پوٹھوہار دے ایدھی راجہ حسن اختر ایڈووکیٹ

طلعت عباس خان

دوستاں دے وچھڑن دے حوالے نال ایہ ورھا چنگا نہیں رہیا۔ دوست وی پھل دار رُکھ ورگے ہوندے نیں جو پھل تے اپنی چھاں نال دوجیاں نوں مستفید کردے رہندے نیں۔ راجہ حسن اختر وی اک پھل دار رُکھ ورگے سن۔ ویلفیئر کماں دی وجہ نال اوہ خطہ پوٹھوہار دے ایدھی کہلاندے سن۔ راجہ صاحب وڈے بھائی افتخارعباس دے یونیورسٹی فیلو سن پر زیادہ دوستی میرے نال سی۔ بار سیاست وچ میرے شانہ بشانہ رہے۔ اک شام امریکہ توں دوست عادل نال لندن کال کیتی گل ہو رہی سی اوس ویلے راجہ صاحب وی کول بیٹھے سن۔ جدوں گل ہو رہی سی تے راجہ صاحب نے عادل توں پچھیا کہدے نال گلاں کر رہے او دسیا امریکہ وچ طلعت عباس نال تے پچھیا کہ کیہ اوہدے بھائی دا ناں افتخارعباس اے۔ جی میں جواب دتا گیا۔ فیر راجہ صاحب نال فون تے میری گل ہوئی کہیا ہن تے تسیں ہر صورت لندن آئونا اے تسیں میرے مہمان بنو گے‘ رہائش‘ کھان پین میرے ذمہ تے عادل تہانوں ایتھے سیر کراوے گا۔ ہن جس خلوص پیار نال دعوت ملی میں اوہدے تے عمل کردے ہوئے براستہ لندن پاکستان جان دا ٹکٹ لیا۔ لندن ہیتھرو ایئرپورٹ اپڑیا تے اوہ دوویں موجود سن۔ دوہاں نے جپھیاں پائیاں‘ گھر اپڑے۔ عادل فیملی دے نال نیڑے ای رہندا سی تھوڑی دیر آرام کیتا فیر اسیں تنے پیدل عادل دے گھر اپڑے۔ کھانا کھادا‘ راجہ صاحب دے کول لندن وچ دو تن ہفتے گزارے۔ راجہ صاحب سویرے جاب تے جان توں پہلاں پنج دس پونڈ سرہانے رکھ کے جاندے کہ دن نوں کھا پی لینا۔ پاکستان واپسی تے ایہ روز دی رقم اکٹھی واپس کیتی تے پہلے ناراض بعد وچ خوش ہوئے۔ ایس دوران عادل نوں کہیا کیوں ناں ایتھے ٹرین دا لما ں سفر کیتا جاوے۔ پچھیا کناں لماں کہیا ایڈمبرا تک دا۔ ایس بہانے کزن نال وی ملاقات ہو جاوے گی۔ عادل نے کہیا میرے کزن وی گلاسکو وچ نیں۔ تسیں ایڈمبرا وچ کزن نوں مل لینا تے میں گلاسکو ٹر جاواں گا۔ فیر انج ای ہویا اوس ویلے ایئرٹکٹ سستا تے ٹرین دا ٹکٹ مہنگا سی پر انجوائے دے موڈ وچ ٹرین دا سفر چنگا لگا۔
راجہ صاحب نوں ساتھ چلن لئی کہیا پر نویں نویں جاب دی وجہ نال سانوں کمپنی نہ دے سکے۔ دوہاں نے خوب انجوائے کیتا۔ برطانیہ وزٹ تے راجہ صاحب تے عادل دے نال گزرے ہوئے لمحات مینوں اج وی یاد آئوندے نیں۔ لندن وچ رات نوں خوب گپ شپ رہندی۔ عادل تے راجہ صاحب نوں دسیا کہ میں ہن امریکہ چھڈن دا ارادہ کر چکیا واں باقی زندگی پاکستان وچ ای گزاراں گا۔ راجہ صاحب نے وی گل نال اتفاق کیتا تے کجھ چر بعد راجہ صاحب وی لندن چھڈ کے پاکستان آئے تے ہن تے کافی عرصے توں عادل وی پاکستان وچ ای اے۔ راجہ حسن اختر لندن وچ راجہ اظہر دے نال رَل کے پی ٹی آئی دے جلسے کردے۔ راجہ صاحب سٹیج سیکرٹری دے فرائض نبھاندے سن فیر پاکستان آئے۔ ایتھے آ کے اسیں وی سیکرٹری جنرل معراج محمد خان دے نال پی ٹی آئی وچ شامل ہوئے۔ بعد وچ سوائے راجہ صاحب دے معراج محمد خان سنے سارے ساتھی پی ٹی آئی چھڈ گئے۔ راجہ حسن اختر آخری ساہ تک منسلک رہے۔ سیاست وچ کدی وی اوہناں نے لیڈر بنن دی کوشش نہیں کیتی۔ ہمیشہ ورکر بن کے رہے۔ راجہ صاحب دا پنڈ درکالی شیرشاہی کلرسیداں اے۔ اوہ منہاس فیملی چوں سن۔ رہائش اسلام آباد وچ سی پر ہفتے وچ تن دن اپنے علاقے وچ ضرور آئوندے جاندے سن۔ اوتھے رہ کے بار دی مقامی سیاست وچ اہم کردار ادا کردے رہندے۔ اوہ وکیلاں دے کنگ میکر کہلاندے سن۔ اوہناں نے فلاحی کماں وچ وی ودھ چڑھ کے حصہ لیا۔
سارے سرکاری سکولاں وچ لائق بچیاں نوں سکالرشپ دیندے سن۔ ہرسال شجرکاری مہم وچ وی ودھ چڑھ کے حصہ لیندے سن۔ مینوں انگوراں دی بیل دے تحفے دتے۔ ایہ انگور اج وی صحن وچ پھل دے رہے نیں۔ اوہناں دے پُتر راجہ ہمایوں حسن نے امریکہ توں تعلیم حاصل کیتی۔ ایس دوران اوہو امریکن شہری نال نکاح کیتا فیر دلہن نال پاکستان آئے تے ویاہ دیاں رسماں ایتھے دھوم دھام نال ادا کیتیاں۔ اپنے علاقے وچ مثالی ولیمہ دتا۔ راجہ صاحب خوش قسمت ٹھہرے کہ دھی تے پُتر دے ویاہ تے اوہناں نوں پھلدا پھولدا ویکھ کے گئے۔ نواسے‘ نواسیاں نال کھیڈ کے گئے۔ اکثر فیس بک تے وٹس ایپ تے رابطہ رہندا۔ ست ستمبر نوں میرے نال فون تے گل ہوئی۔ فیر اوسے شام نوں جوابی فون کیتا گپ شپ ہوئی۔ سپریم کورٹ وچ تیراں تریخ سوموار نوں ملاقات طے پائی۔ میرے توں ایڈووکیٹ نیازاللہ نیازی دا فون نمبر لیا اوہناں نال وی گل کیتی۔ رات نوں میسج لکھیا کہ انشاء اللہ سوموار نوں سپریم کورٹ وچ ملن آواں گا۔ 9 تریخ نوں وکلاء کنونشن سی اوتھے خالد بھائی جان دے نال میں وی موجود سی۔ ایس دوران اک وجے راجہ ممتاز احمد دا فون آیا کہ راجہ حسن اختر پولی کلینک وچ ڈاڈھے بیمار نیں۔ اسیں وکلاء کنونشن چھڈ کے ہسپتال اپڑے تے اوتھے ایمبولینس دے انتظار وچ راجہ حسن اختر اپنی زندگی دی اننگ مکمل کرکے سٹیچر تے ابدی نیند سوں رہے سن تے بھابی تے رشتے دار رو رہے سن۔ اوس ویلے سوائے بھابی دے اوہناں دا پُتر تے دھی پی ایچ ڈی دی وجہ نال دوویں ملک چوں باہر سن۔ دھی جنازے توں پہلاں اپڑ سکی پر پُتر امریکہ دی وجہ نال جنازے وچ شامل نہ ہو سکیا۔ چنگی گل ایہ وکھائی دتی کہ بچیاں نے ہمیشہ اپنے والدین نوں خوشیاں دتیاں تے اوہناں دے والدین بچیاں تے خوشیاں نچھاور کردے وکھائی دتے۔ راجہ حسن اختر نے بھرپور زندگی گزاری۔ دعا اے اللہ اوہناں نوں جنت الفردوس وچ اعلیٰ مقام عطا کرے تے رشتے داراں نوں صبروجمیل عطا فرمائے۔ (آمین) ٭٭