تارکینِ وطن نال دشمنی

تحریر حمید اللہ بھٹی

نادرا دے کجھ افسراں نے رنگ رلیاں تے سیاحت لئی تارکین وطن نال انج دی دشمنی کیتی اے
کوئی ملک اپنے ملک دے ڈیٹا تیکر کسے دوجے ملک نوں رسائی نہیں دیندا پر پاکستان ولوں نادرا نے ایہہ حماقت وی کر دتی اے

تحریر حمید اللہ بھٹی

ادھی توں ودھ مدتِ اقتدار لنگھان دے باوجود موجودہ حکومت کسے شعبے وچ قابل ذکر یا قابل تعریف کارکردگی دا مظاہرہ نہیں کر سکی بلکہ مہنگائی تے بے روزگاری وچ وادھے دی بنا اُتے حمایتی طبقہ وی ہُن افسردہ تے پشیمان وکھائی دین لگیا اے پر بیرون ملک اج وی حکمران جماعت دی مقبولیت اک عیاں حقیقت اے۔ ایہہ دوجیاں جماعتاں توں زیادہ تارکین وطن وچ مقبول اے شاید ایسے بنا اُتے حکمران تارکین وطن نوں ووٹ دا حق دین دے نال ایواناں وچ نمائندگی دی گل کردے نیں سوشل میڈیا اُتے عمران خان دے حامیاں دا جیہڑا غلبہ اے ایس وچ وڈی تعداد تارکین وطن دی اے جو حکومت دے چنگے کماں دے نال غلط فیصلیاں دی تائید وچ دلائل پیش کردے نظر آندے نیں ایس وچ کوئی شائبہ نہیں کہ جدوں توں تحریک انصاف حکومت وچ آئی اے ترسیلات زر وچ نمایاں وادھا ہویا اے تے پاکستان ایس حوالے نال دنیا دے تیجے وڈے ملک دا مقام حاصل کرن دے نیڑے وے جس دی اک وجہ بیرون ملک مقیم پاکستانیاں وچ وزیراعظم دی ذاتی مقبولیت اے ایسے بنا اُتے اوہناں نے امریکہ وغیرہ وچ تاریخی جلسے کیتے پر کیہ موجودہ حکومت نے تارکین وطن دی بہتری لئی عملی طور اُتے وی کجھ اقدامات کیتے نیں؟۔ بظاہر زمینی حقائق ہاں وچ جواب دین دی تائید دی بجائے نفی کردے وکھائی دیندے نیں جے ایہہ کھوجن دی کوشش کیتی جائے کہ موجودہ حکومت نے تارکین وطن لئی مشکلات پیدا کیتیاں نیں؟ تے ہاں وچ ای جواب دینا قرینِ انصاف ہوئے گا۔ ایس حوالے نال موجودہ اناڑی حکمراناں نے حماقتاں دے پہاڑ کھڑے کرن وچ کوئی کسر نہیں چھڈی گل ایتھوں تیکر ای محدود نہیں رہی بلکہ قومی سلامتی دے حوالے نال وی خطرات ودھا دتے نیں جس دے بعد عین ممکن اے جلدای تارکین وطن وی اپنے ہم وطناں وانگوں حکمراناں اُتے برسدے نظر آن۔
کوئی ملک اپنے ملک دے ڈیٹا تیکر کسے دوجے ملک نوں رسائی نہیں دیندا پر پاکستان ولوں نادرا نے ایہہ حماقت وی کر دتی اے پر حکومت نے نادرا دے کجھ افسراں دی وجہ نال مسائل دی دلدل وچ دھنس دے تارکین وطن دی حالت زار دا نوٹس نہیں لیا بیرون ملک سفارتخانیاں وچ نادرا کائونٹر قائم کرن دا فیصلہ جس حوالے نال وی ویکھیے ایہہ تارکین وطن دے نال ملک لئی وی سخت نقصان دہ اے نادرا نے حماقت کردے ہوئے دنیا نوں اپنے ڈیٹا تیکر رسائی دے دتی اے ہن جس ملک دی کوئی ایجنسی یا ادارہ جدوں چاہے نادرا ڈیٹا تیکر رسائی حاصل کر سکدا اے ایہہ احمقانہ و ظالمانہ فیصلہ نادرا دے افسراں نے محض کجھ ملکاں دی سیر و سیاحت دے لالچ وچ کیتا اے کجھ افسر مغرب دی سیاحت کرن دے نال تحفے وصول کر چکے نیں جد کہ کجھ ہجے گھمن پھرن تے نائٹ کلباں وچ شراب و شباب وچ اپنے آپ نوں ڈبون وچ مصروف نیں نادرا ڈیٹا تیکر رسائی ملن نال کئی ملکاں وچ پاکستانیاں نوں ڈی پورٹ کرن دا کم شروع ہو چکیا اے جویں جویں سفارتخانیاں وچ نادرا کائونٹرز دی تعداد وچ وادھا ہوئے گا بیرون ملک مقیم پاکستانیاں اُتے عرصہ حیات تنگ ہوندا جائے گا جس دے نتیجے وچ پیسے کمان والی ایہہ مشیناں کم کرن دی بجائے وطن واپس آن تے بے روزگاری دے سیلاب دا حصہ بنن اُتے مجبور ہوندیاں جان گیاں۔
نادرا ڈیٹا تیکر رسائی نال کسے ملک لئی وی ہر پاکستانی دے بارے ایہہ جاننا آسان ہو جائے گا کہ اوہ کسے ایف آئی آر دی بنا اُتے کسے ایجنسی نوں مطلوب ہے یا نہیں۔ کسے اُتے کوئی وی کیس ہویا تے نہ صرف بیرونی حکام فوری جانن دے قابل ہو جان گے بلکہ ایسے آڑ وچ معمولی جواز اُتے ملک بدر کر سکن گے تے فیر ایہہ سلسلہ ہر لنگھدے دن دے نال ودھدا چلا جائے گا ساڈے ملک وچ ایہہ اک روایت اے کہ اک بندہ جرم کردا اے تے ایف آئی آر درج کراندے ہوئے کئی بے گناہ وی نال ای نامزد کر دتے جاندے نیں کجھ عرصے توں ایہہ چلن وی عام ہو گیا اے کہ بیرون ملک مقیم بندیاں نوں مشورے دے الزام وچ وی نامزد کیتا جان لگیا اے جے انج دا ای سلسلہ چلدا رہیا تے سوچو تارکین وطن کس طرح بیرون ملک قیام کر سکن گے؟ کیوں جے نادرا ڈیٹا تیکر رسائی نال غیر ملکی حکام مجرم ہون دا الزام لا کے پاکستانیاں نوں دھڑا دھڑ بے دخل کرنا شروع کر دین گے تے کیس دے فیصلہ تیکر بے گناہی ثابت کرن دے نال بے روزگاری دا عذاب وکھرا سہن اُتے مجبور ہون گے ملک دے ڈیٹا تیکر رسائی نہ صرف کسے وی عالمی طاقت نوں پاکستان وچ آلہ کار لبھن تے فیر کٹھ پتلی وانگوں استعمال کرن دی سہولت مل جائے گی بلکہ بیرون ملک مقیم پاکستانیاں دی بے دخلی نال ملک وچ بے روزگاری وچ وادھے نال سیاسی عدم استحکام وچ وکھرا اضافہ ہوئے گا ایس طرح نہ صرف تارکین وطن دی زندگی اجیرن ہوئے گی بلکہ پاکستان دی داخلی سلامتی لئی وی شدید نوعیت دے خطرات پیدا ہون دا اندیشہ اے نادرا دے کجھ افسراں نے رنگ رلیاں تے سیاحت لئی تارکین وطن نال انج دی دشمنی کیتی اے جیہڑی موجودہ حکومت دی بداعمالیاں دے سارے نقصانات توں زیادہ ملک نوں مسائل دی گرداب وچ دھکیلن دا موجب بنے گی۔ سپین دے شہر بارسلونا وچ قونصل جنرل عمران علی چوہدری اک واحد شخصیت نیں جنہاں نے قونصل خانے وچ نادرا دا کائونٹر نہیں بنن دتا پر ہن ایہہ وی رکاوٹ ختم ہون دے نیڑے وے کیوں جے ترقی پان دے بعد ہن ایہناں دی یورپ توں باہر تعیناتی دا امکان اے۔
زرعی تے صنعتی پیداوار گھٹ ہون نال برآمدات متاثر تے ودھدی آبادی دی ضروریات پوری کرن لئی پاکستان دا درآمدات اُتے انحصار ودھن لگیا اے ایہناں حالات وچ چاہیدا تے ایہہ سی کہ زرعی و صنعتی پیداوار ودھان دے نال تارکین وطن لئی وی سہولتاں وچ وادھا کیتا جاندا تاکہ اک پاسے ملک خوراک وچ خود کفیل ہوندا نیز بے روزگاری گھٹ ہوندی نال ای ترسیلاتِ زر وچ وادھا ہوندا پر افسوس نال کہنا پیندا اے کہ حکومتی جماعت دی ساری توانائیاں حریف جماعتاں نوں نیچا وکھان لئی وقف نیں جے گل ایتھوں تیکر ای محدود رہندی تے فیر وی شاید نقصان گھٹ ای رہندا پر وطن عزیز دے دیار غیر وچ وسن والیاں نوں مشکلات دے بھنور وچ بے یارومددگار چھڈن دے نال دانستہ طور اُتے مزید مصائب پیدا کیتے جان لگے نیں جس نال ترسیلات زر وچ نمایاں کمی دے خدشے دے نال روزگار لئی بیرون ملک مقیم پاکستانیاں لئی وی ساز گار حالات ناہموار ہو سکدے نیں پر حکومتی صفاں وچ دور تیکر نظر دوڑان دے باوجود انج دا کوئی بندا نظر نہیں آندا جس نوں حماقتاں دا احساس ہوئے تے اوہ تارکین وطن دی سچے دل نال مشکلات گھٹ کرنا چاہندا ہوئے۔ زلفی بخاری نے کجھ لوک جرمنی بجھوائے پر ایس وچ وی ملک دا نہیں موصوف دا ذاتی فائدہ سی ودھدے ملکی خسارے نوں خوفناک حد تیکر جان توں روکن وچ ترسیلات زر دا اہم کردار اے پر حکومت نے جس طرح تارکین وطن نوں رسوا کرن دی نادرا نوں کھلی چھٹی دے رکھی اے ایہہ تباہی نوں دعوت دین دے مترادف اے حالانکہ کسے بندے دی نجی زندگی وچ مداخلت روکن لئی ملکی و عالمی قوانین موجود نیں فیر نادرا نے ڈیٹا دے حوالے نال کیوں دنیا اُتے مہربان اے تے پاکستان کیوں اپنے شہریاں دے ڈیٹا تیکر ساری دنیا نوں رسائی دے رہیا اے؟ کدھرے نادرا وچ غیر ملکیاں دے آلہ کار تے نہیں؟ حکومت نوں چاہیدا اے کہ بیرون ملک رنگ رلیاں منان، سیاحت تے تحفے وصول کرن والے سارے افسراں نوں گرفتار کر کے غداراں جہی کڑی سزادیوے کیوں جے نادرا دی کجھ کالی بھیڑاں دی حماقت نے ملکی معیشت بہتر بنان وچ معاون ترسیلات زر گھٹ کرن تے بیرون ملک مقیم پاکستانیاں لئی غیر ملکی سرزمین تنگ کرن دی دانستہ کوشش کیتی اے جنہاں نوں معاف یا نظر انداز کرنا ملک و ملت نال دشمنی دے برابر اے۔