تحریکِ آزادی دے مردِ مجاہد دی یاد وچ ……

صوفی غلام محمد بٹ ؒ دی 25 ویں برسی دے موقعے اُتے ہون والے سیمینار دا احوال

رپورٹ:محمد ارشاد

ایس حقیقت توں کسے طور اُتے انکار ممکن نہیں کہ تحریک پاکستان دے اِنج دے بوہت سارے فراموش کردہ ہیرو نیں جنہاں نوں اوہ پذیرائی و مقبولیت حاصل نہیں ہوئی جیہڑی تحریک پاکستان دے دیگر اکابرین نے حاصل کیتی۔ احمد نگر تحصیل وزیر آباد دا اک نواحی قصبہ اے جس دی شہرت ایس لئی وی اے کہ ایہہ ملک دے معروف ترین چٹھہ خانوادے دا مرکز اے جیہڑا ہمیشہ اقتدار دے ایواناں وچ رہیا اے۔ ایہہ خاندان سیاسی جدوجہد توں دور پر سیاسی بساط اُتے ایس خاندان نوں چیلنج کرن والی شخصیات دی تعداد آٹے وچ لون دے برابر وی نہیں۔ ایس دی اک وجہ ایہہ وے کہ وطن عزیز وچ سیاست اشرافیہ تیکر محدود ہو چکی اے جنہوں چیلنج کرنا عام بندے لئی کسے طور اُتے ایس لئی ممکن نہیں کہ اوہ ریاستی مشینری دی حمایت توں محروم ہوندا اے۔

احمد نگر اک تابناک ماضی رکھدا اے تے ایہہ تقسیم توں پہلاں تے بعد وچ وی سیاسی سرگرمیاں دا مرکز رہیا اے۔ صوفی حکیم غلام محمد بٹؒ دا شمار ضلع گوجرانوالہ دی اوہناں شخصیات وچ کیتا جاندا اے جنہاں نے ہمیشہ غریب تے پِسے ہوئے طبقات لئی اواز بلند کیتی۔ جذبہ جوان ہوئے تے منزلاں آپ چل کے نیڑے آ جاندیاں نیں۔ صوفی حکیم غلا م محمد بٹؒ تحریک پاکستان دے دناں وچ نوجوان سن پر غیر معمولی سیاسی شعور رکھدے سن جس دی گواہی تقریباََ پون صدی لنگھ جان دے باوجود ہن وی احمد نگر تحصیل وزیر آباد دے باسی دیندے نیں حتیٰ کہ اوہ لوک وی ایہناں وچ شامل نیں جنہاں دی ایہناں نال ذاتی شناسائی وی نہیں سی اوہ وی ایہناں دی ایس بے مثل جدوجہد نوں یاد کردے نیں۔
تحریک پاکستان کامیاب ہوئی تے صوفی حکیم غلام محمد بٹؒ نے کل وقتی سیاست کرن دے بجائے سماج سدھار دی سرگرمیاں وچ ودھ چڑھ کے حصہ لیا۔ اوہ حکمت دے پیشے نال جڑے ہوئے تے کجھ ای ورھیاں وچ مشرقی طب وچ ایہناں دی مہارت دا شہرہ چاراں پاسے پھیل چکیا سی اوہناں نے ایہناں سارے پیشہ وارانہ مصروفیات دے باوجود عوام دی خدمت نوں اپنی زندگی دا مشن بنائے رکھیا۔
صوفی حکیم غلام محمد بٹؒ دی زندگی وچ اوس ویلے فیصلہ کن موڑ آیا جدوں تحریک پاکستان وچ سرگرم کردار ادا کیتے جان والے ہون والی ایہناں دی تربیت پاروں اوہناں نے احمد نگر دے سیاسی آقاواں تے مافیاز نوں للکارن دا فیصلہ کیتا تے سابق سپیکر قومی اسمبلی حامد ناصر چٹھہ دے والد صلاح الدین چٹھہ دے خلاف عام انتخابات وچ کھڑے ہو گئے ایہہ اک انج دا فیصلہ سی جیہڑا اک جرات مند تے باہمت انسان ای کر سکدا اے۔ اوہ ایہناں انتخابات وچ اگرچے شکست نال دوچار ہوئے پر اوہناں نے احمد نگر دے محکوم تے پسے ہوئے عوام نوں سیاسی شعور تے زبان دین وچ اہم کردار ادا کیتا۔
سیاست تے حکمت صوفی حکیم غلام محمد بٹؒ دی شخصیت دا اک پہلو اے اوہ اک درویش منش انسان سن تے تصوف وچ غیر معمولی لگائو رکھدے سن۔ اوہ ہمہ وقت عشق رسول ﷺ وچ سرمست رہیا کردے پر ریاکاری توں ہمیشہ دور رہے۔

اوہناں نے اپنا ورثہ ، اپنی ذات دا محدود نہیں رکھیا بلکہ اپنے اکلوتے تے ہونہار صاحب زادے مدثر اقبال بٹ نوں منتقل کیتا جیہڑا صحافت ای نہیں بلکہ پنجابی ادب ، ثقافت بلکہ سیاست دا وی اک معتبر حوالہ نیں تے پنجاب دی تقسیم دے خلاف سب توں زور آور اواز وی ایہناں دی ای ہے۔
صوفی حکیم غلام محمد بٹؒ دی ایس ہفتے منگل دے دیہاڑ 25 ویں برسی منائی گئی جس وچ سیاسی، ادبی، صحافتی تے کاروباری شعبیاں دی نمایاں شخصیات نے شرکت کیتی تے ایہناں دی تحریک پاکستان تے بعد وچ وی سیاسی خدمات تے جدوجہد نوں سراہیا۔ ایس تقریب دا انعقاد پنجابی پرچار نامی تنظیم نے کیتا جیہڑی پنجاب دے حقوق دی اواز بلند کر ن دے حوالے نال اک معتبر حوالہ بن چکی اے۔
مصطفی ٹائون لہور دے پنجاب ہائوس وچ منعقد ہون والی ایس تقریب وچ مقررین نے شاندار الفاظ وچ صوفی حکیم غلام محمد بٹؒ دی خدمات نوں سراہیا تے کہیاصوفی حکیم غلام محمد بٹؒ تحریک پاکستان دے سرگرم کارکن تے احمد نگر دے سیاسی آقاواں نوں للکارن والے مجاہد ای نہیں سن بلکہ اوہ اپنی ذات وچ اک تحریک سن جیہڑے مدثر اقبال بٹ دی صورت وچ اج وی زندہ اے تے اپنی منزل ول رواں دواں اے تے مجبوراں تے مظلوماں دی اواز بن چکی اے۔ پنجابی میڈیا گروپ دے سربراہ مدثر اقبال بٹ وچ ایہناں دے والد دا عکس تے تربیت واضح طور تے وکھائی دیندی اے۔ تقریب دی صدارت حفیظ تائب فائونڈیشن دے صدر تے اوہناں دے بھرا عبدالمجید منہاس نے کیتی جد کہ ڈاکٹر طارق پیرزادہ، علی اصغر عباس تے طارق جتالہ مہمانانِ خصوصی وچ  شامل سن۔
پنجابی میڈیا گروپ دے صدر محمد ندیم رضا، روزنامہ پوسٹ مارٹم گوجرانوالہ دے ایڈیٹر ذبیح اللہ بلگن، محمدصابر ورک ،محمدعظیم ،زین علی سلطانی ،سید الطاف حسین زیدی ،محمد وقار عظیم چشتی ، محمد ندیم اقبال باہو ،محمد وسیم منیر خان ،ساجد علی عثمان باجوہ ، اطہر نوید کوثرتے عنایت عابد سنے حاضرین دی اک وڈی تعداد نے شرکت کیتی۔
تقریب دی میزبان پنجابی پرچار دے صدر احمد رضا وٹو تے بلال مدثر بٹ سن جنہاں نے مہماناں نوں خوش آمدید کہیا۔ حافظ ممتاز ملک تے ڈاکٹر سعید الحسن نظامی نے سٹیج سیکرٹری دے فرائض انجام دتے تے کیہ خوب دتے کہ حاضرین دے دل موہ لئے۔

تقریب دا آغاز تلاوت کلام پاک تے نعت خوانی نال کیتا گیا نعت خواناں نے رسول پاک ﷺ دی شان شاعرانہ آہنگ وچ بیان کر کے انج دا روحانی سماں بنھ دتا کہ سنن والے داد دتے بغیر نہ رہ سکے۔ عبدالمجید منہاس نے تقریب نال اپنے صدارتی خطاب وچ کہیا، مدثر اقبال بٹ نے جیہڑی وی کامیابیاں حاصل کیتیاں نیں اوہ ایہناں دے والد دی دعاواں تے تربیت دا نتیجہ اے اوہناں نے اج تیکر اپنے والد دے مشن نوں زندہ رکھیا ہویا اے جنہاں دے عشق رسول ﷺ تے خدائے تبارک تعالیٰ اُتے یقین دی کوئی حد نہیں۔
پنجابی میڈیا گروپ دے صدر تے سینئر صحافی محمد ندیم رضا نے کہیا کہ صوفی حکیم غلام محمد بٹؒ نال ساڈی واقفیت مدثر اقبال بٹ دے توسط نال اے۔ مدثر اقبال بٹ دی شخصیت وچ موجود درگزر کرن تے بے لوث محبت دا جذبہ ایس گل دی گواہی دیندا اے کہ ایہہ خوبیاں ایہناں نوں وراثت وچ ملی اے ایہناں دے والد وچ وی یقینا ایہو خوبیاں ہون گیاں جیہڑی ایہناں توں ایہناں نوں ملیاں نیں۔
ایہناں دے والد دا ظالماں دے روبروڈٹ جان دا ثبوت سانوں مدثر اقبال بٹ دی صحافت نال وی ملدا اے جنہاں دی شخصیت وچ ڈر تے خوف دا شائبہ تیکر نہیں جنہاں نے اپنی ایہہ خصوصیات ہن اپنے ہونہار صاحب زادے بلال بٹ وچ منتقل کر دتی اے دعا اے کہ اوہ وی ایس ورثے دی حفاظت اپنے والد وانگوں ای کرن۔
روزنامہ پوسٹ مارٹم گوجرانوالہ دے ایڈیٹر ذبیح اللہ بلگن نے کہیا کہ حکیم غلام محمد بٹؒ نے اپنے ناں دے نال صوفی دا وادھا اوس دور وچ کیتا جدوں لوک انج دے وادھے نوں پرکھے بغیر قبول نہیں کردے سن۔ صوفی حکیم غلام محمدؒ اک حقیقی صوفی سن۔ ایہناں دے ظاہر تے باطن وچ کوئی تضاد نہیں سی۔ ایس لئی لوکاں نے ایس وادھے نوں بغیر کسے تر دو دے قبول کر لیا۔
طارق پیرزادہ نے کہیا کہ والدین دی یاد تازہ کرنا خوشی دی گل اے تے مدثر اقبال بٹ اپنے والد دے ناں نوں زندہ رکھے ہوئے نیں جیہڑا تاریخ وچ تا ابد زندہ رہے گا۔ پنجاب ہائوس دے سارے ذمہ داران ایس ر وحانی محفل دے انعقاد اُتے مبارکباد دے مستحق نیں۔
طارق جٹالہ نے کہیا کہ مدثر اقبال بٹ نوں ویکھ کے صوفی حکیم غلام محمد بٹؒ دے بارے وچ جیہڑا تصور ابھردا اے اوہ اک حقیقی صوفی تے عظیم انسان دا اے ایہناں دی شخصیت دا عکس ایہناں دے ہونہار سپوت مدثر اقبال بٹ وچ واضح وکھائی دیندا اے۔
علی اصغر عباس نے کہیا کہ اسیں ایس دور توں لنگے رہے آں کہ ہجے قبر دی مٹی گِلی ہوندی اے تے اولاد اپنے والدین نوں بھُل جاندی اے پر مدثر اقبال بٹ نے ربع صدی توں اپنے والد دی یاداں نوں زندہ رکھیا ہویا اے۔

اسٹیج سیکرٹری ڈاکٹر سعید الحسن نظامی نے وقفے وقفے نال اپنی گل بات دے وچکار تحریک پاکستان دے کارکن تے پنجابی میڈیا گروپ دے چیئر مین مدثر اقبال بٹ دے والد صوفی حکیم غلام محمد بٹؒ دی زیست دے مختلف پہلوئواں اُتے روشنی پاندے ہوئے کہیا ، اوہ اک نڈر لیڈر سن۔ احمد نگر وچ اوہناں نے چٹھیاں نوں اوس ویلے للکاریا جدوں ایہناں دے اگے کوئی کھڑا ہون دی جرات نہیں کر سکدا سی اوہ مظلوم تے پسے ہوئے لوکاں دی اواز بنے۔ اوہ جدوں اپنے مطب وچ موجود ہوندے تے غریب تے بے بس مریضاں دا بلامعاوضہ علاج کردے۔ اوہ انتہائی مہربان تے محبت کرن والے اک شفیق انسان سن۔ عشق رسول ﷺ ایہناں دی شخصیت دا خاصا سی ۔ ایہناں خوبیاں دی جھلک ای مدثر اقبال بٹ وچ وی نظر آندی اے۔ دعا اے کہ ایہناں دے صاحبز ادے بلال مدثر اقبال بٹ اپنے والد وانگوں ایہناں خوبیاں دی حفاظت کرن تے ایہناں دا عکس بنن۔
تقریب دے اختتام اُتے تحریک پاکستان دے کارکن صوفی حکیم غلام محمد بٹؒ دے ایصال ثواب تے ایہناں دے بلندی درجات لئی دعا کیتی گئی تے مہماناں دی کھانے نال تواضع کیتی گئی۔
پنجابی میڈیا گروپ دے چیئر مین مدثر اقبال بٹ اپنے والد دے ذکر اُتے کئی وار آبدیدہ ہو گئے جد کہ فوک گلوکار ندیم اقبال باہو نے جدوں عارفانہ کلام سنایا تے ہال وچ خاموشی چھا گئی تے پنجابی میڈیا گروپ دے چیئر مین مدثر اقبال بٹ دیاں اکھاں توں اتھرو وگ پئے تے اوہناں نے دل کھول کے فرزندِ اقبال باہو نوں داد دتی۔