عمران خان عالمی رہنماواں وچ سب توں اگے

مظہر برلاس

بھارتی الزاماں دا ٹھوکواں جواب دین والی صائمہ سلیم ایس لئی وی اہم نظر آئی کہ ایہ خاتون اکھاں توں محروم اے۔ جنیوا دے پاکستانی مشن وچ سیکنڈ سیکرٹری دے طور تے کم کرن والی باہمت صائمہ سلیم نے ساریاں نوں حیران کر دتا۔ اللہ نے ایہدے پورے خاندان نوں ہمت نال نوازیا اے۔ صائمہ سلیم دے نابینا بھائی یوسف سلیم بطور جج خدمات نبھا رہے نیں اوہناں دی اک نابینا بھین لہور یونیورسٹی وچ بطور استاد کم کر رہی اے۔ قصر مختصر‘ کسے ترقی پذیر ملک توں اک باہمت خاتون دی سفارت کاری حیران کن وی اے تے کمال وی۔ جس دیس دی ایہ خاتون نیں اوہدے سربراہ عمران خان نے وی دنیا نوں حیران کر رکھیا اے۔ مسلسل تریجا ورھا اوہ اقوام متحدہ دی جنرل اسمبلی نال خطاب کر ن والے عالمی رہنماواں وچ سب توں اگے نیں۔ ایس ورھے وی عمران خان دی تقریر نوں ای اقوام متحدہ دی جنرل اسمبلی وچ کیتی جان والیاں تقریراں وچ اول قرار دتا جا رہیا اے اوہناں دی تقریر دے وکھووکھ پہلوئواں تے دنیا بھر وچ بحث ہو رہی اے۔
عمران خان ایس ویلے نہ صرف مسلم دنیا دے مقبول ترین لیڈر نیں سگوں پورا تھرڈ ورلڈ اوہناں تے مان کر رہیا اے دنیا بھر دے مظلوما ںدے مقدمیاں دے ایس ویلے سب توںوڈے وکیل عمران خان نیں مظلوماں دی وکالت پاروں اوہ دنیا وچ سب توں ودھ مقبول ہوئے نیں۔ اوہناں نے مظلوماں دیاں دعاواں وی لئیاں نیں‘ مغربی دنیا وچ وی‘ جہڑے لوک سچی گل کردے نیں‘ عمران خان دے موقف دی تائید کر رہے نیں۔ ایہدی وڈی وجہ ایہہ وے کہ عمران خان دنیا نوں درپیش مسئلیاں دی ٹھیک نشاندہی کر رہے نیں بھاویں اوہناں نوں اپنے ملک وچ مافیا توں علاوہ مہنگائی ورگے جن دا وی سامنا اے پر اوہ فیر وی دنیا لئی اہم ترین رہنما بن چکے نیں۔ اقوام متحدہ دے مطابق موجودہ سیشن وچ کئی عالمی رہنماواں نے خطاب کیتا پر جس رہنما دا خطاب سب توں ودھ ویکھیا تے سنیا گیا اوہدا ناں عمران خان اے۔ سوا ارب آبادی دے حامل ملک انڈیا دے وزیراعظم دوجے نمبر تے نیں حالاں کہ بھارت دی آبادی آئی ٹی نال جڑی ہوئی اے۔ امریکی صدر تریجے‘ چینی صدر چوتھے‘ برطانوی وزیراعظم پنجویں تے ایرانی سربراہ چھیویں نمبر تے نیں۔
پاکستان دے وزیراعظم عمران خان دنیا نوں درپیش چیلنجاں دا کناںپتہ اے ایس حقیقت دا اعتراف برطانوی وزیراعظم نے اپنی تقریر وچ کیتا۔ عمران خان دے خطاب توں اک دن پہلاں برطانیہ دے وزیراعظم بورس جانسن نے اقوام متحدہ دی جنرل اسمبلی نال خطاب کیتا۔ اوہناں اپنی تقریر وچ عمران خان نوں خراج تحسین پیش کردے ہوئے دنیا نوں آکھیا کہ اوہ ماحولیات بارے عمران خان توں رہنمائی حاصل کرے۔ عمران خان نے اپنے ملک وچ دس ارب رُکھ لان دے منصوبے دا آغاز کرکے پوری دنیا نوں دسیا اے کہ کس طرح ماحول نوں بہتر بنایا جا سکدا اے۔ دنیا دیاں نگاہواں عمران خان تے لگیاں ہوئیاں سن کہ طاقتور حکمراناں نوں اکھاں وکھان والا حکمران آخر کیہ کہندا اے‘ دنیا نوں کس طرح لاجواب کردا اے؟ انج تے طاقتور ترین ملکاں وچ فیصلے کرن والے لوک عمران خان دے خیالات تو ںچنگی طرح جانو نیں کیوں جے اوہ اکثر مغربی اخبارات وچ مضمون لکھدے رہندے نیں غیرملکی میڈیا نوں سب توں ودھ انٹرویوز دین والے واحد پاکستانی وزیراعظم نو ںدنیا سنن دی منتظر رہندی اے۔ انتظار کرن والیاں وچ دوست تے دشمن دوویں ای شامل نیں ایسے لئی دنیا نوں شدت نال انتظار سی کہ عمران خان ایس واری اقوام متحدہ دی جنرل اسمبلی وچ جنہوں ہدف تنقید بناندا اے کنہوں راہ وکھاندا اے تے کہدیاں اکھاں کھولدا اے؟ عام طور تے پاکستان دے وزرائے اعظم اجہے موقعے تے اپنا قومی لباس نہیں پاندے سن۔ کوئی سوٹ وچ پھسیا ہوندا سی تے کسے نوں سوٹ پھسا لیندا سی عمران خان بڑا وکھرا نکلیا۔ سادہ جہی شلوار قمیض وچ ملبوس ایہ بندہ دنیا دے معتبر تے مدبر ترین رہنما دے طور تے سامنے آیا۔ اوہنے کرونا ورگی وباء توں گل شروع کیتی تے فیر وکھووکھ حوالیاں نال دنیا دیاں اکھاں کھولن دی کوشش کیتی۔ اوہناں نے افغانستان وچ پیدا ہون والی اگلی صورتحال توں پوری دنیا نوں دسیا اوتھے پیدا ہون والے انسانی بحران بارے دسیا سارے ملکاں نوں کہیا کہ اوہ افغانستان وچ استحکام لئی اک ہو جان‘ خاص طور تے امریکہ تے چین تے زور دتا تے نال ای چتاونی وی دتی کہ جے دنیا افغانستان وچ استحکام نہ لیا سکی تے فیر توں افغانستان دہشت گرداں دی آماجگاہ بن جاوے گا۔
وزیراعظم عمران خان نے دہشت گردی دے خلاف جنگ وچ ہون والے پاکستان دے جانی تے مالی نقصان دا تذکرہ کیتا تے افغانستان دی وجہ نال پاکستان دے ورھیاں توں متاثر ہون دی گل چھیڑی۔ ایس حوالے نال اوہناں نے امریکہ دے دوہرے کردار نوں اجاگر کیتا۔ نال ای 480 ڈرون حملیاں دا تذکرہ وی کر دتا۔ اوہناں نے کھل کے کہیا کہ ساڈے زیادہ نقصان اٹھان دی واحد وجہ ایہہ سی کہ اسیں امریکی اتحادی سی۔ عمران خان نے اپنے چوی منٹ دے خطاب وچ ست منٹ بھارت نوں چنگا لتاڑیا۔ اوہناں نے مقبوضہ کشمیر دی صورتحال تے ہندوستان وچ اقلیتاں دے حال بارے دنیا نوں دسیا۔ سید علی گیلانی دی میت دے نال ہون والے سلوک دا خاص طور تے ذکر کیتا۔ انسانی حقوق بارے دنیا دے دہرے نظام نوں آڑے ہتھیں لیا تے دنیا نوں دسیا کہ جے بھارت ساڈے نال مذاکرات چاہندا اے تے ایہ شرطاں پوریاں کرکے آئے۔ عمران خان نے اسلاموفوبیا وچ وادھے نوں روکن لئی عالمی مکالمے دی لوڑ تے زور دتا۔ غریب ملکاں وچ ہون والی لٹ مار‘ ایہدے نال ہون والے نقصان تے ترقی یافتہ ملکاں نوں اجہی دولت رکھن دے نقصان بارے دسیا۔ اوہناں نے موسمیاتی تبدیلیاں تے وی گل کیتی۔ جس طرح عمران خان نے دنیا دے ضمیر نوں جگان دی کوشش کیتی ایہدے تے مینوں طاہرحنفی دا شعر یاد آ رہیا اے کہ:
افلاک سے کوئی تو صدا دے کے پوچھتا
کیسی گزر رہی ہے سنا، یرغمالِ خاک