یورپ یاترا

ابرار ندیم

میرے بار بار کہن تے جدوں سہیل قمر مینوں محبت کرن والے جوڑیاں ولوں محبت دی نشانی دے طور تے لائے جان والے جندریاں دا پس منظر دس رہے سن تے اوہناں دے چھوٹے بھرا عدنان قمر نے میرے کن وچ سرگوشی کیتی کہ جے سہیل بھائی وی اپنیاں محبتاں دی نشانی لئی ایتھے جندرے لاندے تے ادھے توں ودھ جندرے تے اکلے سہیل صاحب دے ای ہونے سن۔ جہدے تے میں ہسدے ہوئے عدنان قمر نوں کہیا عدنان بھائی! سہیل قمر دا تے مینوں پتہ نہیں اوہناں نے اپنی محبت دی نشانی دے طور تے ہن تک کنے جندرے لائے ہون گے پر تسیں جنے شوخ تے شرارتی او ایہ گل طے اے کہ تسیں ہن تک ایتھے گھٹوگھٹ پندراں ویہہ جندرے تے ضرور لائے ہون گے انج وی ایہ تھاں تہاڈے گھر تے ممکنہ طور تے تہاڈے دل دے جنے نیڑے اے ممکن اے ایتھے آندے جاندے تسیں ہفتے دس دن بعد نہیں تے ہر نویں چن دے نال کوئی نہ کوئی نواں جندرا ضرور لا جاندے او سگو ںایہ وی ممکن اے اپنی ڈھیر مصروفیات پاروں ہن تسیں ایہناں جندریاں دا سرے توں کوئی تکلف ای نہ کردے ہوو۔ ایہ سن کے عدنان قمر نے باقاعدہ ہتھ جوڑدے ہوئے کہیا بابا جی! تسیں میرے ول او یاں سہیل بھائی ول؟ ایہدے تے میں عدنان قمر دے کن وچ سرگوشی کردے ہوئے کہیا عدنان بھائی! ایس اک ادھ دن وچ جدوں تک ساڈا قیام تہاڈے کول اے جے تسیں اک ادھ جندرا میرا وی لوا دیو تے میں ہور کسے شرط دے بناں تہاڈے ول آں‘ نہیں تے میری پہلی دوستی تے سہیل قمر دے نال ای اے۔جواب وچ عدنان قمر نے شوخی نال کہیا بزرگو! ماشاء اللہ تسیں عمر دے جس حصے وچ ہو ایہدے وچ ہن تسیں جندرے لان دا نہیں سگوں اللہ دے حضور توبہ استغفار کرکے عاقبت دے نال اپنیاں حرکتاں وی ٹھیک کرن دا سوچو۔ انج وی جس زمانے دے تسیں او اوس زمانے وچ جندرے نہیں پرانے فیشن دے وڈے وڈے جندرے ہوندے سن جہناں دا جرمنی سنے ہن پورے یورپ وچ کدھروں ملن دا سوال ای پیدا نہیں ہوندا ایس لئی میرے ولوں تسیں صاف جواب ای سمجھو بھاویں تسیں میرا ساتھ دیو یاں بھائی سہیل قمر دا۔ ایہدے تے اسیں تناں نے اپنے آل دوالے دی پرواہ کیتے بناں اکٹھے زور دار قہقہہ لایا جہدے تے اوتھے موجود مردوزن نے سانوں انج حیران ہو کے ویکھیا جیویں اسیں کسے پاگل خانے توں نسے ہوئے آں۔
ایہدے بعد اسیں کافی چِر تک اوتھے کھڑے آئوندے جاندے لوکاں دا نظارہ تے اوہناں تے دلچسپ تبصرے کردے رہے ایس دوران پتہ ای نہیں چلیا کہ کدوں دوپہر دے تقریباً ڈیڑھ وجے دا وقت ہو گیا۔ اسیں لوک کیوں جے کافی دور توں پیدل چلدے ہوئے نہر دے اوس پل تے اپڑے سی ایس لئی ہن تھکاوٹ دے نال چنگی بھلی بھکھ وی لگنی شروع ہو گئی سی جہدے تے عدنان قمر نے بطور میزبان سانوں اوتھوں واپس چل کے کسے ٹرکش ریستوران وچ مزیدار لنچ دی دعوت دتی بھاویں اک ویلے دی روٹی لئی اجہے خوبصورت ماحول نوں چھڈ کے اوتھوں جان نوں میرا دل نہیں سی چاہ رہیا پر نہ چاہندے ہوئے وی فیصلے دی ایس گھڑی وچ دل تے معدہ غالب آ گیا جہدے بعد سہیل قمر تے عدنان قمر دا تے مینوں پتہ نہیں پر اوتھوں واپسی تے میرے ذہن وچ نورجہاں دا ایہ گیت بار بار گونجدا رہیا سانوں نہر والے پل تے بلا کے تے خورے ماہی کتھے رہ گیا۔ واپسی تے سہیل قمر نے مینوں راہ وچ ڈھیر پرانی طرز دے تن چار مکان وکھاندے ہوئے دسیا کہ تریخی اعتبار نال ایہ مکان تقریباً چار پنج ہزار ورھے پرانے نیں جہناں نوں پوری دنیا توں خاص طور تے ویکھن لئی ایتھے آئوندے نیں جہدے تے مینوں حیرانی تے بڑی ہوئی پر ایس توں وی ودھ حیرانی میرے لئی ایہ سی کہ ایہناں مکاناں دے وچکار اینے لمے عرصے دے فرق دے باوجود صرف اک ادھ پلاٹ دا فاصلہ سی جہدے تے میں سہیل قمر توں پچھیا کہ ایہناں تریخی یاں پرانے مکاناں دے وچکار اینے زیادہ زمانیاں دے فرق دے باوجود صرف اک ادھ پلاٹ دا فرق کیوں اے۔ میرا سوال سی کہ اینے زمانے گزرن دے بعد ایہناں مکاناں دے آل دوالے یاں درمیانی پلاٹاں تے ہن تک کسے قبضہ گروپ نے کوئی مکان کیوں تعمیر نہیں کیتا۔ میرا گمان اے کہ ایس حوالے نال شاید اوتھوں دے گوریاں نے دنیا بھر دے سیاحواں نوں بے وقوف بنایا ہویا اے۔ میرا ایہ سوال اج وی موجود اے جے سہیل قمر یاں کوئی قاری میرے ایس سوال دا تسلی بخش جواب دے سکے تے فیر ای میرا شک دور ہو سکدا اے۔٭٭