سٹیج دے بے تاج بادشاہ عمر شریف اللہ نوں پیارے ہو گئے
ایئر ایمبولینس دے ذریعے علاج لئی امریکہ جا رہے سن، طبیعت زیادہ خراب
ہوئی تے جرمنی وچ لینڈ کرنا پیا، 1974وچ فنی کیریئر دا آغاز تھیٹر توں کیتا
عنبرین فاطمہ
ہاسے کھلارن والے سٹیج دے بے تاج بادشاہ کامیڈی کنگ ’’عمر شریف ‘‘اپنیاں، بیگانیاں تے دوستاں نوں داغ مفارقت دے گئے۔ عمر شریف کافی عرصے توں بیمار سن۔ دل تے گردیاں دے علاوہ دیگر بیماریاں وچ مبتلا سن اوہناں نوں ہارٹ سرجری لئی ایئر ایمبولینس دے ذریعے امریکہ منتقل کیتا جا رہیا سی دوران سفر حالت وگڑن پاروں ایہناں نوں جرمنی وچ لینڈ کرنا پیا۔ طبیعت نہ سنبھلن اُتے جرمنی دے اک ہسپتال داخل کروایا گیا جتھے اوہ جان بر نہ ہو سکے۔ عمر شریف دی وفات دا سن کے ہر اکھ آشکبار اے ایہناں دے کجھ ساتھی جنہاں نے ایہناں دے نال کم کیتا اسیں ایہناں نال گل بات کیتی اوہ سب دے سب بے حد دل گرفتہ سن پر اوہناں نے عمر شریف دے نال اپنی دوستی تے کم دے تعلق دیاں یاداں نوں جس طرح شیئر کیتا تہاڈی نذر اے۔
’’وسیم عباس ‘‘ نے کہیا کہ عمر شریف دے نال میری ناختم ہون والیاں یاداں نیں اوہناں نے میرے نال اپنی زندگی دا اک لمبا ترین حصہ لنگھایا اوہ میرے عزیز ترین دوستاں وچوں سن میں کیہ کہواں کہ کیہ کیہ یاداں نیں تے کس قدر یاداں نیں۔ اج اوہناں دے انتقال دا سن کے شدید دکھی تے پریشان واں تے سوچ رہیا واں کہ کنج ویلا تیزی نال لنگھ جاندا اے تے بس یاداں ای رہ جاندیاں نیں۔ مینوں یاد اے کہ عمر شریف جدوں پنجاب وچ ڈرامہ کرن لئی آئے سن تے میں ای ایہناں نوں لیایا سی اسیں پنجاب وچ جنہا کم کیتا اکٹھے ای کیتا۔ کراچی ہوئے یا لہور اسیں اک دوجے دے نال لاتعداد ڈرامیاں وچ کم کیتا۔ ساڈی دوستی دا ایہہ عالم سی کہ جے عمر شریف لہور آندے سن میرے گھر وچ رہندے اسیں دن رات اکٹھے لنگھاندے تے جے میں کراچی جاندا تے عمر شریف دے گھر رہندا سی اسیں سال ہا سال اک دوجے دے نال گزارے نیں تے عمر شریف دے فن اُتے کیہ گل کیتی جائے دنیا گواہ اے کہ اوہ کنہے وڈے فنکار سن ہندوستان دے وڈے فنکار جنہاں نوں ایتھے بوہت پسند کیتا جاندا اے اوہ سب دے سب ایہناں دے پرستار سن۔ ایہناں نوں کاپی وی کیتا کردے سن۔ میری ایہناں نال بے پناہ دوستی سی تے جے عمر شریف چنگے نہ ہوندے تے ساڈی دوستی چل نہیں سکدی سی۔ مینوں یاد اے کہ اسیں دونویں اکٹھے کم کر رہے سی عمر شریف سٹیج اُتے سن تے میری واری ہجے آنی سی میں بیک سٹیج بیٹھا سوچ رہیا سی کہ اینے وڈے آرٹسٹاں دے نال کم کیتا پر ایس انسان دے کم دا انداز ای وکھرا اے۔ عمر شریف 26 سال دی عمر توں ای شوگر دے مرض وچ مبتلا ہو گئے سن۔ اک وار اوہ سٹیج اُتے دوران ڈرامہ ای بیہوش ہو گئے اسیں ایمبولینس نوں کال کیتی انائونس کیتا کہ جے ہال وچ کوئی ڈاکٹر موجود اے تے مدد کرو دو ینگ ڈاکٹر اوتھے موجود سن اوہناں نے پہلا سوال ای ایہہ کہتا کہ کدھرے ایہہ شوگر دے مریض تے نہیں دسیا گیا کہ ہین تے اوہناں نے فیر چینی گھول کے ایہناں دے منہ وچ پائی تے کجھ دیر دے بعد ایہناں نوں ہوش آیا۔ عمر شریف جنہے سیٹ اُتے شرارتی سن اینے ای آف دی سیٹ وی شرارتی سن۔
مزاح دی دنیا وچ اپنا وکھرا ای مقام رکھن والے فنکار ’’سہیل احمد‘‘ کہندے نیں کہ عمر شریف دے نال مزاح دی اک صدی ختم ہوئی اے اسیں تے اکثر ایہہ جملہ کسے لئی وی بول دینے آں پر میں ایہہ سمجھنا واں کہ ہر فیلڈ وچ عمر شریف دے لیول دا اک بندہ ہوندا اے تے مزاح دی دنیا وچ صرف عمر شریف ای سی۔ اج کل تے اُنج ای ہر کوئی کامیڈی کنگ ہون دا دعویٰ رکھدا اے پر اصل کامیڈی کنگ عمر شریف سی جیہڑا چلا گیا اے پر دِلاں وچ ہمیشہ زندہ رہوے گا۔ پورے برصغیر وچ اسیں اکھاں نال ویکھیا کہ عمر شریف دے چاہن والے کنہے زیادہ سن وڈے وڈے نامور سٹارز نوں عمر شریف دے نال سیلفی لین لئی ترسدے ہوئے ویکھیا اے۔ ایہناں نال مل کے طبیعت بحال ہو جاندی سی چہرے اُتے خودبخود مسکراہٹ آ جاندی سی۔ ایہناں نوں ایہناں دی زندگی وچ جیہڑا مقام ملیا اوہ اللہ دا دتا ہویا سی پر بطور پاکستانی میں کہواں گا کہ ایہناں نوں اوہ مقام نہیں ملیا جیہڑا ملنا چاہیدا سی، اوہ پاکستان دا اوہ غیور چہرہ سی جس دی جنہی تعریف کیتی جائے گھٹ اے۔ پاکستانیت ایہناں دے اندر کُٹ کُٹ کے بھری ہوئی سی۔ ایہناں نوں پاکستان دی ثقافت نال بے حد محبت سی۔ اوہناں نے اپنے فن نوں پچھے تے پاکستان نوں ہمیشہ اگے رکھیا۔ عمر شریف اک وڈے بندے سن ، لہور وچ اوہ میرے محلے دار وی سن ساڈا اک دوجے دے گھر وچ بوہت زیادہ آنا جانا سی ایہناں دی بیگم تے بچے میرے بوہت نیڑے سن تے ہین۔ سہیل احمد نے مزید کہیا کہ بطور انسان میں ایہناں توں زیادہ پیارا کسے نوں نہیں پایا۔ عمر شریف اپنے کم نوں عبادت سمجھدے سن اوہ انسیت نال بھرپور انسان سن شوگر دے مریض سن شوگر ایہناں دا خاندانی مرض سی۔ ایہناں دی جوان بھین تے بھرا وفات پا گئے سن تے اوہناں دے بچے عمر شریف دے کول ای ہوندے سن۔ اوہناں نے صرف اپنے بچیاں نوں نہیں بلکہ پورے خاندان دے بچیاں نوں اپنے گلے نال لایا ہویا سی۔ ایہناں دیاں خوشیاں غماں نوں اپنا سمجھدے سن۔ کھلے دل دے مالک سن سیٹ اُتے شوٹنگ دے دوران کدی بھُک لگدی سی تے ایہہ نہیں کہندے سن کہ میرے لئی فلاں شے لے آئو بلکہ ایہہ کہیا کردے سن کہ جنہے وی ایتھے لوک موجود نیں سب لئی ایہہ شے لے آئو جے برگر منگوانا ہوندا سی تے سب لئی منگواندے سن۔ چکن یا جو وی شے منگواندے سب لئی منگواندے، اینا وڈا دل خدا سب نوں تے نہیں دیندا۔ مینوں یاد اے کہ اک وار اسیں اکٹھے کم کر رہے سی عمر شریف خاصے پریشان سن میں پریشانی دی وجہ پچھی تے اوہناں نے دسیا کہ بھانجے نوں شوگر اے تے انسولین لان دے بعد اوہ کومے وچ چلا گیا اے دعا کرو ایس لئی ڈرامہ ختم ہویا ایس دے بعد میں وی ایہناں دے نال ای ہسپتال وچ چلا گیا ڈاکٹراں نے کہیا کہ ہر قسم دی کوشش کر کے ویکھ لئی اے ہن اک آخری کوشش رہ گئی اے تے اوہ ایہہ وے کہ دو لکھ دے انجیکشن لگن گے ایہناں نوں تے اک انجیکشن دی قیمت ساڑھے تن لکھ اے عمر شریف ایہہ سن کے برہم ہو گئے کہ لایا کیوں نہیں ہجے تیکر جائو فوراً لائو، او تے ایس طرح دے انسان سن۔ ایہناں جہیا نہ کوئی ہے نہ کوئی آئے گا۔ صدیاں وچوں وی انج دے لوک پیدا نہیں ہوندے۔
’’نسیم وکی‘‘ نے کہیا کہ ساڈی خوش قسمتی اے کہ حالیہ دور وچ جیہڑے لوک کم کر رہے نیں ایہناں وچ اسیں اوہ خوش نصیب آں جنہاں نوں عمر شریف دے نال کم کرن دا موقع میسر آیا میں ایہناں دے نال مسلسل 10 سال تیکر لہور وچ سٹیج اُتے کم کیتا بوہت سارے ڈرامے ویڈیو وچ وی ریکارڈ ہوئے جنہاں وچ ’’یہ تو کمال ہو گیا ،ناچ میری بلبل ،عمر شریف حاضر ہو ،جو گھر گیا وہ مر گیا‘‘ قابل ذکر نیں ۔
میرے کول اج جیہڑی کامیابی اے اوہ ایہناں ای دی مرہون منت اے میں ایہناں توں بوہت متاثر واں اج مینوں جنہا وی کم آندا اے بس سمجھو کہ عمر شریف نوں ویکھ کے ای سکھیا اے۔ ہندوستان وچ ایس ویلے جنہی وی کامیڈی ہو رہی اے اوہ عمر شریف دیاں فلماں تے ایہناں دے ڈرامیاں توں متاثر اے ایہناں نوں ویکھ کے بوہت سارے لوک شوبز وچ آئے۔ مینوں یاد اے کہ میرا عمر شریف دے نال پہلا ڈرامہ ’’ لوٹے اور لفافے‘‘ سی ایس دوران اوہناں نے میرے نال جدوں پہلی ملاقات کیتی تے سمجھایا کہ کدی گندی جگت نہیں لانی صاف ستھری گل کرنی اے پر ایہناں نوں جدوں میں پہلی وار ویکھیا سی تے بوہت خوش ہویا کہ میں عمر شریف نوں بالمشافہ ویکھ لیا اے۔ راولپنڈی وچ اوہناں نے میرے نال اک ڈرامہ کیتا اوہ سولہ دن دا سپیل سی ایس وچ اوہ ڈاکٹر بنے ہوئے سن تےمیں مریض بوہت ای یادگار تجربہ سی۔ عمر شریف دے نال کم کر کے آرٹسٹ نوں اپنی ورتھ دا اندازہ ہوندا سی کہ اوہ فن دی دنیا وچ کتھے کھڑا اے۔
’’شیبا حسن ‘‘نے کہیا کہ ساری دنیا اک پاسے تے میرا بھائی عمر شریف اک پاسے سی اینا پیار کرن والا انسان میں اپنی زندگی وچ کدی نہیں ویکھیا۔ دنیا کجھ وی کہندی سی پر اوہ کہیا کردے سن کہ شیبا میری بھین اے۔ میں ایس دے نال غداری نہیں کر سکدا۔ ایہناں نوں بوہت سارے لوکاں نے کہیا کہ شیبا نوں فلاں ڈرامے وچ نہ لو ئو فلاں وچ نہ لوئو پر اوہناں نے کسے دی نہ منی تے مینوں اپنے ڈرامیاں وچ کاسٹ کردے رہے۔ عمر شریف دے تے طنز و مزاح دا کوئی مقابلہ ای نہیں کر سکدا سی، اوہ اینا فی البدیہہ بولدے سن کہ بس لاجواب ای کر دیندے سن۔
’’حامد رانا‘‘ نے کہیا کہ عمر شریف ایشیا دے اک وڈے فنکار سن پاکستان دی پہچان سن ایہناں نوں ایہہ کمال سی کہ اوہ لوکاں نوں اک دو یا تن گھنٹے تیکر بنھ کے رکھدے سن تے سارا ٹائم لوک ہسدے ای رہندے سن۔ مینوں یاد اے کہ اسیں تماثیل وچ اکٹھے اک ڈرامہ کر رہے سی۔ ایس دوران میرا ایہناں نال اختلاف ہو گیا تے فیر اوہ چلے گئے جدوں اوہ لہور آئے تے اوہناں نے اپنا اک تھیٹر بنایا مینوں پتہ چلیا اوہ اپنے ڈرامے لئی کاسٹ کر رہے نیں مینوں لگیا کہ اوہ مینوں اپنے ڈرامے وچ نہیں رکھن گے پر اوہناں نے مینوں بلایا تے کہیا کہ تسیں میرا ڈرامہ کرو میں حامی بھر لئی تے بوہت متاثر ہویا کہ اوہناں نے دل وچ کوئی گل نہیں رکھی تے مینوں کم دتا۔ عمر شریف دے قہقہیاں اُتے انج دے فنکاراں نوں ہسدے ویکھیا جنہاں نوں دنیا ویکھن لئی بےتاب رہندی سی دبئی وچ عمر شریف نے اک ون مین شو کیتا جس دے ناظرین وچ امیتابھ بچن وی سن اوہ عمر شریف دیاں گلاں اُتے ہسدے رہے تے لوٹ پوٹ ہوندے رہے۔ عمر شریف اک ای سی اوہناں جہیا نہ کوئی اے نہ ہوئے گا اللہ اوہناں دے درجات بلند کرے۔ آمین
ایہہ کجھ ہفتے پہلے دی گل اے جدوں سوشل میڈیا تے اخبارات وچ لیجنڈری کامیڈین عمر شریف دی تصویر وکھائی دتی جس وچ اوہ ویل چیئر اُتے بیٹھے سن شیو ودھی ہوئی سی۔ ایس نوں ویکھ کے میرے سنے ایہناں دے چاہن والیاں نوں وی یقین نہ آیا کہ ایہہ دوجیاں نوں ہنسان والے دی تصویر سی۔ تے فیر ایس دی بیماری دی خبر نے سب نوں رنجیدہ کر دتا سی۔
عمر شریف پاکستان دے صف اول دے تھیٹر، سٹیج فلم تے ٹی وی دے مزاحیہ اداکار سن۔ عمر شریف 19 اپریل 1955 نوں پیدا ہوئے سن۔ ایہناں دا اصل ناں محمد عمر سی۔ پر شوبز وچ آن دے بعد اوہناں نے اپنا ناں عمر شریف رکھ لیا سی۔ اوہناں نے کیریئر دا آغاز 1974ء وچ 14 سال دی عمر وچ سٹیج اداکاری توں کیتا سی۔ 1980ء وچ پہلی وار عمر شریف نے آڈیو کیسٹ نال اپنے ڈرامے ریلیز کیتے سن اوہ کجھ دن پہلے دو اکتوبر نوں جرمنی دے اک ہسپتال وچ انتقال کر گئے۔ ایہناں نوں بغرض علاج امریکہ ایئر ایمبولینس وچ لے جایا جا رہیا سی پر زیادہ طبیعت خراب ہون اُتے جرمنی دے ہسپتال وچ لے جایا گیا پر اوہ ایس دنیا توں چلے گئے۔
اداکار مصنف تے ہدایت کار عمر شریف نے تن شادیاں کیتیاں سن ایہناں دی پہلی بیوی والدہ دا انتخاب سی، دوجی شادی سٹیج اداکارہ شکیلہ قریشی نال ہوئی جدوں اوہ لہور وچ فلماں تے سٹیج دے مصروف ترین اداکار سمجھے جاندے سن جد کہ تیجی شادی اوہناں نے زرین غزل نال کیتی۔ بیرون ملک علاج لئی ایہناں دی اہلیہ زرین ای ایہناں دے نال سن۔ عمر شریف نوں جتھے والدہ دی موت دا غم سی اوتھے اوہ اپنے بھرا عثمان برنی جیہڑے سینئر صحافی سن ایہناں دی وفات اُتے دکھی سن جنہاں نوں ہسپتال جاندے ہوئے عمر شریف دے ہتھاں وچ دم توڑیا سی جد کہ صاحبزادی حرا دی وفات تے ایہناں دی زندگی وچ سب توں وڈا صدمہ ثابت ہوئی۔ دھی دی وفات دے دناں وچ اوہ بیرون ملک سن جس دی وفات دے ذکر اُتے اوہ اکثر آبدیدہ ہو جاندے سن۔
لیجنڈ کامیڈین عمر شریف جب شدید بیمار سن ایہناں دی اہلیہ تے پتر نے حکومت نال عمر شریف دے امریکہ وچ علاج کروان دی اپیل وی کیتی سی عمر شریف دی فیملی دا کہنا سی کہ جے ایہناں نوں علاج لئی امریکہ نہیں گھلیا جاندا تے ایہناں دی اوپن ہارٹ سرجری ایتھے کرنی پیندی جیہڑی ایہناں لئی خطرناک ای سمجھی جا رہی سی۔ سندھ حکومت نے معروف اداکار عمر شریف دے علاج لئی رقم جاری کر دتی سی۔ محکمہ خزانہ سندھ نے چار کروڑ روپئے عمر شریف دے علاج معالجے لئی جاری کرن دا نوٹیفکیشن جاری کر دتا سی تے مالی امداد دے نال نال لیجنڈری اداکار عمر شریف لئی ایئر ایمبولینس دا بندوبست وی کر دتا گیا سی۔ ایہناں انتظامات دی نگرانی وزیراعلیٰ سندھ سید مراد علی شاہ کر رہے سن۔ ایسے دوران عمر شریف دی طبیعت کئی وار خراب ہوئی، ایئر ایمبولینس دے آن وچ وی تاخیر ہوندی رہی۔ ایس دے باوجود آخر کار ایہناں نوں فیملی ارکان دے نال امریکہ توں ویزے وی جاری کر دتے گئے تے انج دو دن پہلاں ایہناں نوں علاج لئی کراچی توں روانہ کیتا گیا سی پر رستے ای وچ ایہناں دی طبیعت زیادہ خراب ہون اُتے جرمنی وچ ایئر ایمبولینس اتار کے عمر شریف نوں ہسپتال منتقل کر دتا گیا سی بدقسمتی نال ایس وار امریکہ تیکر اپڑنا ایہناں دی تقدیر وچ نہیں سی تے انج سب دے چہریاں نوں مسکراہٹاں دین والا فنکار ایس دنیا توں رخصت ہو گیا۔
عمر شریف دی بنیادی وجہ شہرت مزاجیہ سٹیج ڈرامے رہے۔ خاص طور تے ایہناں دا سٹیج ڈرامہ ’’بکرا قسطوں پر ‘‘نوں زبردست شہرت ملی سی جس دے بعد ایس ڈرامے دی ویڈیو نوں وی بڑی مقبولیت ملی سی۔ ایس ڈرامے نوں بھارت وچ وی بوہت پسند کیتا سی۔ ایس ڈرامے دی مقبولیت دے بعد عمر شریف نے لہور وچ پیر رکھیا تے اک فلم ’’ مسٹر چارسو بیس ‘‘ بنائی جس وچ مرکزی کردار وی بخوبی نبھایا بلکہ ایس فلم نوں وی زبردست کامیابی ملی تے ایہناں اُتے لہور وچ کئی فلماں وچ کم کرن دا بھرپور موقع ملیا۔ عمر شریف نے اپنی ذاتی پروڈکشن دے تحت مسٹر چارلی بنائی جس وچ مرکزی کردار اوہناں نے ای ادا کیتا سی جد کہ اپنی تیجی فلم ’’مس فتنہ ‘‘دا کردار وی ایس خوبصورتی نال کیتا کہ شائقین ای نہیں ناقدین نے وی عمر شریف دے کم نوں سراہیا سی اوہناں نے ہدایت کار پرویز کلیم دی فلم ’’بت شکن ‘‘جس وچ مرکزی کردار اداکار یوسف خان نے کیتا سی ایس وچ عمر شریف نے اک سکھ دا کردار ادا کیتا۔ ہدایت کار ظہور گیلانی دی فلم ’’پیداگیر ، تے ہدائت کار الطاف حسین دیفلم ’’بگڑے رئیس‘‘ وچ وی عمر شریف نے چنگی پرفارمنس دا مظاہرہ کیتا سی، ایہناں نوں منفرد مزاحیہ اداکاری اُتے کئی وار نگار ایوارڈ تے گریجوائٹ ایوارڈ وی ملے سن۔ ایسے دوران اوہناں نے فیروز پور روڈ اچھرہ دے نیڑے شمع سینما نوں ایس دے مالک نال معاہدہ کر کے ایس سینما نوں تھیٹر دی شکل دین دا فیصلہ کیتا۔ ایس کم وچ اوہ دن رات لگے رہے تے انج ایس سینما نوں لہور تھیٹر دے ناں توں کافی تبدیلیاں دے بعد جدوں مکمل کیتا گیا تے ایس دا افتتاح عمر شریف دی والدہ نے کیتا سی۔ ایس طرح عمر شریف لہور دی فلمی دنیا وچ وی مصروف رہے تے شام دے بعد تھیٹر وچ مصروف ہو جاندے سن۔ عمر شریف دی انتقال دی خبر نے شوبز دی دنیا نوں اداس نہیں کیتا بلکہ عمر دے پرستار وی دکھی نیں کیوں جے اپنی ساری زندگی دوجیاں نوں ہسانا آسان کم نہیں ہوندا۔ اوہناں نے اپنی زندگی وچ چیریٹی دے حوالے نال وی بوہت کم کیتا خاص طور تے وزیراعظم پاکستان عمران خان دے کینسر ہسپتال لئی فنڈ ریزنگ مہم وچ استاد نصرت فتح علی خان تے دلدار پرویز بھٹی دے نال عمر شریف وی پیش پیش سن۔
عمر شریف نے پاکستان وچ مختلف ٹی وی چینلاں اُتے وی شوز کیتے تے انج دا ای اک شو ’عمر شریف ورسز عمر شریف‘ وچ اوہ چار سو توں ودھ روپاں وچ نظر آئے جیہڑا کہ اک ریکارڈ اے ایس شو لئی عمر شریف دے نال کم کرن والے میک اپ آرٹسٹ عمران نواب دا کہنا اے کہ میں تے میرے والد نواب علی نے عمر شریف صاحب نوں 400 توں ودھ گیٹ اپ دتے تے اوہناں نےاینے ای کردار تے لب و لہجے اختیار کیتے۔ عمر شریف ورسز عمر شریف وچ اوہ 400 توں ودھ بہروپاں وچ نظر آئے جیہڑا کہ اک ریکارڈ اے۔ ایہناں فنکاراں دے مطابق عمر شریف دا مشاہدہ زبردست سی۔ ایہناں دے ہمعصر فنکار وی ایہناں دی خداداد صلاحیتاں دے معترف نیں تے سمجھدے نیں کہ ایس جہے فنکار دا خلا جلدی پورا ہونا ممکن نہیں۔ انج دے فنکار گھٹ ای دنیا وچ آندے نیں۔
