آئی ایس آئی نوں سلام پر احتیاط ضروری

متلوب ورائچ

انڈین چینل تے ڈینئل دا انٹرویو نشر ہویا جہدے وچ اوہنے پاکستان وچ تن ورھے جسوسی کرن بارے دسیا۔ اوہ اپنی شکل تے لہجے توں مزدور تے غریب لگدا اے اوہدے مطابق ’’را‘‘ نے پیسے کمان لئی پاکستان وچ دھماکے کرن نوں کہیا تے اوہ تیار ہو گیا۔ 1990ء وچ پاکستان آیا‘ 93ء تک ایتھے رہیا۔ ایس دوران دس واری واپس گیا تے نال کسے اجہے اک بندے نوں وی ہر واری لے گیا جو بھارتی جسوس ایجنسی دے کم آ سکے۔ 93ء وچ اوہ پھڑیا گیا۔ اوہدے خلاف کیس چلیا چار ورھے سزا ہوئی تے اوہ واپس ٹر گیا۔ ڈینئل نے نشر ہون والے انٹرویو وچ کہیا کہ بھارت ای جسوس پاکستان گھلدا اے۔ پاکستان توں جسوس بھارت نہیں آئوندے۔ میں قوم لئی ایناں خطرہ مول لیا پر مینوں ’’را‘‘ نے لاوارث چھڈ دتا۔ واپسی تے صرف 15 ہزار روپیے دتے گئے اوہدے انٹرویو توں ’’را‘‘ خلاف نفرت جھلک رہی سی۔ ساڈیاں اطلاعواں موجب ایس انٹرویو دے نشر ہون دے بعدآپ ڈینئل نظر آیا نہ اوہ اینکر جنہے انٹرویو کیتا سی۔ کجھ دیہاڑیاں توں ڈینئل دا رکشا اوہدے گھر دے باہر کھلوتا اے جو اوہدے روزگار دا اک ذریعہ اے جد کہ اوہدے روزگار دا دوجا ذریعہ ڈینئل دے بقول اوہدی بیوی لوکاں دے گھراں وچ بھانڈے مانجدی اے۔
دوستو! کجھ ورھے پہلاں بھارت دے بڑے معروف اداکار اوم پوری نے بھارتی فوج تے تنقید کیتی سی۔ اک ہفتے وچ اوم پوری دی اوہناں دے گھروں مسخ شدہ چہرے والی لاش ملی سی۔ بھارتی فوج‘ اوہدی ایجنسیاں دے خلاف کوئی وی بندہ گل کرے تے اوہ اوہدا انج دا ای بھیانک انجام ہوندا اے۔ ساڈے ایتھے فوج تے ایجنسیاں دے خلاف باقاعدہ بیانیے بنائے جاندے نیں ۔ جسوساں دی گل چلی اے تے پاکستان وچ اک کشمیرسنگھ ناں دا وی جسوس پھڑیا گیا سی۔ اوہنوں سزائے موت سنائی گئی پر اوہدے تے عمل نہیں ہویا۔ نہ صرف عمل نہیں ہویا سگوں اوہنوں بڑے پروٹوکول وچ بھارت دے حوالے کر دتا گیا۔ قید دوران کشمیر سنگھ نے اسلام قبول کر لیا سی۔ مشرف دور وچ نگران حکومت بنی‘ اوہدے وچ انسانی حقوق دے اک وزیر انصار برنی وی سن۔ اوہنے کشمیر سنگھ دی واپسی دا پربندھ کیتا۔ اوہناں دیہاڑیاں پنجاب دا وزیراعلیٰ پرکاش سنگھ بادل سی۔ کہیا جاندا اے اوہنے اپنا اثرورسوخ استعمال کیتا سی۔ کہیا جاندا اے برنی نوں ایہناں خدمات دے بدلے پنجاہ کروڑ روپیے ملے سن۔ اک ہور جسوس وی پاکستان وچ سزائے موت دی قید کٹ رہیا سی سربجیت سنگھ اوہنوں وی بھارت دے حوالے کرن دی کوشش جاری سی پر سودا نہ ہو سکیا۔ اوہدی بھین دلبر کور دا کہنا سی کہ میں پنجاہ لکھ دے سکدی سی پرسربجیت سنگھ جیل وچ ساتھی قیدیاں دی لڑائی دوران ماریا گیا سی۔ پاکستان توں ساڈے اداریاں دے لوکاں دی لازوال قربانیاں توں دہشت گردی گھٹ ترین سطح تے آ گئی ایہدا مکمل خاتمہ ہونا چاہیدا سی۔ اج وی دہشت گردی دے واقعات ہو رہے نیں۔ ایہدے وچ تے شک والی گل ای نہیں کہ دہشت گردی جدوں عروج تے سی تے اج جدوں دم توڑ رہی اے ہمیشہ توں ایہدے پچھے بھارت رہیا اے۔ افغان سرزمین استعمال کیتی جاندی رہی۔ کجھ افغان مہاجرین بھارت لئی کم کردے نیں۔ دہشت گردی سہولت کاری دے بناں ہو ای نہیں سکدی۔ سہولت کار اوہ وی جو ڈینئل دے نال گئے تے تربیت لے کے آ گئے اوہناں وچ کئی دہشت گردی وچ وی ملوث ہون گے۔ کیہ اوہ صرف دس لوک ای پاکستان وچ سہولت کاری تے دہشت گردی کردے نیں۔ ڈینئل ورگے پتہ نہیں کنے لوک پاکستان آئے تے ایجنٹ تے ایجنٹ بناندے رہے۔ ساڈے ادارے یقینا خبردار تے ہشیار نیں تاں ای تے ڈینئل‘ کشمیر سنگھ‘ سربجیت سنگھ ورگے لوک پھڑے گئے۔ کلبھوشن دا پھڑیا جانا ساڈے اداریاں دا ناقابل فراموش کارنامہ اے۔ دہشت گردی دے مکمل خاتمے لئی پاکستان وچ کسے وی لیول تے پائے جان والے سہولت کاراں دا محاسبہ کرنا ہووے گا۔ ایہناں وچوں اوہ وڈے وڈے ناں وی نیں جو پاکستان خلاف زہر اگلدے رہندے نیں پر سیاسی بنیاداں تے اوہناں دے پاکستان خلاف کردار توں منہ پھیر لیا جاندا اے۔
دوستو! پاکستان دی قابل فخر خفیہ ایجنسیاں دنیا بھر وچ پاکستان دے دشمناں نوں ایکسپوز کرن وچ ماہر نیں۔ ایہو وجہ اے کہ لمے عرصے توں سوشل میڈیا دی سماجی ویب سائٹ تے پاکستان دی قابل فخرخفیہ ایجنسیاں نوں نمبرون منیا جا رہیا اے پر سوال ایہ پیدا ہوندا اے کہ ملک توں باہر دشمناں نوں پھڑن لئی ساڈیاں خفیہ ایجنسیاں مہارت رکھدیاں نیں پر ملک د ے اندر دوستاں دے روپ وچ ساڈے اپنے ای دشمن دے آلہ کار بن کے ساڈے حساس اداریاں قومی سلامتی دی کنڈ وچ چھرا ماردے نیں۔ ایہدے وچ کوئی شک نہیں کہ جے ساڈی قومی سلامتی دے ادارے اندرون ملک کجھ غداراں دی نشاندہی کردے نیں تے اوہدے تے حیرانی دا اظہار کرنا کوئی ضروری نہیں کیوں جے پیسے دا لالچ تے دوجی ترغیبات انسان نوں لالچ وچ مبتلا کرکے اوہدا ایمان کمزور کر دیندیاں نیں تے انسان آخر انسان اے۔ کیہ ساڈی تریخ وچ میرجعفر تے میرصادق تے انج دے ان گنت کرداراں نوں بھلایا جا سکدا اے؟ ایس لئی موجودہ دور دے مطابق جدید طریقیاں نال ملک دے اندر دشمناں دا خاتمہ وی اوناں ای ضروری اے جناں سرحد دے پار دشمناں دا خاتمہ کرنا ضروری اے۔٭٭