یورپ یاترا

ابرار ندیم

ایہ اج توں پنج چھ ورھے پہلاں 2016ء دی گل اے میں جرمنی دے شہر فرائے برگ وچ وچکار بازار اک بنچ تے اکلا بیٹھا حیرانی تے اشتیاق نال اپنے آل دوالیوں لنگھن والے حسین قدرتی مناظر دا انج نظارہ کر رہیا سی جیویں کسے پینڈو بچے نوں پہلی واری شہر وچ کھڈونیاں دی بہت وڈی دکان وچ اکٹھے ڈھیر سارے خوبصورت کھڈونے ویکھن نوں مل گئے ہون۔ سچی گل اے انگریزی فلماں وچ ویکھیا ہویا ایہ دلکش منظر میرے ورگے سدھے سادے پینڈو بندے لئی کسے طلسم ہوشربا توں گھٹ نہیں سی۔ میرے آل دوالے رنگاں تے خوشبوئواں دا اجیہا منہ زور سیلاب سی جہدے وچ کسے مزاحمت دے بناں میں اوہدے رخ تے بہندا چلا جا رہیا سی۔ مینوں انج لگ وکھائی دے رہیا سی جیویں بسنت دے دن نیلگوں اسمان تے بہت ساریاں رنگی برنگیاں پتنگاں شوخ ہواواں دے سنگ لہلہاندی تے بل کھاندیاں اکٹھیاں اڈ رہیا ہون۔ اجے میں ایس رنگ برنگے تے خوشبوئواں نال مہکدے دلکش منظر وچ ای کھویا ہویا سی کہ ایس دوران میرے فون تے واٹس ایپ میسج دی ٹون وجی۔ ایہ لہور توں استاد محترم عطاء الحق قاسمی صاحب دا میسج سی جو میرے یورپ آن دے پہلے دن توں فون تے میسجز دے راہیں میرے نال مسلسل رابطے وچ سن تے میری خیریت پچھن دے نال مجوزہ سفر دے حوالے نال اکثر اپنے قیمتی مشوریاں نال میری رہنمائی وی فرماندے سن۔
قاسمی صاحب نے پچھیا سی سنائو یورپ اپڑ کے کیہ محسوس کر رہے او؟ میں اک نظر فیر اپنے آل دوالیوں گزردے حسین قدرتی مناظر ول ویکھیا تے اک ٹھنڈی آہ بھردے ہوئے جوابی میسج کیتا سر جی بڑی دیر کر دتی اے۔ جہدے تے قاسمی صاحب نے ہسدے ہوئے میسج کیتا پُتر! پہلے آ کے توں کہڑے تیر مار لینے سن۔ ایہدے تے مینوں بھلوال وچ اپنے استاد ملک افتخار صاحب دا اوہ خودساختہ قول یاد آ گیا جہنوں اوہ ساڈے ورگے نالائق طالب علماں نوں سبق یاد نہ کرن تے شرمندہ کرن لئی اکثر سناندے سن کہ جہڑے ایتھے بھیڑے اوہ لہور وی بھیڑے‘ مطلب جو بھلوال وچ نکمے تے نالائق نیں اوہ لہور وچ وی نکمے نیں۔ ایہدے بعد میں کنی ای دیر تک اوتھے اکلا بیٹھا نامور سفرنامہ نگار مستنصرحسین تارڑ دی خوش قسمتی تے اپنیاں نالائقیاں نوں یاد کرکے کڑھدا رہیا کہ کاش اسیں وی چاچا جی تارڑ وانگوں پڑھے لکھے تے سوہنے ہوندے۔ ایس دوران میں قاسمی صاحب دے دتے گئے معنے نوں دھون لئی اپنے کتے دے نال میرے نیڑیوں لنگھدی ہوئی اک میم نوں ویکھ کے تارڑ صاحب ورگی سمائل دین دی کوشش وی کیتی پر پتہ نہیں اوس کج فہم نے کیوں اپنا منہ دوجے پاسے پھیر لیا۔
ایس توں پہلاں کہ میں اوتھے ٹُٹے دل نال تے کجھ الٹا سدھا سوچدا اللہ بھلا کرے جرمنی وچ رہندے میرے دوست سہیل قمر تے اوہناں دے بھائی رضوان قمر دا جو مینوں اوتھے چھڈ کے کسے کم نال گئے سن واپس آ گئے۔ سہیل قمر جرمنی دے کسے انسٹیٹیوٹ توں تربیت یافتہ فلم ڈائریکٹر نیں تے میسی برگ وچ اپنی جرمن نژاد بیوی تے بچیاں دے نال رہندے نیں جد کہ اوہناں دے بھائی رضوان قمر فرائے برگ جہنوں عرف عام وچ بلیک فارسٹ یعنی کالا جنگل کہیا جاندا اے وچ اپنا کاروبار کردے نیں۔ ایس شہر دے بارے کہیا جاندا اے کہ ایہ اینے سنگھنے جنگلاں نال گھریا ہویا اے کہ ایتھے سورج دیاں شعاواں وچ وی نہیں اپڑ سکدیاں۔ اوہناں دے اک ہور بھائی عدنان قمر وی نیں جو فرانس دے نیڑے جرمنی دے اک سرحدی شہر رائن فلٹن وچ رہندے نیں تے اوتھے اپنا کاروبار کردے نیں۔ ایہناں تنے بھراواں دا تعلق سیالکوٹ نال اے تے ایہ اک لمے عرصے توں جرمنی دے مستقل شہری نیں پر ایناں عرصہ دیار غیار وچ رہن دے باوجود اوہناں دے مزاج تے رویاں وچ پیار‘ محبت‘ خلوص تے ملنساری دی اوہو اعلیٰ قدراں تے روایتاں بدرجہ اتم موجود نیں جو ساڈی دینی تے مشرقی تہذیب و ثقافت دا اثاثہ نیں۔ تناں بھراواں وچ سہیل قمر اک پڑھے لکھے تے سنجیدہ مزاج دے تے رضوان قمر سدھے سادے تے کم گو انسان نیں جد کہ اوہناں دے ساریاں توں چھوٹے بھائی عدنان قمرشوخ تے شرارتی طبیعت دے مالک ہر ویلے ہسدے مسکران والے اک کھنڈرے شخص نیں۔ عدنان قمر دے شہر رائن فلٹن وچ اک بہت وڈی نہر اے جہنوں ایس شہر دی نسبت نال رائن کہیا جاندا اے۔ ایہدی خوبصورتی ایہہ وے کہ ایہدے اک پاسے فرانس دی سرحد اے تے دوجے پاسے سوئٹزرلینڈ دا شہر باسل اے۔ ایس نہر دے پل تے اک اجہی تھاں اے جتھے محبت کرن والے جوڑیاں نے اپنی محبت دی نشانی دے طور تے چھوٹے چھوٹے ان گنت جندرے لائے ہوئے نیں جہناں دی گنتی ہزاراں وچ اے۔
جدوں سہیل قمر میرے استفسار تے مینوں ایہناں جندریاں دا پس منظر دس رہے سن تے عدنان قمر نے چپکے جہے میرے کن وچ سرگوشی کیتی کہ جے سہیل بھائی وی اپنیاں محبتاں دی نشانی د ے طور تے ایتھے جندرے لاندے تے ادھے توں ودھ جندرے تے اکلے سہیل صاحب دے ای ہونے سن۔ فرائے برگ شہر تے اوہدے وسنیکاں دی خوبصورتی دے بعد مینوں جس چیز نے سب توں ودھ متاثر کیتا اوہ اوتھے رہندے ساڈے پاکستانی بھراواں دا آپس وچ اتفاق تے پیار محبت دا رشتہ اے۔ گوالمنڈی دے جمشیدبٹ سنے اورنگزیب‘ منصوربٹ‘ رضوان بٹ‘ سہیل بٹ‘ محمداختر تے محمدخالد صاحب اوتھے موجود اجہے پاکستانی نیں جہناں دیاں عمراں پردیس وچ لنگھ گئیاں نیں پر اوہناں دے دل اج وی پاکستان لئی دھڑکدے نیں۔