چوہدری اندریاس بھٹی دیاں تعلیمی تے انتظامی کوششاں

شکیل امجد صادق

انسان دی پہلی درس گاہ ماں دی جھولی اے تے فیر ماں اپنے لخت جگر نوں استاد دے حوالے کر دیندی اے۔ اوس ویلے اوہ اک بے قیمت پتھر وانگوں ہوندا اے جہنوں استاد تراش کے ہیرا بنا دیندا اے۔ ماں باپ بچے نوں زمین وچ قدم قدم چلنا سکھاندے نیں تے استاد اوہنوں دنیا وچ اگے ودھن دا ہنر دیندا اے۔ ماں باپ اپنے جگر دے ٹکڑے نوں اٹھن بیٹھن دا سلیقہ سکھاندے نیں پر استاد اوہ عظیم ہستی اے جو اوہنوں انسان بنا دیندا اے تے بندے نوں حیوانیت چوں کڈھ کے انسانیت دے گُر بارے واقف کراندا اے۔ استاد ای اوہ شخصیت اے جو تعلیم و تربیت دا محور و منبع ہوندا اے۔ ترقی یافتہ قوماں تے مہذب معاشریاں وچ استاد نوں اک خاص مقام تے نمایاں حیثیت حاصل ہوندی اے کیوں جے مہذب‘ پرامن تے باشعور معاشرے تے دی تشکیل اک استاد دے ای مرہون منت اے۔
تریخ گواہ اے کہ جس قوم نے وی استاد دی قدر کیتی اوہ دنیا بھر وچ سرفراز ہوئی۔ امریکہ‘ برطانیہ‘ جاپان‘ فرانس‘ ملائیشیا تے اٹلی سنے سارے ترقی یافتہ ملکاں وچ استاد نوں جو عزت تے مقام و مرتبہ حاصل اے اوہ اوہناں ملکاں دے صدراں تے وزرائے اعظم نوں وی نہیں دتا جاندا کیوں جے اوہ جان دے نیں کہ استاد مینارہ نور اے جو انھیرے وچ سانوں راہ وکھاندا اے۔ اک پوڑھی اے جو سانوں اچائی تے اپڑا دیندی اے۔ اک انمول تحفہ اے جہدے بناں انسان ادھورا اے۔ اسلامی تریخ دے سب توں وڈے خلیفہ حضرت عمر فاروقؓ ہوراں توں اک واری کسے نے پچھیا کہ اینی وڈی اسلامی مملکت دے خلیفہ ہون دے باوجود تہاڈے دل وچ کوئی حسرت باقی اے؟ تے آپ نے فرمایا کہ کاش میں اک معلم ہوندا۔
استاد دی عظمت و اہمیت تے معاشرے وچ اوہدے کردا رتے علامہ ڈاکٹر محمد اقبال کہندے نیں کہ استاد اصل وچ قوم دے محافظ نیں کیوں جے اگلیاں نسلاں نوں سنوارنا تے اوہناں نوں ملک دی خدمت دے قابل بنانا اوہناں دے حوالے اے۔ علامہ اقبال دے ایہ الفاظ استاد دی عظمت و اہمیت دے عکاس نیں۔ استاد دا فرض سارے فرضاں توں ودھ اوکھا تے اہم اے کیوں جے ساری قسم دی اخلاقی‘ تمدنی تے مذہبی نیکیاں دا کلید اوہدے ہتھ وچ اے تے ہر قسم دی ترقی دا سرچشمہ اوہدی محنت اے۔
چوہدری اندریاس بھٹی اک کامیاب استاد ہون دے نال نال اک کہنہ مشق منتظم وی نیں۔ آپ 24مئی 1965ء نوں سیالکوٹ دے اک پنڈ ڈسکہ روڈ مترانوالی وچ پیدا ہوئے۔ والدین نے ہجرت کیتی تے اوکاڑہ آ وسے۔ آپ نے میٹرک 1983ء وچ گورنمنٹ ہائی سکول ملٹری فارم توں کرن دے بعد گورنمنٹ کالج اوکاڑہ توں انٹر تے بی اے دی تعلیم حاصل کیتی۔ آپ نے ایف سی کالج لہور توں ایم اے انگلش‘ گورنمنٹ کالج آف ایجوکیشن لوئرمال لہور توں بی ایڈ تے علامہ اقبال اوپن یونیورسٹی اسلام آباد توں ایم ایڈ دیاں ڈگریاں حاصل کیتیاں۔ آپ نے سری لنکا دی کینڈی یونیورسٹی توں ایم فل انگلش دی ڈگری حاصل کیتی۔ ایہدے بعد بطور ماہر مضمون آپ دا پہلا تقرر گورنمنٹ ہائر سکینڈری سکول نورشاہ ضلع ساہیوال ہویا۔ آپ وکھووکھ سکولاں دے ہیڈماسٹر‘ سینئر ہیڈماسٹر تے پرنسپل دے عہدیاں تے تعینات رہے تے اپنی پیشہ ورانہ صلاحیتاں نوں ورت کے اداریاں دی بہتری لئی دن رات کوشاں رہے۔ ایہناں پیشہ ورانہ صلاحیتاں دی بنیاد تے آپ نوں اپریل 2020ء وچ ڈسٹرکٹ ایجوکیشن آفیسر مردانہ ضلع اوکاڑہ دی ذمہ داری دتی گئی۔ آپ نے اپنی انتظامی صلاحیتاں نوں نویں سروے توں مجتمع کیتا تے تعلیمی ترقی لئی دن رات کوشاں رہے۔ قسمت نے اک واری فیر یاوری کیتی تے 21جون 2021 نوں سی ای او ایجوکیشن ضلع اوکاڑہ دی تعیناتی دا پروانہ جاری ہو گیا۔ آپ نے چارج سانبھدیاں ای محکمہ تعلیم دی بہتری لئی لک بنھ گیا۔ آپ دی تعیناتی توں پہلاں ضلع اوکاڑہ تعلیمی رینکنگ دے لحاظ نال 25ویں نمبر تے سی جو ہن تن مہینے دے اندر اٹھویں نمبر تے اے۔ آپ نے سروس دوران فوت ہون والے استاداں دے پینڈنگ کیساں نوں پہلی بنیاداں تے حل کیتا تے کوئی کیس باقی نہ چھڈیا۔ آپ نے اوہناں دے وارثاں دے نال حسن سلوک دی نویں مثال قائم کیتی تے اوہناں دے چیک اوہناں دے گھراں تے اپڑائے۔ آپ نے نویں بچیاں دی انرولمنٹ دا کم 80فیصد مکمل کر لیا اے تے باقی تے کم جاری اے۔ انصاف سکولاں دے سلسلے وچ آپ نے 296 سکولز فنکشنل کیتے تے اٹھ ہزار دے نیڑے طلباء داخل کیتے۔ جدوں آپ آئے تے پی ایم پورٹل تے 2300 دے نیڑے شکایتاں سن جو آپ نے فوراً حل کیتیاں تے استاداں دی دادرسی دے نال نال مسئلیا ںنوں وی حل کیتا۔ ایہدے نال نال آپ نے سی ایم پورٹل تے ملن والیاں شکایتاں نوں وی چنگے طریقے نال نبیڑیا۔ آپ نے سارے سکولاں تے تعلیمی دفتراں وچ ایس او پیز دی پابندی نو ںاپنا قومی شعار بنوایا۔ استاداں دی اے سی آر دے سلسلے وچ پورے نظام نوں بہتر کیتا تے یقینی بنایا۔ استاداں دی پروموشن دے سلسلے وچ ڈی پی سی نوں یقینی بنایا تے ہر ڈی پی سی وچ چار سو توں ودھ استاداں دی پروموشناں نوں یقینی بنایا۔ کلین تے گرین پاکستان دے نعرے دا بھرپور تحفظ کیتا تے ایس تحریک تے بھرواں عمل کرایا۔ ایس ویلے آپ دے زیرسایہ وکھووکھ قسم دیاں سولاں تعلیمی سکیماں جاری نیں جہناں دی نگہداشت وچ آپ کوئی کسر باقی نہیں چھڈ رہے۔ آپ اپنے زیرسایہ سارے دفتراں دی رپورٹ روزانہ دی بنیاد تے لیندے نیں تے کسے سائل دا کوئی کم کل تے نہیں چھڈدے۔ ایس ویلے آپ پورے ضلع وچ تن لکھ ستر ہزار چھ سو پنج بچے داخل کر چکے نیں تے پڑھے لکھے پنجاب وچ اپنا بھرواں کردار ادا کر رہے نیں۔ آپ حکومت ولوں آن والے سارے مراسلات دا جواب ویلے سر دیندے نیں تے دوجی جدید معلومات تے طریقہ ہائے تدریس لاگو کرن وچ سب توں اگے ہوندے نیں۔ آپ اک فرض شناس‘ محب وطن‘ ذمہ دار تے اعلیٰ انتظامی صلاحیتاں نال بھرپور انسان نیں۔ آپ دا شمار اوہناں لوکاں وچ کیتا جاندا اے جو پیشے‘ اپنی قوم‘ اپنے ملک تے اپنے عہدے نال ڈھیر مخلص نیں۔ دعا اے کہ اللہ تعالیٰ آپ نوں ملک و قوم دی خدمت دی توفیق عطا کیتی رکھے تے تعلیمی بہتری وچ اپنے حصے دی شمع جلان وچ تیز ہواواں وچ وی اپنے پیراں تے کھڑے رہن۔٭٭