پنڈورا لیکس نوں بس دفنانا باقی رہ گیا اے
ارشاد بھٹی
سوئس لیکس‘ دبئی لیکس‘ پاناما لیکس‘ 25 والیمز جعلی اکائونٹس منی لانڈرنگ گھپلے‘ 10 والیمز جعلی اکائونٹس منی لانڈرنگ دس نمبریاں‘ حدیبیہ‘ ایون فیلڈ‘ العزیزیہ فلیگ شپ ڈاکے‘ 56 کمپنی رولے‘ آشیانہ ٹھگیاں‘ ادویات سکینڈل‘ آٹا کنک ہیر پھیر‘ چینی کھانچے‘ پٹرول چوریاں‘ نجی بجلی گھر کرپشن‘ بی آر ٹی ہڑپشن‘ مالم جبہ چتر چالاکیاں‘ ایل این جی دیہاڑیاں تے ہن پنڈورا لیکس‘ اینی لیکس ہو چکیاں نیں کہ دھوتی بنیان وچ پاکستان لیکولیک‘ دھوتی بنیان وچ پاکستانی لیکولیک‘ پنج فیصد مگرمچھاں نے 95فیصد انسان نما جانوراں دیاں نک نال لکیراں کڈھوا دتیاں‘ کیہ سیاستدان‘ کیہ بیورو کریٹس‘ کیہ تاجر‘ کیہ میڈیا ٹائیکون‘ اکثریت جیرے بلیڈ‘ ہن تے پنڈورا لیکس وچ ریٹائر جرنیلاں دے ناں وی آ گئے۔ رہی سہی کسر پوری ہوئی‘ اک پاسے مگرمچھ اشرافیہ‘ دوجے پاسے عوام‘ چشم بددور‘ ایہ عوام وی کسے توں گھٹ نہیں ’’کھاتا ہے تو لگاتا بھی تو ہے‘‘ تے سر جھونن والے‘ میرے اثاثے ذرائع آمدن توں ودھ نیں تے تہانوں کیہ‘ تے تاڑیاں مارن والے نااہلاں‘ مجرماں‘ اشتہاریاں دے ووٹر‘ سپورٹر‘ چشم بددور‘ عوام دے وی کیا کہنے‘ بریانی دی اک پلیٹ دوالے بھنگڑے پان والے‘ چشم بددور‘ 50 ورھے پہلاں روٹی‘ کپڑا تے مکان لئی ذوالفقار بھٹو دے سامنے نچ رہے سن۔
50 ورھے بعد روٹی‘ کپڑے تے مکان دی امید تے بلاول بھٹو دے سامنے نچ رہے نیں چشم بددور‘ عوام دے وی کیہ کہنے‘ جھوٹ‘ منافقت‘ خوشامد‘ جی حضوری‘ جگاڑ دے بادشاہ‘ اُتے مگرمچھاں نوں ویکھو‘ تھلے مگرمچھاں دے منہ وچ بیٹھی نیند سُتی عوام تے نظر مارو‘ پیارے تے وچار پاکستان تے ترس آوے‘ چشم بددور‘ اج وی کئی پڑھے لکھے حریت پسند کدھرے نوازشریف نوں پھسایا گیا‘ اوہ اج وی رہبر‘ قائد‘ امام خمینی‘ پاکستان تے رحم کھائو‘ باز آ جائو‘ چشم بددور‘ اج اسلامی جمہوریہ پاکستان دا ایہ حال‘ پنج سالہ زینب وی غیرمحفوظ‘ قبر وچ کفن پائے لیٹی 14 سالہ لڑکی وی غیرمحفوظ‘ چشم بددور‘ جعلسازی ایسی لندن وچ بیٹھے نوازشریف نوں پاکستان توں کرونا دیاں 3 ڈوزاں لگ چکیاں‘ چشم بددور‘ ساڈی اوقات ایہہ‘ بائیڈن فون کردا نہیں‘ مودی فون سن دا نہیں‘ نیوزی لینڈ دی وزیراعظم گل من دی نہیں‘ ساڈی حیثیت ایہہ کہ پ اکستانی پاسپورٹ 113ویں نمبر تے اپڑ گیا۔
گل پنڈورا لیکس دی‘ رولا پیا‘ پر ایہ کجھ دیہاڑے دا رولا‘ جتھے زکوٰۃ تے صدقے کھا لئے جان‘ جتھے یتیماں‘ مسکیناں دا مال ہڑپ کر لیا جاوے‘ جتھے بھیناں دا حق مار لیا جاوے‘ جتھے کجھ مرلے زمین‘ کجھ لکھ روپیاں دی خاطر پُتر ماواں نوں کٹ رہے نیں‘ اوتھے پنڈورا لیکس چوں کیہ نکلنا‘ ایتھے حمودالرحمن کمیشن توں ایبٹ آباد کمیشن تک‘ ریکوڈک توں براڈشیٹ تک کجھ ہویا‘ ڈاکٹر عاصم دی ویڈیو آئی سی‘ پھاہے لگن توں پہلاں صولت مرزا دی ویڈیو آئی سی۔ ذوالفقار مرزا نے قرآن چک چک کے کجھ کہیا سی‘ مشتاق رئیسانی دی ویڈیو‘ عبدالمجید اچکزئی دی ویڈیو‘ عزیر بلوچ دی ویڈیو‘ یوسف رضا گیلانی دے لخت جگر دی ویڈیو‘ جج ارشد ملک دی ویڈیو‘ جسٹس (ر) جاویداقبال دی ویڈیو‘ کجھ ہویا‘ ایس لئی شانتی‘ پنڈورا لیکس تے وی کجھ نہیں ہووے گا۔
اخلاقیات دا قحط ایسا‘ دو نمبری ایسی کہ مریم نواز اپنے بندے دی ویڈیو تے کہوے ایہ اللہ تے بندے دا معاملہ‘ مخالفین دی ویڈیو تے پریس کانفرنس کرن‘ کدھرے ساریاں نوں مثال عبرت بنا دیو‘ کیپٹن صفدر تے پہنچے ہوئے بزرگ نکلے‘ بولے ’’غیراخلاقی ویڈیو توں نہ ڈرو‘ جرأت توں کم لوو‘ ہر اک دی غیراخلاقی ویڈیو ہوندی اے‘‘۔ واہ میرے جرأت مند‘ فیر سن لوو‘ پنڈورا لیکس کجھ دیہاڑیاں دی مہمان‘ کجھ نہیں ہونا‘ کجھ نہیں نکلنا‘ انج وی پنڈورا لیکس دے تابوت وچ میرے کپتان آخری کِل ٹھوک چکے نیں‘ پنڈورا لیکس تے وزیراعظم انسپکشن کمیشن دے جھنڈے تھلے کمیشن بنا دتا‘ نیب‘ ایف آئی اے‘ ایف بی آر دے نمائندے تحقیقات کرن گے۔ پنڈورا لیکس وچ آئے ست سو اقبال دے شاہیناں نوں چھڈو‘ صرف وفاقی وزیراں نوں لے لوو جہناں دیاں آف شور کمپنیاں نکلیاں‘ ذرا منظر ملاحظہ فرمائو‘ الزام وفاقی وزراء تے‘ کمیشن دے سربراہ وزیراعظم‘ تحقیقات کرن گے سرکاری ادارے‘ مطلب چور خود‘ تفتیش خود‘ جج خود‘ چشم بددور‘ ایہو عمران خان سن جو پاناما لیکس تے کسے تحقیق‘ تفتیش توں پہلاں بولے ’’نوازشریف استعفیٰ دیو‘ نوازشریف اسیں تہاڈے حکومتی کمیشن نوں نہیں مناں گے‘ نوازشریف جدوں اُتے تسیں وزیراعظم بن کے بیٹھو ہوو گے تے تھلے سرکاری ادارے کیہ خاک آزادانہ تفتیش کر سکن گے‘ نوازشریف سارے سرکاری ادارے تہاڈے قبضے وچ‘ ایہناں اداریاں دی تفتیش نوں اسیں نہیں من دے‘‘۔
ہن جدوں پنڈورا لیکس وچ اپنی کابینہ‘ وزیر دے ناں آئے تے امید سی کہ عمران خان پہلے ٹوئٹ‘ پہلے بیان وچ اپنے وزیراں نوں اودوں تک مستعفی ہون دا کہن گے جدوں تک اوہ کلیئر نہیں ہو جاندے تے عمران خان چیف جسٹس اگے درخواست کرن گے کہ پنڈورا لیکس تے اک آزادانہ کمیشن بنان‘ جے آئی ٹی تشکیل دین تے اپنی نگرانی وچ الف توں ے تک تفتیش کران پر انج ہویا‘ نہ ہونا سی۔ ہن اک پاسے جدوں گل اپنیاں دی ہووے تے عمران خان دی اخلاقیات‘ اصول منطق غایب‘ گل مخالفین دی ہووے تے عمران خان اخلاقی بلندیاں تے‘ شہبازشریف نال نیب دے چیئرمین دی مشاورت نہیں کرنی‘ منطق ایہ کہ اوہ نیب دے ملزم‘ نیب دے ملزم نال نیب چیئرمین تقرری دی مشاورت کیوں کراں۔ ایہ وکھری گل عمران خان آپ وی نیب دے ملزم‘ پر بلاشبہ شہبازشریف نال مشاورت نہیں کرنی چاہیدی کیوں جے اوہ صرف خود نیب دے ملزم‘ اوہناں دے دوویں پتر‘ ٹبر نیب دے ملزم‘ اوہناں دے بھائی نیب دے مجرم ہو کے اشتہاری‘ اوہناں دے بھتریئے نیب دے مجرم‘ دوہاں بھراواں دے دوویں داماد نیب دے ملزم‘ ہن ایہ تے نہیں ہو سکدا کہ علاقے دے مجرماں‘ ملزماں توں پچھیا جاوے تہاڈے علاقے دا ایس ایچ او کہنوں لایا جاوے۔ ہن تے نہیں ہو سکدا کہ مجرماں‘ ملزماں توں پچھیا جاوے تہاڈے کیساں لئی جج کنہوں لائیے‘ شہبازشریف نال مشاورت نہیں ہونی چاہیدی سگوں میرا مننا ہن ویلا آ گیا اے اجہی قنون سازی کیتی جاوے کہ نیب چیئرمین‘ چیف الیکشن کمشنر‘ ڈی جی ایف آئی اے حکومت‘ اپوزیشن نہ لاوے سگوں سپریم کورٹ لاوے یاں اجیہا کمیشن‘ کمیٹی ایہ تقرریاں کرے جہدا سیاست نال کوئی تعلق نہ ہووے تے جو ڈائریکٹ یاں ان ڈائریکٹ ایہناں عہدیاں دے بینیفشری نہ ہون یاں ایہ محکمے اوہناں نوں کوئی فائدہ یاں نقصان نہ اپڑ ا سکن۔ آپ ملاحظہ کرو کہ پی پی تے مسلم لیگ نے رَل کے چیئرمین نیب لایا۔ ہن دوویں دھڑے ہتھ دھو کے چیئرمین نیب دے پچھے پئے ہوئے‘ تحریک انصاف نے اپوزیشن دے نال رَل کے چیف الیکشن کمشنر لایا‘ ہن تحریک انصاف چیف الیکشن کمشنر دے خلاف‘ وجہ کیہ‘ وجہ ایہ‘ سارے چاہن جہنوں اسیں لائیے اوہ ساڈی منے‘ اوہ ساڈا بن کے رہوے‘ ایہو وجہ اے اج ہر ادارہ تباہ و برباد‘ ایہ لمی کہانی‘ فیر سہی‘ جاندے جاندے فیر سن لوو‘ پنڈورا لیکس دی پیدا ہوندیاں ای موت ہو چکی‘ بس دفنانا باقی اے۔(بشکریہ روزنامہ جنگ)
