بورڈ وچ تبدیلی دی ہوا، وسیم خان دی وکٹ وی ڈگ گئی

نویں چیئر مین رمیز دے نال کئی معاملات نہ چلن دی بنیاد اُتے وسیم نے خدا حافظ کہہ دتا

جواد رانا

پاکستان کرکٹ بورڈ دے چیف ایگزیکٹو وسیم خان نے استعفیٰ دے دتا۔ جنہوں پی سی بی بورڈ آف گورنرز نے منظور کر لیا اے۔ وسیم خان اختیارات وچ کمی دے معاملے اُتے ناخوش سن۔ وسیم خان نے رمیز راجہ دے نال مزید معاملات نہ چلن دی بنیاد اُتے عہدے توں الگ ہون دا فیصلہ کیتا۔ پاکستان کرکٹ بورڈ دے بورڈ آف گورنرز دا اجلاس بذریعہ ویڈیو کانفرنس منعقد ہویا۔ اجلاس وچ چیف ایگزیکٹو دی حیثیت نال وسیم خان دے استعفیٰ نوں متفقہ طور اُتے منظور کر لیا گیا اے۔ وسیم خان نے ایہہ عہدہ یکم فروری 2019 نوں تن سال لئی سنبھالیا سی۔ چیئر مین پی سی بی رمیز راجہ دا کہنا اے کہ اپنے دور وچ وسیم خان نے پی سی بی وچ بہترین قیادت دا مظاہرہ کیتا خصوصاً کوویڈ 19 دی عالمی وبا دے دناں وچ اوہناں نے ایس عہدے اُتے رہندے ہوئے انج دے اہم فیصلے کیتے جس نال بین الاقوامی تے قومی دونویں سطح اُتے کرکٹ دی سرگرمیاں متاثر نہیں ہوئیاں۔ اوہناں نے کہیا کہ بہترین قیادت اُتے پی سی بی وسیم خان دا مشکور اے تے اوہ ایہناں دے کیریئر تے مستقبل لئی نیک خواہشات دا اظہار کردے نیں۔ وسیم خان دا کہنا اے کہ پاکستان کرکٹ بورڈ نال وابستگی اُتے ایہناں نوں فخر اے خاص طور تے سری لنکا کرکٹ ٹیم دی پاکستان آمد نال ملک وچ ٹیسٹ کرکٹ دی بحالی تے پچھلے دو ورھیاں توں ایچ بی ایل پاکستان سپر لیگ دے پاکستان وچ انعقاد اُتے اوہ بوہت مطمئن نیں۔ اوہناں نے کہیا کہ 2019 وچ جدوں اوہناں نے ایس عہدے دا چارج سنبھالیا تے اولین ذمہ داری پوری دنیا وچ پاکستان کرکٹ تے پاکستان کرکٹ بورڈ دا مثبت تشخص اجاگر کرنا سی۔ انج اسیں اک جامع تے منظم حکمت عملی دے تحت فیصلے کیتے جس نال بین الاقوامی سطح اُتے ساڈا امیج بہتر ہویا۔ پر امید آں کہ کوویڈ 19 دی عالمی وبا دے دوران چکے گئے اقدامات نال ملک وچ بین الاقوامی کرکٹ دے انعقاد اُتے مفید اثرات مرتب ہون گے۔ وسیم خان نے کہیا کہ ایہناں دا پنج سالہ حکمت عملی پیش کرنا، نویں ڈومیسٹک نظام نوں کامیابی نال تیجے سال وی منعقد کروانا تے خواتین کرکٹ وچ سرمایہ کاری کرن دے مثبت اثرات جلدی ساہمنے آن گے۔ میرے لئی اگے ودھن تے اپنی فیملی نال دوبارہ ملن دا ایہو بہترین ویلا اے اوہناں نے پاکستان کرکٹ دی ترقی لئی میرے خواباں دی تکمیل وچ بوہت قربانیاں دتیاں نیں تے ایہہ قربانیاں ہمیشہ میرے دل دے نیڑے رہن گیاں۔ اوہناں نے مزید کہیا کہ اوہ پی سی بی دے اسٹاف تے کمرشل پارٹنرز دے نال کم کرن اُتے بوہت خوش نیں۔ اوہ ایس موقعے اُتے سارے ملازمین پاکستان مینز تے ویمنز کرکٹرز تے پاکستان کرکٹ دے سارے فینز دے شکر گزار نیں۔ وسیم خان نے مزید کہیا کہ آخر وچ اوہ چیئر مین پی سی بی رمیز راجہ لئی نیک تمناواں دا اظہار کردے نیں۔ یقین اے کہ پاکستان کرکٹ ایہناں دی قیادت وچ ترقی کرے گی۔ پی سی بی چیئر مین رمیز راجا دے نال ملاقات وچ وسیم خان نے اپنا استعفیٰ پیش کیتا۔ نویں سربراہ بورڈ رمیز راجا ڈی آر ایس دے معاملے اُتے وسیم خان توں خوش نہیں سن، نیوزی لینڈ تے انگلینڈ دی ٹیم دے دورہ پاکستان توں انکار نے وسیم خان دے کیس نوں مزید کمزور کیتا۔ وسیم خان دے عہدے دی معیاد فروری وچ ختم ہو رہی سی۔ وسیم خان نوں ساڈھے 26 لکھ روپئے دے پرکشش پیکیج، فائیو اسٹار مراعات تے مکمل اختیارات دے نال لیاگیا گیا۔ غیر ملکی دوریاں وچ 600 ڈالرز تے انگلینڈ وچ 900 ڈالرز دا یومیہ الائونس ملدا سی۔ وسیم خان پاکستان دے اک بااثر کرکٹر دے دوست نیں۔ ایہناں لئی سب توں وڈا دھچکہ نیوزی لینڈ تے انگلینڈ دی ٹیماں دے پاکستان دے دورے دی منسوخی سی۔ وسیم خان نے فرسٹ کلاس کرکٹ وچ وارک شائر، سسیکس تے ڈربی شائر دی نمائندگی کیتی تے پنج سنچریاں تے 17 نصف سنچریاں وی بنائیاں۔ اوہ لیسٹر شائر کائونٹی دے چیف ایگزیکٹو وی رہے۔
ذرائع دے مطابق کرکٹ دے معاملات سابق کرکٹر نوں دین دی تجویز اے۔ انگلش بورڈ دی طرز اُتے ڈائریکٹر کرکٹ لیان دی تجویز زیر غور اے۔ پاکستان کرکٹ بورڈ دے بورڈ آف گورنرز نے چیف ایگزیکٹو دا استعفیٰ منظور کر لیا۔ ذرائع دا کہنا اے کہ وسیم خان اختیارات وچ کمی دے معاملے اُتے ناخوش سن۔ وسیم خان نے رمیز راجہ دے نال مزید معاملات نہ چلن دی بنیاد اُتے عہدے توں الگ ہون دا فیصلہ کیتا۔ ذرائع دا کہنا اے کہ پاکستان کرکٹ بورڈ وچ ڈائریکٹر کرکٹ دا عہدہ متعارف کروان دا پلان بنایا گیا اے۔ چیف ایگزیکٹو دی تھاں ہن ڈائریکٹر کرکٹ دا عہدہ متعارف کرایا جا سکدا اے تے قانونی پیچیدگیاں تے ایہناں دے حل دے بعد ڈائریکٹر کرکٹ دا عہدہ لیایا جائے گا۔ چیئر مین پی سی بی رمیز راجہ نویں پوسٹ لیان دے خواہشمند نیں جس دے بعد چیف ایگزیکٹو دے اختیارات چیئر مین دے کول ہون گے۔ چیئر مین دے کول چیف ایگزیکٹو دے اختیارات دا وی آئینی جائزہ لیا جا رہیا اے۔ چیف ایگزیکٹو وسیم خان نے وی اختیارات دی کمی پاروں مستعفی ہون دا فیصلہ کیتا۔ سابق پاکستانی کرکٹ عاقب جاوید تے معین خان پی سی بی وچ اعلیٰ عہدیاں دے دعویداراں وچ شامل نیں پچھلے مہینے نویں چیئر مین دی حیثیت نال اپنی پہلی پریس کانفرنس وچ رمیز راجہ نے اندرونی طور اُتے معاملات نوں ٹھیک کرن لئی بے رحمانہ انداز اپنان دی گل کیتی سی۔