نیں جد کہ حسب روایت کرسیاں دے پرستار صوبائی سطحاں اُتے اپنے جوڑ توڑ وچ مصروف نیں جد کہ خصوصی طور اُتے پنجاب حکومت دے جوڑ توڑ تے مسلم لیگ ن وچ رسہ کشی بارے نویں توں نویاں خبراں تے افواہواں گردش کردیاں پھر رہیاں نیں کسے نوں ملک و قوم دی فلاح دی خیر دی پرواہ نہیں ہر کوئی اقتدار دی ہوس وچ انھا ہو چکیا اے۔ عوامی شعور نوں روٹی تے نوکری دی فکر نگل گئی اے۔ تعلیمی ادارے آئے دن بند کر دتے جاندے نیں انج لگدا اے کہ جویں تعلیم و صحت حکومت دی ترجیحات وچ شامل ای نہیں بلکہ کسے سوچے سمجھے منصوبے دے تحت عوام نوں ایہناں بنیادی سہولتاں توں محروم کیتا جا رہیا اے۔ ایہہ صرف اسیں نہیں کہہ رہے بلکہ دنیا کہہ رہی اے کیوں جے خان صاحب ہر پلیٹ فارم اُتے تبدیلی راگ سنایا کردے سن تاجکستان مشترکہ بزنس فورم اُتے شاعر نے جس طرح وزیراعظم عمران خان دی کنٹینر اُتے کیتی جان والی گلاں تے موجودہ پالیسیاں اُتے شاعرانہ تنقید کیتی اے اوہ وی قابل غور اے کہ ’’اتنے ظالم نہ بنو کچھ تو مروت سیکھو ‘‘ تے خان صاحب نے غصے وچ کہیا کہ اسیں بزنس دیاں گلاں کریئے شعر شاعری فیر کراں گے۔ یقینا ’’کاغذ کی نائو سدا نہیں چلتی ‘‘حالات و واقعات نوں ویکھ کے ایہہ اندازہ لایا جا سکدا اے کہ غیر معیاری پرفارمنس حکومت نوں لے ڈُبے گی۔
